| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៣. តតិយបណ្ណាសកំ
3. Tatiyapaṇṇāsakaṃ
(១១) ១. អាសាទុប្បជហវគ្គវណ្ណនា
(11) 1. Āsāduppajahavaggavaṇṇanā
១១៩. តតិយស្ស បណ្ណាសកស្ស បឋមេ អាសាតិ តណ្ហា។ ទុប្បជហាតិ ទុច្ចជា ទុន្នីហរា។ លាភាសាយ ទុប្បជហភាវេន សត្តា ទសបិ វស្សានិ វីសតិបិ សដ្ឋិបិ វស្សានិ ‘‘អជ្ជ លភិស្សាម, ស្វេ លភិស្សាមា’’តិ រាជានំ ឧបដ្ឋហន្តិ, កសិកម្មាទីនិ ករោន្តិ, ឧភតោព្យូឡ្ហំ សង្គាមំ បក្ខន្ទន្តិ, អជបថសង្កុបថាទយោ បដិបជ្ជន្តិ, នាវាយ មហាសមុទ្ទំ បវិសន្តិ។ ជីវិតាសាយ ទុប្បជហត្តា សម្បត្តេ មរណកាលេបិ វស្សសតជីវិំ អត្តានំ មញ្ញន្តិ។ សោ កម្មកម្មនិមិត្តាទីនិ បស្សន្តោបិ ‘‘ទានំ ទេហិ បូជំ, ករោហី’’តិ អនុកម្បកេហិ វុច្ចមានោ ‘‘នាហំ មរិស្សាមិ, ជីវិស្សាមិ’’ច្ចេវ អាសាយ កស្សចិ វចនំ ន គណ្ហាតិ។
119. Tatiyassa paṇṇāsakassa paṭhame āsāti taṇhā. Duppajahāti duccajā dunnīharā. Lābhāsāya duppajahabhāvena sattā dasapi vassāni vīsatipi saṭṭhipi vassāni ‘‘ajja labhissāma, sve labhissāmā’’ti rājānaṃ upaṭṭhahanti, kasikammādīni karonti, ubhatobyūḷhaṃ saṅgāmaṃ pakkhandanti, ajapathasaṅkupathādayo paṭipajjanti, nāvāya mahāsamuddaṃ pavisanti. Jīvitāsāya duppajahattā sampatte maraṇakālepi vassasatajīviṃ attānaṃ maññanti. So kammakammanimittādīni passantopi ‘‘dānaṃ dehi pūjaṃ, karohī’’ti anukampakehi vuccamāno ‘‘nāhaṃ marissāmi, jīvissāmi’’cceva āsāya kassaci vacanaṃ na gaṇhāti.
១២០. ទុតិយេ បុព្ពការីតិ បឋមំ ឧបការស្ស ការកោ។ កតញ្ញូកតវេទីតិ តេន កតំ ញត្វា បច្ឆា ការកោ។ តេសុ បុព្ពការី ‘‘ឥណំ ទេមី’’តិ សញ្ញំ ករោតិ, បច្ឆា ការកោ ‘‘ឥណំ ជីរាបេមី’’តិ សញ្ញំ ករោតិ។
120. Dutiye pubbakārīti paṭhamaṃ upakārassa kārako. Kataññūkatavedīti tena kataṃ ñatvā pacchā kārako. Tesu pubbakārī ‘‘iṇaṃ demī’’ti saññaṃ karoti, pacchā kārako ‘‘iṇaṃ jīrāpemī’’ti saññaṃ karoti.
១២១. តតិយេ តិត្តោ ច តប្បេតា ចាតិ បច្ចេកពុទ្ធោ ច តថាគតសាវកោ ច ខីណាសវោ តិត្តោ នាម, តថាគតោ អរហំ សម្មាសម្ពុទ្ធោ តិត្តោ ច តប្បេតា ច។
121. Tatiye titto ca tappetā cāti paccekabuddho ca tathāgatasāvako ca khīṇāsavo titto nāma, tathāgato arahaṃ sammāsambuddho titto ca tappetā ca.
១២២. ចតុត្ថេ ទុត្តប្បយាតិ ទាយកេន ទុត្តប្បយា តប្បេតុំ ន សុករា។ និក្ខិបតីតិ និទហតិ ន បរិភុញ្ជតិ។ វិស្សជ្ជេតីតិ បរេសំ ទេតិ។
122. Catutthe duttappayāti dāyakena duttappayā tappetuṃ na sukarā. Nikkhipatīti nidahati na paribhuñjati. Vissajjetīti paresaṃ deti.
១២៣. បញ្ចមេ ន វិស្សជ្ជេតីតិ សព្ពំយេវ បរេសំ ន ទេតិ, អត្តនោ បន យាបនមត្តំ គហេត្វា អវសេសំ ទេតិ។
123. Pañcame na vissajjetīti sabbaṃyeva paresaṃ na deti, attano pana yāpanamattaṃ gahetvā avasesaṃ deti.
១២៤. ឆដ្ឋេ សុភនិមិត្តន្តិ ឥដ្ឋារម្មណំ។
124. Chaṭṭhe subhanimittanti iṭṭhārammaṇaṃ.
១២៥. សត្តមេ បដិឃនិមិត្តន្តិ អនិដ្ឋនិមិត្តំ។
125. Sattame paṭighanimittanti aniṭṭhanimittaṃ.
១២៦. អដ្ឋមេ បរតោ ច ឃោសោតិ បរស្ស សន្តិកា អស្សទ្ធម្មសវនំ។
126. Aṭṭhame parato ca ghosoti parassa santikā assaddhammasavanaṃ.
១២៧. នវមេ បរតោ ច ឃោសោតិ បរស្ស សន្តិកា សទ្ធម្មសវនំ។ សេសំ សព្ពត្ថ ឧត្តានត្ថមេវាតិ។
127. Navame parato ca ghosoti parassa santikā saddhammasavanaṃ. Sesaṃ sabbattha uttānatthamevāti.
អាសាទុប្បជហវគ្គោ បឋមោ។
Āsāduppajahavaggo paṭhamo.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / (១១) ១. អាសាទុប្បជហវគ្គោ • (11) 1. Āsāduppajahavaggo
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / (១១) ១. អាសាទុប្បជហវគ្គវណ្ណនា • (11) 1. Āsāduppajahavaggavaṇṇanā
