| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
ಆಸನಪ್ಪಟಿಬಾಹನಾದಿಕಥಾ
Āsanappaṭibāhanādikathā
೩೧೬. ವಿಪ್ಪಕತಭೋಜನೇನಾತಿ ಏತ್ಥ ವಿಪ್ಪಕತಸದ್ದೋ ಅನಿಟ್ಠಿತಪರಿಯಾಯೋತಿ ಆಹ ‘‘ಅನಿಟ್ಠಿತೇ ಭೋಜನೇ’’ತಿ। ಪಕಿರಿಯಿತ್ಥ, ಪಕಿರಿಯಿಸ್ಸತೇ ವಾ ಪಕತಂ, ನ ಪಕತಂ ವಿಪ್ಪಕತನ್ತಿ ವಿಗ್ಗಹೋ ಕಾತಬ್ಬೋ, ಅತ್ಥತೋ ಪನ ‘‘ಕರಿಯಮಾನೋ ಅನಿಟ್ಠಿತೋ’’ತಿ ವುತ್ತಂ ಹೋತಿ। ಏತ್ಥಾತಿ ಠಾನೇ। ಅತಿಸಮೀಪನ್ತಿ ಭುಞ್ಜಮಾನಸ್ಸ ಭಿಕ್ಖುಸ್ಸ ಅತಿಆಸನ್ನಂ। ತಸ್ಸಾತಿ ಭುಞ್ಜಮಾನಸ್ಸ ಭಿಕ್ಖುಸ್ಸ। ಪಿವಿತ್ವಾ ವಾತಿ ಯಾಗುಂ ಪಿವಿತ್ವಾ ವಾ। ಖಾದಿತ್ವಾ ವಾತಿ ಖಜ್ಜಕಂ ಖಾದಿತ್ವಾ ವಾ। ರಿತ್ತಹತ್ಥಮ್ಪೀತಿ ತುಚ್ಛಹತ್ಥಮ್ಪಿ। ಪಿಸದ್ದೇನ ಆಮಿಸಹತ್ಥಂ ಪನ ಪಗೇವಾತಿ ದಸ್ಸೇತಿ। ಹೀತಿ ಸಚ್ಚಂ, ಯಸ್ಮಾ ವಾ। ಸೋತಿ ರಿತ್ತಹತ್ಥೋ ಭಿಕ್ಖು।
316.Vippakatabhojanenāti ettha vippakatasaddo aniṭṭhitapariyāyoti āha ‘‘aniṭṭhite bhojane’’ti. Pakiriyittha, pakiriyissate vā pakataṃ, na pakataṃ vippakatanti viggaho kātabbo, atthato pana ‘‘kariyamāno aniṭṭhito’’ti vuttaṃ hoti. Etthāti ṭhāne. Atisamīpanti bhuñjamānassa bhikkhussa atiāsannaṃ. Tassāti bhuñjamānassa bhikkhussa. Pivitvā vāti yāguṃ pivitvā vā. Khāditvā vāti khajjakaṃ khāditvā vā. Rittahatthampīti tucchahatthampi. Pisaddena āmisahatthaṃ pana pagevāti dasseti. Hīti saccaṃ, yasmā vā. Soti rittahattho bhikkhu.
ಆಪತ್ತಿನ್ತಿ ದುಕ್ಕಟಾಪತ್ತಿಂ। ಯನ್ತಿ ವಿಪ್ಪಕತಭೋಜನಂ ಭಿಕ್ಖುಂ। ಸೋತಿ ಪಚ್ಛಾ ಆಗತೋ ಭಿಕ್ಖು। ಅಯಞ್ಚ ಭಿಕ್ಖೂತಿ ವಿಪ್ಪಕತಭೋಜನೋ ಅಯಞ್ಚ ಭಿಕ್ಖು। ತೇನಾತಿ ವಿಪ್ಪಕತಭೋಜನೇನ ನವಕೇನ ವಾ ವುಡ್ಢತರೇನ ವಾ ಭಿಕ್ಖುನಾ। ಕಿಂ ನವಕೇನ ವುಡ್ಢತರಂ ಆಣಾಪೇತುಂ ವಟ್ಟತೀತಿ ಆಹ ‘‘ವುಡ್ಢತರಂ ಹೀ’’ತಿಆದಿ। ಹೀತಿ ಸಚ್ಚಂ, ಯಸ್ಮಾ ವಾ। ಸೋತಿ ವುಡ್ಢತರೋ ಭಿಕ್ಖು। ತತೋತಿ ಉದಕಂ ಆಹರಾಪೇತುಂ ಆಣತ್ತಿತೋ। ಯನ್ತಿ ಕಮ್ಮಂ।
Āpattinti dukkaṭāpattiṃ. Yanti vippakatabhojanaṃ bhikkhuṃ. Soti pacchā āgato bhikkhu. Ayañca bhikkhūti vippakatabhojano ayañca bhikkhu. Tenāti vippakatabhojanena navakena vā vuḍḍhatarena vā bhikkhunā. Kiṃ navakena vuḍḍhataraṃ āṇāpetuṃ vaṭṭatīti āha ‘‘vuḍḍhataraṃ hī’’tiādi. Hīti saccaṃ, yasmā vā. Soti vuḍḍhataro bhikkhu. Tatoti udakaṃ āharāpetuṃ āṇattito. Yanti kammaṃ.
ಯೋತಿ ಭಿಕ್ಖು। ‘‘ಏವರೂಪಸ್ಸಾ’’ತಿ ಪದೇನ ತಸ್ಸ ನಿಯಮನಂ ವೇದಿತಬ್ಬಂ। ಕಾಸಸ್ಸ ಖೇಳಮಲ್ಲಕಂ ಠಪೇತಬ್ಬಂ। ಭಗನ್ದರಅತಿಸಾರಾನಂ ವಚ್ಚಕಪಾಲಂ ಠಪೇತಬ್ಬಂ । ಅಞ್ಞೇಸಂ ಅಞ್ಞಾನಿ ಠಪೇತಬ್ಬಾನಿ ಹೋನ್ತಿ। ತೇನ ವುತ್ತಂ ‘‘ಖೇಳ…ಪೇ॰… ಹೋನ್ತೀ’’ತಿ। ಯಸ್ಮಿಂತಿ ಯಸ್ಮಿಂ ಗಿಲಾನೇ। ಯೋಪಿ ಭೇಸಜ್ಜಂ ಕರೋತೀತಿ ಸಮ್ಬನ್ಧೋ। ಲೇಸಕಪ್ಪೇನಾತಿ ಏತ್ಥ ಲೇಸಕಪ್ಪಸದ್ದಾನಂ ಅತ್ಥತೋ ಏಕತ್ತಾ ವುತ್ತಂ ‘‘ಅಪ್ಪಕೇನ ಸೀಸಾಬಾಧಾದಿಮತ್ತೇನಾ’’ತಿ। ಭಿಕ್ಖೂ ಗಣೇತ್ವಾತಿ ಏತ್ಥ ಗಣಂ ಞತ್ವಾತಿ ದಸ್ಸೇನ್ತೋ ಆಹ ‘‘ಪರಿಚ್ಛೇದಂ ಞತ್ವಾ’’ತಿ। ತತ್ಥ ‘‘ಪರಿಚ್ಛೇದ’’ನ್ತಿ ಇಮಿನಾ ಗಣಸದ್ದಸ್ಸ ಅಧಿಪ್ಪಾಯತ್ಥಂ ದಸ್ಸೇತಿ। ‘‘ಞತ್ವಾ’’ತಿ ಇಮಿನಾ ಇಧಾತುಯಾ ಅತ್ಥಂ ದಸ್ಸೇತಿ।
Yoti bhikkhu. ‘‘Evarūpassā’’ti padena tassa niyamanaṃ veditabbaṃ. Kāsassa kheḷamallakaṃ ṭhapetabbaṃ. Bhagandaraatisārānaṃ vaccakapālaṃ ṭhapetabbaṃ . Aññesaṃ aññāni ṭhapetabbāni honti. Tena vuttaṃ ‘‘kheḷa…pe… hontī’’ti. Yasmiṃti yasmiṃ gilāne. Yopi bhesajjaṃ karotīti sambandho. Lesakappenāti ettha lesakappasaddānaṃ atthato ekattā vuttaṃ ‘‘appakena sīsābādhādimattenā’’ti. Bhikkhū gaṇetvāti ettha gaṇaṃ ñatvāti dassento āha ‘‘paricchedaṃ ñatvā’’ti. Tattha ‘‘pariccheda’’nti iminā gaṇasaddassa adhippāyatthaṃ dasseti. ‘‘Ñatvā’’ti iminā idhātuyā atthaṃ dasseti.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ಆಸನಪ್ಪಟಿಬಾಹನಾದಿ • Āsanappaṭibāhanādi
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಆಸನಪ್ಪಟಿಬಾಹನಾದಿಕಥಾ • Āsanappaṭibāhanādikathā
