| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
ཨཱསནཔྤཊིབཱཧནཱདིཀཐཱ
Āsanappaṭibāhanādikathā
༣༡༦. ཝིཔྤཀཏབྷོཛནེནཱཏི ཨེཏྠ ཝིཔྤཀཏསདྡོ ཨནིཊྛིཏཔརིཡཱཡོཏི ཨཱཧ ‘‘ཨནིཊྛིཏེ བྷོཛནེ’’ཏི། པཀིརིཡིཏྠ, པཀིརིཡིསྶཏེ ཝཱ པཀཏཾ, ན པཀཏཾ ཝིཔྤཀཏནྟི ཝིགྒཧོ ཀཱཏབྦོ, ཨཏྠཏོ པན ‘‘ཀརིཡམཱནོ ཨནིཊྛིཏོ’’ཏི ཝུཏྟཾ ཧོཏི། ཨེཏྠཱཏི ཋཱནེ། ཨཏིསམཱིཔནྟི བྷུཉྫམཱནསྶ བྷིཀྑུསྶ ཨཏིཨཱསནྣཾ། ཏསྶཱཏི བྷུཉྫམཱནསྶ བྷིཀྑུསྶ། པིཝིཏྭཱ ཝཱཏི ཡཱགུཾ པིཝིཏྭཱ ཝཱ། ཁཱདིཏྭཱ ཝཱཏི ཁཛྫཀཾ ཁཱདིཏྭཱ ཝཱ། རིཏྟཧཏྠམྤཱིཏི ཏུཙྪཧཏྠམྤི། པིསདྡེན ཨཱམིསཧཏྠཾ པན པགེཝཱཏི དསྶེཏི། ཧཱིཏི སཙྩཾ, ཡསྨཱ ཝཱ། སོཏི རིཏྟཧཏྠོ བྷིཀྑུ།
316.Vippakatabhojanenāti ettha vippakatasaddo aniṭṭhitapariyāyoti āha ‘‘aniṭṭhite bhojane’’ti. Pakiriyittha, pakiriyissate vā pakataṃ, na pakataṃ vippakatanti viggaho kātabbo, atthato pana ‘‘kariyamāno aniṭṭhito’’ti vuttaṃ hoti. Etthāti ṭhāne. Atisamīpanti bhuñjamānassa bhikkhussa atiāsannaṃ. Tassāti bhuñjamānassa bhikkhussa. Pivitvā vāti yāguṃ pivitvā vā. Khāditvā vāti khajjakaṃ khāditvā vā. Rittahatthampīti tucchahatthampi. Pisaddena āmisahatthaṃ pana pagevāti dasseti. Hīti saccaṃ, yasmā vā. Soti rittahattho bhikkhu.
ཨཱཔཏྟིནྟི དུཀྐཊཱཔཏྟིཾ། ཡནྟི ཝིཔྤཀཏབྷོཛནཾ བྷིཀྑུཾ། སོཏི པཙྪཱ ཨཱགཏོ བྷིཀྑུ། ཨཡཉྩ བྷིཀྑཱུཏི ཝིཔྤཀཏབྷོཛནོ ཨཡཉྩ བྷིཀྑུ། ཏེནཱཏི ཝིཔྤཀཏབྷོཛནེན ནཝཀེན ཝཱ ཝུཌྜྷཏརེན ཝཱ བྷིཀྑུནཱ། ཀིཾ ནཝཀེན ཝུཌྜྷཏརཾ ཨཱཎཱཔེཏུཾ ཝཊྚཏཱིཏི ཨཱཧ ‘‘ཝུཌྜྷཏརཾ ཧཱི’’ཏིཨཱདི། ཧཱིཏི སཙྩཾ, ཡསྨཱ ཝཱ། སོཏི ཝུཌྜྷཏརོ བྷིཀྑུ། ཏཏོཏི ཨུདཀཾ ཨཱཧརཱཔེཏུཾ ཨཱཎཏྟིཏོ། ཡནྟི ཀམྨཾ།
Āpattinti dukkaṭāpattiṃ. Yanti vippakatabhojanaṃ bhikkhuṃ. Soti pacchā āgato bhikkhu. Ayañca bhikkhūti vippakatabhojano ayañca bhikkhu. Tenāti vippakatabhojanena navakena vā vuḍḍhatarena vā bhikkhunā. Kiṃ navakena vuḍḍhataraṃ āṇāpetuṃ vaṭṭatīti āha ‘‘vuḍḍhataraṃ hī’’tiādi. Hīti saccaṃ, yasmā vā. Soti vuḍḍhataro bhikkhu. Tatoti udakaṃ āharāpetuṃ āṇattito. Yanti kammaṃ.
ཡོཏི བྷིཀྑུ། ‘‘ཨེཝརཱུཔསྶཱ’’ཏི པདེན ཏསྶ ནིཡམནཾ ཝེདིཏབྦཾ། ཀཱསསྶ ཁེལ༹མལླཀཾ ཋཔེཏབྦཾ། བྷགནྡརཨཏིསཱརཱནཾ ཝཙྩཀཔཱལཾ ཋཔེཏབྦཾ ། ཨཉྙེསཾ ཨཉྙཱནི ཋཔེཏབྦཱནི ཧོནྟི། ཏེན ཝུཏྟཾ ‘‘ཁེལ༹…པེ॰… ཧོནྟཱི’’ཏི། ཡསྨིཾཏི ཡསྨིཾ གིལཱནེ། ཡོཔི བྷེསཛྫཾ ཀརོཏཱིཏི སམྦནྡྷོ། ལེསཀཔྤེནཱཏི ཨེཏྠ ལེསཀཔྤསདྡཱནཾ ཨཏྠཏོ ཨེཀཏྟཱ ཝུཏྟཾ ‘‘ཨཔྤཀེན སཱིསཱབཱདྷཱདིམཏྟེནཱ’’ཏི། བྷིཀྑཱུ གཎེཏྭཱཏི ཨེཏྠ གཎཾ ཉཏྭཱཏི དསྶེནྟོ ཨཱཧ ‘‘པརིཙྪེདཾ ཉཏྭཱ’’ཏི། ཏཏྠ ‘‘པརིཙྪེད’’ནྟི ཨིམིནཱ གཎསདྡསྶ ཨདྷིཔྤཱཡཏྠཾ དསྶེཏི། ‘‘ཉཏྭཱ’’ཏི ཨིམིནཱ ཨིདྷཱཏུཡཱ ཨཏྠཾ དསྶེཏི།
Yoti bhikkhu. ‘‘Evarūpassā’’ti padena tassa niyamanaṃ veditabbaṃ. Kāsassa kheḷamallakaṃ ṭhapetabbaṃ. Bhagandaraatisārānaṃ vaccakapālaṃ ṭhapetabbaṃ . Aññesaṃ aññāni ṭhapetabbāni honti. Tena vuttaṃ ‘‘kheḷa…pe… hontī’’ti. Yasmiṃti yasmiṃ gilāne. Yopi bhesajjaṃ karotīti sambandho. Lesakappenāti ettha lesakappasaddānaṃ atthato ekattā vuttaṃ ‘‘appakena sīsābādhādimattenā’’ti. Bhikkhū gaṇetvāti ettha gaṇaṃ ñatvāti dassento āha ‘‘paricchedaṃ ñatvā’’ti. Tattha ‘‘pariccheda’’nti iminā gaṇasaddassa adhippāyatthaṃ dasseti. ‘‘Ñatvā’’ti iminā idhātuyā atthaṃ dasseti.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi / ཨཱསནཔྤཊིབཱཧནཱདི • Āsanappaṭibāhanādi
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཨཱསནཔྤཊིབཱཧནཱདིཀཐཱ • Āsanappaṭibāhanādikathā
