| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๒๗. อสํวาสนิเทฺทสวณฺณนา
27. Asaṃvāsaniddesavaṇṇanā
๑๙๘. อุกฺขิโตฺตติ กมฺมนานาสํวาสกสงฺขาโต อาปตฺติยา อทสฺสเน, อปฺปฎิกเมฺม, ปาปิกาย ทิฎฺฐิยา อปฺปฎินิสฺสเคฺค อุกฺขิตฺตโกฯ อนุปสมฺปโนฺนติ สิกฺขมานสามเณรสามเณริสิกฺขาปจฺจกฺขาตสงฺขาโต อนุปสมฺปโนฺนฯ ฉินฺนมูลโกติ อนฺติมวตฺถุอชฺฌาปโนฺนฯ อุกฺขิตฺตเกสุ ‘‘ธมฺมวาทิโน เอเต’’ติ อุปฺปนฺนาย ลทฺธิยา นานาภูโต สํวาโส เอตสฺสาติ นานาสํวาโส, อุกฺขิตฺตานุวตฺตกสงฺขาโต ลทฺธินานาสํวาสโกฯ สีมโต นิคฺคตา นิสฺสีมา, สีมนฺตริกา พหิสีมา จ, ตตฺถ หตฺถปาเส เจปิ ฐิโต, สีมานานาสํวาสโก นิสฺสีมฎฺฐิโตฯ เวหายเส อากาเส ฐิโต เวหายสณฺฐิโต พินฺทาคเมนฯ ตตฺถ ‘‘นานาสํวาโส จา’’ติอาทินา สมาหารทฺวเนฺทปิ กฺวจิ นปุํสกลิงฺคํ พฺยภิจรตีติ นปุํสกตฺตาภาโว ยถา ‘‘มคฺคามโคฺค’’ติฯ เอกกมฺมํ เอกุเทฺทโส สมสิกฺขตาติ อยํ ติวิโธปิ สํวาโส นามฯ โส เยสํ นตฺถิ, เต อสํวาสาฯ เอเต หตฺถปาสโต พหิกรณวเสน วเชฺชตพฺพาฯ เอเตสุ หิ ติวิเธ อุกฺขิตฺตเก สติ อุโปสถาทิกํ กมฺมํ กโรนฺตสฺส ปาจิตฺติยํ, อิตเรสุ ทุกฺกฎนฺติฯ
198.Ukkhittoti kammanānāsaṃvāsakasaṅkhāto āpattiyā adassane, appaṭikamme, pāpikāya diṭṭhiyā appaṭinissagge ukkhittako. Anupasampannoti sikkhamānasāmaṇerasāmaṇerisikkhāpaccakkhātasaṅkhāto anupasampanno. Chinnamūlakoti antimavatthuajjhāpanno. Ukkhittakesu ‘‘dhammavādino ete’’ti uppannāya laddhiyā nānābhūto saṃvāso etassāti nānāsaṃvāso, ukkhittānuvattakasaṅkhāto laddhinānāsaṃvāsako. Sīmato niggatā nissīmā, sīmantarikā bahisīmā ca, tattha hatthapāse cepi ṭhito, sīmānānāsaṃvāsako nissīmaṭṭhito. Vehāyase ākāse ṭhito vehāyasaṇṭhito bindāgamena. Tattha ‘‘nānāsaṃvāso cā’’tiādinā samāhāradvandepi kvaci napuṃsakaliṅgaṃ byabhicaratīti napuṃsakattābhāvo yathā ‘‘maggāmaggo’’ti. Ekakammaṃ ekuddeso samasikkhatāti ayaṃ tividhopi saṃvāso nāma. So yesaṃ natthi, te asaṃvāsā. Ete hatthapāsato bahikaraṇavasena vajjetabbā. Etesu hi tividhe ukkhittake sati uposathādikaṃ kammaṃ karontassa pācittiyaṃ, itaresu dukkaṭanti.
อสํวาสนิเทฺทสวณฺณนา นิฎฺฐิตาฯ
Asaṃvāsaniddesavaṇṇanā niṭṭhitā.
