| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. து³தியவக்³கோ³
2. Dutiyavaggo
1-33. அஸங்க²தஸுத்தாதி³வண்ணனா
1-33. Asaṅkhatasuttādivaṇṇanā
377-409. காயே காயானுபஸ்ஸீதிஆதீ³ஸு யங் வத்தப்³ப³ங், தங் பரதோ வக்கா²ம.
377-409.Kāyekāyānupassītiādīsu yaṃ vattabbaṃ, taṃ parato vakkhāma.
அனதந்திஆதீ³ஸு தண்ஹானதியா அபா⁴வேன அனதங். சதுன்னங் ஆஸவானங் அபா⁴வேன அனாஸவங். பரமத்த²ஸச்சதாய ஸச்சங். வட்டஸ்ஸ பரபா⁴க³ட்டே²ன பாரங். ஸண்ஹட்டே²ன நிபுணங். ஸுட்டு² து³த்³த³ஸதாய ஸுது³த்³த³ஸங். ஜராய அஜரிதத்தா அஜஜ்ஜரங். தி²ரட்டே²ன து⁴வங். அபலுஜ்ஜனதாய அபலோகிதங். சக்கு²விஞ்ஞாணேன அபஸ்ஸிதப்³ப³த்தா அனித³ஸ்ஸனங். தண்ஹாமானதி³ட்டி²பபஞ்சானங் அபா⁴வேன நிப்பபஞ்சங்.
Anatantiādīsu taṇhānatiyā abhāvena anataṃ. Catunnaṃ āsavānaṃ abhāvena anāsavaṃ. Paramatthasaccatāya saccaṃ. Vaṭṭassa parabhāgaṭṭhena pāraṃ. Saṇhaṭṭhena nipuṇaṃ. Suṭṭhu duddasatāya sududdasaṃ. Jarāya ajaritattā ajajjaraṃ. Thiraṭṭhena dhuvaṃ. Apalujjanatāya apalokitaṃ. Cakkhuviññāṇena apassitabbattā anidassanaṃ. Taṇhāmānadiṭṭhipapañcānaṃ abhāvena nippapañcaṃ.
ஸந்தபா⁴வட்டே²ன ஸந்தங். மரணாபா⁴வேன அமதங். உத்தமட்டே²ன பணீதங். ஸஸ்ஸிரிகட்டே²ன ஸிவங். நிருபத்³த³வதாய கே²மங். தண்ஹாக்க²யஸ்ஸ பச்சயத்தா தண்ஹக்க²யங்.
Santabhāvaṭṭhena santaṃ. Maraṇābhāvena amataṃ. Uttamaṭṭhena paṇītaṃ. Sassirikaṭṭhena sivaṃ. Nirupaddavatāya khemaṃ. Taṇhākkhayassa paccayattā taṇhakkhayaṃ.
விம்ஹாபனீயட்டே²ன அச்ச²ரங் பஹரிதப்³ப³யுத்தகந்தி அச்ச²ரியங். அபூ⁴தமேவ பூ⁴தங் அஜாதங் ஹுத்வா அத்தீ²தி வா அப்³பு⁴தங். நித்³து³க்க²த்தா அனீதிகங். நித்³து³க்க²ஸபா⁴வத்தா அனீதிகத⁴ம்மங். வானாபா⁴வேன நிப்³பா³னங். ப்³யாப³ஜ்ஜா²பா⁴வேனேவ அப்³யாப³ஜ்ஜ²ங். விராகா³தி⁴க³மஸ்ஸ பச்சயதோ விராக³ங். பரமத்த²ஸுத்³தி⁴தாய ஸுத்³தி⁴. தீஹி ப⁴வேஹி முத்ததாய முத்தி. காமாலயானங் அபா⁴வேன அனாலயங். பதிட்ட²ட்டே²ன தீ³பங். அல்லீயிதப்³ப³யுத்தட்டே²ன லேணங். தாயனட்டே²ன தாணங். ப⁴யஸரணட்டே²ன ஸரணங், ப⁴யனாஸனந்தி அத்தோ². பரங் அயனங் க³தி பதிட்டா²தி பராயணங். ஸேஸமெத்த² வுத்தனயமேவாதி.
Vimhāpanīyaṭṭhena accharaṃ paharitabbayuttakanti acchariyaṃ. Abhūtameva bhūtaṃ ajātaṃ hutvā atthīti vā abbhutaṃ. Niddukkhattā anītikaṃ. Niddukkhasabhāvattā anītikadhammaṃ. Vānābhāvena nibbānaṃ. Byābajjhābhāveneva abyābajjhaṃ. Virāgādhigamassa paccayato virāgaṃ. Paramatthasuddhitāya suddhi. Tīhi bhavehi muttatāya mutti. Kāmālayānaṃ abhāvena anālayaṃ. Patiṭṭhaṭṭhena dīpaṃ. Allīyitabbayuttaṭṭhena leṇaṃ. Tāyanaṭṭhena tāṇaṃ. Bhayasaraṇaṭṭhena saraṇaṃ, bhayanāsananti attho. Paraṃ ayanaṃ gati patiṭṭhāti parāyaṇaṃ. Sesamettha vuttanayamevāti.
அஸங்க²தஸங்யுத்தவண்ணனா நிட்டி²தா.
Asaṅkhatasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
1. அஸங்க²தஸுத்தங் • 1. Asaṅkhatasuttaṃ
2. அனதஸுத்தங் • 2. Anatasuttaṃ
3-32. அனாஸவாதி³ஸுத்தங் • 3-32. Anāsavādisuttaṃ
33. பராயனஸுத்தங் • 33. Parāyanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 23-33. அஸங்க²தஸுத்தாதி³வண்ணனா • 23-33. Asaṅkhatasuttādivaṇṇanā
