| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
५. असङ्कमनपटिसन्दहनपञ्हो
5. Asaṅkamanapaṭisandahanapañho
५. राजा आह ‘‘भन्ते नागसेन, न च सङ्कमति पटिसन्दहति चा’’ति? ‘‘आम, महाराज, न च सङ्कमति पटिसन्दहति चा’’ति। ‘‘कथं, भन्ते नागसेन, न च सङ्कमति पटिसन्दहति च, ओपम्मं करोही’’ति? ‘‘यथा, महाराज, कोचिदेव पुरिसो पदीपतो पदीपं पदीपेय्य, किंनु खो सो, महाराज, पदीपो पदीपम्हा सङ्कन्तो’’ति? ‘‘न हि, भन्ते’’ति। ‘‘एवमेव खो, महाराज, न च सङ्कमति पटिसन्दहति चा’’ति।
5. Rājā āha ‘‘bhante nāgasena, na ca saṅkamati paṭisandahati cā’’ti? ‘‘Āma, mahārāja, na ca saṅkamati paṭisandahati cā’’ti. ‘‘Kathaṃ, bhante nāgasena, na ca saṅkamati paṭisandahati ca, opammaṃ karohī’’ti? ‘‘Yathā, mahārāja, kocideva puriso padīpato padīpaṃ padīpeyya, kiṃnu kho so, mahārāja, padīpo padīpamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cā’’ti.
‘‘भिय्यो ओपम्मं करोही’’ति। ‘‘अभिजानासि नु, त्वं महाराज, दहरको सन्तो सिलोकाचरियस्स सन्तिके किञ्चि सिलोकं गहित’’न्ति? ‘‘आम, भन्ते’’ति । ‘‘किंनु खो, महाराज, सो सिलोको आचरियम्हा सङ्कन्तो’’ति? ‘‘न हि, भन्ते’’ति। ‘‘एवमेव खो, महाराज, न च सङ्कमति पटिसन्दहति चाति।
‘‘Bhiyyo opammaṃ karohī’’ti. ‘‘Abhijānāsi nu, tvaṃ mahārāja, daharako santo silokācariyassa santike kiñci silokaṃ gahita’’nti? ‘‘Āma, bhante’’ti . ‘‘Kiṃnu kho, mahārāja, so siloko ācariyamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cāti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
असङ्कमनपटिसन्दहनपञ्हो पञ्चमो।
Asaṅkamanapaṭisandahanapañho pañcamo.
