| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၁၀. အသနဗောဓိယတ္ထေရအပဒာနဝဏ္ဏနာ
10. Asanabodhiyattheraapadānavaṇṇanā
ဇာတိယာ သတ္တဝသ္သောဟန္တိအာဒိကံ အာယသ္မတော အသနဗောဓိယတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော တိသ္သသ္သ ဘဂဝတော ကာလေ အညတရသ္မိံ ကုလဂေဟေ နိဗ္ဗတ္တော ဝုဒ္ဓိပ္ပတ္တော သုခပ္ပတ္တော သာသနေ ပသန္နော အသနဗောဓိတော ဖလံ ဂဟေတ္ဝာ တတော ဝုဋ္ဌိတဗောဓိတရုဏေ ဂဟေတ္ဝာ ဗောဓိံ ရောပေသိ, ယထာ န ဝိနသ္သတိ တထာ ဥဒကာသိဉ္စနာဒိကမ္မေန ရက္ခိတ္ဝာ ပူဇေသိ။ သော တေန ပုညေန ဒေဝမနုသ္သေသု သမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ပရိပက္ကသမ္ဘာရတ္တာ သတ္တဝသ္သိကောဝ သမာနော ပဗ္ဗဇိတ္ဝာ ခုရဂ္ဂေယေဝ အရဟတ္တံ ပာပုဏိ, ပုရာကတပုညနာမေန အသနဗောဓိယတ္ထေရောတိ ပာကဋော။
Jātiyā sattavassohantiādikaṃ āyasmato asanabodhiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle aññatarasmiṃ kulagehe nibbatto vuddhippatto sukhappatto sāsane pasanno asanabodhito phalaṃ gahetvā tato vuṭṭhitabodhitaruṇe gahetvā bodhiṃ ropesi, yathā na vinassati tathā udakāsiñcanādikammena rakkhitvā pūjesi. So tena puññena devamanussesu sampattiyo anubhavitvā imasmiṃ buddhuppāde kulagehe nibbatto paripakkasambhārattā sattavassikova samāno pabbajitvā khuraggeyeva arahattaṃ pāpuṇi, purākatapuññanāmena asanabodhiyattheroti pākaṭo.
၇၈. သော ပုဗ္ဗသမ္ဘာရမနုသ္သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ဇာတိယာ သတ္တဝသ္သောဟန္တိအာဒိမာဟ။ တတ္ထ ဇာတိယာတိ မာတုဂဗ္ဘတော နိက္ခန္တကာလတော ပဋ္ဌာယာတိ အတ္ထော။ သတ္တဝသ္သော ပရိပုဏ္ဏသရဒော အဟံ လောကနာယကံ တိသ္သံ ဘဂဝန္တံ အဒ္ဒသန္တိ သမ္ဗန္ဓော။ ပသန္နစိတ္တော သုမနောတိ ပကာရေန ပသန္နအနာလုဠိတအဝိကမ္ပိတစိတ္တော, သုမနော သုန္ဒရမနော သောမနသ္သသဟဂတစိတ္တောတိ အတ္ထော။
78. So pubbasambhāramanussaritvā somanassajāto pubbacaritāpadānaṃ pakāsento jātiyā sattavassohantiādimāha. Tattha jātiyāti mātugabbhato nikkhantakālato paṭṭhāyāti attho. Sattavasso paripuṇṇasarado ahaṃ lokanāyakaṃ tissaṃ bhagavantaṃ addasanti sambandho. Pasannacitto sumanoti pakārena pasannaanāluḷitaavikampitacitto, sumano sundaramano somanassasahagatacittoti attho.
၇၉. တိသ္သသ္သာဟံ ဘဂဝတောတိ တိက္ခတ္တုံ ဇာတောတိ တိသ္သော, သော မာတုဂဗ္ဘတော, မနုသ္သဇာတိတော, ပဉ္စက္ခန္ဓတော စ မုတ္တော ဟုတ္ဝာ ဇာတော နိဗ္ဗတ္တော ဗုဒ္ဓော ဇာတောတိ အတ္ထော။ တသ္သ တိသ္သသ္သ ဘဂဝတော တာဒိနော, လောကဇေဋ္ဌသ္သ အသနဗောဓိံ ဥတ္တမံ ရောပယိန္တိ သမ္ဗန္ဓော။
79.Tissassāhaṃ bhagavatoti tikkhattuṃ jātoti tisso, so mātugabbhato, manussajātito, pañcakkhandhato ca mutto hutvā jāto nibbatto buddho jātoti attho. Tassa tissassa bhagavato tādino, lokajeṭṭhassa asanabodhiṃ uttamaṃ ropayinti sambandho.
၈၀. အသနော နာမဓေယ္ယေနာတိ နာမပညတ္တိယာ နာမသညာယ အသနော နာမ အသနရုက္ခော ဗောဓိ အဟောသီတိ အတ္ထော။ ဓရဏီရုဟပာဒပောတိ ဝလ္လိရုက္ခပဗ္ဗတဂင္ဂာသာဂရာဒယော ဓာရေတီတိ ဓရဏီ, ကာ သာ? ပထဝီ, တသ္သံ ရုဟတိ ပတိဋ္ဌဟတီတိ ဓရဏီရုဟော, ပာဒေန ပိဝတီတိ ပာဒပော, ပာဒသင္ခာတေန မူလေန သိဉ္စိတောဒကံ ပိဝတိ အာပောရသံ သိနေဟံ ဓာရေတီတိ အတ္ထော။ ဓရဏီရုဟော စ သော ပာဒပော စာတိ ဓရဏီရုဟပာဒပော, တံ ဥတ္တမံ အသနံ ဗောဓိံ ပဉ္စ ဝသ္သာနိ ပရိစရိံ ပောသေသိန္တိ အတ္ထော။
80.Asano nāmadheyyenāti nāmapaññattiyā nāmasaññāya asano nāma asanarukkho bodhi ahosīti attho. Dharaṇīruhapādapoti vallirukkhapabbatagaṅgāsāgarādayo dhāretīti dharaṇī, kā sā? Pathavī, tassaṃ ruhati patiṭṭhahatīti dharaṇīruho, pādena pivatīti pādapo, pādasaṅkhātena mūlena siñcitodakaṃ pivati āporasaṃ sinehaṃ dhāretīti attho. Dharaṇīruho ca so pādapo cāti dharaṇīruhapādapo, taṃ uttamaṃ asanaṃ bodhiṃ pañca vassāni paricariṃ posesinti attho.
၈၁. ပုပ္ဖိတံ ပာဒပံ ဒိသ္ဝာတိ တံ မယာ ပောသိတံ အသနဗောဓိရုက္ခံ ပုပ္ဖိတံ အစ္ဆရယောဂ္ဂဘူတပုပ္ဖတ္တာ အဗ္ဘုတံ လောမဟံသကရဏံ ဒိသ္ဝာ သကံ ကမ္မံ အတ္တနော ကမ္မံ ပကိတ္တေန္တော ပကာရေန ကထယန္တော ဗုဒ္ဓသေဋ္ဌသ္သ သန္တိကံ အဂမာသိန္တိ အတ္ထော။ သေသံ သဗ္ဗတ္ထ ဥတ္တာနတ္ထမေဝာတိ။
81.Pupphitaṃ pādapaṃ disvāti taṃ mayā positaṃ asanabodhirukkhaṃ pupphitaṃ accharayoggabhūtapupphattā abbhutaṃ lomahaṃsakaraṇaṃ disvā sakaṃkammaṃ attano kammaṃ pakittento pakārena kathayanto buddhaseṭṭhassa santikaṃ agamāsinti attho. Sesaṃ sabbattha uttānatthamevāti.
အသနဗောဓိယတ္ထေရအပဒာနဝဏ္ဏနာ သမတ္တာ။
Asanabodhiyattheraapadānavaṇṇanā samattā.
ဆဋ္ဌဝဂ္ဂဝဏ္ဏနာ သမတ္တာ။
Chaṭṭhavaggavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၁၀. အသနဗောဓိယတ္ထေရအပဒာနံ • 10. Asanabodhiyattheraapadānaṃ
