| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೩. ತತಿಯಪಣ್ಣಾಸಕಂ
3. Tatiyapaṇṇāsakaṃ
(೧೧) ೧. ಆಸಾದುಪ್ಪಜಹವಗ್ಗವಣ್ಣನಾ
(11) 1. Āsāduppajahavaggavaṇṇanā
೧೧೯. ತತಿಯಸ್ಸ ಪಣ್ಣಾಸಕಸ್ಸ ಪಠಮೇ ಆಸಾತಿ ತಣ್ಹಾ। ದುಪ್ಪಜಹಾತಿ ದುಚ್ಚಜಾ ದುನ್ನೀಹರಾ। ಲಾಭಾಸಾಯ ದುಪ್ಪಜಹಭಾವೇನ ಸತ್ತಾ ದಸಪಿ ವಸ್ಸಾನಿ ವೀಸತಿಪಿ ಸಟ್ಠಿಪಿ ವಸ್ಸಾನಿ ‘‘ಅಜ್ಜ ಲಭಿಸ್ಸಾಮ, ಸ್ವೇ ಲಭಿಸ್ಸಾಮಾ’’ತಿ ರಾಜಾನಂ ಉಪಟ್ಠಹನ್ತಿ, ಕಸಿಕಮ್ಮಾದೀನಿ ಕರೋನ್ತಿ, ಉಭತೋಬ್ಯೂಳ್ಹಂ ಸಙ್ಗಾಮಂ ಪಕ್ಖನ್ದನ್ತಿ, ಅಜಪಥಸಙ್ಕುಪಥಾದಯೋ ಪಟಿಪಜ್ಜನ್ತಿ, ನಾವಾಯ ಮಹಾಸಮುದ್ದಂ ಪವಿಸನ್ತಿ। ಜೀವಿತಾಸಾಯ ದುಪ್ಪಜಹತ್ತಾ ಸಮ್ಪತ್ತೇ ಮರಣಕಾಲೇಪಿ ವಸ್ಸಸತಜೀವಿಂ ಅತ್ತಾನಂ ಮಞ್ಞನ್ತಿ। ಸೋ ಕಮ್ಮಕಮ್ಮನಿಮಿತ್ತಾದೀನಿ ಪಸ್ಸನ್ತೋಪಿ ‘‘ದಾನಂ ದೇಹಿ ಪೂಜಂ, ಕರೋಹೀ’’ತಿ ಅನುಕಮ್ಪಕೇಹಿ ವುಚ್ಚಮಾನೋ ‘‘ನಾಹಂ ಮರಿಸ್ಸಾಮಿ, ಜೀವಿಸ್ಸಾಮಿ’’ಚ್ಚೇವ ಆಸಾಯ ಕಸ್ಸಚಿ ವಚನಂ ನ ಗಣ್ಹಾತಿ।
119. Tatiyassa paṇṇāsakassa paṭhame āsāti taṇhā. Duppajahāti duccajā dunnīharā. Lābhāsāya duppajahabhāvena sattā dasapi vassāni vīsatipi saṭṭhipi vassāni ‘‘ajja labhissāma, sve labhissāmā’’ti rājānaṃ upaṭṭhahanti, kasikammādīni karonti, ubhatobyūḷhaṃ saṅgāmaṃ pakkhandanti, ajapathasaṅkupathādayo paṭipajjanti, nāvāya mahāsamuddaṃ pavisanti. Jīvitāsāya duppajahattā sampatte maraṇakālepi vassasatajīviṃ attānaṃ maññanti. So kammakammanimittādīni passantopi ‘‘dānaṃ dehi pūjaṃ, karohī’’ti anukampakehi vuccamāno ‘‘nāhaṃ marissāmi, jīvissāmi’’cceva āsāya kassaci vacanaṃ na gaṇhāti.
೧೨೦. ದುತಿಯೇ ಪುಬ್ಬಕಾರೀತಿ ಪಠಮಂ ಉಪಕಾರಸ್ಸ ಕಾರಕೋ। ಕತಞ್ಞೂಕತವೇದೀತಿ ತೇನ ಕತಂ ಞತ್ವಾ ಪಚ್ಛಾ ಕಾರಕೋ। ತೇಸು ಪುಬ್ಬಕಾರೀ ‘‘ಇಣಂ ದೇಮೀ’’ತಿ ಸಞ್ಞಂ ಕರೋತಿ, ಪಚ್ಛಾ ಕಾರಕೋ ‘‘ಇಣಂ ಜೀರಾಪೇಮೀ’’ತಿ ಸಞ್ಞಂ ಕರೋತಿ।
120. Dutiye pubbakārīti paṭhamaṃ upakārassa kārako. Kataññūkatavedīti tena kataṃ ñatvā pacchā kārako. Tesu pubbakārī ‘‘iṇaṃ demī’’ti saññaṃ karoti, pacchā kārako ‘‘iṇaṃ jīrāpemī’’ti saññaṃ karoti.
೧೨೧. ತತಿಯೇ ತಿತ್ತೋ ಚ ತಪ್ಪೇತಾ ಚಾತಿ ಪಚ್ಚೇಕಬುದ್ಧೋ ಚ ತಥಾಗತಸಾವಕೋ ಚ ಖೀಣಾಸವೋ ತಿತ್ತೋ ನಾಮ, ತಥಾಗತೋ ಅರಹಂ ಸಮ್ಮಾಸಮ್ಬುದ್ಧೋ ತಿತ್ತೋ ಚ ತಪ್ಪೇತಾ ಚ।
121. Tatiye titto ca tappetā cāti paccekabuddho ca tathāgatasāvako ca khīṇāsavo titto nāma, tathāgato arahaṃ sammāsambuddho titto ca tappetā ca.
೧೨೨. ಚತುತ್ಥೇ ದುತ್ತಪ್ಪಯಾತಿ ದಾಯಕೇನ ದುತ್ತಪ್ಪಯಾ ತಪ್ಪೇತುಂ ನ ಸುಕರಾ। ನಿಕ್ಖಿಪತೀತಿ ನಿದಹತಿ ನ ಪರಿಭುಞ್ಜತಿ। ವಿಸ್ಸಜ್ಜೇತೀತಿ ಪರೇಸಂ ದೇತಿ।
122. Catutthe duttappayāti dāyakena duttappayā tappetuṃ na sukarā. Nikkhipatīti nidahati na paribhuñjati. Vissajjetīti paresaṃ deti.
೧೨೩. ಪಞ್ಚಮೇ ನ ವಿಸ್ಸಜ್ಜೇತೀತಿ ಸಬ್ಬಂಯೇವ ಪರೇಸಂ ನ ದೇತಿ, ಅತ್ತನೋ ಪನ ಯಾಪನಮತ್ತಂ ಗಹೇತ್ವಾ ಅವಸೇಸಂ ದೇತಿ।
123. Pañcame na vissajjetīti sabbaṃyeva paresaṃ na deti, attano pana yāpanamattaṃ gahetvā avasesaṃ deti.
೧೨೪. ಛಟ್ಠೇ ಸುಭನಿಮಿತ್ತನ್ತಿ ಇಟ್ಠಾರಮ್ಮಣಂ।
124. Chaṭṭhe subhanimittanti iṭṭhārammaṇaṃ.
೧೨೫. ಸತ್ತಮೇ ಪಟಿಘನಿಮಿತ್ತನ್ತಿ ಅನಿಟ್ಠನಿಮಿತ್ತಂ।
125. Sattame paṭighanimittanti aniṭṭhanimittaṃ.
೧೨೬. ಅಟ್ಠಮೇ ಪರತೋ ಚ ಘೋಸೋತಿ ಪರಸ್ಸ ಸನ್ತಿಕಾ ಅಸ್ಸದ್ಧಮ್ಮಸವನಂ।
126. Aṭṭhame parato ca ghosoti parassa santikā assaddhammasavanaṃ.
೧೨೭. ನವಮೇ ಪರತೋ ಚ ಘೋಸೋತಿ ಪರಸ್ಸ ಸನ್ತಿಕಾ ಸದ್ಧಮ್ಮಸವನಂ। ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ।
127. Navame parato ca ghosoti parassa santikā saddhammasavanaṃ. Sesaṃ sabbattha uttānatthamevāti.
ಆಸಾದುಪ್ಪಜಹವಗ್ಗೋ ಪಠಮೋ।
Āsāduppajahavaggo paṭhamo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / (೧೧) ೧. ಆಸಾದುಪ್ಪಜಹವಗ್ಗೋ • (11) 1. Āsāduppajahavaggo
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / (೧೧) ೧. ಆಸಾದುಪ್ಪಜಹವಗ್ಗವಣ್ಣನಾ • (11) 1. Āsāduppajahavaggavaṇṇanā
