| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
அஸாதா⁴ரணபாராஜிகங்
Asādhāraṇapārājikaṃ
5. உப்³ப⁴ஜாணுமண்ட³லிகாஸிக்கா²பத³வண்ணனா
5. Ubbhajāṇumaṇḍalikāsikkhāpadavaṇṇanā
அஸாதா⁴ரணேஸு பன சதுன்னங் தாவ பாராஜிகானங் பட²மே அவஸ்ஸுதாதி காயஸங்ஸக்³க³ராகே³ன திந்தா, கிலின்னாதி அத்தோ². து³தியபதே³பி ஏஸேவ நயோ. புரிஸபுக்³க³லஸ்ஸாதி காயஸங்ஸக்³க³ங் ஸமாபஜ்ஜிதுங் விஞ்ஞுஸ்ஸ மனுஸ்ஸஜாதிகஸ்ஸ புரிஸஸங்கா²தஸ்ஸ புக்³க³லஸ்ஸ. அத⁴க்க²கந்தி அத்தனோ அக்க²கானங் அதோ⁴. உப்³ப⁴ஜாணுமண்ட³லந்தி ஜாணுமண்ட³லானங் உபரி, எத்த² ச உப்³ப⁴கப்பரம்பி உப்³ப⁴ஜாணுமண்ட³லேனேவ ஸங்க³ஹிதங். ஆமஸனந்தி ஆமஜ்ஜனங் பு²ட்டோ²காஸங் அனதிக்கமித்வா தத்தே²வ ஸங்க⁴ட்டனங். பராமஸனந்தி இதோ சிதோ ச ஸஞ்சரணங். க³ஹணந்தி க³ஹிதமத்தங். சு²பனந்தி அஸங்க⁴ட்டெத்வா பு²ட்ட²மத்தங். படிபீளனந்தி அங்கே³ க³ஹெத்வா நிப்பீளனங். ஸாதி³யெய்யாதி யா பி⁴க்கு²னீ அத்தனோ யதா²பரிச்சி²ன்னே காயே புரிஸஸ்ஸ ஏதங் ஆமஸனாதி³ங் ஸாதி³யதி, ஸயங் வா பன தேன காயேன புரிஸஸ்ஸ யங்கிஞ்சி காயப்பதே³ஸங் ஸாத³யமானா சு²பதி, அயங் உப்³ப⁴ஜாணுமண்ட³லிகா நாம பாராஜிகாதி அயமெத்த² ஸங்கே²போ.
Asādhāraṇesu pana catunnaṃ tāva pārājikānaṃ paṭhame avassutāti kāyasaṃsaggarāgena tintā, kilinnāti attho. Dutiyapadepi eseva nayo. Purisapuggalassāti kāyasaṃsaggaṃ samāpajjituṃ viññussa manussajātikassa purisasaṅkhātassa puggalassa. Adhakkhakanti attano akkhakānaṃ adho. Ubbhajāṇumaṇḍalanti jāṇumaṇḍalānaṃ upari, ettha ca ubbhakapparampi ubbhajāṇumaṇḍaleneva saṅgahitaṃ. Āmasananti āmajjanaṃ phuṭṭhokāsaṃ anatikkamitvā tattheva saṅghaṭṭanaṃ. Parāmasananti ito cito ca sañcaraṇaṃ. Gahaṇanti gahitamattaṃ. Chupananti asaṅghaṭṭetvā phuṭṭhamattaṃ. Paṭipīḷananti aṅge gahetvā nippīḷanaṃ. Sādiyeyyāti yā bhikkhunī attano yathāparicchinne kāye purisassa etaṃ āmasanādiṃ sādiyati, sayaṃ vā pana tena kāyena purisassa yaṃkiñci kāyappadesaṃ sādayamānā chupati, ayaṃ ubbhajāṇumaṇḍalikā nāma pārājikāti ayamettha saṅkhepo.
‘‘நிதா³னங் புக்³க³லங் வத்து²’’ந்திஆதி³கே (கங்கா²॰ அட்ட²॰ பட²மபாராஜிகவண்ணனா) தேன வித்தா²ரவினிச்ச²யே யஸ்மா ஸப்³பா³னேவ அஸாதா⁴ரணபஞ்ஞத்தியோ ஹொந்தி, தஸ்மா இதோ பட்டா²ய ஸந்திங் அனுபஞ்ஞத்திங் வத்வா ஸாதா⁴ரணபஞ்ஞத்தீதி வா அஸாதா⁴ரணபஞ்ஞத்தீதி வா ந வக்கா²ம, ஆணத்தியங் யத்த² ஆணத்தி நத்தி², தத்த² கிஞ்சி அவத்வா யத்த² அத்தி², தத்தே²வ வக்கா²ம, விபத்திவிசாரணா வுத்தாயேவ.
‘‘Nidānaṃ puggalaṃ vatthu’’ntiādike (kaṅkhā. aṭṭha. paṭhamapārājikavaṇṇanā) tena vitthāravinicchaye yasmā sabbāneva asādhāraṇapaññattiyo honti, tasmā ito paṭṭhāya santiṃ anupaññattiṃ vatvā sādhāraṇapaññattīti vā asādhāraṇapaññattīti vā na vakkhāma, āṇattiyaṃ yattha āṇatti natthi, tattha kiñci avatvā yattha atthi, tattheva vakkhāma, vipattivicāraṇā vuttāyeva.
அவஸேஸங் பன ஸப்³ப³த்த² வத்தப்³ப³ங், தயித³ங் வுச்சதி, இத³ங் தாவ ஸிக்கா²பத³ங் ஸாவத்தி²யங் ஸுந்த³ரீனந்த³ங் ஆரப்³ப⁴ காயஸங்ஸக்³க³ங் ஸமாபஜ்ஜனவத்து²ஸ்மிங் பஞ்ஞத்தங், ஏகதோஅவஸ்ஸுதே யதா²பரிச்சி²ன்னேன காயேன புரிஸஸ்ஸ காயங், உப⁴தோஅவஸ்ஸுதேபி காயேன காயப்படிப³த்³த⁴ங், யதா²பரிச்சி²ன்னகாயப்படிப³த்³தே⁴ன வா அவஸேஸகாயேன வா தஸ்ஸ காயங் ஆமஸந்தியா து²ல்லச்சயங், யக்க²பேதபண்ட³கதிரச்சா²னக³தமனுஸ்ஸவிக்³க³ஹானங் உப⁴தோஅவஸ்ஸுதே யதா²பரிச்சி²ன்னேன காயேன காயங் ஆமஸந்தியாபி து²ல்லச்சயங், ஸசே பன புரிஸஸ்ஸ காயஸங்ஸக்³க³ராகோ³ நத்தி², பாராஜிகக்கெ²த்தேபி து²ல்லச்சயமேவ. அவஸேஸே பன காயப்படிப³த்³தே⁴ன காயப்படிப³த்³தா⁴தி³பே⁴தே³, மேது²னராக³கே³ஹஸிதபேமேஸு ச ஸப்³ப³த்த² து³க்கடங். அஸஞ்சிச்ச, அஸ்ஸதியா, அஜானந்தியா, அஸாதி³யந்தியா , உம்மத்திகாதீ³னஞ்ச அனாபத்தி. அங்கா³னி ஸமுட்டா²னாதீ³னி ச பி⁴க்கு²பாதிமொக்கே² காயஸங்ஸக்³கே³ வுத்தனயேனேவ வேதி³தப்³பா³னீதி.
Avasesaṃ pana sabbattha vattabbaṃ, tayidaṃ vuccati, idaṃ tāva sikkhāpadaṃ sāvatthiyaṃ sundarīnandaṃ ārabbha kāyasaṃsaggaṃ samāpajjanavatthusmiṃ paññattaṃ, ekatoavassute yathāparicchinnena kāyena purisassa kāyaṃ, ubhatoavassutepi kāyena kāyappaṭibaddhaṃ, yathāparicchinnakāyappaṭibaddhena vā avasesakāyena vā tassa kāyaṃ āmasantiyā thullaccayaṃ, yakkhapetapaṇḍakatiracchānagatamanussaviggahānaṃ ubhatoavassute yathāparicchinnena kāyena kāyaṃ āmasantiyāpi thullaccayaṃ, sace pana purisassa kāyasaṃsaggarāgo natthi, pārājikakkhettepi thullaccayameva. Avasese pana kāyappaṭibaddhena kāyappaṭibaddhādibhede, methunarāgagehasitapemesu ca sabbattha dukkaṭaṃ. Asañcicca, assatiyā, ajānantiyā, asādiyantiyā , ummattikādīnañca anāpatti. Aṅgāni samuṭṭhānādīni ca bhikkhupātimokkhe kāyasaṃsagge vuttanayeneva veditabbānīti.
உப்³ப⁴ஜாணுமண்ட³லிகாஸிக்கா²பத³வண்ணனா நிட்டி²தா.
Ubbhajāṇumaṇḍalikāsikkhāpadavaṇṇanā niṭṭhitā.
6. வஜ்ஜப்படிச்சா²தி³காஸிக்கா²பத³வண்ணனா
6. Vajjappaṭicchādikāsikkhāpadavaṇṇanā
து³தியே க³ணஸ்ஸாதி அஞ்ஞாஸங் பி⁴க்கு²னீனங். டி²தாதி ஸலிங்கே³ டி²தா. சுதாதி காலங்கதா. நாஸிதாதி லிங்க³னாஸனாய ஸயங் வா நட்டா², அஞ்ஞேஹி வா நாஸிதா. அவஸ்ஸடாதி தித்தா²யதனங் ஸங்கந்தா. புப்³பே³வாஹங் அய்யே அஞ்ஞாஸிந்தி இத³ங் தஸ்ஸா வசனகாலத³ஸ்ஸனங், ஸலிங்கே³ டி²தாய பன பாராஜிகபா⁴வங் ஞத்வா ‘‘ந தா³னி நங் கஸ்ஸசி ஆரோசெஸ்ஸாமீ’’தி து⁴ரே நிக்கி²த்தமத்தேயேவ அயங் வஜ்ஜப்படிச்சா²தி³கா நாம பாராஜிகா ஹோதீதி.
Dutiye gaṇassāti aññāsaṃ bhikkhunīnaṃ. Ṭhitāti saliṅge ṭhitā. Cutāti kālaṅkatā. Nāsitāti liṅganāsanāya sayaṃ vā naṭṭhā, aññehi vā nāsitā. Avassaṭāti titthāyatanaṃ saṅkantā. Pubbevāhaṃ ayye aññāsinti idaṃ tassā vacanakāladassanaṃ, saliṅge ṭhitāya pana pārājikabhāvaṃ ñatvā ‘‘na dāni naṃ kassaci ārocessāmī’’ti dhure nikkhittamatteyeva ayaṃ vajjappaṭicchādikā nāma pārājikā hotīti.
ஸாவத்தி²யங் து²ல்லனந்த³ங் ஆரப்³ப⁴ நேவஅத்தனாபடிசோத³னா நக³ணஸ்ஸ ஆரோசனவத்து²ஸ்மிங் பஞ்ஞத்தங், ஸேஸமெத்த² ஸப்பாணகவக்³க³ம்ஹி து³ட்டு²ல்லாபத்திப்படிச்சா²த³னஸிக்கா²பதே³ வுத்தனயேனேவ வேதி³தப்³ப³ங். தத்ர ஹி பாசித்தியங், இத⁴ பாராஜிகந்தி அயமேவ விஸேஸோ, ஸேஸங் தாதி³ஸமேவாதி.
Sāvatthiyaṃ thullanandaṃ ārabbha nevaattanāpaṭicodanā nagaṇassa ārocanavatthusmiṃ paññattaṃ, sesamettha sappāṇakavaggamhi duṭṭhullāpattippaṭicchādanasikkhāpade vuttanayeneva veditabbaṃ. Tatra hi pācittiyaṃ, idha pārājikanti ayameva viseso, sesaṃ tādisamevāti.
வஜ்ஜப்படிச்சா²தி³காஸிக்கா²பத³வண்ணனா நிட்டி²தா.
Vajjappaṭicchādikāsikkhāpadavaṇṇanā niṭṭhitā.
7. உக்கி²த்தானுவத்திகாஸிக்கா²பத³வண்ணனா
7. Ukkhittānuvattikāsikkhāpadavaṇṇanā
ததியே உக்கி²த்தந்தி ஆபத்தியா அத³ஸ்ஸனாதீ³ஸு உக்கி²த்தங். த⁴ம்மேனாதி பூ⁴தேன வத்து²னா. வினயேனாதி சோதெ³த்வா ஸாரெத்வா. ஸத்து²ஸாஸனேனாதி இதா⁴பி சோதெ³த்வா ஸாரெத்வா கரணமேவ ஸத்து²ஸாஸனங் நாம. அனாத³ரந்தி யேன ஸங்கே⁴ன உக்கே²பனியகம்மங் கதங், தஸ்மிங் வா, தத்த² பரியாபன்னக³ணே வா ஏகபுக்³க³லே வா தஸ்மிங் வா கம்மே ஆத³ரவிரஹிதங், ஸம்மாவத்தனாய அவத்தமானந்தி அத்தோ². அப்படிகாரந்தி படிகாரரஹிதங், அனோஸாரிதந்தி அத்தோ². அகதஸஹாயந்தி ஏககம்மாதி³கே ஸங்வாஸே ஸஹ அயனபா⁴வேன ஸமானஸங்வாஸகா பி⁴க்கூ² ஸஹாயா நாம, யஸ்ஸ பன ஸோ ஸங்வாஸோ தேஹி ஸத்³தி⁴ங் நத்தி² ந தேன தே ஸஹாயா கதா ஹொந்தி , இதி ஸோ அகதஸஹாயோ நாம, தங் அகதஸஹாயங், ஸமானஸங்வாஸகபா⁴வங் அனுபக³தந்தி அத்தோ². தமனுவத்தெய்யாதி தங் உக்கி²த்தகங் உக்கி²த்தகபா⁴வேயேவ டி²தங் பி⁴க்கு²ங் யா பி⁴க்கு²னீ யங்தி³ட்டி²கோ ஸோ ஹோதி, தாய தி³ட்டி²யா க³ஹணபா⁴வேன அனுவத்தெய்ய. ஸா பி⁴க்கு²னீ பி⁴க்கு²னீஹி ஸங்க⁴பே⁴த³ஸிக்கா²பதா³தீ³ஸு வுத்தனயேன விஸுங் ஸங்க⁴மஜ்ஜே² ச வுச்சமானா தங் வத்து²ங் அப்படினிஸ்ஸஜ்ஜந்தீ ஸமனுபா⁴ஸனகம்மபரியோஸானே உக்கி²த்தானுவத்திகா நாம பாராஜிகா ஹோதீதி.
Tatiye ukkhittanti āpattiyā adassanādīsu ukkhittaṃ. Dhammenāti bhūtena vatthunā. Vinayenāti codetvā sāretvā. Satthusāsanenāti idhāpi codetvā sāretvā karaṇameva satthusāsanaṃ nāma. Anādaranti yena saṅghena ukkhepaniyakammaṃ kataṃ, tasmiṃ vā, tattha pariyāpannagaṇe vā ekapuggale vā tasmiṃ vā kamme ādaravirahitaṃ, sammāvattanāya avattamānanti attho. Appaṭikāranti paṭikārarahitaṃ, anosāritanti attho. Akatasahāyanti ekakammādike saṃvāse saha ayanabhāvena samānasaṃvāsakā bhikkhū sahāyā nāma, yassa pana so saṃvāso tehi saddhiṃ natthi na tena te sahāyā katā honti , iti so akatasahāyo nāma, taṃ akatasahāyaṃ, samānasaṃvāsakabhāvaṃ anupagatanti attho. Tamanuvatteyyāti taṃ ukkhittakaṃ ukkhittakabhāveyeva ṭhitaṃ bhikkhuṃ yā bhikkhunī yaṃdiṭṭhiko so hoti, tāya diṭṭhiyā gahaṇabhāvena anuvatteyya. Sā bhikkhunī bhikkhunīhi saṅghabhedasikkhāpadādīsu vuttanayena visuṃ saṅghamajjhe ca vuccamānā taṃ vatthuṃ appaṭinissajjantī samanubhāsanakammapariyosāne ukkhittānuvattikā nāma pārājikā hotīti.
ஸாவத்தி²யங் து²ல்லனந்த³ங் ஆரப்³ப⁴ உக்கி²த்தானுவத்தனவத்து²ஸ்மிங் பஞ்ஞத்தங், ஞத்தியா து³க்கடங், த்³வீஹி கம்மவாசாஹி த்³வே து²ல்லச்சயா, ‘‘யஸ்ஸா நக்க²மதி, ஸா பா⁴ஸெய்யா’’தி ஏவங் ய்ய-காரப்பத்தாய ததியகம்மவாசாய பாராஜிகங், அத⁴ம்மகம்மே திகது³க்கடங், ஸேஸங் ஸங்க⁴பே⁴த³ஸிக்கா²பதா³தீ³ஸு வுத்தனயேனேவ வேதி³தப்³ப³ங்.
Sāvatthiyaṃ thullanandaṃ ārabbha ukkhittānuvattanavatthusmiṃ paññattaṃ, ñattiyā dukkaṭaṃ, dvīhi kammavācāhi dve thullaccayā, ‘‘yassā nakkhamati, sā bhāseyyā’’ti evaṃ yya-kārappattāya tatiyakammavācāya pārājikaṃ, adhammakamme tikadukkaṭaṃ, sesaṃ saṅghabhedasikkhāpadādīsu vuttanayeneva veditabbaṃ.
உக்கி²த்தானுவத்திகாஸிக்கா²பத³வண்ணனா நிட்டி²தா.
Ukkhittānuvattikāsikkhāpadavaṇṇanā niṭṭhitā.
8. அட்ட²வத்து²காஸிக்கா²பத³வண்ணனா
8. Aṭṭhavatthukāsikkhāpadavaṇṇanā
சதுத்தே² அவஸ்ஸுதாதி லோகஸ்ஸாத³மித்தஸந்த²வவஸேன காயஸங்ஸக்³க³ராகே³ன திந்தா. அயமேவ ஹி அத்தோ² ஸீஹளமாதிகாட்ட²கதா²யங் வுத்தோ, ஸமந்தபாஸாதி³காயங் (பாசி॰ அட்ட²॰ 675) பனஸ்ஸ விசாரணா கதா, து³தியபதே³பி ஏஸேவ நயோ. புரிஸபுக்³க³லஸ்ஸ ஹத்த²க்³க³ஹணங் வாதிஆதீ³ஸு பன யங் புரிஸபுக்³க³லேன ஹத்தே² க³ஹணங் கதங், தங் ‘‘புரிஸபுக்³க³லஸ்ஸ ஹத்த²க்³க³ஹண’’ந்தி வுத்தங், ஏஸேவ நயோ ஸங்கா⁴டிகண்ணக்³க³ஹணேபி. ஹத்த²க்³க³ஹணந்தி எத்த² ச யஸ்ஸ கஸ்ஸசி அபாராஜிகக்கெ²த்தபூ⁴தஸ்ஸ அங்க³ஸ்ஸ க³ஹணங் ஹத்த²க்³க³ஹணங், யஸ்ஸ கஸ்ஸசி நிவத்த²ஸ்ஸ வா பாருதஸ்ஸ வா க³ஹணங் ஸங்கா⁴டிகண்ணக்³க³ஹணங். ஸந்திட்டெ²ய்ய வாதிஆதீ³ஸு காயஸங்ஸக்³க³ஸங்கா²தஸ்ஸ அஸத்³த⁴ம்மஸ்ஸ படிஸேவனத்தா²ய புரிஸஸ்ஸ ஹத்த²பாஸே ஸந்திட்டெ²ய்ய வா, தத்த² டி²தா ஸல்லபெய்ய வா, புரிஸேன வா ‘‘இத்த²ன்னாமங் டா²னங் ஆக³ச்சா²’’தி வுத்தா தங் ஸங்கேதங் க³ச்செ²ய்ய, தஸ்ஸ வா புரிஸஸ்ஸ அப்³பா⁴க³மனங் ஸாதி³யெய்ய, யேன கேனசி வா படிச்ச²ன்னங் ஓகாஸங் பவிஸெய்ய, புரிஸஸ்ஸ ஹத்த²பாஸே ட²த்வா காயங் உபஸங்ஹரெய்யாதி ஏவமத்தோ² த³ட்ட²ப்³போ³. அயம்பி பாராஜிகாதி யதா² புரிமாயோ, ஏவங் அயம்பி பி⁴க்கு²னீ ஏதஸ்ஸ காயஸங்ஸக்³க³ஸங்கா²தஸ்ஸ அஸத்³த⁴ம்மஸ்ஸ படிஸேவனத்தா²ய ஏதானி அட்ட² வத்தூ²னி படிபாடியா வா உப்படிபாடியா வா பூரெத்வா அட்ட²வத்து²கா நாம பாராஜிகா ஹோதீதி.
Catutthe avassutāti lokassādamittasanthavavasena kāyasaṃsaggarāgena tintā. Ayameva hi attho sīhaḷamātikāṭṭhakathāyaṃ vutto, samantapāsādikāyaṃ (pāci. aṭṭha. 675) panassa vicāraṇā katā, dutiyapadepi eseva nayo. Purisapuggalassa hatthaggahaṇaṃ vātiādīsu pana yaṃ purisapuggalena hatthe gahaṇaṃ kataṃ, taṃ ‘‘purisapuggalassa hatthaggahaṇa’’nti vuttaṃ, eseva nayo saṅghāṭikaṇṇaggahaṇepi. Hatthaggahaṇanti ettha ca yassa kassaci apārājikakkhettabhūtassa aṅgassa gahaṇaṃ hatthaggahaṇaṃ, yassa kassaci nivatthassa vā pārutassa vā gahaṇaṃ saṅghāṭikaṇṇaggahaṇaṃ. Santiṭṭheyya vātiādīsu kāyasaṃsaggasaṅkhātassa asaddhammassa paṭisevanatthāya purisassa hatthapāse santiṭṭheyya vā, tattha ṭhitā sallapeyya vā, purisena vā ‘‘itthannāmaṃ ṭhānaṃ āgacchā’’ti vuttā taṃ saṅketaṃ gaccheyya, tassa vā purisassa abbhāgamanaṃ sādiyeyya, yena kenaci vā paṭicchannaṃ okāsaṃ paviseyya, purisassa hatthapāse ṭhatvā kāyaṃ upasaṃhareyyāti evamattho daṭṭhabbo. Ayampi pārājikāti yathā purimāyo, evaṃ ayampi bhikkhunī etassa kāyasaṃsaggasaṅkhātassa asaddhammassa paṭisevanatthāya etāni aṭṭha vatthūni paṭipāṭiyā vā uppaṭipāṭiyā vā pūretvā aṭṭhavatthukā nāma pārājikā hotīti.
ஸாவத்தி²யங் ச²ப்³ப³க்³கி³யா பி⁴க்கு²னியோ ஆரப்³ப⁴ அட்ட²மங் வத்து²ங் பரிபூரணவத்து²ஸ்மிங் பஞ்ஞத்தங், ஸங்கேதக³மனே பதே³ பதே³ து³க்கடங், புரிஸஸ்ஸ ஹத்த²பாஸங் ஓக்கந்தமத்தே து²ல்லச்சயங், புரிஸஸ்ஸ அப்³பா⁴க³மனஸாத³யமானேபி து³க்கடங். ஹத்த²பாஸோக்கமனே து²ல்லச்சயங், ஸேஸேஸு ஏகேகஸ்மிங் து²ல்லச்சயமேவ, அட்ட²மே பரிபுண்ணே பாராஜிகங். ஏகேகஸ்மிங் பன வத்து²ஸ்மிங் ஸதக்க²த்தும்பி வீதிக்கந்தே தா ஆபத்தியோ தே³ஸெத்வா முச்சதி, அபிசெத்த² க³ணனூபிகா ஆபத்தி வேதி³தப்³பா³, ‘‘இதா³னி நாபஜ்ஜிஸ்ஸாமீ’’தி ஹி து⁴ரனிக்கே²பங் கத்வா தே³ஸிதா க³ணனூபிகா, தே³ஸிதக³ணனங் உபேதி, பாராஜிகஸ்ஸ அங்க³ங் ந ஹோதி. தஸ்மா யா ஏகங் ஆபன்னா து⁴ரனிக்கே²பங் கத்வா தே³ஸெத்வா புன கிலேஸவஸேன ஆபஜ்ஜதி, புனபி தே³ஸேதி, ஏவங் அட்ட²மங் பரிபூரெந்தீபி பாராஜிகா ந ஹோதி. யா பன ஆபஜ்ஜித்வா ‘‘புனபி அஞ்ஞங் வத்து²ங் ஆபஜ்ஜிஸ்ஸாமீ’’தி ஸஉஸ்ஸாஹாவ தே³ஸேதி, தஸ்ஸா ஸா ஆபத்தி அக³ணனூபிகா, தே³ஸிதாபி அதே³ஸிதா ஹோதி, பாராஜிகஸ்ஸ அங்க³ங் ஹோதி. அஸஞ்சிச்ச, அஸ்ஸதியா, அஜானந்தியா அஸாதி³யந்தியா, உம்மத்திகாதீ³னஞ்ச அனாபத்தி. காயஸங்ஸக்³க³ராகோ³, ஸஉஸ்ஸாஹதா, அட்ட²மஸ்ஸ வத்து²ஸ்ஸ பூரணந்தி இமானெத்த² தீணி அங்கா³னி. ஸமனுபா⁴ஸனஸமுட்டா²னங், கிரியாகிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், த்³விவேத³னந்தி.
Sāvatthiyaṃ chabbaggiyā bhikkhuniyo ārabbha aṭṭhamaṃ vatthuṃ paripūraṇavatthusmiṃ paññattaṃ, saṅketagamane pade pade dukkaṭaṃ, purisassa hatthapāsaṃ okkantamatte thullaccayaṃ, purisassa abbhāgamanasādayamānepi dukkaṭaṃ. Hatthapāsokkamane thullaccayaṃ, sesesu ekekasmiṃ thullaccayameva, aṭṭhame paripuṇṇe pārājikaṃ. Ekekasmiṃ pana vatthusmiṃ satakkhattumpi vītikkante tā āpattiyo desetvā muccati, apicettha gaṇanūpikā āpatti veditabbā, ‘‘idāni nāpajjissāmī’’ti hi dhuranikkhepaṃ katvā desitā gaṇanūpikā, desitagaṇanaṃ upeti, pārājikassa aṅgaṃ na hoti. Tasmā yā ekaṃ āpannā dhuranikkhepaṃ katvā desetvā puna kilesavasena āpajjati, punapi deseti, evaṃ aṭṭhamaṃ paripūrentīpi pārājikā na hoti. Yā pana āpajjitvā ‘‘punapi aññaṃ vatthuṃ āpajjissāmī’’ti saussāhāva deseti, tassā sā āpatti agaṇanūpikā, desitāpi adesitā hoti, pārājikassa aṅgaṃ hoti. Asañcicca, assatiyā, ajānantiyā asādiyantiyā, ummattikādīnañca anāpatti. Kāyasaṃsaggarāgo, saussāhatā, aṭṭhamassa vatthussa pūraṇanti imānettha tīṇi aṅgāni. Samanubhāsanasamuṭṭhānaṃ, kiriyākiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dvivedananti.
அட்ட²வத்து²காஸிக்கா²பத³வண்ணனா நிட்டி²தா.
Aṭṭhavatthukāsikkhāpadavaṇṇanā niṭṭhitā.
உத்³தி³ட்டா² கோ² அய்யாயோ அட்ட² பாராஜிகா த⁴ம்மாதி பி⁴க்கூ² ஆரப்³ப⁴ பஞ்ஞத்தா ஸாதா⁴ரணா சத்தாரோ, இமே சத்தாரோதி ஏவங் பாதிமொக்கு²த்³தே³ஸமக்³கே³ன அட்ட² பாராஜிகா த⁴ம்மா உத்³தி³ட்டா²தி ஏவமெத்த² அத்தோ² வேதி³தப்³போ³, ஸேஸங் பி⁴க்கு²பாதிமொக்க²வண்ணனாயங் வுத்தனயமேவாதி.
Uddiṭṭhā kho ayyāyo aṭṭha pārājikā dhammāti bhikkhū ārabbha paññattā sādhāraṇā cattāro, ime cattāroti evaṃ pātimokkhuddesamaggena aṭṭha pārājikā dhammā uddiṭṭhāti evamettha attho veditabbo, sesaṃ bhikkhupātimokkhavaṇṇanāyaṃ vuttanayamevāti.
கங்கா²விதரணியா பாதிமொக்க²வண்ணனாய
Kaṅkhāvitaraṇiyā pātimokkhavaṇṇanāya
பி⁴க்கு²னிபாதிமொக்கே²
Bhikkhunipātimokkhe
பாராஜிகவண்ணனா நிட்டி²தா.
Pārājikavaṇṇanā niṭṭhitā.
