| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. ஆஸங்ஸஸுத்தவண்ணனா
3. Āsaṃsasuttavaṇṇanā
13. ததியே ஸந்தோதி அத்தி² உபலப்³ப⁴ந்தி. ஸங்விஜ்ஜமானாதி தஸ்ஸேவ வேவசனங். லோகஸ்மிந்தி ஸத்தலோகே. நிராஸோதி அனாஸோ அபத்த²னோ. ஆஸங்ஸோதி ஆஸங்ஸமானோ பத்த²யமானோ. விக³தாஸோதி அபக³தாஸோ. சண்டா³லகுலேதி சண்டா³லானங் குலே. வேனகுலேதி விலீவகாரகுலே. நேஸாத³குலேதி மிக³லுத்³த³கானங் குலே. ரத²காரகுலேதி சம்மகாரகுலே. புக்குஸகுலேதி புப்ப²ச்ச²ட்³ட³ககுலே.
13. Tatiye santoti atthi upalabbhanti. Saṃvijjamānāti tasseva vevacanaṃ. Lokasminti sattaloke. Nirāsoti anāso apatthano. Āsaṃsoti āsaṃsamāno patthayamāno. Vigatāsoti apagatāso. Caṇḍālakuleti caṇḍālānaṃ kule. Venakuleti vilīvakārakule. Nesādakuleti migaluddakānaṃ kule. Rathakārakuleti cammakārakule. Pukkusakuleti pupphacchaḍḍakakule.
எத்தாவதா குலவிபத்திங் த³ஸ்ஸெத்வா இதா³னி யஸ்மா நீசகுலே ஜாதோபி ஏகச்சோ அட்³டோ⁴ ஹோதி மஹத்³த⁴னோ, அயங் பன ந தாதி³ஸோ, தஸ்மாஸ்ஸ போ⁴க³விபத்திங் த³ஸ்ஸேதுங் த³லித்³தே³திஆதி³மாஹ. தத்த² த³லித்³தே³தி தா³லித்³தி³யேன ஸமன்னாக³தே. அப்பன்னபானபோ⁴ஜனேதி பரித்தகஅன்னபானபோ⁴ஜனே. கஸிரவுத்திகேதி து³க்க²ஜீவிகே, யத்த² வாயாமேன பயோகே³ன ஜீவிதவுத்திங் ஸாதெ⁴ந்தி, ததா²ரூபேதி அத்தோ². யத்த² கஸிரேன கா⁴ஸச்சா²தோ³ லப்³ப⁴தீதி யஸ்மிங் குலே து³க்கே²ன யாகு³ப⁴த்தகா⁴ஸோ ச கோபீனமத்தங் அச்சா²த³னஞ்ச லப்³ப⁴தி.
Ettāvatā kulavipattiṃ dassetvā idāni yasmā nīcakule jātopi ekacco aḍḍho hoti mahaddhano, ayaṃ pana na tādiso, tasmāssa bhogavipattiṃ dassetuṃ daliddetiādimāha. Tattha daliddeti dāliddiyena samannāgate. Appannapānabhojaneti parittakaannapānabhojane. Kasiravuttiketi dukkhajīvike, yattha vāyāmena payogena jīvitavuttiṃ sādhenti, tathārūpeti attho. Yattha kasirena ghāsacchādo labbhatīti yasmiṃ kule dukkhena yāgubhattaghāso ca kopīnamattaṃ acchādanañca labbhati.
இதா³னி யஸ்மா ஏகச்சோ நீசகுலே ஜாதோபி உபதி⁴ஸம்பன்னோ ஹோதி அத்தபா⁴வஸமித்³தி⁴யங் டி²தோ , அயஞ்ச ந தாதி³ஸோ, தஸ்மாஸ்ஸ ஸரீரவிபத்திம்பி த³ஸ்ஸேதுங் ஸோ ச ஹோதி து³ப்³ப³ண்ணோதிஆதி³மாஹ. தத்த² து³ப்³ப³ண்ணோதி பங்ஸுபிஸாசகோ விய ஜா²மகா²ணுவண்ணோ. து³த்³த³ஸிகோதி விஜாதமாதுயாபி அமனாபத³ஸ்ஸனோ. ஓகோடிமகோதி லகுண்ட³கோ. காணோதி ஏகக்கி²காணோ வா உப⁴யக்கி²காணோ வா. குணீதி ஏகஹத்த²குணீ வா உப⁴யஹத்த²குணீ வா. க²ஞ்ஜோதி ஏகபாத³க²ஞ்ஜோ வா உப⁴யபாத³க²ஞ்ஜோ வா. பக்க²ஹதோதி ஹதபக்கோ² பீட²ஸப்பீ. பதீ³பெய்யஸ்ஸாதி வட்டிதேலகபல்லகாதி³னோ பதீ³பஉபகரணஸ்ஸ. தஸ்ஸ ந ஏவங் ஹோதீதி. கஸ்மா ந ஹோதி? நீசகுலே ஜாதத்தா.
Idāni yasmā ekacco nīcakule jātopi upadhisampanno hoti attabhāvasamiddhiyaṃ ṭhito , ayañca na tādiso, tasmāssa sarīravipattimpi dassetuṃ so ca hoti dubbaṇṇotiādimāha. Tattha dubbaṇṇoti paṃsupisācako viya jhāmakhāṇuvaṇṇo. Duddasikoti vijātamātuyāpi amanāpadassano. Okoṭimakoti lakuṇḍako. Kāṇoti ekakkhikāṇo vā ubhayakkhikāṇo vā. Kuṇīti ekahatthakuṇī vā ubhayahatthakuṇī vā. Khañjoti ekapādakhañjo vā ubhayapādakhañjo vā. Pakkhahatoti hatapakkho pīṭhasappī. Padīpeyyassāti vaṭṭitelakapallakādino padīpaupakaraṇassa. Tassa na evaṃ hotīti. Kasmā na hoti? Nīcakule jātattā.
ஜெட்டோ²தி அஞ்ஞஸ்மிங் ஜெட்டே² ஸதி கனிட்டோ² ஆஸங் ந கரோதி, தஸ்மா ஜெட்டோ²தி ஆஹ. ஆபி⁴ஸேகோதி ஜெட்டோ²பி ந அபி⁴ஸேகாரஹோ ஆஸங் ந கரோதி, தஸ்மா ஆபி⁴ஸேகோதி ஆஹ. அனபி⁴ஸித்தோதி அபி⁴ஸேகாரஹோபி காணகுணிஆதி³தோ³ஸரஹிதோ ஸகிங் அபி⁴ஸித்தோ புன அபி⁴ஸேகே ஆஸங் ந கரோதி, தஸ்மா அனபி⁴ஸித்தோதி ஆஹ . அசலப்பத்தோதி ஜெட்டோ²பி ஆபி⁴ஸேகோ அனபி⁴ஸித்தோ மந்தோ³ உத்தானஸெய்யகோ, ஸோபி அபி⁴ஸேகே ஆஸங் ந கரோதி. ஸோளஸவஸ்ஸுத்³தே³ஸிகோ பன பஞ்ஞாயமானமஸ்ஸுபே⁴தோ³ அசலப்பத்தோ நாம ஹோதி, மஹந்தம்பி ரஜ்ஜங் விசாரேதுங் ஸமத்தோ², தஸ்மா ‘‘அசலப்பத்தோ’’தி ஆஹ. தஸ்ஸ ஏவங் ஹோதீதி கஸ்மா ஹோதி? மஹாஜாதிதாய.
Jeṭṭhoti aññasmiṃ jeṭṭhe sati kaniṭṭho āsaṃ na karoti, tasmā jeṭṭhoti āha. Ābhisekoti jeṭṭhopi na abhisekāraho āsaṃ na karoti, tasmā ābhisekoti āha. Anabhisittoti abhisekārahopi kāṇakuṇiādidosarahito sakiṃ abhisitto puna abhiseke āsaṃ na karoti, tasmā anabhisittoti āha . Acalappattoti jeṭṭhopi ābhiseko anabhisitto mando uttānaseyyako, sopi abhiseke āsaṃ na karoti. Soḷasavassuddesiko pana paññāyamānamassubhedo acalappatto nāma hoti, mahantampi rajjaṃ vicāretuṃ samattho, tasmā ‘‘acalappatto’’ti āha. Tassa evaṃ hotīti kasmā hoti? Mahājātitāya.
து³ஸ்ஸீலோதி நிஸ்ஸீலோ. பாபத⁴ம்மோதி லாமகத⁴ம்மோ. அஸுசீதி அஸுசீஹி காயகம்மாதீ³ஹி ஸமன்னாக³தோ. ஸங்கஸ்ஸரஸமாசாரோதி ஸங்காஹி ஸரிதப்³ப³ஸமாசாரோ, கிஞ்சிதே³வ அஸாருப்பங் தி³ஸ்வா ‘‘இத³ங் இமினா கதங் ப⁴விஸ்ஸதீ’’தி ஏவங் பரேஸங் ஆஸங்கனீயஸமாசாரோ, அத்தனாயேவ வா ஸங்காஹி ஸரிதப்³ப³ஸமாசாரோ, ஸாஸங்கஸமாசாரோதி அத்தோ². தஸ்ஸ ஹி தி³வாட்டா²னாதீ³ஸு ஸன்னிபதித்வா கிஞ்சிதே³வ மந்தயந்தே பி⁴க்கூ² தி³ஸ்வா ‘‘இமே ஏகதோ ஹுத்வா மந்தெந்தி, கச்சி நு கோ² மயா கதகம்மங் ஜானித்வா மந்தெந்தீ’’தி ஏவங் ஸாஸங்கஸமாசாரோ ஹோதி. படிச்ச²ன்னகம்மந்தோதி படிச்சா²தே³தப்³ப³யுத்தகேன பாபகம்மேன ஸமன்னாக³தோ. அஸ்ஸமணோ ஸமணபடிஞ்ஞோதி அஸ்ஸமணோ ஹுத்வாவ ஸமணபதிரூபகதாய ‘‘ஸமணோ அஹ’’ந்தி ஏவங் படிஞ்ஞோ. அப்³ரஹ்மசாரீ ப்³ரஹ்மசாரிபடிஞ்ஞோதி அஞ்ஞே ப்³ரஹ்மசாரினோ ஸுனிவத்தே² ஸுபாருதே ஸும்ப⁴கபத்தத⁴ரே கா³மனிக³மராஜதா⁴னீஸு பிண்டா³ய சரித்வா ஜீவிகங் கப்பெந்தே தி³ஸ்வா ஸயம்பி தாதி³ஸேன ஆகாரேன ததா² படிபஜ்ஜனதோ ‘‘அஹங் ப்³ரஹ்மசாரீ’’தி படிஞ்ஞங் தெ³ந்தோ விய ஹோதி. ‘‘அஹங் பி⁴க்கூ²’’தி வத்வா உபோஸத²க்³கா³தீ³னி பவிஸந்தோ பன ப்³ரஹ்மசாரிபடிஞ்ஞோ ஹோதியேவ, ததா² ஸங்கி⁴கங் லாப⁴ங் க³ண்ஹந்தோ. அந்தோபூதீதி பூதினா கம்மேன அந்தோ அனுபவிட்டோ². அவஸ்ஸுதோதி ராகா³தீ³ஹி திந்தோ. கஸம்பு³ஜாதோதி ஸஞ்ஜாதராகா³தி³கசவரோ. தஸ்ஸ ந ஏவங் ஹோதீதி. கஸ்மா ந ஹோதி? லோகுத்தரத⁴ம்மஉபனிஸ்ஸயஸ்ஸ நத்தி²தாய. தஸ்ஸ ஏவங் ஹோதீதி. கஸ்மா ஹோதி? மஹாஸீலஸ்மிங் பரிபூரகாரிதாய.
Dussīloti nissīlo. Pāpadhammoti lāmakadhammo. Asucīti asucīhi kāyakammādīhi samannāgato. Saṅkassarasamācāroti saṅkāhi saritabbasamācāro, kiñcideva asāruppaṃ disvā ‘‘idaṃ iminā kataṃ bhavissatī’’ti evaṃ paresaṃ āsaṅkanīyasamācāro, attanāyeva vā saṅkāhi saritabbasamācāro, sāsaṅkasamācāroti attho. Tassa hi divāṭṭhānādīsu sannipatitvā kiñcideva mantayante bhikkhū disvā ‘‘ime ekato hutvā mantenti, kacci nu kho mayā katakammaṃ jānitvā mantentī’’ti evaṃ sāsaṅkasamācāro hoti. Paṭicchannakammantoti paṭicchādetabbayuttakena pāpakammena samannāgato. Assamaṇo samaṇapaṭiññoti assamaṇo hutvāva samaṇapatirūpakatāya ‘‘samaṇo aha’’nti evaṃ paṭiñño. Abrahmacārī brahmacāripaṭiññoti aññe brahmacārino sunivatthe supārute sumbhakapattadhare gāmanigamarājadhānīsu piṇḍāya caritvā jīvikaṃ kappente disvā sayampi tādisena ākārena tathā paṭipajjanato ‘‘ahaṃ brahmacārī’’ti paṭiññaṃ dento viya hoti. ‘‘Ahaṃ bhikkhū’’ti vatvā uposathaggādīni pavisanto pana brahmacāripaṭiñño hotiyeva, tathā saṅghikaṃ lābhaṃ gaṇhanto. Antopūtīti pūtinā kammena anto anupaviṭṭho. Avassutoti rāgādīhi tinto. Kasambujātoti sañjātarāgādikacavaro. Tassa na evaṃ hotīti. Kasmā na hoti? Lokuttaradhammaupanissayassa natthitāya. Tassaevaṃ hotīti. Kasmā hoti? Mahāsīlasmiṃ paripūrakāritāya.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ஆஸங்ஸஸுத்தங் • 3. Āsaṃsasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. ஆஸங்ஸஸுத்தவண்ணனா • 3. Āsaṃsasuttavaṇṇanā
