| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
൫. അസങ്കമനപടിസന്ദഹനപഞ്ഹോ
5. Asaṅkamanapaṭisandahanapañho
൫. രാജാ ആഹ ‘‘ഭന്തേ നാഗസേന, ന ച സങ്കമതി പടിസന്ദഹതി ചാ’’തി? ‘‘ആമ, മഹാരാജ, ന ച സങ്കമതി പടിസന്ദഹതി ചാ’’തി. ‘‘കഥം, ഭന്തേ നാഗസേന, ന ച സങ്കമതി പടിസന്ദഹതി ച, ഓപമ്മം കരോഹീ’’തി? ‘‘യഥാ, മഹാരാജ, കോചിദേവ പുരിസോ പദീപതോ പദീപം പദീപേയ്യ, കിംനു ഖോ സോ, മഹാരാജ, പദീപോ പദീപമ്ഹാ സങ്കന്തോ’’തി? ‘‘ന ഹി, ഭന്തേ’’തി. ‘‘ഏവമേവ ഖോ, മഹാരാജ, ന ച സങ്കമതി പടിസന്ദഹതി ചാ’’തി.
5. Rājā āha ‘‘bhante nāgasena, na ca saṅkamati paṭisandahati cā’’ti? ‘‘Āma, mahārāja, na ca saṅkamati paṭisandahati cā’’ti. ‘‘Kathaṃ, bhante nāgasena, na ca saṅkamati paṭisandahati ca, opammaṃ karohī’’ti? ‘‘Yathā, mahārāja, kocideva puriso padīpato padīpaṃ padīpeyya, kiṃnu kho so, mahārāja, padīpo padīpamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cā’’ti.
‘‘ഭിയ്യോ ഓപമ്മം കരോഹീ’’തി. ‘‘അഭിജാനാസി നു, ത്വം മഹാരാജ, ദഹരകോ സന്തോ സിലോകാചരിയസ്സ സന്തികേ കിഞ്ചി സിലോകം ഗഹിത’’ന്തി? ‘‘ആമ, ഭന്തേ’’തി . ‘‘കിംനു ഖോ, മഹാരാജ, സോ സിലോകോ ആചരിയമ്ഹാ സങ്കന്തോ’’തി? ‘‘ന ഹി, ഭന്തേ’’തി. ‘‘ഏവമേവ ഖോ, മഹാരാജ, ന ച സങ്കമതി പടിസന്ദഹതി ചാതി.
‘‘Bhiyyo opammaṃ karohī’’ti. ‘‘Abhijānāsi nu, tvaṃ mahārāja, daharako santo silokācariyassa santike kiñci silokaṃ gahita’’nti? ‘‘Āma, bhante’’ti . ‘‘Kiṃnu kho, mahārāja, so siloko ācariyamhā saṅkanto’’ti? ‘‘Na hi, bhante’’ti. ‘‘Evameva kho, mahārāja, na ca saṅkamati paṭisandahati cāti.
‘‘കല്ലോസി, ഭന്തേ നാഗസേനാ’’തി.
‘‘Kallosi, bhante nāgasenā’’ti.
അസങ്കമനപടിസന്ദഹനപഞ്ഹോ പഞ്ചമോ.
Asaṅkamanapaṭisandahanapañho pañcamo.
