| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
२. दुतियवग्गो
2. Dutiyavaggo
२३-३३. असङ्खतसुत्तादिवण्णना
23-33. Asaṅkhatasuttādivaṇṇanā
३७७-४०९. तत्थ च नत्थि एत्थ तण्हासङ्खातं नतं, नत्थि एतस्मिं वा अधिगते पुग्गलभावोति अनतं। अनासवन्ति एत्थापि एसेव नयो। सच्चधम्मताय सच्चं। वट्टदुक्खतो पारमेतीति पारं। सण्हट्ठेनाति सुखुमट्ठेन निपुणं। ततो एव दुद्दसताय। अजज्जरं निच्चसभावत्ता। नत्थि एतस्स निदस्सनन्ति वा अनिदस्सनं। एतस्मिं अधिगते नत्थि संसारे। पपञ्चन्ति वा निप्पपञ्चं।
377-409. Tattha ca natthi ettha taṇhāsaṅkhātaṃ nataṃ, natthi etasmiṃ vā adhigate puggalabhāvoti anataṃ. Anāsavanti etthāpi eseva nayo. Saccadhammatāya saccaṃ. Vaṭṭadukkhato pārametīti pāraṃ. Saṇhaṭṭhenāti sukhumaṭṭhena nipuṇaṃ. Tato eva duddasatāya. Ajajjaraṃ niccasabhāvattā. Natthi etassa nidassananti vā anidassanaṃ. Etasmiṃ adhigate natthi saṃsāre. Papañcanti vā nippapañcaṃ.
एतस्मिं अधिगते पुग्गलस्स मरणं नत्थीति वा अमतं। अतप्पकट्ठेन वा पणीतं। सुखहेतुताय वा सिवं। तण्हा खीयन्ति एत्थाति तण्हक्खयं।
Etasmiṃ adhigate puggalassa maraṇaṃ natthīti vā amataṃ. Atappakaṭṭhena vā paṇītaṃ. Sukhahetutāya vā sivaṃ. Taṇhā khīyanti etthāti taṇhakkhayaṃ.
अञ्ञस्स तादिसस्स अभावतो विम्हापनीयताय अभूतमेवाति। कुतोचि पच्चयतो अनिब्बत्तमेव हुत्वा भूतं विज्जमानं। तेनाह ‘‘अजातं हुत्वा अत्थी’’ति। नत्थि एत्थ दुक्खन्ति निद्दुक्खं, तस्स भावो निद्दुक्खत्तं। तस्मा अनीतिकं ईतिरहितं। वानं वुच्चति तण्हा, तदभावेन निब्बानं। ब्याबज्झं वुच्चति दुक्खं, तदभावेन अब्याबज्झं। परमत्थतो सच्चतो सुद्धिभावेन। कामा एव पुथुज्जनेहि अल्लीयितब्बतो आलया। एस नयो सेसेसुपि। पतिट्ठट्ठेनाति पतिट्ठाभावेन वट्टदुक्खतो मुच्चितुकामानं दीपसदिसं ओघेहि अनज्झोत्थरणीयत्ता। अल्लीयितब्बयुत्तट्ठेनाति अल्लीयितुं अरहभावतो। तायनट्ठेनाति सपरतायनट्ठेन। भयसरणट्ठेनाति भयस्स हिंसनट्ठेन। सेट्ठं उत्तमं। गतीति गन्धब्बट्ठानं।
Aññassa tādisassa abhāvato vimhāpanīyatāya abhūtamevāti. Kutoci paccayato anibbattameva hutvā bhūtaṃ vijjamānaṃ. Tenāha ‘‘ajātaṃ hutvā atthī’’ti. Natthi ettha dukkhanti niddukkhaṃ, tassa bhāvo niddukkhattaṃ. Tasmā anītikaṃ ītirahitaṃ. Vānaṃ vuccati taṇhā, tadabhāvena nibbānaṃ. Byābajjhaṃ vuccati dukkhaṃ, tadabhāvena abyābajjhaṃ. Paramatthato saccato suddhibhāvena. Kāmā eva puthujjanehi allīyitabbato ālayā. Esa nayo sesesupi. Patiṭṭhaṭṭhenāti patiṭṭhābhāvena vaṭṭadukkhato muccitukāmānaṃ dīpasadisaṃ oghehi anajjhottharaṇīyattā. Allīyitabbayuttaṭṭhenāti allīyituṃ arahabhāvato. Tāyanaṭṭhenāti saparatāyanaṭṭhena. Bhayasaraṇaṭṭhenāti bhayassa hiṃsanaṭṭhena. Seṭṭhaṃ uttamaṃ. Gatīti gandhabbaṭṭhānaṃ.
असङ्खतसुत्तादिवण्णना निट्ठिता।
Asaṅkhatasuttādivaṇṇanā niṭṭhitā.
असङ्खतसंयुत्तवण्णना निट्ठिता।
Asaṅkhatasaṃyuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya
१. असङ्खतसुत्तं • 1. Asaṅkhatasuttaṃ
२. अनतसुत्तं • 2. Anatasuttaṃ
३-३२. अनासवादिसुत्तं • 3-32. Anāsavādisuttaṃ
३३. परायनसुत्तं • 33. Parāyanasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १-३३. असङ्खतसुत्तादिवण्णना • 1-33. Asaṅkhatasuttādivaṇṇanā
