| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
আসনপ্পটিবাহনাদিকথা
Āsanappaṭibāhanādikathā
৩১৬. ৰিপ্পকতভোজনোতি অন্তরঘরে ৰা ৰিহারে ৰা অরঞ্ঞে ৰা যত্থ কত্থচি ভুঞ্জমানো ভিক্খু অনিট্ঠিতে ভোজনে ন ৰুট্ঠাপেতব্বো। অন্তরঘরে পচ্ছা আগতেন ভিক্খং গহেত্ৰা গন্তব্বং। সচে মনুস্সা ৰা ভিক্খূ ৰা ‘‘পৰিসথা’’তি ৰদন্তি, ‘‘মযি পৰিসন্তে ভিক্খূ উট্ঠহিস্সন্তী’’তি ৰত্তব্বং। ‘‘এথ, ভন্তে, আসনং অত্থী’’তি ৰুত্তেন পন পৰিসিতব্বং। সচে কোচি কিঞ্চি ন ৰদতি, আসনসালং গন্ত্ৰা অতিসমীপং অগন্ত্ৰা সভাগট্ঠানে ঠাতব্বং। ওকাসে কতে ‘‘পৰিসথা’’তি ৰুত্তেন পন পৰিসিতব্বং। সচে পন যং আসনং তস্স পাপুণাতি, তত্থ অভুঞ্জন্তো ভিক্খু নিসিন্নো হোতি, তং উট্ঠাপেতুং ৰট্টতি। যাগুখজ্জকাদীসু পন যংকিঞ্চি পিৰিত্ৰা ৰা খাদিত্ৰা ৰা যাৰ অঞ্ঞো আগচ্ছতি, তাৰ নিসিন্নং রিত্তহত্থম্পি ৰুট্ঠাপেতুং ন ৰট্টতি। ৰিপ্পকতভোজনোযেৰ হি সো হোতি।
316.Vippakatabhojanoti antaraghare vā vihāre vā araññe vā yattha katthaci bhuñjamāno bhikkhu aniṭṭhite bhojane na vuṭṭhāpetabbo. Antaraghare pacchā āgatena bhikkhaṃ gahetvā gantabbaṃ. Sace manussā vā bhikkhū vā ‘‘pavisathā’’ti vadanti, ‘‘mayi pavisante bhikkhū uṭṭhahissantī’’ti vattabbaṃ. ‘‘Etha, bhante, āsanaṃ atthī’’ti vuttena pana pavisitabbaṃ. Sace koci kiñci na vadati, āsanasālaṃ gantvā atisamīpaṃ agantvā sabhāgaṭṭhāne ṭhātabbaṃ. Okāse kate ‘‘pavisathā’’ti vuttena pana pavisitabbaṃ. Sace pana yaṃ āsanaṃ tassa pāpuṇāti, tattha abhuñjanto bhikkhu nisinno hoti, taṃ uṭṭhāpetuṃ vaṭṭati. Yāgukhajjakādīsu pana yaṃkiñci pivitvā vā khāditvā vā yāva añño āgacchati, tāva nisinnaṃ rittahatthampi vuṭṭhāpetuṃ na vaṭṭati. Vippakatabhojanoyeva hi so hoti.
সচে ৰুট্ঠাপেতীতি সচে আপত্তিং অতিক্কমিত্ৰাপি ৰুট্ঠাপেতিযেৰ। পৰারিতো চ হোতীতি যং সো ৰুট্ঠাপেতি, অযঞ্চ ভিক্খু পৰারিতো চ হোতি, তেন ৰত্তব্বো – ‘‘গচ্ছ উদকং আহরাহী’’তি। ৰুড্ঢতরঞ্হি ভিক্খুং আণাপেতুং ইদমেৰ একং ঠানন্তি। সচে সো উদকম্পি ন আহরতি, ততো যঞ্চ নৰকতরেন কত্তব্বং, তং দস্সেন্তো ‘‘সাধুকং সিত্থানী’’তিআদিমাহ।
Sace vuṭṭhāpetīti sace āpattiṃ atikkamitvāpi vuṭṭhāpetiyeva. Pavārito ca hotīti yaṃ so vuṭṭhāpeti, ayañca bhikkhu pavārito ca hoti, tena vattabbo – ‘‘gaccha udakaṃ āharāhī’’ti. Vuḍḍhatarañhi bhikkhuṃ āṇāpetuṃ idameva ekaṃ ṭhānanti. Sace so udakampi na āharati, tato yañca navakatarena kattabbaṃ, taṃ dassento ‘‘sādhukaṃ sitthānī’’tiādimāha.
গিলানস্স পতিরূপং সেয্যন্তি এত্থ যো কাসভগন্দরাতিসারাদীহি গিলানো হোতি, খেল়মল্লকৰচ্চকপালাদীনি ঠপেতব্বানি হোন্তি। কুট্ঠি ৰা হোতি, সেনাসনং দূসেতি; এৰরূপস্স হেট্ঠাপাসাদপণ্ণসালাদীসু অঞ্ঞতরং একমন্তং সেনাসনং দাতব্বং। যস্মিং ৰসন্তে সেনাসনং ন দুস্সতি, তস্স ৰরসেয্যাপি দাতব্বাৰ। যোপি সিনেহপানৰিরেচননত্থুকম্মাদীসু যংকিঞ্চি ভেসজ্জং করোতি, সব্বো সো গিলানোযেৰ, তস্সাপি সল্লক্খেত্ৰা পতিরূপং সেনাসনং দাতব্বং । লেসকপ্পেনাতি অপ্পকেন সীসাবাধাদিমত্তেন। ভিক্খূ গণেত্ৰাতি ‘‘এত্তকা নাম ভিক্খূ’’তি ৰিহারে ভিক্খূনং পরিচ্ছেদং ঞত্ৰা।
Gilānassa patirūpaṃ seyyanti ettha yo kāsabhagandarātisārādīhi gilāno hoti, kheḷamallakavaccakapālādīni ṭhapetabbāni honti. Kuṭṭhi vā hoti, senāsanaṃ dūseti; evarūpassa heṭṭhāpāsādapaṇṇasālādīsu aññataraṃ ekamantaṃ senāsanaṃ dātabbaṃ. Yasmiṃ vasante senāsanaṃ na dussati, tassa varaseyyāpi dātabbāva. Yopi sinehapānavirecananatthukammādīsu yaṃkiñci bhesajjaṃ karoti, sabbo so gilānoyeva, tassāpi sallakkhetvā patirūpaṃ senāsanaṃ dātabbaṃ . Lesakappenāti appakena sīsābādhādimattena. Bhikkhūgaṇetvāti ‘‘ettakā nāma bhikkhū’’ti vihāre bhikkhūnaṃ paricchedaṃ ñatvā.
আসনপ্পটিবাহনাদিকথা নিট্ঠিতা।
Āsanappaṭibāhanādikathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / আসনপ্পটিবাহনাদি • Āsanappaṭibāhanādi
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / আসনপ্পটিবাহনাদিকথা • Āsanappaṭibāhanādikathā
