| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
ஆஸனப்படிபா³ஹனாதி³கதா²
Āsanappaṭibāhanādikathā
316. விப்பகதபோ⁴ஜனோதி அந்தரக⁴ரே வா விஹாரே வா அரஞ்ஞே வா யத்த² கத்த²சி பு⁴ஞ்ஜமானோ பி⁴க்கு² அனிட்டி²தே போ⁴ஜனே ந வுட்டா²பேதப்³போ³. அந்தரக⁴ரே பச்சா² ஆக³தேன பி⁴க்க²ங் க³ஹெத்வா க³ந்தப்³ப³ங். ஸசே மனுஸ்ஸா வா பி⁴க்கூ² வா ‘‘பவிஸதா²’’தி வத³ந்தி, ‘‘மயி பவிஸந்தே பி⁴க்கூ² உட்ட²ஹிஸ்ஸந்தீ’’தி வத்தப்³ப³ங். ‘‘ஏத², ப⁴ந்தே, ஆஸனங் அத்தீ²’’தி வுத்தேன பன பவிஸிதப்³ப³ங். ஸசே கோசி கிஞ்சி ந வத³தி, ஆஸனஸாலங் க³ந்த்வா அதிஸமீபங் அக³ந்த்வா ஸபா⁴க³ட்டா²னே டா²தப்³ப³ங். ஓகாஸே கதே ‘‘பவிஸதா²’’தி வுத்தேன பன பவிஸிதப்³ப³ங். ஸசே பன யங் ஆஸனங் தஸ்ஸ பாபுணாதி, தத்த² அபு⁴ஞ்ஜந்தோ பி⁴க்கு² நிஸின்னோ ஹோதி, தங் உட்டா²பேதுங் வட்டதி. யாகு³க²ஜ்ஜகாதீ³ஸு பன யங்கிஞ்சி பிவித்வா வா கா²தி³த்வா வா யாவ அஞ்ஞோ ஆக³ச்ச²தி, தாவ நிஸின்னங் ரித்தஹத்த²ம்பி வுட்டா²பேதுங் ந வட்டதி. விப்பகதபோ⁴ஜனோயேவ ஹி ஸோ ஹோதி.
316.Vippakatabhojanoti antaraghare vā vihāre vā araññe vā yattha katthaci bhuñjamāno bhikkhu aniṭṭhite bhojane na vuṭṭhāpetabbo. Antaraghare pacchā āgatena bhikkhaṃ gahetvā gantabbaṃ. Sace manussā vā bhikkhū vā ‘‘pavisathā’’ti vadanti, ‘‘mayi pavisante bhikkhū uṭṭhahissantī’’ti vattabbaṃ. ‘‘Etha, bhante, āsanaṃ atthī’’ti vuttena pana pavisitabbaṃ. Sace koci kiñci na vadati, āsanasālaṃ gantvā atisamīpaṃ agantvā sabhāgaṭṭhāne ṭhātabbaṃ. Okāse kate ‘‘pavisathā’’ti vuttena pana pavisitabbaṃ. Sace pana yaṃ āsanaṃ tassa pāpuṇāti, tattha abhuñjanto bhikkhu nisinno hoti, taṃ uṭṭhāpetuṃ vaṭṭati. Yāgukhajjakādīsu pana yaṃkiñci pivitvā vā khāditvā vā yāva añño āgacchati, tāva nisinnaṃ rittahatthampi vuṭṭhāpetuṃ na vaṭṭati. Vippakatabhojanoyeva hi so hoti.
ஸசே வுட்டா²பேதீதி ஸசே ஆபத்திங் அதிக்கமித்வாபி வுட்டா²பேதியேவ. பவாரிதோ ச ஹோதீதி யங் ஸோ வுட்டா²பேதி, அயஞ்ச பி⁴க்கு² பவாரிதோ ச ஹோதி, தேன வத்தப்³போ³ – ‘‘க³ச்ச² உத³கங் ஆஹராஹீ’’தி. வுட்³ட⁴தரஞ்ஹி பி⁴க்கு²ங் ஆணாபேதுங் இத³மேவ ஏகங் டா²னந்தி. ஸசே ஸோ உத³கம்பி ந ஆஹரதி, ததோ யஞ்ச நவகதரேன கத்தப்³ப³ங், தங் த³ஸ்ஸெந்தோ ‘‘ஸாது⁴கங் ஸித்தா²னீ’’திஆதி³மாஹ.
Sace vuṭṭhāpetīti sace āpattiṃ atikkamitvāpi vuṭṭhāpetiyeva. Pavārito ca hotīti yaṃ so vuṭṭhāpeti, ayañca bhikkhu pavārito ca hoti, tena vattabbo – ‘‘gaccha udakaṃ āharāhī’’ti. Vuḍḍhatarañhi bhikkhuṃ āṇāpetuṃ idameva ekaṃ ṭhānanti. Sace so udakampi na āharati, tato yañca navakatarena kattabbaṃ, taṃ dassento ‘‘sādhukaṃ sitthānī’’tiādimāha.
கி³லானஸ்ஸ பதிரூபங் ஸெய்யந்தி எத்த² யோ காஸப⁴க³ந்த³ராதிஸாராதீ³ஹி கி³லானோ ஹோதி, கே²ளமல்லகவச்சகபாலாதீ³னி ட²பேதப்³பா³னி ஹொந்தி. குட்டி² வா ஹோதி, ஸேனாஸனங் தூ³ஸேதி; ஏவரூபஸ்ஸ ஹெட்டா²பாஸாத³பண்ணஸாலாதீ³ஸு அஞ்ஞதரங் ஏகமந்தங் ஸேனாஸனங் தா³தப்³ப³ங். யஸ்மிங் வஸந்தே ஸேனாஸனங் ந து³ஸ்ஸதி, தஸ்ஸ வரஸெய்யாபி தா³தப்³பா³வ. யோபி ஸினேஹபானவிரேசனநத்து²கம்மாதீ³ஸு யங்கிஞ்சி பே⁴ஸஜ்ஜங் கரோதி, ஸப்³போ³ ஸோ கி³லானோயேவ, தஸ்ஸாபி ஸல்லக்கெ²த்வா பதிரூபங் ஸேனாஸனங் தா³தப்³ப³ங் . லேஸகப்பேனாதி அப்பகேன ஸீஸாபா³தா⁴தி³மத்தேன. பி⁴க்கூ² க³ணெத்வாதி ‘‘எத்தகா நாம பி⁴க்கூ²’’தி விஹாரே பி⁴க்கூ²னங் பரிச்சே²த³ங் ஞத்வா.
Gilānassa patirūpaṃ seyyanti ettha yo kāsabhagandarātisārādīhi gilāno hoti, kheḷamallakavaccakapālādīni ṭhapetabbāni honti. Kuṭṭhi vā hoti, senāsanaṃ dūseti; evarūpassa heṭṭhāpāsādapaṇṇasālādīsu aññataraṃ ekamantaṃ senāsanaṃ dātabbaṃ. Yasmiṃ vasante senāsanaṃ na dussati, tassa varaseyyāpi dātabbāva. Yopi sinehapānavirecananatthukammādīsu yaṃkiñci bhesajjaṃ karoti, sabbo so gilānoyeva, tassāpi sallakkhetvā patirūpaṃ senāsanaṃ dātabbaṃ . Lesakappenāti appakena sīsābādhādimattena. Bhikkhūgaṇetvāti ‘‘ettakā nāma bhikkhū’’ti vihāre bhikkhūnaṃ paricchedaṃ ñatvā.
ஆஸனப்படிபா³ஹனாதி³கதா² நிட்டி²தா.
Āsanappaṭibāhanādikathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / ஆஸனப்படிபா³ஹனாதி³ • Āsanappaṭibāhanādi
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஆஸனப்படிபா³ஹனாதி³கதா² • Āsanappaṭibāhanādikathā
