| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๒. ทุติยวโคฺค
2. Dutiyavaggo
๒๓-๓๓. อสงฺขตสุตฺตาทิวณฺณนา
23-33. Asaṅkhatasuttādivaṇṇanā
๓๗๗-๔๐๙. ตตฺถ จ นตฺถิ เอตฺถ ตณฺหาสงฺขาตํ นตํ, นตฺถิ เอตสฺมิํ วา อธิคเต ปุคฺคลภาโวติ อนตํฯ อนาสวนฺติ เอตฺถาปิ เอเสว นโยฯ สจฺจธมฺมตาย สจฺจํฯ วฎฺฎทุกฺขโต ปารเมตีติ ปารํฯ สณฺหเฎฺฐนาติ สุขุมเฎฺฐน นิปุณํฯ ตโต เอว ทุทฺทสตายฯ อชชฺชรํ นิจฺจสภาวตฺตาฯ นตฺถิ เอตสฺส นิทสฺสนนฺติ วา อนิทสฺสนํฯ เอตสฺมิํ อธิคเต นตฺถิ สํสาเรฯ ปปญฺจนฺติ วา นิปฺปปญฺจํฯ
377-409. Tattha ca natthi ettha taṇhāsaṅkhātaṃ nataṃ, natthi etasmiṃ vā adhigate puggalabhāvoti anataṃ. Anāsavanti etthāpi eseva nayo. Saccadhammatāya saccaṃ. Vaṭṭadukkhato pārametīti pāraṃ. Saṇhaṭṭhenāti sukhumaṭṭhena nipuṇaṃ. Tato eva duddasatāya. Ajajjaraṃ niccasabhāvattā. Natthi etassa nidassananti vā anidassanaṃ. Etasmiṃ adhigate natthi saṃsāre. Papañcanti vā nippapañcaṃ.
เอตสฺมิํ อธิคเต ปุคฺคลสฺส มรณํ นตฺถีติ วา อมตํฯ อตปฺปกเฎฺฐน วา ปณีตํฯ สุขเหตุตาย วา สิวํฯ ตณฺหา ขียนฺติ เอตฺถาติ ตณฺหกฺขยํฯ
Etasmiṃ adhigate puggalassa maraṇaṃ natthīti vā amataṃ. Atappakaṭṭhena vā paṇītaṃ. Sukhahetutāya vā sivaṃ. Taṇhā khīyanti etthāti taṇhakkhayaṃ.
อญฺญสฺส ตาทิสสฺส อภาวโต วิมฺหาปนียตาย อภูตเมวาติฯ กุโตจิ ปจฺจยโต อนิพฺพตฺตเมว หุตฺวา ภูตํ วิชฺชมานํฯ เตนาห ‘‘อชาตํ หุตฺวา อตฺถี’’ติฯ นตฺถิ เอตฺถ ทุกฺขนฺติ นิทฺทุกฺขํ, ตสฺส ภาโว นิทฺทุกฺขตฺตํฯ ตสฺมา อนีติกํ อีติรหิตํฯ วานํ วุจฺจติ ตณฺหา, ตทภาเวน นิพฺพานํฯ พฺยาพชฺฌํ วุจฺจติ ทุกฺขํ, ตทภาเวน อพฺยาพชฺฌํฯ ปรมตฺถโต สจฺจโต สุทฺธิภาเวนฯ กามา เอว ปุถุชฺชเนหิ อลฺลียิตพฺพโต อาลยาฯ เอส นโย เสเสสุปิฯ ปติฎฺฐเฎฺฐนาติ ปติฎฺฐาภาเวน วฎฺฎทุกฺขโต มุจฺจิตุกามานํ ทีปสทิสํ โอเฆหิ อนโชฺฌตฺถรณียตฺตาฯ อลฺลียิตพฺพยุตฺตเฎฺฐนาติ อลฺลียิตุํ อรหภาวโตฯ ตายนเฎฺฐนาติ สปรตายนเฎฺฐนฯ ภยสรณเฎฺฐนาติ ภยสฺส หิํสนเฎฺฐนฯ เสฎฺฐํ อุตฺตมํฯ คตีติ คนฺธพฺพฎฺฐานํฯ
Aññassa tādisassa abhāvato vimhāpanīyatāya abhūtamevāti. Kutoci paccayato anibbattameva hutvā bhūtaṃ vijjamānaṃ. Tenāha ‘‘ajātaṃ hutvā atthī’’ti. Natthi ettha dukkhanti niddukkhaṃ, tassa bhāvo niddukkhattaṃ. Tasmā anītikaṃ ītirahitaṃ. Vānaṃ vuccati taṇhā, tadabhāvena nibbānaṃ. Byābajjhaṃ vuccati dukkhaṃ, tadabhāvena abyābajjhaṃ. Paramatthato saccato suddhibhāvena. Kāmā eva puthujjanehi allīyitabbato ālayā. Esa nayo sesesupi. Patiṭṭhaṭṭhenāti patiṭṭhābhāvena vaṭṭadukkhato muccitukāmānaṃ dīpasadisaṃ oghehi anajjhottharaṇīyattā. Allīyitabbayuttaṭṭhenāti allīyituṃ arahabhāvato. Tāyanaṭṭhenāti saparatāyanaṭṭhena. Bhayasaraṇaṭṭhenāti bhayassa hiṃsanaṭṭhena. Seṭṭhaṃ uttamaṃ. Gatīti gandhabbaṭṭhānaṃ.
อสงฺขตสุตฺตาทิวณฺณนา นิฎฺฐิตาฯ
Asaṅkhatasuttādivaṇṇanā niṭṭhitā.
อสงฺขตสํยุตฺตวณฺณนา นิฎฺฐิตาฯ
Asaṅkhatasaṃyuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya
๑. อสงฺขตสุตฺตํ • 1. Asaṅkhatasuttaṃ
๒. อนตสุตฺตํ • 2. Anatasuttaṃ
๓-๓๒. อนาสวาทิสุตฺตํ • 3-32. Anāsavādisuttaṃ
๓๓. ปรายนสุตฺตํ • 33. Parāyanasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑-๓๓. อสงฺขตสุตฺตาทิวณฺณนา • 1-33. Asaṅkhatasuttādivaṇṇanā
