| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೨. ದುತಿಯವಗ್ಗೋ
2. Dutiyavaggo
೧-೩೩. ಅಸಙ್ಖತಸುತ್ತಾದಿವಣ್ಣನಾ
1-33. Asaṅkhatasuttādivaṇṇanā
೩೭೭-೪೦೯. ಕಾಯೇ ಕಾಯಾನುಪಸ್ಸೀತಿಆದೀಸು ಯಂ ವತ್ತಬ್ಬಂ, ತಂ ಪರತೋ ವಕ್ಖಾಮ।
377-409.Kāyekāyānupassītiādīsu yaṃ vattabbaṃ, taṃ parato vakkhāma.
ಅನತನ್ತಿಆದೀಸು ತಣ್ಹಾನತಿಯಾ ಅಭಾವೇನ ಅನತಂ। ಚತುನ್ನಂ ಆಸವಾನಂ ಅಭಾವೇನ ಅನಾಸವಂ। ಪರಮತ್ಥಸಚ್ಚತಾಯ ಸಚ್ಚಂ। ವಟ್ಟಸ್ಸ ಪರಭಾಗಟ್ಠೇನ ಪಾರಂ। ಸಣ್ಹಟ್ಠೇನ ನಿಪುಣಂ। ಸುಟ್ಠು ದುದ್ದಸತಾಯ ಸುದುದ್ದಸಂ। ಜರಾಯ ಅಜರಿತತ್ತಾ ಅಜಜ್ಜರಂ। ಥಿರಟ್ಠೇನ ಧುವಂ। ಅಪಲುಜ್ಜನತಾಯ ಅಪಲೋಕಿತಂ। ಚಕ್ಖುವಿಞ್ಞಾಣೇನ ಅಪಸ್ಸಿತಬ್ಬತ್ತಾ ಅನಿದಸ್ಸನಂ। ತಣ್ಹಾಮಾನದಿಟ್ಠಿಪಪಞ್ಚಾನಂ ಅಭಾವೇನ ನಿಪ್ಪಪಞ್ಚಂ।
Anatantiādīsu taṇhānatiyā abhāvena anataṃ. Catunnaṃ āsavānaṃ abhāvena anāsavaṃ. Paramatthasaccatāya saccaṃ. Vaṭṭassa parabhāgaṭṭhena pāraṃ. Saṇhaṭṭhena nipuṇaṃ. Suṭṭhu duddasatāya sududdasaṃ. Jarāya ajaritattā ajajjaraṃ. Thiraṭṭhena dhuvaṃ. Apalujjanatāya apalokitaṃ. Cakkhuviññāṇena apassitabbattā anidassanaṃ. Taṇhāmānadiṭṭhipapañcānaṃ abhāvena nippapañcaṃ.
ಸನ್ತಭಾವಟ್ಠೇನ ಸನ್ತಂ। ಮರಣಾಭಾವೇನ ಅಮತಂ। ಉತ್ತಮಟ್ಠೇನ ಪಣೀತಂ। ಸಸ್ಸಿರಿಕಟ್ಠೇನ ಸಿವಂ। ನಿರುಪದ್ದವತಾಯ ಖೇಮಂ। ತಣ್ಹಾಕ್ಖಯಸ್ಸ ಪಚ್ಚಯತ್ತಾ ತಣ್ಹಕ್ಖಯಂ।
Santabhāvaṭṭhena santaṃ. Maraṇābhāvena amataṃ. Uttamaṭṭhena paṇītaṃ. Sassirikaṭṭhena sivaṃ. Nirupaddavatāya khemaṃ. Taṇhākkhayassa paccayattā taṇhakkhayaṃ.
ವಿಮ್ಹಾಪನೀಯಟ್ಠೇನ ಅಚ್ಛರಂ ಪಹರಿತಬ್ಬಯುತ್ತಕನ್ತಿ ಅಚ್ಛರಿಯಂ। ಅಭೂತಮೇವ ಭೂತಂ ಅಜಾತಂ ಹುತ್ವಾ ಅತ್ಥೀತಿ ವಾ ಅಬ್ಭುತಂ। ನಿದ್ದುಕ್ಖತ್ತಾ ಅನೀತಿಕಂ। ನಿದ್ದುಕ್ಖಸಭಾವತ್ತಾ ಅನೀತಿಕಧಮ್ಮಂ। ವಾನಾಭಾವೇನ ನಿಬ್ಬಾನಂ। ಬ್ಯಾಬಜ್ಝಾಭಾವೇನೇವ ಅಬ್ಯಾಬಜ್ಝಂ। ವಿರಾಗಾಧಿಗಮಸ್ಸ ಪಚ್ಚಯತೋ ವಿರಾಗಂ। ಪರಮತ್ಥಸುದ್ಧಿತಾಯ ಸುದ್ಧಿ। ತೀಹಿ ಭವೇಹಿ ಮುತ್ತತಾಯ ಮುತ್ತಿ। ಕಾಮಾಲಯಾನಂ ಅಭಾವೇನ ಅನಾಲಯಂ। ಪತಿಟ್ಠಟ್ಠೇನ ದೀಪಂ। ಅಲ್ಲೀಯಿತಬ್ಬಯುತ್ತಟ್ಠೇನ ಲೇಣಂ। ತಾಯನಟ್ಠೇನ ತಾಣಂ। ಭಯಸರಣಟ್ಠೇನ ಸರಣಂ, ಭಯನಾಸನನ್ತಿ ಅತ್ಥೋ। ಪರಂ ಅಯನಂ ಗತಿ ಪತಿಟ್ಠಾತಿ ಪರಾಯಣಂ। ಸೇಸಮೇತ್ಥ ವುತ್ತನಯಮೇವಾತಿ।
Vimhāpanīyaṭṭhena accharaṃ paharitabbayuttakanti acchariyaṃ. Abhūtameva bhūtaṃ ajātaṃ hutvā atthīti vā abbhutaṃ. Niddukkhattā anītikaṃ. Niddukkhasabhāvattā anītikadhammaṃ. Vānābhāvena nibbānaṃ. Byābajjhābhāveneva abyābajjhaṃ. Virāgādhigamassa paccayato virāgaṃ. Paramatthasuddhitāya suddhi. Tīhi bhavehi muttatāya mutti. Kāmālayānaṃ abhāvena anālayaṃ. Patiṭṭhaṭṭhena dīpaṃ. Allīyitabbayuttaṭṭhena leṇaṃ. Tāyanaṭṭhena tāṇaṃ. Bhayasaraṇaṭṭhena saraṇaṃ, bhayanāsananti attho. Paraṃ ayanaṃ gati patiṭṭhāti parāyaṇaṃ. Sesamettha vuttanayamevāti.
ಅಸಙ್ಖತಸಂಯುತ್ತವಣ್ಣನಾ ನಿಟ್ಠಿತಾ।
Asaṅkhatasaṃyuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya
೧. ಅಸಙ್ಖತಸುತ್ತಂ • 1. Asaṅkhatasuttaṃ
೨. ಅನತಸುತ್ತಂ • 2. Anatasuttaṃ
೩-೩೨. ಅನಾಸವಾದಿಸುತ್ತಂ • 3-32. Anāsavādisuttaṃ
೩೩. ಪರಾಯನಸುತ್ತಂ • 33. Parāyanasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨೩-೩೩. ಅಸಙ್ಖತಸುತ್ತಾದಿವಣ್ಣನಾ • 23-33. Asaṅkhatasuttādivaṇṇanā
