| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
3. තතියපණ්‌ණාසකං
3. Tatiyapaṇṇāsakaṃ
(11) 1. ආසාදුප්‌පජහවග්‌ගවණ්‌ණනා
(11) 1. Āsāduppajahavaggavaṇṇanā
119. තතියස්‌ස පණ්‌ණාසකස්‌ස පඨමෙ ආසාති තණ්‌හා. දුප්‌පජහාති දුච්‌චජා දුන්‌නීහරා. ලාභාසාය දුප්‌පජහභාවෙන සත්‌තා දසපි වස්‌සානි වීසතිපි සට්‌ඨිපි වස්‌සානි ‘‘අජ්‌ජ ලභිස්‌සාම, ස්‌වෙ ලභිස්‌සාමා’’ති රාජානං උපට්‌ඨහන්‌ති, කසිකම්‌මාදීනි කරොන්‌ති, උභතොබ්‍යූළ්‌හං සඞ්‌ගාමං පක්‌ඛන්‌දන්‌ති, අජපථසඞ්‌කුපථාදයො පටිපජ්‌ජන්‌ති, නාවාය මහාසමුද්‌දං පවිසන්‌ති. ජීවිතාසාය දුප්‌පජහත්‌තා සම්‌පත්‌තෙ මරණකාලෙපි වස්‌සසතජීවිං අත්‌තානං මඤ්‌ඤන්‌ති. සො කම්‌මකම්‌මනිමිත්‌තාදීනි පස්‌සන්‌තොපි ‘‘දානං දෙහි පූජං, කරොහී’’ති අනුකම්‌පකෙහි වුච්‌චමානො ‘‘නාහං මරිස්‌සාමි, ජීවිස්‌සාමි’’ච්‌චෙව ආසාය කස්‌සචි වචනං න ගණ්‌හාති.
119. Tatiyassa paṇṇāsakassa paṭhame āsāti taṇhā. Duppajahāti duccajā dunnīharā. Lābhāsāya duppajahabhāvena sattā dasapi vassāni vīsatipi saṭṭhipi vassāni ‘‘ajja labhissāma, sve labhissāmā’’ti rājānaṃ upaṭṭhahanti, kasikammādīni karonti, ubhatobyūḷhaṃ saṅgāmaṃ pakkhandanti, ajapathasaṅkupathādayo paṭipajjanti, nāvāya mahāsamuddaṃ pavisanti. Jīvitāsāya duppajahattā sampatte maraṇakālepi vassasatajīviṃ attānaṃ maññanti. So kammakammanimittādīni passantopi ‘‘dānaṃ dehi pūjaṃ, karohī’’ti anukampakehi vuccamāno ‘‘nāhaṃ marissāmi, jīvissāmi’’cceva āsāya kassaci vacanaṃ na gaṇhāti.
120. දුතියෙ පුබ්‌බකාරීති පඨමං උපකාරස්‌ස කාරකො. කතඤ්‌ඤූකතවෙදීති තෙන කතං ඤත්‌වා පච්‌ඡා කාරකො. තෙසු පුබ්‌බකාරී ‘‘ඉණං දෙමී’’ති සඤ්‌ඤං කරොති, පච්‌ඡා කාරකො ‘‘ඉණං ජීරාපෙමී’’ති සඤ්‌ඤං කරොති.
120. Dutiye pubbakārīti paṭhamaṃ upakārassa kārako. Kataññūkatavedīti tena kataṃ ñatvā pacchā kārako. Tesu pubbakārī ‘‘iṇaṃ demī’’ti saññaṃ karoti, pacchā kārako ‘‘iṇaṃ jīrāpemī’’ti saññaṃ karoti.
121. තතියෙ තිත්‌තො ච තප්‌පෙතා චාති පච්‌චෙකබුද්‌ධො ච තථාගතසාවකො ච ඛීණාසවො තිත්‌තො නාම, තථාගතො අරහං සම්‌මාසම්‌බුද්‌ධො තිත්‌තො ච තප්‌පෙතා ච.
121. Tatiye titto ca tappetā cāti paccekabuddho ca tathāgatasāvako ca khīṇāsavo titto nāma, tathāgato arahaṃ sammāsambuddho titto ca tappetā ca.
122. චතුත්‌ථෙ දුත්‌තප්‌පයාති දායකෙන දුත්‌තප්‌පයා තප්‌පෙතුං න සුකරා. නික්‌ඛිපතීති නිදහති න පරිභුඤ්‌ජති. විස්‌සජ්‌ජෙතීති පරෙසං දෙති.
122. Catutthe duttappayāti dāyakena duttappayā tappetuṃ na sukarā. Nikkhipatīti nidahati na paribhuñjati. Vissajjetīti paresaṃ deti.
123. පඤ්‌චමෙ න විස්‌සජ්‌ජෙතීති සබ්‌බංයෙව පරෙසං න දෙති, අත්‌තනො පන යාපනමත්‌තං ගහෙත්‌වා අවසෙසං දෙති.
123. Pañcame na vissajjetīti sabbaṃyeva paresaṃ na deti, attano pana yāpanamattaṃ gahetvā avasesaṃ deti.
124. ඡට්‌ඨෙ සුභනිමිත්‌තන්‌ති ඉට්‌ඨාරම්‌මණං.
124. Chaṭṭhe subhanimittanti iṭṭhārammaṇaṃ.
125. සත්‌තමෙ පටිඝනිමිත්‌තන්‌ති අනිට්‌ඨනිමිත්‌තං.
125. Sattame paṭighanimittanti aniṭṭhanimittaṃ.
126. අට්‌ඨමෙ පරතො ච ඝොසොති පරස්‌ස සන්‌තිකා අස්‌සද්‌ධම්‌මසවනං.
126. Aṭṭhame parato ca ghosoti parassa santikā assaddhammasavanaṃ.
127. නවමෙ පරතො ච ඝොසොති පරස්‌ස සන්‌තිකා සද්‌ධම්‌මසවනං. සෙසං සබ්‌බත්‌ථ උත්‌තානත්‌ථමෙවාති.
127. Navame parato ca ghosoti parassa santikā saddhammasavanaṃ. Sesaṃ sabbattha uttānatthamevāti.
ආසාදුප්‌පජහවග්‌ගො පඨමො.
Āsāduppajahavaggo paṭhamo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / (11) 1. ආසාදුප්‌පජහවග්‌ගො • (11) 1. Āsāduppajahavaggo
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / (11) 1. ආසාදුප්‌පජහවග්‌ගවණ්‌ණනා • (11) 1. Āsāduppajahavaggavaṇṇanā
