| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā |
ཨཱསནཔྤཊིབཱཧནཱདིཀཐཱ
Āsanappaṭibāhanādikathā
༣༡༦. ཝིཔྤཀཏབྷོཛནོཏི ཨནྟརགྷརེ ཝཱ ཝིཧཱརེ ཝཱ ཨརཉྙེ ཝཱ ཡཏྠ ཀཏྠཙི བྷུཉྫམཱནོ བྷིཀྑུ ཨནིཊྛིཏེ བྷོཛནེ ན ཝུཊྛཱཔེཏབྦོ། ཨནྟརགྷརེ པཙྪཱ ཨཱགཏེན བྷིཀྑཾ གཧེཏྭཱ གནྟབྦཾ། སཙེ མནུསྶཱ ཝཱ བྷིཀྑཱུ ཝཱ ‘‘པཝིསཐཱ’’ཏི ཝདནྟི, ‘‘མཡི པཝིསནྟེ བྷིཀྑཱུ ཨུཊྛཧིསྶནྟཱི’’ཏི ཝཏྟབྦཾ། ‘‘ཨེཐ, བྷནྟེ, ཨཱསནཾ ཨཏྠཱི’’ཏི ཝུཏྟེན པན པཝིསིཏབྦཾ། སཙེ ཀོཙི ཀིཉྩི ན ཝདཏི, ཨཱསནསཱལཾ གནྟྭཱ ཨཏིསམཱིཔཾ ཨགནྟྭཱ སབྷཱགཊྛཱནེ ཋཱཏབྦཾ། ཨོཀཱསེ ཀཏེ ‘‘པཝིསཐཱ’’ཏི ཝུཏྟེན པན པཝིསིཏབྦཾ། སཙེ པན ཡཾ ཨཱསནཾ ཏསྶ པཱཔུཎཱཏི, ཏཏྠ ཨབྷུཉྫནྟོ བྷིཀྑུ ནིསིནྣོ ཧོཏི, ཏཾ ཨུཊྛཱཔེཏུཾ ཝཊྚཏི། ཡཱགུཁཛྫཀཱདཱིསུ པན ཡཾཀིཉྩི པིཝིཏྭཱ ཝཱ ཁཱདིཏྭཱ ཝཱ ཡཱཝ ཨཉྙོ ཨཱགཙྪཏི, ཏཱཝ ནིསིནྣཾ རིཏྟཧཏྠམྤི ཝུཊྛཱཔེཏུཾ ན ཝཊྚཏི། ཝིཔྤཀཏབྷོཛནོཡེཝ ཧི སོ ཧོཏི།
316.Vippakatabhojanoti antaraghare vā vihāre vā araññe vā yattha katthaci bhuñjamāno bhikkhu aniṭṭhite bhojane na vuṭṭhāpetabbo. Antaraghare pacchā āgatena bhikkhaṃ gahetvā gantabbaṃ. Sace manussā vā bhikkhū vā ‘‘pavisathā’’ti vadanti, ‘‘mayi pavisante bhikkhū uṭṭhahissantī’’ti vattabbaṃ. ‘‘Etha, bhante, āsanaṃ atthī’’ti vuttena pana pavisitabbaṃ. Sace koci kiñci na vadati, āsanasālaṃ gantvā atisamīpaṃ agantvā sabhāgaṭṭhāne ṭhātabbaṃ. Okāse kate ‘‘pavisathā’’ti vuttena pana pavisitabbaṃ. Sace pana yaṃ āsanaṃ tassa pāpuṇāti, tattha abhuñjanto bhikkhu nisinno hoti, taṃ uṭṭhāpetuṃ vaṭṭati. Yāgukhajjakādīsu pana yaṃkiñci pivitvā vā khāditvā vā yāva añño āgacchati, tāva nisinnaṃ rittahatthampi vuṭṭhāpetuṃ na vaṭṭati. Vippakatabhojanoyeva hi so hoti.
སཙེ ཝུཊྛཱཔེཏཱིཏི སཙེ ཨཱཔཏྟིཾ ཨཏིཀྐམིཏྭཱཔི ཝུཊྛཱཔེཏིཡེཝ། པཝཱརིཏོ ཙ ཧོཏཱིཏི ཡཾ སོ ཝུཊྛཱཔེཏི, ཨཡཉྩ བྷིཀྑུ པཝཱརིཏོ ཙ ཧོཏི, ཏེན ཝཏྟབྦོ – ‘‘གཙྪ ཨུདཀཾ ཨཱཧརཱཧཱི’’ཏི། ཝུཌྜྷཏརཉྷི བྷིཀྑུཾ ཨཱཎཱཔེཏུཾ ཨིདམེཝ ཨེཀཾ ཋཱནནྟི། སཙེ སོ ཨུདཀམྤི ན ཨཱཧརཏི, ཏཏོ ཡཉྩ ནཝཀཏརེན ཀཏྟབྦཾ, ཏཾ དསྶེནྟོ ‘‘སཱདྷུཀཾ སིཏྠཱནཱི’’ཏིཨཱདིམཱཧ།
Sace vuṭṭhāpetīti sace āpattiṃ atikkamitvāpi vuṭṭhāpetiyeva. Pavārito ca hotīti yaṃ so vuṭṭhāpeti, ayañca bhikkhu pavārito ca hoti, tena vattabbo – ‘‘gaccha udakaṃ āharāhī’’ti. Vuḍḍhatarañhi bhikkhuṃ āṇāpetuṃ idameva ekaṃ ṭhānanti. Sace so udakampi na āharati, tato yañca navakatarena kattabbaṃ, taṃ dassento ‘‘sādhukaṃ sitthānī’’tiādimāha.
གིལཱནསྶ པཏིརཱུཔཾ སེཡྻནྟི ཨེཏྠ ཡོ ཀཱསབྷགནྡརཱཏིསཱརཱདཱིཧི གིལཱནོ ཧོཏི, ཁེལ༹མལླཀཝཙྩཀཔཱལཱདཱིནི ཋཔེཏབྦཱནི ཧོནྟི། ཀུཊྛི ཝཱ ཧོཏི, སེནཱསནཾ དཱུསེཏི; ཨེཝརཱུཔསྶ ཧེཊྛཱཔཱསཱདཔཎྞསཱལཱདཱིསུ ཨཉྙཏརཾ ཨེཀམནྟཾ སེནཱསནཾ དཱཏབྦཾ། ཡསྨིཾ ཝསནྟེ སེནཱསནཾ ན དུསྶཏི, ཏསྶ ཝརསེཡྻཱཔི དཱཏབྦཱཝ། ཡོཔི སིནེཧཔཱནཝིརེཙནནཏྠུཀམྨཱདཱིསུ ཡཾཀིཉྩི བྷེསཛྫཾ ཀརོཏི, སབྦོ སོ གིལཱནོཡེཝ, ཏསྶཱཔི སལླཀྑེཏྭཱ པཏིརཱུཔཾ སེནཱསནཾ དཱཏབྦཾ ། ལེསཀཔྤེནཱཏི ཨཔྤཀེན སཱིསཱབཱདྷཱདིམཏྟེན། བྷིཀྑཱུ གཎེཏྭཱཏི ‘‘ཨེཏྟཀཱ ནཱམ བྷིཀྑཱུ’’ཏི ཝིཧཱརེ བྷིཀྑཱུནཾ པརིཙྪེདཾ ཉཏྭཱ།
Gilānassa patirūpaṃ seyyanti ettha yo kāsabhagandarātisārādīhi gilāno hoti, kheḷamallakavaccakapālādīni ṭhapetabbāni honti. Kuṭṭhi vā hoti, senāsanaṃ dūseti; evarūpassa heṭṭhāpāsādapaṇṇasālādīsu aññataraṃ ekamantaṃ senāsanaṃ dātabbaṃ. Yasmiṃ vasante senāsanaṃ na dussati, tassa varaseyyāpi dātabbāva. Yopi sinehapānavirecananatthukammādīsu yaṃkiñci bhesajjaṃ karoti, sabbo so gilānoyeva, tassāpi sallakkhetvā patirūpaṃ senāsanaṃ dātabbaṃ . Lesakappenāti appakena sīsābādhādimattena. Bhikkhūgaṇetvāti ‘‘ettakā nāma bhikkhū’’ti vihāre bhikkhūnaṃ paricchedaṃ ñatvā.
ཨཱསནཔྤཊིབཱཧནཱདིཀཐཱ ནིཊྛིཏཱ།
Āsanappaṭibāhanādikathā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi / ཨཱསནཔྤཊིབཱཧནཱདི • Āsanappaṭibāhanādi
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨཱསནཔྤཊིབཱཧནཱདིཀཐཱ • Āsanappaṭibāhanādikathā
