| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༥. ཨསངྐམནཔཊིསནྡཧནཔཉྷོ
5. Asaṅkamanapaṭisandahanapañho
༥. རཱཛཱ ཨཱཧ ‘‘བྷནྟེ ནཱགསེན, ན ཙ སངྐམཏི པཊིསནྡཧཏི ཙཱ’’ཏི? ‘‘ཨཱམ, མཧཱརཱཛ, ན ཙ སངྐམཏི པཊིསནྡཧཏི ཙཱ’’ཏི། ‘‘ཀཐཾ, བྷནྟེ ནཱགསེན, ན ཙ སངྐམཏི པཊིསནྡཧཏི ཙ, ཨོཔམྨཾ ཀརོཧཱི’’ཏི? ‘‘ཡཐཱ, མཧཱརཱཛ, ཀོཙིདེཝ པུརིསོ པདཱིཔཏོ པདཱིཔཾ པདཱིཔེཡྻ, ཀིཾནུ ཁོ སོ, མཧཱརཱཛ, པདཱིཔོ པདཱིཔམྷཱ སངྐནྟོ’’ཏི? ‘‘ན ཧི, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ན ཙ སངྐམཏི པཊིསནྡཧཏི ཙཱ’’ཏི།
5. Rājā āha ‘‘bhante nāgasena, na ca saṅkamati paṭisandahati cā’’ti? ‘‘Āma, mahārāja, na ca saṅkamati paṭisandahati cā’’ti. ‘‘Kathaṃ, bhante nāgasena, na ca saṅkamati paṭisandahati ca, opammaṃ karohī’’ti? ‘‘Yathā, mahārāja, kocideva puriso padīpato padīpaṃ padīpeyya, kiṃnu kho so, mahārāja, padīpo padīpamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cā’’ti.
‘‘བྷིཡྻོ ཨོཔམྨཾ ཀརོཧཱི’’ཏི། ‘‘ཨབྷིཛཱནཱསི ནུ, ཏྭཾ མཧཱརཱཛ, དཧརཀོ སནྟོ སིལོཀཱཙརིཡསྶ སནྟིཀེ ཀིཉྩི སིལོཀཾ གཧིཏ’’ནྟི? ‘‘ཨཱམ, བྷནྟེ’’ཏི ། ‘‘ཀིཾནུ ཁོ, མཧཱརཱཛ, སོ སིལོཀོ ཨཱཙརིཡམྷཱ སངྐནྟོ’’ཏི? ‘‘ན ཧི, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ན ཙ སངྐམཏི པཊིསནྡཧཏི ཙཱཏི།
‘‘Bhiyyo opammaṃ karohī’’ti. ‘‘Abhijānāsi nu, tvaṃ mahārāja, daharako santo silokācariyassa santike kiñci silokaṃ gahita’’nti? ‘‘Āma, bhante’’ti . ‘‘Kiṃnu kho, mahārāja, so siloko ācariyamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cāti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
ཨསངྐམནཔཊིསནྡཧནཔཉྷོ པཉྩམོ།
Asaṅkamanapaṭisandahanapañho pañcamo.
