| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. অসনবোধিযত্থেরঅপদানৰণ্ণনা
10. Asanabodhiyattheraapadānavaṇṇanā
জাতিযা সত্তৰস্সোহন্তিআদিকং আযস্মতো অসনবোধিযত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো তিস্সস্স ভগৰতো কালে অঞ্ঞতরস্মিং কুলগেহে নিব্বত্তো ৰুদ্ধিপ্পত্তো সুখপ্পত্তো সাসনে পসন্নো অসনবোধিতো ফলং গহেত্ৰা ততো ৰুট্ঠিতবোধিতরুণে গহেত্ৰা বোধিং রোপেসি, যথা ন ৰিনস্সতি তথা উদকাসিঞ্চনাদিকম্মেন রক্খিত্ৰা পূজেসি। সো তেন পুঞ্ঞেন দেৰমনুস্সেসু সম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো পরিপক্কসম্ভারত্তা সত্তৰস্সিকোৰ সমানো পব্বজিত্ৰা খুরগ্গেযেৰ অরহত্তং পাপুণি, পুরাকতপুঞ্ঞনামেন অসনবোধিযত্থেরোতি পাকটো।
Jātiyā sattavassohantiādikaṃ āyasmato asanabodhiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle aññatarasmiṃ kulagehe nibbatto vuddhippatto sukhappatto sāsane pasanno asanabodhito phalaṃ gahetvā tato vuṭṭhitabodhitaruṇe gahetvā bodhiṃ ropesi, yathā na vinassati tathā udakāsiñcanādikammena rakkhitvā pūjesi. So tena puññena devamanussesu sampattiyo anubhavitvā imasmiṃ buddhuppāde kulagehe nibbatto paripakkasambhārattā sattavassikova samāno pabbajitvā khuraggeyeva arahattaṃ pāpuṇi, purākatapuññanāmena asanabodhiyattheroti pākaṭo.
৭৮. সো পুব্বসম্ভারমনুস্সরিত্ৰা সোমনস্সজাতো পুব্বচরিতাপদানং পকাসেন্তো জাতিযা সত্তৰস্সোহন্তিআদিমাহ। তত্থ জাতিযাতি মাতুগব্ভতো নিক্খন্তকালতো পট্ঠাযাতি অত্থো। সত্তৰস্সো পরিপুণ্ণসরদো অহং লোকনাযকং তিস্সং ভগৰন্তং অদ্দসন্তি সম্বন্ধো। পসন্নচিত্তো সুমনোতি পকারেন পসন্নঅনালুল়িতঅৰিকম্পিতচিত্তো, সুমনো সুন্দরমনো সোমনস্সসহগতচিত্তোতি অত্থো।
78. So pubbasambhāramanussaritvā somanassajāto pubbacaritāpadānaṃ pakāsento jātiyā sattavassohantiādimāha. Tattha jātiyāti mātugabbhato nikkhantakālato paṭṭhāyāti attho. Sattavasso paripuṇṇasarado ahaṃ lokanāyakaṃ tissaṃ bhagavantaṃ addasanti sambandho. Pasannacitto sumanoti pakārena pasannaanāluḷitaavikampitacitto, sumano sundaramano somanassasahagatacittoti attho.
৭৯. তিস্সস্সাহং ভগৰতোতি তিক্খত্তুং জাতোতি তিস্সো, সো মাতুগব্ভতো, মনুস্সজাতিতো, পঞ্চক্খন্ধতো চ মুত্তো হুত্ৰা জাতো নিব্বত্তো বুদ্ধো জাতোতি অত্থো। তস্স তিস্সস্স ভগৰতো তাদিনো, লোকজেট্ঠস্স অসনবোধিং উত্তমং রোপযিন্তি সম্বন্ধো।
79.Tissassāhaṃ bhagavatoti tikkhattuṃ jātoti tisso, so mātugabbhato, manussajātito, pañcakkhandhato ca mutto hutvā jāto nibbatto buddho jātoti attho. Tassa tissassa bhagavato tādino, lokajeṭṭhassa asanabodhiṃ uttamaṃ ropayinti sambandho.
৮০. অসনো নামধেয্যেনাতি নামপঞ্ঞত্তিযা নামসঞ্ঞায অসনো নাম অসনরুক্খো বোধি অহোসীতি অত্থো। ধরণীরুহপাদপোতি ৰল্লিরুক্খপব্বতগঙ্গাসাগরাদযো ধারেতীতি ধরণী, কা সা? পথৰী, তস্সং রুহতি পতিট্ঠহতীতি ধরণীরুহো, পাদেন পিৰতীতি পাদপো, পাদসঙ্খাতেন মূলেন সিঞ্চিতোদকং পিৰতি আপোরসং সিনেহং ধারেতীতি অত্থো। ধরণীরুহো চ সো পাদপো চাতি ধরণীরুহপাদপো, তং উত্তমং অসনং বোধিং পঞ্চ ৰস্সানি পরিচরিং পোসেসিন্তি অত্থো।
80.Asano nāmadheyyenāti nāmapaññattiyā nāmasaññāya asano nāma asanarukkho bodhi ahosīti attho. Dharaṇīruhapādapoti vallirukkhapabbatagaṅgāsāgarādayo dhāretīti dharaṇī, kā sā? Pathavī, tassaṃ ruhati patiṭṭhahatīti dharaṇīruho, pādena pivatīti pādapo, pādasaṅkhātena mūlena siñcitodakaṃ pivati āporasaṃ sinehaṃ dhāretīti attho. Dharaṇīruho ca so pādapo cāti dharaṇīruhapādapo, taṃ uttamaṃ asanaṃ bodhiṃ pañca vassāni paricariṃ posesinti attho.
৮১. পুপ্ফিতং পাদপং দিস্ৰাতি তং মযা পোসিতং অসনবোধিরুক্খং পুপ্ফিতং অচ্ছরযোগ্গভূতপুপ্ফত্তা অব্ভুতং লোমহংসকরণং দিস্ৰা সকং কম্মং অত্তনো কম্মং পকিত্তেন্তো পকারেন কথযন্তো বুদ্ধসেট্ঠস্স সন্তিকং অগমাসিন্তি অত্থো। সেসং সব্বত্থ উত্তানত্থমেৰাতি।
81.Pupphitaṃ pādapaṃ disvāti taṃ mayā positaṃ asanabodhirukkhaṃ pupphitaṃ accharayoggabhūtapupphattā abbhutaṃ lomahaṃsakaraṇaṃ disvā sakaṃkammaṃ attano kammaṃ pakittento pakārena kathayanto buddhaseṭṭhassa santikaṃ agamāsinti attho. Sesaṃ sabbattha uttānatthamevāti.
অসনবোধিযত্থেরঅপদানৰণ্ণনা সমত্তা।
Asanabodhiyattheraapadānavaṇṇanā samattā.
ছট্ঠৰগ্গৰণ্ণনা সমত্তা।
Chaṭṭhavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১০. অসনবোধিযত্থেরঅপদানং • 10. Asanabodhiyattheraapadānaṃ
