| Library / Tipiṭaka / තිපිටක • Tipiṭaka / චූළවග්‌ග-අට්‌ඨකථා • Cūḷavagga-aṭṭhakathā |
ආසනප්‌පටිබාහනාදිකථා
Āsanappaṭibāhanādikathā
316. විප්‌පකතභොජනොති අන්‌තරඝරෙ වා විහාරෙ වා අරඤ්‌ඤෙ වා යත්‌ථ කත්‌ථචි භුඤ්‌ජමානො භික්‌ඛු අනිට්‌ඨිතෙ භොජනෙ න වුට්‌ඨාපෙතබ්‌බො. අන්‌තරඝරෙ පච්‌ඡා ආගතෙන භික්‌ඛං ගහෙත්‌වා ගන්‌තබ්‌බං. සචෙ මනුස්‌සා වා භික්‌ඛූ වා ‘‘පවිසථා’’ති වදන්‌ති, ‘‘මයි පවිසන්‌තෙ භික්‌ඛූ උට්‌ඨහිස්‌සන්‌තී’’ති වත්‌තබ්‌බං. ‘‘එථ, භන්‌තෙ, ආසනං අත්‌ථී’’ති වුත්‌තෙන පන පවිසිතබ්‌බං. සචෙ කොචි කිඤ්‌චි න වදති, ආසනසාලං ගන්‌ත්‌වා අතිසමීපං අගන්‌ත්‌වා සභාගට්‌ඨානෙ ඨාතබ්‌බං. ඔකාසෙ කතෙ ‘‘පවිසථා’’ති වුත්‌තෙන පන පවිසිතබ්‌බං. සචෙ පන යං ආසනං තස්‌ස පාපුණාති, තත්‌ථ අභුඤ්‌ජන්‌තො භික්‌ඛු නිසින්‌නො හොති, තං උට්‌ඨාපෙතුං වට්‌ටති. යාගුඛජ්‌ජකාදීසු පන යංකිඤ්‌චි පිවිත්‌වා වා ඛාදිත්‌වා වා යාව අඤ්‌ඤො ආගච්‌ඡති, තාව නිසින්‌නං රිත්‌තහත්‌ථම්‌පි වුට්‌ඨාපෙතුං න වට්‌ටති. විප්‌පකතභොජනොයෙව හි සො හොති.
316.Vippakatabhojanoti antaraghare vā vihāre vā araññe vā yattha katthaci bhuñjamāno bhikkhu aniṭṭhite bhojane na vuṭṭhāpetabbo. Antaraghare pacchā āgatena bhikkhaṃ gahetvā gantabbaṃ. Sace manussā vā bhikkhū vā ‘‘pavisathā’’ti vadanti, ‘‘mayi pavisante bhikkhū uṭṭhahissantī’’ti vattabbaṃ. ‘‘Etha, bhante, āsanaṃ atthī’’ti vuttena pana pavisitabbaṃ. Sace koci kiñci na vadati, āsanasālaṃ gantvā atisamīpaṃ agantvā sabhāgaṭṭhāne ṭhātabbaṃ. Okāse kate ‘‘pavisathā’’ti vuttena pana pavisitabbaṃ. Sace pana yaṃ āsanaṃ tassa pāpuṇāti, tattha abhuñjanto bhikkhu nisinno hoti, taṃ uṭṭhāpetuṃ vaṭṭati. Yāgukhajjakādīsu pana yaṃkiñci pivitvā vā khāditvā vā yāva añño āgacchati, tāva nisinnaṃ rittahatthampi vuṭṭhāpetuṃ na vaṭṭati. Vippakatabhojanoyeva hi so hoti.
සචෙ වුට්‌ඨාපෙතීති සචෙ ආපත්‌තිං අතික්‌කමිත්‌වාපි වුට්‌ඨාපෙතියෙව. පවාරිතො ච හොතීති යං සො වුට්‌ඨාපෙති, අයඤ්‌ච භික්‌ඛු පවාරිතො ච හොති, තෙන වත්‌තබ්‌බො – ‘‘ගච්‌ඡ උදකං ආහරාහී’’ති. වුඩ්‌ඪතරඤ්‌හි භික්‌ඛුං ආණාපෙතුං ඉදමෙව එකං ඨානන්‌ති. සචෙ සො උදකම්‌පි න ආහරති, තතො යඤ්‌ච නවකතරෙන කත්‌තබ්‌බං, තං දස්‌සෙන්‌තො ‘‘සාධුකං සිත්‌ථානී’’තිආදිමාහ.
Sace vuṭṭhāpetīti sace āpattiṃ atikkamitvāpi vuṭṭhāpetiyeva. Pavārito ca hotīti yaṃ so vuṭṭhāpeti, ayañca bhikkhu pavārito ca hoti, tena vattabbo – ‘‘gaccha udakaṃ āharāhī’’ti. Vuḍḍhatarañhi bhikkhuṃ āṇāpetuṃ idameva ekaṃ ṭhānanti. Sace so udakampi na āharati, tato yañca navakatarena kattabbaṃ, taṃ dassento ‘‘sādhukaṃ sitthānī’’tiādimāha.
ගිලානස්‌ස පතිරූපං සෙය්‍යන්‌ති එත්‌ථ යො කාසභගන්‌දරාතිසාරාදීහි ගිලානො හොති, ඛෙළමල්‌ලකවච්‌චකපාලාදීනි ඨපෙතබ්‌බානි හොන්‌ති. කුට්‌ඨි වා හොති, සෙනාසනං දූසෙති; එවරූපස්‌ස හෙට්‌ඨාපාසාදපණ්‌ණසාලාදීසු අඤ්‌ඤතරං එකමන්‌තං සෙනාසනං දාතබ්‌බං. යස්‌මිං වසන්‌තෙ සෙනාසනං න දුස්‌සති, තස්‌ස වරසෙය්‍යාපි දාතබ්‌බාව. යොපි සිනෙහපානවිරෙචනනත්‌ථුකම්‌මාදීසු යංකිඤ්‌චි භෙසජ්‌ජං කරොති, සබ්‌බො සො ගිලානොයෙව, තස්‌සාපි සල්‌ලක්‌ඛෙත්‌වා පතිරූපං සෙනාසනං දාතබ්‌බං . ලෙසකප්‌පෙනාති අප්‌පකෙන සීසාබාධාදිමත්‌තෙන. භික්‌ඛූ ගණෙත්‌වාති ‘‘එත්‌තකා නාම භික්‌ඛූ’’ති විහාරෙ භික්‌ඛූනං පරිච්‌ඡෙදං ඤත්‌වා.
Gilānassa patirūpaṃ seyyanti ettha yo kāsabhagandarātisārādīhi gilāno hoti, kheḷamallakavaccakapālādīni ṭhapetabbāni honti. Kuṭṭhi vā hoti, senāsanaṃ dūseti; evarūpassa heṭṭhāpāsādapaṇṇasālādīsu aññataraṃ ekamantaṃ senāsanaṃ dātabbaṃ. Yasmiṃ vasante senāsanaṃ na dussati, tassa varaseyyāpi dātabbāva. Yopi sinehapānavirecananatthukammādīsu yaṃkiñci bhesajjaṃ karoti, sabbo so gilānoyeva, tassāpi sallakkhetvā patirūpaṃ senāsanaṃ dātabbaṃ . Lesakappenāti appakena sīsābādhādimattena. Bhikkhūgaṇetvāti ‘‘ettakā nāma bhikkhū’’ti vihāre bhikkhūnaṃ paricchedaṃ ñatvā.
ආසනප්‌පටිබාහනාදිකථා නිට්‌ඨිතා.
Āsanappaṭibāhanādikathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / ආසනප්‌පටිබාහනාදි • Āsanappaṭibāhanādi
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / ආසනප්‌පටිබාහනාදිකථා • Āsanappaṭibāhanādikathā
