| Library / Tipiṭaka / ತಿಪಿಟಕ • Tipiṭaka / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā |
ಆಸನಪ್ಪಟಿಬಾಹನಾದಿಕಥಾ
Āsanappaṭibāhanādikathā
೩೧೬. ವಿಪ್ಪಕತಭೋಜನೋತಿ ಅನ್ತರಘರೇ ವಾ ವಿಹಾರೇ ವಾ ಅರಞ್ಞೇ ವಾ ಯತ್ಥ ಕತ್ಥಚಿ ಭುಞ್ಜಮಾನೋ ಭಿಕ್ಖು ಅನಿಟ್ಠಿತೇ ಭೋಜನೇ ನ ವುಟ್ಠಾಪೇತಬ್ಬೋ। ಅನ್ತರಘರೇ ಪಚ್ಛಾ ಆಗತೇನ ಭಿಕ್ಖಂ ಗಹೇತ್ವಾ ಗನ್ತಬ್ಬಂ। ಸಚೇ ಮನುಸ್ಸಾ ವಾ ಭಿಕ್ಖೂ ವಾ ‘‘ಪವಿಸಥಾ’’ತಿ ವದನ್ತಿ, ‘‘ಮಯಿ ಪವಿಸನ್ತೇ ಭಿಕ್ಖೂ ಉಟ್ಠಹಿಸ್ಸನ್ತೀ’’ತಿ ವತ್ತಬ್ಬಂ। ‘‘ಏಥ, ಭನ್ತೇ, ಆಸನಂ ಅತ್ಥೀ’’ತಿ ವುತ್ತೇನ ಪನ ಪವಿಸಿತಬ್ಬಂ। ಸಚೇ ಕೋಚಿ ಕಿಞ್ಚಿ ನ ವದತಿ, ಆಸನಸಾಲಂ ಗನ್ತ್ವಾ ಅತಿಸಮೀಪಂ ಅಗನ್ತ್ವಾ ಸಭಾಗಟ್ಠಾನೇ ಠಾತಬ್ಬಂ। ಓಕಾಸೇ ಕತೇ ‘‘ಪವಿಸಥಾ’’ತಿ ವುತ್ತೇನ ಪನ ಪವಿಸಿತಬ್ಬಂ। ಸಚೇ ಪನ ಯಂ ಆಸನಂ ತಸ್ಸ ಪಾಪುಣಾತಿ, ತತ್ಥ ಅಭುಞ್ಜನ್ತೋ ಭಿಕ್ಖು ನಿಸಿನ್ನೋ ಹೋತಿ, ತಂ ಉಟ್ಠಾಪೇತುಂ ವಟ್ಟತಿ। ಯಾಗುಖಜ್ಜಕಾದೀಸು ಪನ ಯಂಕಿಞ್ಚಿ ಪಿವಿತ್ವಾ ವಾ ಖಾದಿತ್ವಾ ವಾ ಯಾವ ಅಞ್ಞೋ ಆಗಚ್ಛತಿ, ತಾವ ನಿಸಿನ್ನಂ ರಿತ್ತಹತ್ಥಮ್ಪಿ ವುಟ್ಠಾಪೇತುಂ ನ ವಟ್ಟತಿ। ವಿಪ್ಪಕತಭೋಜನೋಯೇವ ಹಿ ಸೋ ಹೋತಿ।
316.Vippakatabhojanoti antaraghare vā vihāre vā araññe vā yattha katthaci bhuñjamāno bhikkhu aniṭṭhite bhojane na vuṭṭhāpetabbo. Antaraghare pacchā āgatena bhikkhaṃ gahetvā gantabbaṃ. Sace manussā vā bhikkhū vā ‘‘pavisathā’’ti vadanti, ‘‘mayi pavisante bhikkhū uṭṭhahissantī’’ti vattabbaṃ. ‘‘Etha, bhante, āsanaṃ atthī’’ti vuttena pana pavisitabbaṃ. Sace koci kiñci na vadati, āsanasālaṃ gantvā atisamīpaṃ agantvā sabhāgaṭṭhāne ṭhātabbaṃ. Okāse kate ‘‘pavisathā’’ti vuttena pana pavisitabbaṃ. Sace pana yaṃ āsanaṃ tassa pāpuṇāti, tattha abhuñjanto bhikkhu nisinno hoti, taṃ uṭṭhāpetuṃ vaṭṭati. Yāgukhajjakādīsu pana yaṃkiñci pivitvā vā khāditvā vā yāva añño āgacchati, tāva nisinnaṃ rittahatthampi vuṭṭhāpetuṃ na vaṭṭati. Vippakatabhojanoyeva hi so hoti.
ಸಚೇ ವುಟ್ಠಾಪೇತೀತಿ ಸಚೇ ಆಪತ್ತಿಂ ಅತಿಕ್ಕಮಿತ್ವಾಪಿ ವುಟ್ಠಾಪೇತಿಯೇವ। ಪವಾರಿತೋ ಚ ಹೋತೀತಿ ಯಂ ಸೋ ವುಟ್ಠಾಪೇತಿ, ಅಯಞ್ಚ ಭಿಕ್ಖು ಪವಾರಿತೋ ಚ ಹೋತಿ, ತೇನ ವತ್ತಬ್ಬೋ – ‘‘ಗಚ್ಛ ಉದಕಂ ಆಹರಾಹೀ’’ತಿ। ವುಡ್ಢತರಞ್ಹಿ ಭಿಕ್ಖುಂ ಆಣಾಪೇತುಂ ಇದಮೇವ ಏಕಂ ಠಾನನ್ತಿ। ಸಚೇ ಸೋ ಉದಕಮ್ಪಿ ನ ಆಹರತಿ, ತತೋ ಯಞ್ಚ ನವಕತರೇನ ಕತ್ತಬ್ಬಂ, ತಂ ದಸ್ಸೇನ್ತೋ ‘‘ಸಾಧುಕಂ ಸಿತ್ಥಾನೀ’’ತಿಆದಿಮಾಹ।
Sace vuṭṭhāpetīti sace āpattiṃ atikkamitvāpi vuṭṭhāpetiyeva. Pavārito ca hotīti yaṃ so vuṭṭhāpeti, ayañca bhikkhu pavārito ca hoti, tena vattabbo – ‘‘gaccha udakaṃ āharāhī’’ti. Vuḍḍhatarañhi bhikkhuṃ āṇāpetuṃ idameva ekaṃ ṭhānanti. Sace so udakampi na āharati, tato yañca navakatarena kattabbaṃ, taṃ dassento ‘‘sādhukaṃ sitthānī’’tiādimāha.
ಗಿಲಾನಸ್ಸ ಪತಿರೂಪಂ ಸೇಯ್ಯನ್ತಿ ಏತ್ಥ ಯೋ ಕಾಸಭಗನ್ದರಾತಿಸಾರಾದೀಹಿ ಗಿಲಾನೋ ಹೋತಿ, ಖೇಳಮಲ್ಲಕವಚ್ಚಕಪಾಲಾದೀನಿ ಠಪೇತಬ್ಬಾನಿ ಹೋನ್ತಿ। ಕುಟ್ಠಿ ವಾ ಹೋತಿ, ಸೇನಾಸನಂ ದೂಸೇತಿ; ಏವರೂಪಸ್ಸ ಹೇಟ್ಠಾಪಾಸಾದಪಣ್ಣಸಾಲಾದೀಸು ಅಞ್ಞತರಂ ಏಕಮನ್ತಂ ಸೇನಾಸನಂ ದಾತಬ್ಬಂ। ಯಸ್ಮಿಂ ವಸನ್ತೇ ಸೇನಾಸನಂ ನ ದುಸ್ಸತಿ, ತಸ್ಸ ವರಸೇಯ್ಯಾಪಿ ದಾತಬ್ಬಾವ। ಯೋಪಿ ಸಿನೇಹಪಾನವಿರೇಚನನತ್ಥುಕಮ್ಮಾದೀಸು ಯಂಕಿಞ್ಚಿ ಭೇಸಜ್ಜಂ ಕರೋತಿ, ಸಬ್ಬೋ ಸೋ ಗಿಲಾನೋಯೇವ, ತಸ್ಸಾಪಿ ಸಲ್ಲಕ್ಖೇತ್ವಾ ಪತಿರೂಪಂ ಸೇನಾಸನಂ ದಾತಬ್ಬಂ । ಲೇಸಕಪ್ಪೇನಾತಿ ಅಪ್ಪಕೇನ ಸೀಸಾಬಾಧಾದಿಮತ್ತೇನ। ಭಿಕ್ಖೂ ಗಣೇತ್ವಾತಿ ‘‘ಏತ್ತಕಾ ನಾಮ ಭಿಕ್ಖೂ’’ತಿ ವಿಹಾರೇ ಭಿಕ್ಖೂನಂ ಪರಿಚ್ಛೇದಂ ಞತ್ವಾ।
Gilānassa patirūpaṃ seyyanti ettha yo kāsabhagandarātisārādīhi gilāno hoti, kheḷamallakavaccakapālādīni ṭhapetabbāni honti. Kuṭṭhi vā hoti, senāsanaṃ dūseti; evarūpassa heṭṭhāpāsādapaṇṇasālādīsu aññataraṃ ekamantaṃ senāsanaṃ dātabbaṃ. Yasmiṃ vasante senāsanaṃ na dussati, tassa varaseyyāpi dātabbāva. Yopi sinehapānavirecananatthukammādīsu yaṃkiñci bhesajjaṃ karoti, sabbo so gilānoyeva, tassāpi sallakkhetvā patirūpaṃ senāsanaṃ dātabbaṃ . Lesakappenāti appakena sīsābādhādimattena. Bhikkhūgaṇetvāti ‘‘ettakā nāma bhikkhū’’ti vihāre bhikkhūnaṃ paricchedaṃ ñatvā.
ಆಸನಪ್ಪಟಿಬಾಹನಾದಿಕಥಾ ನಿಟ್ಠಿತಾ।
Āsanappaṭibāhanādikathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ಆಸನಪ್ಪಟಿಬಾಹನಾದಿ • Āsanappaṭibāhanādi
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಆಸನಪ್ಪಟಿಬಾಹನಾದಿಕಥಾ • Āsanappaṭibāhanādikathā
