| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
5. අසඞ්‌කමනපටිසන්‌දහනපඤ්‌හො
5. Asaṅkamanapaṭisandahanapañho
5. රාජා ආහ ‘‘භන්‌තෙ නාගසෙන, න ච සඞ්‌කමති පටිසන්‌දහති චා’’ති? ‘‘ආම, මහාරාජ, න ච සඞ්‌කමති පටිසන්‌දහති චා’’ති. ‘‘කථං, භන්‌තෙ නාගසෙන, න ච සඞ්‌කමති පටිසන්‌දහති ච, ඔපම්‌මං කරොහී’’ති? ‘‘යථා, මහාරාජ, කොචිදෙව පුරිසො පදීපතො පදීපං පදීපෙය්‍ය, කිංනු ඛො සො, මහාරාජ, පදීපො පදීපම්‌හා සඞ්‌කන්‌තො’’ති? ‘‘න හි, භන්‌තෙ’’ති. ‘‘එවමෙව ඛො, මහාරාජ, න ච සඞ්‌කමති පටිසන්‌දහති චා’’ති.
5. Rājā āha ‘‘bhante nāgasena, na ca saṅkamati paṭisandahati cā’’ti? ‘‘Āma, mahārāja, na ca saṅkamati paṭisandahati cā’’ti. ‘‘Kathaṃ, bhante nāgasena, na ca saṅkamati paṭisandahati ca, opammaṃ karohī’’ti? ‘‘Yathā, mahārāja, kocideva puriso padīpato padīpaṃ padīpeyya, kiṃnu kho so, mahārāja, padīpo padīpamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cā’’ti.
‘‘භිය්‍යො ඔපම්‌මං කරොහී’’ති. ‘‘අභිජානාසි නු, ත්‌වං මහාරාජ, දහරකො සන්‌තො සිලොකාචරියස්‌ස සන්‌තිකෙ කිඤ්‌චි සිලොකං ගහිත’’න්‌ති? ‘‘ආම, භන්‌තෙ’’ති . ‘‘කිංනු ඛො, මහාරාජ, සො සිලොකො ආචරියම්‌හා සඞ්‌කන්‌තො’’ති? ‘‘න හි, භන්‌තෙ’’ති. ‘‘එවමෙව ඛො, මහාරාජ, න ච සඞ්‌කමති පටිසන්‌දහති චාති.
‘‘Bhiyyo opammaṃ karohī’’ti. ‘‘Abhijānāsi nu, tvaṃ mahārāja, daharako santo silokācariyassa santike kiñci silokaṃ gahita’’nti? ‘‘Āma, bhante’’ti . ‘‘Kiṃnu kho, mahārāja, so siloko ācariyamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cāti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
අසඞ්‌කමනපටිසන්‌දහනපඤ්‌හො පඤ්‌චමො.
Asaṅkamanapaṭisandahanapañho pañcamo.
