| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. ஆஸங்ஸஸுத்தவண்ணனா
3. Āsaṃsasuttavaṇṇanā
13. ததியே ஸந்தோதி எத்த² ஸந்த-ஸத்³தோ³ ‘‘தீ³க⁴ங் ஸந்தஸ்ஸ யோஜன’’ந்திஆதீ³ஸு (த⁴॰ ப॰ 60) கிலந்தபா⁴வே ஆக³தோ. ‘‘அயஞ்ச விதக்கோ, அயஞ்ச விசாரோ ஸந்தோ ஹொந்தி ஸமிதா’’திஆதீ³ஸு (விப⁴॰ 576) நிருத்³த⁴பா⁴வே. ‘‘அதி⁴க³தோ கோ² ம்யாயங் த⁴ம்மோ, க³ம்பீ⁴ரோ து³த்³த³ஸோ து³ரனுபோ³தோ⁴ ஸந்தோ பணீதோ’’திஆதீ³ஸு (தீ³॰ நி॰ 2.67; ம॰ நி॰ 1.281; ஸங்॰ நி॰ 1.172; மஹாவ॰ 7-8) ஸந்தஞாணகோ³சரதாயங். ‘‘உபஸந்தஸ்ஸ ஸதா³ ஸதிமதோ’’திஆதீ³ஸு (உதா³॰ 27) கிலேஸவூபஸமே. ‘‘ஸந்தோ ஹவே ஸப்³பி⁴ பவேத³யந்தீ’’திஆதீ³ஸு (த⁴॰ ப॰ 151) ஸாதூ⁴ஸு. ‘‘பஞ்சிமே, பி⁴க்க²வே, மஹாசோரா ஸந்தோ ஸங்விஜ்ஜமானா’’திஆதீ³ஸு (பாரா॰ 195) அத்தி²பா⁴வே. இதா⁴பி அத்தி²பா⁴வேயேவாதி ஆஹ ‘‘ஸந்தோதி அத்தி² உபலப்³ப⁴ந்தீ’’தி. தத்த² அத்தீ²தி லோகஸங்கேதவஸேன ஸங்விஜ்ஜந்தி. அத்தி²பா⁴வோ ஹெத்த² புக்³க³லஸம்ப³ந்தே⁴ன வுத்தத்தா லோகஸமஞ்ஞாவஸேனேவ வேதி³தப்³போ³, ந பரமத்த²வஸேன. அத்தீ²தி சேதங் நிபாதபத³ங் த³ட்ட²ப்³ப³ங் ‘‘அத்தி² இமஸ்மிங் காயே கேஸா’’திஆதீ³ஸு (ம॰ நி॰ 1.110) விய.
13. Tatiye santoti ettha santa-saddo ‘‘dīghaṃ santassa yojana’’ntiādīsu (dha. pa. 60) kilantabhāve āgato. ‘‘Ayañca vitakko, ayañca vicāro santo honti samitā’’tiādīsu (vibha. 576) niruddhabhāve. ‘‘Adhigato kho myāyaṃ dhammo, gambhīro duddaso duranubodho santo paṇīto’’tiādīsu (dī. ni. 2.67; ma. ni. 1.281; saṃ. ni. 1.172; mahāva. 7-8) santañāṇagocaratāyaṃ. ‘‘Upasantassa sadā satimato’’tiādīsu (udā. 27) kilesavūpasame. ‘‘Santo have sabbhi pavedayantī’’tiādīsu (dha. pa. 151) sādhūsu. ‘‘Pañcime, bhikkhave, mahācorā santo saṃvijjamānā’’tiādīsu (pārā. 195) atthibhāve. Idhāpi atthibhāveyevāti āha ‘‘santoti atthi upalabbhantī’’ti. Tattha atthīti lokasaṅketavasena saṃvijjanti. Atthibhāvo hettha puggalasambandhena vuttattā lokasamaññāvaseneva veditabbo, na paramatthavasena. Atthīti cetaṃ nipātapadaṃ daṭṭhabbaṃ ‘‘atthi imasmiṃ kāye kesā’’tiādīsu (ma. ni. 1.110) viya.
ஸங்விஜ்ஜமானாதி உபலப்³ப⁴மானா. யஞ்ஹி ஸங்விஜ்ஜதி, தங் உபலப்³ப⁴தி. தேனாஹ ‘‘ஸங்விஜ்ஜமானாதி தஸ்ஸேவ வேவசன’’ந்தி. அனாஸோதி பத்த²னாரஹிதோ. தேனாஹ ‘‘அபத்த²னோ’’தி. ஆஸங்ஸதி பத்தே²தீதி ஆஸங்ஸோ. வேணுவெத்தாதி³விலீவேஹி ஸுப்பாதி³பா⁴ஜனகாரகா விலீவகாரகா. மிக³மச்சா²தீ³னங் நிஸாத³னதோ நேஸாதா³, மாக³விகமச்ச²ப³ந்தா⁴த³யோ. ரதே²ஸு சம்மேன நஹனகரணதோ ரத²காரா , த⁴ம்மகாரா. புஇதி கரீஸஸ்ஸ நாமங், தங் குஸெந்தி அபனெந்தீதி புக்குஸா, புப்ப²ச்ச²ட்³ட³கா.
Saṃvijjamānāti upalabbhamānā. Yañhi saṃvijjati, taṃ upalabbhati. Tenāha ‘‘saṃvijjamānāti tasseva vevacana’’nti. Anāsoti patthanārahito. Tenāha ‘‘apatthano’’ti. Āsaṃsati patthetīti āsaṃso. Veṇuvettādivilīvehi suppādibhājanakārakā vilīvakārakā. Migamacchādīnaṃ nisādanato nesādā, māgavikamacchabandhādayo. Rathesu cammena nahanakaraṇato rathakārā, dhammakārā. Puiti karīsassa nāmaṃ, taṃ kusenti apanentīti pukkusā, pupphacchaḍḍakā.
து³ப்³ப³ண்ணோதி விரூபோ. ஓகோடிமகோதி ஆரோஹாபா⁴வேன ஹெட்டி²மகோ, ரஸ்ஸகாயோதி அத்தோ². தேனாஹ ‘‘லகுண்ட³கோ’’தி. லகு விய க⁴டிகா விய டே³தி பவத்ததீதி ஹி லகுண்ட³கோ, ரஸ்ஸோ. கணதி நிமீலதீதி காணோ. தங் பனஸ்ஸ நிமீலனங் ஏகேன அக்கி²னா த்³வீஹிபி சாதி ஆஹ ‘‘ஏகக்கி²காணோ வா உப⁴யக்கி²காணோ வா’’தி. குணனங் குணோ, ஹத்த²வேகல்லங். தங் ஏதஸ்ஸ அத்தீ²தி குணீ. க²ஞ்ஜோ வுச்சதி பாத³விகலோ. ஹெட்டி²மகாயஸங்கா²தோ ஸரீரஸ்ஸ பக்கோ² பதே³ஸோ ஹதோ அஸ்ஸாதி பக்க²ஹதோ. தேனாஹ ‘‘பீட²ஸப்பீ’’தி. பதீ³பே பதீ³பனே ஏதப்³ப³ங் நேதப்³ப³ந்தி பதீ³பெய்யங், தேலாதி³உபகரணங்.
Dubbaṇṇoti virūpo. Okoṭimakoti ārohābhāvena heṭṭhimako, rassakāyoti attho. Tenāha ‘‘lakuṇḍako’’ti. Laku viya ghaṭikā viya ḍeti pavattatīti hi lakuṇḍako, rasso. Kaṇati nimīlatīti kāṇo. Taṃ panassa nimīlanaṃ ekena akkhinā dvīhipi cāti āha ‘‘ekakkhikāṇo vā ubhayakkhikāṇo vā’’ti. Kuṇanaṃ kuṇo, hatthavekallaṃ. Taṃ etassa atthīti kuṇī. Khañjo vuccati pādavikalo. Heṭṭhimakāyasaṅkhāto sarīrassa pakkho padeso hato assāti pakkhahato. Tenāha ‘‘pīṭhasappī’’ti. Padīpe padīpane etabbaṃ netabbanti padīpeyyaṃ, telādiupakaraṇaṃ.
ஆஸங் ந கரோதீதி ரஜ்ஜாபி⁴ஸேகே கனிட்டோ² பத்த²னங் ந கரோதி ஜெட்டே² ஸதி கனிட்ட²ஸ்ஸ அனதி⁴காரத்தா. அபி⁴ஸேகங் அரஹதீதி அபி⁴ஸேகாரஹோ, ந அபி⁴ஸேகாரஹோ காணகுணிஆதி³தோ³ஸஸமன்னாக³தோ.
Āsaṃ na karotīti rajjābhiseke kaniṭṭho patthanaṃ na karoti jeṭṭhe sati kaniṭṭhassa anadhikārattā. Abhisekaṃ arahatīti abhisekāraho, na abhisekāraho kāṇakuṇiādidosasamannāgato.
ஸீலஸ்ஸ து³ட்டு² நாம நத்தி², தஸ்மா அபா⁴வத்தோ² இத⁴ து³-ஸத்³தோ³தி ஆஹ ‘‘நிஸ்ஸீலோ’’தி. ‘‘பாபங் பாபேன ஸுகர’’ந்திஆதீ³ஸு (உதா³॰ 48; சூளவ॰ 343) விய பாப-ஸத்³தோ³ நிஹீனபரியாயோதி ஆஹ ‘‘லாமகத⁴ம்மோ’’தி. ஸீலவிபத்தியா வா து³ஸ்ஸீலோ. தி³ட்டி²விபத்தியா பாபத⁴ம்மோ. காயவாசாஸங்வரபே⁴தே³ன வா து³ஸ்ஸீலோ, மனோஸங்வரபே⁴தே³ன, ஸதிஸங்வராதி³பே⁴தே³ன வா பாபத⁴ம்மோ. அஸுத்³த⁴ப்பயோக³தாய து³ஸ்ஸீலோ, அஸுத்³தா⁴ஸயதாய பாபத⁴ம்மோ. குஸலஸீலவிரஹேன து³ஸ்ஸீலோ, அகுஸலஸீலஸமன்னாக³மேன பாபத⁴ம்மோ. அஸுசீஹீதி அபரிஸுத்³தே⁴ஹி. ஸங்காஹி ஸரிதப்³ப³ஸமாசாரோதி ‘‘இமஸ்ஸ மஞ்ஞே இத³ங் கம்ம’’ந்தி ஏவங் பரேஹி ஸங்காய ஸரிதப்³ப³ஸமாசாரோ. தேனாஹ ‘‘கிஞ்சிதே³வா’’திஆதி³. அத்தனாயேவ வா ஸங்காஹி ஸரிதப்³ப³ஸமாசாரோதி ஏதேனபி கம்மஸாத⁴னதங்யேவ ஸங்கஸ்ஸரஸத்³த³ஸ்ஸ த³ஸ்ஸேதி. அத்தனோ ஸங்காய பரேஸங் ஸமாசாரகிரியங் ஸரதி ஆஸங்கதி விதா⁴வதீதிபி ஸங்கஸ்ஸரஸமாசாரோதி ஏவமெத்த² கத்துஸாத⁴னதாபி த³ட்ட²ப்³பா³. தஸ்ஸ ஹி த்³வே தயோ ஜனே கதெ²ந்தே தி³ஸ்வா ‘‘மம தோ³ஸங் மஞ்ஞே கதெ²ந்தீ’’தி தேஸங் ஸமாசாரங் ஸங்காய ஸரதி தா⁴வதி.
Sīlassa duṭṭhu nāma natthi, tasmā abhāvattho idha du-saddoti āha ‘‘nissīlo’’ti. ‘‘Pāpaṃ pāpena sukara’’ntiādīsu (udā. 48; cūḷava. 343) viya pāpa-saddo nihīnapariyāyoti āha ‘‘lāmakadhammo’’ti. Sīlavipattiyā vā dussīlo. Diṭṭhivipattiyā pāpadhammo. Kāyavācāsaṃvarabhedena vā dussīlo, manosaṃvarabhedena, satisaṃvarādibhedena vā pāpadhammo. Asuddhappayogatāya dussīlo, asuddhāsayatāya pāpadhammo. Kusalasīlavirahena dussīlo, akusalasīlasamannāgamena pāpadhammo. Asucīhīti aparisuddhehi. Saṅkāhi saritabbasamācāroti ‘‘imassa maññe idaṃ kamma’’nti evaṃ parehi saṅkāya saritabbasamācāro. Tenāha ‘‘kiñcidevā’’tiādi. Attanāyeva vā saṅkāhi saritabbasamācāroti etenapi kammasādhanataṃyeva saṅkassarasaddassa dasseti. Attano saṅkāya paresaṃ samācārakiriyaṃ sarati āsaṅkati vidhāvatītipi saṅkassarasamācāroti evamettha kattusādhanatāpi daṭṭhabbā. Tassa hi dve tayo jane kathente disvā ‘‘mama dosaṃ maññe kathentī’’ti tesaṃ samācāraṃ saṅkāya sarati dhāvati.
ஏவங்படிஞ்ஞோதி ஸலாகக்³க³ஹணாதீ³ஸு ‘‘கித்தகா விஹாரே ஸமணா’’தி க³ணனாய ஆரத்³தா⁴ய ‘‘அஹம்பி ஸமணோ, அஹம்பி ஸமணோ’’தி படிஞ்ஞங் த³த்வா ஸலாகக்³க³ஹணாதீ³னி கரோதீதி ஸமணோ அஹந்தி ஏவங்ஸமணப்படிஞ்ஞோ. ஸும்ப⁴கபத்தத⁴ரேதி மத்திகாபத்தத⁴ரே. பூதினா கம்மேனாதி ஸங்கிலிட்ட²கம்மேன, நிக்³கு³ணதாய வா கு³ணஸாரவிரஹிதத்தா அந்தோபூதி. கஸம்பு³கசவரோ ஜாதோ ஸஞ்ஜாதோ அஸ்ஸாதி கஸம்பு³ஜாதோதி ஆஹ ‘‘ஸஞ்ஜாதராகா³தி³கசவரோ’’தி. அத² வா கஸம்பு³ வுச்சதி திந்தகுணபகஸடங் உத³கங், இமஸ்மிஞ்ச ஸாஸனே து³ஸ்ஸீலோ நாம ஜிகு³ச்ச²னீயத்தா திந்தகுணபஉத³கஸதி³ஸோ, தஸ்மா கஸம்பு³ விய ஜாதோதி கஸம்பு³ஜாதோ. லோகுத்தரத⁴ம்மஉபனிஸ்ஸயஸ்ஸ நத்தி²தாயாதி யத்த² பதிட்டி²தேன ஸக்கா ப⁴வெய்ய அரஹத்தங் லத்³து⁴ங், தஸ்ஸா பதிட்டா²ய பி⁴ன்னத்தா வுத்தங். மஹாஸீலஸ்மிங் பரிபூரகாரிதாயாதி யத்த² பதிட்டி²தேன ஸக்கா ப⁴வெய்ய அரஹத்தங் பாபுணிதுங், தஸ்மிங் பரிபூரகாரிதாய.
Evaṃpaṭiññoti salākaggahaṇādīsu ‘‘kittakā vihāre samaṇā’’ti gaṇanāya āraddhāya ‘‘ahampi samaṇo, ahampi samaṇo’’ti paṭiññaṃ datvā salākaggahaṇādīni karotīti samaṇo ahanti evaṃsamaṇappaṭiñño. Sumbhakapattadhareti mattikāpattadhare. Pūtinā kammenāti saṃkiliṭṭhakammena, nigguṇatāya vā guṇasāravirahitattā antopūti. Kasambukacavaro jāto sañjāto assāti kasambujātoti āha ‘‘sañjātarāgādikacavaro’’ti. Atha vā kasambu vuccati tintakuṇapakasaṭaṃ udakaṃ, imasmiñca sāsane dussīlo nāma jigucchanīyattā tintakuṇapaudakasadiso, tasmā kasambu viya jātoti kasambujāto. Lokuttaradhammaupanissayassa natthitāyāti yattha patiṭṭhitena sakkā bhaveyya arahattaṃ laddhuṃ, tassā patiṭṭhāya bhinnattā vuttaṃ. Mahāsīlasmiṃ paripūrakāritāyāti yattha patiṭṭhitena sakkā bhaveyya arahattaṃ pāpuṇituṃ, tasmiṃ paripūrakāritāya.
ஆஸங்ஸஸுத்தவண்ணனா நிட்டி²தா.
Āsaṃsasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ஆஸங்ஸஸுத்தங் • 3. Āsaṃsasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. ஆஸங்ஸஸுத்தவண்ணனா • 3. Āsaṃsasuttavaṇṇanā
