| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੩. ਆਸਂਸਸੁਤ੍ਤવਣ੍ਣਨਾ
3. Āsaṃsasuttavaṇṇanā
੧੩. ਤਤਿਯੇ ਸਨ੍ਤੋਤਿ ਅਤ੍ਥਿ ਉਪਲਬ੍ਭਨ੍ਤਿ। ਸਂવਿਜ੍ਜਮਾਨਾਤਿ ਤਸ੍ਸੇવ વੇવਚਨਂ। ਲੋਕਸ੍ਮਿਨ੍ਤਿ ਸਤ੍ਤਲੋਕੇ। ਨਿਰਾਸੋਤਿ ਅਨਾਸੋ ਅਪਤ੍ਥਨੋ। ਆਸਂਸੋਤਿ ਆਸਂਸਮਾਨੋ ਪਤ੍ਥਯਮਾਨੋ। વਿਗਤਾਸੋਤਿ ਅਪਗਤਾਸੋ। ਚਣ੍ਡਾਲਕੁਲੇਤਿ ਚਣ੍ਡਾਲਾਨਂ ਕੁਲੇ। વੇਨਕੁਲੇਤਿ વਿਲੀવਕਾਰਕੁਲੇ। ਨੇਸਾਦਕੁਲੇਤਿ ਮਿਗਲੁਦ੍ਦਕਾਨਂ ਕੁਲੇ। ਰਥਕਾਰਕੁਲੇਤਿ ਚਮ੍ਮਕਾਰਕੁਲੇ। ਪੁਕ੍ਕੁਸਕੁਲੇਤਿ ਪੁਪ੍ਫਚ੍ਛਡ੍ਡਕਕੁਲੇ।
13. Tatiye santoti atthi upalabbhanti. Saṃvijjamānāti tasseva vevacanaṃ. Lokasminti sattaloke. Nirāsoti anāso apatthano. Āsaṃsoti āsaṃsamāno patthayamāno. Vigatāsoti apagatāso. Caṇḍālakuleti caṇḍālānaṃ kule. Venakuleti vilīvakārakule. Nesādakuleti migaluddakānaṃ kule. Rathakārakuleti cammakārakule. Pukkusakuleti pupphacchaḍḍakakule.
ਏਤ੍ਤਾવਤਾ ਕੁਲવਿਪਤ੍ਤਿਂ ਦਸ੍ਸੇਤ੍વਾ ਇਦਾਨਿ ਯਸ੍ਮਾ ਨੀਚਕੁਲੇ ਜਾਤੋਪਿ ਏਕਚ੍ਚੋ ਅਡ੍ਢੋ ਹੋਤਿ ਮਹਦ੍ਧਨੋ, ਅਯਂ ਪਨ ਨ ਤਾਦਿਸੋ, ਤਸ੍ਮਾਸ੍ਸ ਭੋਗવਿਪਤ੍ਤਿਂ ਦਸ੍ਸੇਤੁਂ ਦਲਿਦ੍ਦੇਤਿਆਦਿਮਾਹ। ਤਤ੍ਥ ਦਲਿਦ੍ਦੇਤਿ ਦਾਲਿਦ੍ਦਿਯੇਨ ਸਮਨ੍ਨਾਗਤੇ। ਅਪ੍ਪਨ੍ਨਪਾਨਭੋਜਨੇਤਿ ਪਰਿਤ੍ਤਕਅਨ੍ਨਪਾਨਭੋਜਨੇ। ਕਸਿਰવੁਤ੍ਤਿਕੇਤਿ ਦੁਕ੍ਖਜੀવਿਕੇ, ਯਤ੍ਥ વਾਯਾਮੇਨ ਪਯੋਗੇਨ ਜੀવਿਤવੁਤ੍ਤਿਂ ਸਾਧੇਨ੍ਤਿ, ਤਥਾਰੂਪੇਤਿ ਅਤ੍ਥੋ। ਯਤ੍ਥ ਕਸਿਰੇਨ ਘਾਸਚ੍ਛਾਦੋ ਲਬ੍ਭਤੀਤਿ ਯਸ੍ਮਿਂ ਕੁਲੇ ਦੁਕ੍ਖੇਨ ਯਾਗੁਭਤ੍ਤਘਾਸੋ ਚ ਕੋਪੀਨਮਤ੍ਤਂ ਅਚ੍ਛਾਦਨਞ੍ਚ ਲਬ੍ਭਤਿ।
Ettāvatā kulavipattiṃ dassetvā idāni yasmā nīcakule jātopi ekacco aḍḍho hoti mahaddhano, ayaṃ pana na tādiso, tasmāssa bhogavipattiṃ dassetuṃ daliddetiādimāha. Tattha daliddeti dāliddiyena samannāgate. Appannapānabhojaneti parittakaannapānabhojane. Kasiravuttiketi dukkhajīvike, yattha vāyāmena payogena jīvitavuttiṃ sādhenti, tathārūpeti attho. Yattha kasirena ghāsacchādo labbhatīti yasmiṃ kule dukkhena yāgubhattaghāso ca kopīnamattaṃ acchādanañca labbhati.
ਇਦਾਨਿ ਯਸ੍ਮਾ ਏਕਚ੍ਚੋ ਨੀਚਕੁਲੇ ਜਾਤੋਪਿ ਉਪਧਿਸਮ੍ਪਨ੍ਨੋ ਹੋਤਿ ਅਤ੍ਤਭਾવਸਮਿਦ੍ਧਿਯਂ ਠਿਤੋ , ਅਯਞ੍ਚ ਨ ਤਾਦਿਸੋ, ਤਸ੍ਮਾਸ੍ਸ ਸਰੀਰવਿਪਤ੍ਤਿਮ੍ਪਿ ਦਸ੍ਸੇਤੁਂ ਸੋ ਚ ਹੋਤਿ ਦੁਬ੍ਬਣ੍ਣੋਤਿਆਦਿਮਾਹ। ਤਤ੍ਥ ਦੁਬ੍ਬਣ੍ਣੋਤਿ ਪਂਸੁਪਿਸਾਚਕੋ વਿਯ ਝਾਮਖਾਣੁવਣ੍ਣੋ। ਦੁਦ੍ਦਸਿਕੋਤਿ વਿਜਾਤਮਾਤੁਯਾਪਿ ਅਮਨਾਪਦਸ੍ਸਨੋ। ਓਕੋਟਿਮਕੋਤਿ ਲਕੁਣ੍ਡਕੋ। ਕਾਣੋਤਿ ਏਕਕ੍ਖਿਕਾਣੋ વਾ ਉਭਯਕ੍ਖਿਕਾਣੋ વਾ। ਕੁਣੀਤਿ ਏਕਹਤ੍ਥਕੁਣੀ વਾ ਉਭਯਹਤ੍ਥਕੁਣੀ વਾ। ਖਞ੍ਜੋਤਿ ਏਕਪਾਦਖਞ੍ਜੋ વਾ ਉਭਯਪਾਦਖਞ੍ਜੋ વਾ। ਪਕ੍ਖਹਤੋਤਿ ਹਤਪਕ੍ਖੋ ਪੀਠਸਪ੍ਪੀ। ਪਦੀਪੇਯ੍ਯਸ੍ਸਾਤਿ વਟ੍ਟਿਤੇਲਕਪਲ੍ਲਕਾਦਿਨੋ ਪਦੀਪਉਪਕਰਣਸ੍ਸ। ਤਸ੍ਸ ਨ ਏવਂ ਹੋਤੀਤਿ। ਕਸ੍ਮਾ ਨ ਹੋਤਿ? ਨੀਚਕੁਲੇ ਜਾਤਤ੍ਤਾ।
Idāni yasmā ekacco nīcakule jātopi upadhisampanno hoti attabhāvasamiddhiyaṃ ṭhito , ayañca na tādiso, tasmāssa sarīravipattimpi dassetuṃ so ca hoti dubbaṇṇotiādimāha. Tattha dubbaṇṇoti paṃsupisācako viya jhāmakhāṇuvaṇṇo. Duddasikoti vijātamātuyāpi amanāpadassano. Okoṭimakoti lakuṇḍako. Kāṇoti ekakkhikāṇo vā ubhayakkhikāṇo vā. Kuṇīti ekahatthakuṇī vā ubhayahatthakuṇī vā. Khañjoti ekapādakhañjo vā ubhayapādakhañjo vā. Pakkhahatoti hatapakkho pīṭhasappī. Padīpeyyassāti vaṭṭitelakapallakādino padīpaupakaraṇassa. Tassa na evaṃ hotīti. Kasmā na hoti? Nīcakule jātattā.
ਜੇਟ੍ਠੋਤਿ ਅਞ੍ਞਸ੍ਮਿਂ ਜੇਟ੍ਠੇ ਸਤਿ ਕਨਿਟ੍ਠੋ ਆਸਂ ਨ ਕਰੋਤਿ, ਤਸ੍ਮਾ ਜੇਟ੍ਠੋਤਿ ਆਹ। ਆਭਿਸੇਕੋਤਿ ਜੇਟ੍ਠੋਪਿ ਨ ਅਭਿਸੇਕਾਰਹੋ ਆਸਂ ਨ ਕਰੋਤਿ, ਤਸ੍ਮਾ ਆਭਿਸੇਕੋਤਿ ਆਹ। ਅਨਭਿਸਿਤ੍ਤੋਤਿ ਅਭਿਸੇਕਾਰਹੋਪਿ ਕਾਣਕੁਣਿਆਦਿਦੋਸਰਹਿਤੋ ਸਕਿਂ ਅਭਿਸਿਤ੍ਤੋ ਪੁਨ ਅਭਿਸੇਕੇ ਆਸਂ ਨ ਕਰੋਤਿ, ਤਸ੍ਮਾ ਅਨਭਿਸਿਤ੍ਤੋਤਿ ਆਹ । ਅਚਲਪ੍ਪਤ੍ਤੋਤਿ ਜੇਟ੍ਠੋਪਿ ਆਭਿਸੇਕੋ ਅਨਭਿਸਿਤ੍ਤੋ ਮਨ੍ਦੋ ਉਤ੍ਤਾਨਸੇਯ੍ਯਕੋ, ਸੋਪਿ ਅਭਿਸੇਕੇ ਆਸਂ ਨ ਕਰੋਤਿ। ਸੋਲ਼ਸવਸ੍ਸੁਦ੍ਦੇਸਿਕੋ ਪਨ ਪਞ੍ਞਾਯਮਾਨਮਸ੍ਸੁਭੇਦੋ ਅਚਲਪ੍ਪਤ੍ਤੋ ਨਾਮ ਹੋਤਿ, ਮਹਨ੍ਤਮ੍ਪਿ ਰਜ੍ਜਂ વਿਚਾਰੇਤੁਂ ਸਮਤ੍ਥੋ, ਤਸ੍ਮਾ ‘‘ਅਚਲਪ੍ਪਤ੍ਤੋ’’ਤਿ ਆਹ। ਤਸ੍ਸ ਏવਂ ਹੋਤੀਤਿ ਕਸ੍ਮਾ ਹੋਤਿ? ਮਹਾਜਾਤਿਤਾਯ।
Jeṭṭhoti aññasmiṃ jeṭṭhe sati kaniṭṭho āsaṃ na karoti, tasmā jeṭṭhoti āha. Ābhisekoti jeṭṭhopi na abhisekāraho āsaṃ na karoti, tasmā ābhisekoti āha. Anabhisittoti abhisekārahopi kāṇakuṇiādidosarahito sakiṃ abhisitto puna abhiseke āsaṃ na karoti, tasmā anabhisittoti āha . Acalappattoti jeṭṭhopi ābhiseko anabhisitto mando uttānaseyyako, sopi abhiseke āsaṃ na karoti. Soḷasavassuddesiko pana paññāyamānamassubhedo acalappatto nāma hoti, mahantampi rajjaṃ vicāretuṃ samattho, tasmā ‘‘acalappatto’’ti āha. Tassa evaṃ hotīti kasmā hoti? Mahājātitāya.
ਦੁਸ੍ਸੀਲੋਤਿ ਨਿਸ੍ਸੀਲੋ। ਪਾਪਧਮ੍ਮੋਤਿ ਲਾਮਕਧਮ੍ਮੋ। ਅਸੁਚੀਤਿ ਅਸੁਚੀਹਿ ਕਾਯਕਮ੍ਮਾਦੀਹਿ ਸਮਨ੍ਨਾਗਤੋ। ਸਙ੍ਕਸ੍ਸਰਸਮਾਚਾਰੋਤਿ ਸਙ੍ਕਾਹਿ ਸਰਿਤਬ੍ਬਸਮਾਚਾਰੋ, ਕਿਞ੍ਚਿਦੇવ ਅਸਾਰੁਪ੍ਪਂ ਦਿਸ੍વਾ ‘‘ਇਦਂ ਇਮਿਨਾ ਕਤਂ ਭવਿਸ੍ਸਤੀ’’ਤਿ ਏવਂ ਪਰੇਸਂ ਆਸਙ੍ਕਨੀਯਸਮਾਚਾਰੋ, ਅਤ੍ਤਨਾਯੇવ વਾ ਸਙ੍ਕਾਹਿ ਸਰਿਤਬ੍ਬਸਮਾਚਾਰੋ, ਸਾਸਙ੍ਕਸਮਾਚਾਰੋਤਿ ਅਤ੍ਥੋ। ਤਸ੍ਸ ਹਿ ਦਿવਾਟ੍ਠਾਨਾਦੀਸੁ ਸਨ੍ਨਿਪਤਿਤ੍વਾ ਕਿਞ੍ਚਿਦੇવ ਮਨ੍ਤਯਨ੍ਤੇ ਭਿਕ੍ਖੂ ਦਿਸ੍વਾ ‘‘ਇਮੇ ਏਕਤੋ ਹੁਤ੍વਾ ਮਨ੍ਤੇਨ੍ਤਿ, ਕਚ੍ਚਿ ਨੁ ਖੋ ਮਯਾ ਕਤਕਮ੍ਮਂ ਜਾਨਿਤ੍વਾ ਮਨ੍ਤੇਨ੍ਤੀ’’ਤਿ ਏવਂ ਸਾਸਙ੍ਕਸਮਾਚਾਰੋ ਹੋਤਿ। ਪਟਿਚ੍ਛਨ੍ਨਕਮ੍ਮਨ੍ਤੋਤਿ ਪਟਿਚ੍ਛਾਦੇਤਬ੍ਬਯੁਤ੍ਤਕੇਨ ਪਾਪਕਮ੍ਮੇਨ ਸਮਨ੍ਨਾਗਤੋ। ਅਸ੍ਸਮਣੋ ਸਮਣਪਟਿਞ੍ਞੋਤਿ ਅਸ੍ਸਮਣੋ ਹੁਤ੍વਾવ ਸਮਣਪਤਿਰੂਪਕਤਾਯ ‘‘ਸਮਣੋ ਅਹ’’ਨ੍ਤਿ ਏવਂ ਪਟਿਞ੍ਞੋ। ਅਬ੍ਰਹ੍ਮਚਾਰੀ ਬ੍ਰਹ੍ਮਚਾਰਿਪਟਿਞ੍ਞੋਤਿ ਅਞ੍ਞੇ ਬ੍ਰਹ੍ਮਚਾਰਿਨੋ ਸੁਨਿવਤ੍ਥੇ ਸੁਪਾਰੁਤੇ ਸੁਮ੍ਭਕਪਤ੍ਤਧਰੇ ਗਾਮਨਿਗਮਰਾਜਧਾਨੀਸੁ ਪਿਣ੍ਡਾਯ ਚਰਿਤ੍વਾ ਜੀવਿਕਂ ਕਪ੍ਪੇਨ੍ਤੇ ਦਿਸ੍વਾ ਸਯਮ੍ਪਿ ਤਾਦਿਸੇਨ ਆਕਾਰੇਨ ਤਥਾ ਪਟਿਪਜ੍ਜਨਤੋ ‘‘ਅਹਂ ਬ੍ਰਹ੍ਮਚਾਰੀ’’ਤਿ ਪਟਿਞ੍ਞਂ ਦੇਨ੍ਤੋ વਿਯ ਹੋਤਿ। ‘‘ਅਹਂ ਭਿਕ੍ਖੂ’’ਤਿ વਤ੍વਾ ਉਪੋਸਥਗ੍ਗਾਦੀਨਿ ਪવਿਸਨ੍ਤੋ ਪਨ ਬ੍ਰਹ੍ਮਚਾਰਿਪਟਿਞ੍ਞੋ ਹੋਤਿਯੇવ, ਤਥਾ ਸਙ੍ਘਿਕਂ ਲਾਭਂ ਗਣ੍ਹਨ੍ਤੋ। ਅਨ੍ਤੋਪੂਤੀਤਿ ਪੂਤਿਨਾ ਕਮ੍ਮੇਨ ਅਨ੍ਤੋ ਅਨੁਪવਿਟ੍ਠੋ। ਅવਸ੍ਸੁਤੋਤਿ ਰਾਗਾਦੀਹਿ ਤਿਨ੍ਤੋ। ਕਸਮ੍ਬੁਜਾਤੋਤਿ ਸਞ੍ਜਾਤਰਾਗਾਦਿਕਚવਰੋ। ਤਸ੍ਸ ਨ ਏવਂ ਹੋਤੀਤਿ। ਕਸ੍ਮਾ ਨ ਹੋਤਿ? ਲੋਕੁਤ੍ਤਰਧਮ੍ਮਉਪਨਿਸ੍ਸਯਸ੍ਸ ਨਤ੍ਥਿਤਾਯ। ਤਸ੍ਸ ਏવਂ ਹੋਤੀਤਿ। ਕਸ੍ਮਾ ਹੋਤਿ? ਮਹਾਸੀਲਸ੍ਮਿਂ ਪਰਿਪੂਰਕਾਰਿਤਾਯ।
Dussīloti nissīlo. Pāpadhammoti lāmakadhammo. Asucīti asucīhi kāyakammādīhi samannāgato. Saṅkassarasamācāroti saṅkāhi saritabbasamācāro, kiñcideva asāruppaṃ disvā ‘‘idaṃ iminā kataṃ bhavissatī’’ti evaṃ paresaṃ āsaṅkanīyasamācāro, attanāyeva vā saṅkāhi saritabbasamācāro, sāsaṅkasamācāroti attho. Tassa hi divāṭṭhānādīsu sannipatitvā kiñcideva mantayante bhikkhū disvā ‘‘ime ekato hutvā mantenti, kacci nu kho mayā katakammaṃ jānitvā mantentī’’ti evaṃ sāsaṅkasamācāro hoti. Paṭicchannakammantoti paṭicchādetabbayuttakena pāpakammena samannāgato. Assamaṇo samaṇapaṭiññoti assamaṇo hutvāva samaṇapatirūpakatāya ‘‘samaṇo aha’’nti evaṃ paṭiñño. Abrahmacārī brahmacāripaṭiññoti aññe brahmacārino sunivatthe supārute sumbhakapattadhare gāmanigamarājadhānīsu piṇḍāya caritvā jīvikaṃ kappente disvā sayampi tādisena ākārena tathā paṭipajjanato ‘‘ahaṃ brahmacārī’’ti paṭiññaṃ dento viya hoti. ‘‘Ahaṃ bhikkhū’’ti vatvā uposathaggādīni pavisanto pana brahmacāripaṭiñño hotiyeva, tathā saṅghikaṃ lābhaṃ gaṇhanto. Antopūtīti pūtinā kammena anto anupaviṭṭho. Avassutoti rāgādīhi tinto. Kasambujātoti sañjātarāgādikacavaro. Tassa na evaṃ hotīti. Kasmā na hoti? Lokuttaradhammaupanissayassa natthitāya. Tassaevaṃ hotīti. Kasmā hoti? Mahāsīlasmiṃ paripūrakāritāya.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੩. ਆਸਂਸਸੁਤ੍ਤਂ • 3. Āsaṃsasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੩. ਆਸਂਸਸੁਤ੍ਤવਣ੍ਣਨਾ • 3. Āsaṃsasuttavaṇṇanā
