| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๓. ตติยปณฺณาสกํ
3. Tatiyapaṇṇāsakaṃ
(๑๑) ๑. อาสาทุปฺปชหวคฺควณฺณนา
(11) 1. Āsāduppajahavaggavaṇṇanā
๑๑๙. ตติยสฺส ปณฺณาสกสฺส ปฐเม อาสาติ ตณฺหาฯ ทุปฺปชหาติ ทุจฺจชา ทุนฺนีหราฯ ลาภาสาย ทุปฺปชหภาเวน สตฺตา ทสปิ วสฺสานิ วีสติปิ สฎฺฐิปิ วสฺสานิ ‘‘อชฺช ลภิสฺสาม, เสฺว ลภิสฺสามา’’ติ ราชานํ อุปฎฺฐหนฺติ, กสิกมฺมาทีนิ กโรนฺติ, อุภโตพฺยูฬฺหํ สงฺคามํ ปกฺขนฺทนฺติ, อชปถสงฺกุปถาทโย ปฎิปชฺชนฺติ, นาวาย มหาสมุทฺทํ ปวิสนฺติฯ ชีวิตาสาย ทุปฺปชหตฺตา สมฺปเตฺต มรณกาเลปิ วสฺสสตชีวิํ อตฺตานํ มญฺญนฺติฯ โส กมฺมกมฺมนิมิตฺตาทีนิ ปสฺสโนฺตปิ ‘‘ทานํ เทหิ ปูชํ, กโรหี’’ติ อนุกมฺปเกหิ วุจฺจมาโน ‘‘นาหํ มริสฺสามิ, ชีวิสฺสามิ’’เจฺจว อาสาย กสฺสจิ วจนํ น คณฺหาติฯ
119. Tatiyassa paṇṇāsakassa paṭhame āsāti taṇhā. Duppajahāti duccajā dunnīharā. Lābhāsāya duppajahabhāvena sattā dasapi vassāni vīsatipi saṭṭhipi vassāni ‘‘ajja labhissāma, sve labhissāmā’’ti rājānaṃ upaṭṭhahanti, kasikammādīni karonti, ubhatobyūḷhaṃ saṅgāmaṃ pakkhandanti, ajapathasaṅkupathādayo paṭipajjanti, nāvāya mahāsamuddaṃ pavisanti. Jīvitāsāya duppajahattā sampatte maraṇakālepi vassasatajīviṃ attānaṃ maññanti. So kammakammanimittādīni passantopi ‘‘dānaṃ dehi pūjaṃ, karohī’’ti anukampakehi vuccamāno ‘‘nāhaṃ marissāmi, jīvissāmi’’cceva āsāya kassaci vacanaṃ na gaṇhāti.
๑๒๐. ทุติเย ปุพฺพการีติ ปฐมํ อุปการสฺส การโกฯ กตญฺญูกตเวทีติ เตน กตํ ญตฺวา ปจฺฉา การโกฯ เตสุ ปุพฺพการี ‘‘อิณํ เทมี’’ติ สญฺญํ กโรติ, ปจฺฉา การโก ‘‘อิณํ ชีราเปมี’’ติ สญฺญํ กโรติฯ
120. Dutiye pubbakārīti paṭhamaṃ upakārassa kārako. Kataññūkatavedīti tena kataṃ ñatvā pacchā kārako. Tesu pubbakārī ‘‘iṇaṃ demī’’ti saññaṃ karoti, pacchā kārako ‘‘iṇaṃ jīrāpemī’’ti saññaṃ karoti.
๑๒๑. ตติเย ติโตฺต จ ตเปฺปตา จาติ ปเจฺจกพุโทฺธ จ ตถาคตสาวโก จ ขีณาสโว ติโตฺต นาม, ตถาคโต อรหํ สมฺมาสมฺพุโทฺธ ติโตฺต จ ตเปฺปตา จฯ
121. Tatiye titto ca tappetā cāti paccekabuddho ca tathāgatasāvako ca khīṇāsavo titto nāma, tathāgato arahaṃ sammāsambuddho titto ca tappetā ca.
๑๒๒. จตุเตฺถ ทุตฺตปฺปยาติ ทายเกน ทุตฺตปฺปยา ตเปฺปตุํ น สุกราฯ นิกฺขิปตีติ นิทหติ น ปริภุญฺชติฯ วิสฺสเชฺชตีติ ปเรสํ เทติฯ
122. Catutthe duttappayāti dāyakena duttappayā tappetuṃ na sukarā. Nikkhipatīti nidahati na paribhuñjati. Vissajjetīti paresaṃ deti.
๑๒๓. ปญฺจเม น วิสฺสเชฺชตีติ สพฺพํเยว ปเรสํ น เทติ, อตฺตโน ปน ยาปนมตฺตํ คเหตฺวา อวเสสํ เทติฯ
123. Pañcame na vissajjetīti sabbaṃyeva paresaṃ na deti, attano pana yāpanamattaṃ gahetvā avasesaṃ deti.
๑๒๔. ฉเฎฺฐ สุภนิมิตฺตนฺติ อิฎฺฐารมฺมณํฯ
124. Chaṭṭhe subhanimittanti iṭṭhārammaṇaṃ.
๑๒๕. สตฺตเม ปฎิฆนิมิตฺตนฺติ อนิฎฺฐนิมิตฺตํฯ
125. Sattame paṭighanimittanti aniṭṭhanimittaṃ.
๑๒๖. อฎฺฐเม ปรโต จ โฆโสติ ปรสฺส สนฺติกา อสฺสทฺธมฺมสวนํฯ
126. Aṭṭhame parato ca ghosoti parassa santikā assaddhammasavanaṃ.
๑๒๗. นวเม ปรโต จ โฆโสติ ปรสฺส สนฺติกา สทฺธมฺมสวนํฯ เสสํ สพฺพตฺถ อุตฺตานตฺถเมวาติฯ
127. Navame parato ca ghosoti parassa santikā saddhammasavanaṃ. Sesaṃ sabbattha uttānatthamevāti.
อาสาทุปฺปชหวโคฺค ปฐโมฯ
Āsāduppajahavaggo paṭhamo.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / (๑๑) ๑. อาสาทุปฺปชหวโคฺค • (11) 1. Āsāduppajahavaggo
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / (๑๑) ๑. อาสาทุปฺปชหวคฺควณฺณนา • (11) 1. Āsāduppajahavaggavaṇṇanā
