| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
ආසනප්‌පටිබාහනාදිකථා
Āsanappaṭibāhanādikathā
316. විප්‌පකතභොජනෙනාති එත්‌ථ විප්‌පකතසද්‌දො අනිට්‌ඨිතපරියායොති ආහ ‘‘අනිට්‌ඨිතෙ භොජනෙ’’ති. පකිරියිත්‌ථ, පකිරියිස්‌සතෙ වා පකතං, න පකතං විප්‌පකතන්‌ති විග්‌ගහො කාතබ්‌බො, අත්‌ථතො පන ‘‘කරියමානො අනිට්‌ඨිතො’’ති වුත්‌තං හොති. එත්‌ථාති ඨානෙ. අතිසමීපන්‌ති භුඤ්‌ජමානස්‌ස භික්‌ඛුස්‌ස අතිආසන්‌නං. තස්‌සාති භුඤ්‌ජමානස්‌ස භික්‌ඛුස්‌ස. පිවිත්‌වා වාති යාගුං පිවිත්‌වා වා. ඛාදිත්‌වා වාති ඛජ්‌ජකං ඛාදිත්‌වා වා. රිත්‌තහත්‌ථම්‌පීති තුච්‌ඡහත්‌ථම්‌පි. පිසද්‌දෙන ආමිසහත්‌ථං පන පගෙවාති දස්‌සෙති. හීති සච්‌චං, යස්‌මා වා. සොති රිත්‌තහත්‌ථො භික්‌ඛු.
316.Vippakatabhojanenāti ettha vippakatasaddo aniṭṭhitapariyāyoti āha ‘‘aniṭṭhite bhojane’’ti. Pakiriyittha, pakiriyissate vā pakataṃ, na pakataṃ vippakatanti viggaho kātabbo, atthato pana ‘‘kariyamāno aniṭṭhito’’ti vuttaṃ hoti. Etthāti ṭhāne. Atisamīpanti bhuñjamānassa bhikkhussa atiāsannaṃ. Tassāti bhuñjamānassa bhikkhussa. Pivitvā vāti yāguṃ pivitvā vā. Khāditvā vāti khajjakaṃ khāditvā vā. Rittahatthampīti tucchahatthampi. Pisaddena āmisahatthaṃ pana pagevāti dasseti. Hīti saccaṃ, yasmā vā. Soti rittahattho bhikkhu.
ආපත්‌තින්‌ති දුක්‌කටාපත්‌තිං. යන්‌ති විප්‌පකතභොජනං භික්‌ඛුං. සොති පච්‌ඡා ආගතො භික්‌ඛු. අයඤ්‌ච භික්‌ඛූති විප්‌පකතභොජනො අයඤ්‌ච භික්‌ඛු. තෙනාති විප්‌පකතභොජනෙන නවකෙන වා වුඩ්‌ඪතරෙන වා භික්‌ඛුනා. කිං නවකෙන වුඩ්‌ඪතරං ආණාපෙතුං වට්‌ටතීති ආහ ‘‘වුඩ්‌ඪතරං හී’’තිආදි. හීති සච්‌චං, යස්‌මා වා. සොති වුඩ්‌ඪතරො භික්‌ඛු. තතොති උදකං ආහරාපෙතුං ආණත්‌තිතො. යන්‌ති කම්‌මං.
Āpattinti dukkaṭāpattiṃ. Yanti vippakatabhojanaṃ bhikkhuṃ. Soti pacchā āgato bhikkhu. Ayañca bhikkhūti vippakatabhojano ayañca bhikkhu. Tenāti vippakatabhojanena navakena vā vuḍḍhatarena vā bhikkhunā. Kiṃ navakena vuḍḍhataraṃ āṇāpetuṃ vaṭṭatīti āha ‘‘vuḍḍhataraṃ hī’’tiādi. Hīti saccaṃ, yasmā vā. Soti vuḍḍhataro bhikkhu. Tatoti udakaṃ āharāpetuṃ āṇattito. Yanti kammaṃ.
යොති භික්‌ඛු. ‘‘එවරූපස්‌සා’’ති පදෙන තස්‌ස නියමනං වෙදිතබ්‌බං. කාසස්‌ස ඛෙළමල්‌ලකං ඨපෙතබ්‌බං. භගන්‌දරඅතිසාරානං වච්‌චකපාලං ඨපෙතබ්‌බං . අඤ්‌ඤෙසං අඤ්‌ඤානි ඨපෙතබ්‌බානි හොන්‌ති. තෙන වුත්‌තං ‘‘ඛෙළ…පෙ.… හොන්‌තී’’ති. යස්‌මිංති යස්‌මිං ගිලානෙ. යොපි භෙසජ්‌ජං කරොතීති සම්‌බන්‌ධො. ලෙසකප්‌පෙනාති එත්‌ථ ලෙසකප්‌පසද්‌දානං අත්‌ථතො එකත්‌තා වුත්‌තං ‘‘අප්‌පකෙන සීසාබාධාදිමත්‌තෙනා’’ති. භික්‌ඛූ ගණෙත්‌වාති එත්‌ථ ගණං ඤත්‌වාති දස්‌සෙන්‌තො ආහ ‘‘පරිච්‌ඡෙදං ඤත්‌වා’’ති. තත්‌ථ ‘‘පරිච්‌ඡෙද’’න්‌ති ඉමිනා ගණසද්‌දස්‌ස අධිප්‌පායත්‌ථං දස්‌සෙති. ‘‘ඤත්‌වා’’ති ඉමිනා ඉධාතුයා අත්‌ථං දස්‌සෙති.
Yoti bhikkhu. ‘‘Evarūpassā’’ti padena tassa niyamanaṃ veditabbaṃ. Kāsassa kheḷamallakaṃ ṭhapetabbaṃ. Bhagandaraatisārānaṃ vaccakapālaṃ ṭhapetabbaṃ . Aññesaṃ aññāni ṭhapetabbāni honti. Tena vuttaṃ ‘‘kheḷa…pe… hontī’’ti. Yasmiṃti yasmiṃ gilāne. Yopi bhesajjaṃ karotīti sambandho. Lesakappenāti ettha lesakappasaddānaṃ atthato ekattā vuttaṃ ‘‘appakena sīsābādhādimattenā’’ti. Bhikkhū gaṇetvāti ettha gaṇaṃ ñatvāti dassento āha ‘‘paricchedaṃ ñatvā’’ti. Tattha ‘‘pariccheda’’nti iminā gaṇasaddassa adhippāyatthaṃ dasseti. ‘‘Ñatvā’’ti iminā idhātuyā atthaṃ dasseti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / ආසනප්‌පටිබාහනාදි • Āsanappaṭibāhanādi
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / ආසනප්‌පටිබාහනාදිකථා • Āsanappaṭibāhanādikathā
