| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
20. вийсад̇имаваг̇г̇о
20. Vīsatimavaggo
1. асан̃жижжагат̇ааван̣н̣анаа
1. Asañciccakathāvaṇṇanā
857-862. ид̣̇аани асан̃жижжагат̇аа наама ход̇и. д̇ад̇т̇а ‘‘аананд̇арияавад̇т̇ууни наама г̇арууни бхаарияаани, д̇асмаа асан̃жижжааби д̇зсу вад̇т̇уусу вигобид̇зсу аананд̇ариго ход̇ий’’д̇и язсам̣ лад̣̇д̇хи, сзяяат̇ааби згажжаанам̣ уд̇д̇араабат̇агаанам̣; д̇з санд̇хааяа асан̃жижжаад̇и бужчаа сагаваад̣̇исса, лад̣̇д̇хивасзна бадин̃н̃аа ид̇арасса. ат̇а нам̣ ‘‘яасмаа аананд̇арияагаммам̣ наама гаммабат̇аббад̇д̇ам̣. яад̣̇и жа асан̃жижжа гаммабат̇абхзд̣̇о сияаа, авасзсаа баан̣аад̇ибаад̇аад̣̇аяоби асан̃жижжа бхавзяяу’’нд̇и жод̣̇анад̇т̇ам̣ асан̃жижжабаан̣ам̣ ханд̇ваад̇иаад̣̇имааха. ид̇аро д̇ат̇ааруубааяа лад̣̇д̇хияаа абхаавзна бадигкибад̇и. сзсам̣ яат̇аабаал̣имзва нияяаад̇и. на вад̇д̇аб̣б̣ам̣ маад̇угхаад̇агод̇и бужчаа бараваад̣̇исса, рог̇абадигаараад̣̇игаалз асан̃жижжа гхаад̇ам̣ санд̇хааяа бадин̃н̃аа сагаваад̣̇исса. нану маад̇аа ж̇ийвид̇аа воробид̇аад̇и бан̃хзби асан̃жижжа воробид̇ам̣ санд̇хааяа бадин̃н̃аа сагаваад̣̇иссзва. звам̣ ад̇хиббааяам̣ бана аг̇г̇ахзд̇ваа хан̃жийд̇и лад̣̇д̇хибад̇идтаабанам̣ ид̇арасса. д̇ам̣ аяонисо бад̇идтаабид̇ад̇д̇аа аббад̇идтид̇амзва. бид̇угхаад̇агаад̣̇ийсуби зсзва наяо. сан̇гхабхзд̣̇агз бана д̇хаммасан̃н̃им̣ санд̇хааяа сан̇гхабхзд̣̇о аананд̇аригод̇и бужчаа сагаваад̣̇исса, ‘‘сан̇гхам̣ самаг̇г̇ам̣ бхзд̇ваана, габбам̣ нираяамхи бажжад̇ий’’д̇и важанам̣ аяонисо г̇ахзд̇ваа бадин̃н̃аа бараваад̣̇исса. буна саб̣б̣зд̇и будто сагабагкз д̇хаммасан̃н̃им̣ санд̇хааяа бадигкибад̇и, барабагкз д̇хаммасан̃н̃им̣ санд̇хааяа бадиж̇аанаад̇и. д̇хаммасан̃н̃ийд̇и бан̃хад̣̇ваязби зсзва наяо. нану вуд̇д̇ам̣ бхаг̇авад̇аад̇и суд̇д̇ам̣ зганд̇знзва д̇хаммаваад̣̇исса аананд̇аригабхаавад̣̇ассанад̇т̇ам̣ вуд̇д̇ам̣. аабааяиго нзраяигод̇и г̇аат̇ааяаби ад̇хаммаваад̣̇ийязва ад̇хиббзд̇о. ид̇аро бана ад̇хиббааяам̣ аг̇г̇ахзд̇ваа лад̣̇д̇хим̣ бад̇идтабзд̇и. саа аяонисо бад̇идтаабид̇ад̇д̇аа аббад̇идтид̇ааязваад̇и.
857-862. Idāni asañciccakathā nāma hoti. Tattha ‘‘ānantariyavatthūni nāma garūni bhāriyāni, tasmā asañciccāpi tesu vatthūsu vikopitesu ānantariko hotī’’ti yesaṃ laddhi, seyyathāpi ekaccānaṃ uttarāpathakānaṃ; te sandhāya asañciccāti pucchā sakavādissa, laddhivasena paṭiññā itarassa. Atha naṃ ‘‘yasmā ānantariyakammaṃ nāma kammapathappattaṃ. Yadi ca asañcicca kammapathabhedo siyā, avasesā pāṇātipātādayopi asañcicca bhaveyyu’’nti codanatthaṃ asañciccapāṇaṃ hantvātiādimāha. Itaro tathārūpāya laddhiyā abhāvena paṭikkhipati. Sesaṃ yathāpāḷimeva niyyāti. Na vattabbaṃ mātughātakoti pucchā paravādissa, rogapaṭikārādikāle asañcicca ghātaṃ sandhāya paṭiññā sakavādissa. Nanu mātā jīvitā voropitāti pañhepi asañcicca voropitaṃ sandhāya paṭiññā sakavādisseva. Evaṃ adhippāyaṃ pana aggahetvā hañcīti laddhipatiṭṭhāpanaṃ itarassa. Taṃ ayoniso patiṭṭhāpitattā appatiṭṭhitameva. Pitughātakādīsupi eseva nayo. Saṅghabhedake pana dhammasaññiṃ sandhāya saṅghabhedo ānantarikoti pucchā sakavādissa, ‘‘saṅghaṃ samaggaṃ bhetvāna, kappaṃ nirayamhi paccatī’’ti vacanaṃ ayoniso gahetvā paṭiññā paravādissa. Puna sabbeti puṭṭho sakapakkhe dhammasaññiṃ sandhāya paṭikkhipati, parapakkhe dhammasaññiṃ sandhāya paṭijānāti. Dhammasaññīti pañhadvayepi eseva nayo. Nanu vuttaṃ bhagavatāti suttaṃ ekanteneva dhammavādissa ānantarikabhāvadassanatthaṃ vuttaṃ. Āpāyiko nerayikoti gāthāyapi adhammavādīyeva adhippeto. Itaro pana adhippāyaṃ aggahetvā laddhiṃ patiṭṭhapeti. Sā ayoniso patiṭṭhāpitattā appatiṭṭhitāyevāti.
асан̃жижжагат̇ааван̣н̣анаа.
Asañciccakathāvaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / гат̇аавад̇т̇убаал̣и • Kathāvatthupāḷi / (194) 1. асан̃жижжагат̇аа • (194) 1. Asañciccakathā
