| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၂၇. အသံဝာသိကနိဒ္ဒေသဝဏ္ဏနာ
27. Asaṃvāsikaniddesavaṇṇanā
၁၉၈. ဥက္ခိတ္တောတိ အာပတ္တိယာ အဒသ္သနေ, အပ္ပဋိကမ္မေ, ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဝာ ဥက္ခိတ္တကောတိ တိဝိဓောပိ ဣဓ ဥက္ခိတ္တော ဂဟိတော။ အနုပသမ္ပန္နောတိ ဣမိနာ သိက္ခမာနသာမဏေရသာမဏေရီသိက္ခာပစ္စက္ခာတကာ ဂဟိတာတိ ဝေဒိတဗ္ဗာ။ ဆိန္နမူလကော နာမ အန္တိမဝတ္ထုံ အဇ္ဈာပန္နကော။ နာနာသံဝာသောတိ လဒ္ဓိနာနာသံဝာသကော။ ‘‘နာနာသီမာယ ဌိတစတုတ္ထော ကမ္မံ ကရေယ္ယ, ဣဒ္ဓိယာ ဝေဟာသေ ဌိတစတုတ္ထော ကမ္မံ ကရေယ္ယ, အကမ္မံ န စ ကရဏီယ’’န္တိ ဟိ ဝုတ္တတ္တာ ဣမေပိ ‘‘အသံဝာသိကာ’’တိ ဝုတ္တာ။ ဧတေသု ပန ဥက္ခိတ္တကေဟိ သဒ္ဓိံ ဥပောသထာဒီနိ ကရောန္တော ပာစိတ္တိယံ အာပဇ္ဇတိ။ နိသ္သီမဋ္ဌဝေဟာသဋ္ဌေဟိ ကရောန္တသ္သ ကမ္မံ ကုပ္ပတိ, ဒုက္ကဋဉ္စ ဟောတိ, ဣတရေဟိ ဒုက္ကဋံ။ အသံဝာသိကဝိနိစ္ဆယော။
198.Ukkhittoti āpattiyā adassane, appaṭikamme, pāpikāya diṭṭhiyā appaṭinissagge vā ukkhittakoti tividhopi idha ukkhitto gahito. Anupasampannoti iminā sikkhamānasāmaṇerasāmaṇerīsikkhāpaccakkhātakā gahitāti veditabbā. Chinnamūlako nāma antimavatthuṃ ajjhāpannako. Nānāsaṃvāsoti laddhinānāsaṃvāsako. ‘‘Nānāsīmāya ṭhitacatuttho kammaṃ kareyya, iddhiyā vehāse ṭhitacatuttho kammaṃ kareyya, akammaṃ na ca karaṇīya’’nti hi vuttattā imepi ‘‘asaṃvāsikā’’ti vuttā. Etesu pana ukkhittakehi saddhiṃ uposathādīni karonto pācittiyaṃ āpajjati. Nissīmaṭṭhavehāsaṭṭhehi karontassa kammaṃ kuppati, dukkaṭañca hoti, itarehi dukkaṭaṃ. Asaṃvāsikavinicchayo.
အသံဝာသိကနိဒ္ဒေသဝဏ္ဏနာ နိဋ္ဌိတာ။
Asaṃvāsikaniddesavaṇṇanā niṭṭhitā.
