| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೨. ದುತಿಯವಗ್ಗೋ
2. Dutiyavaggo
೨೩-೩೩. ಅಸಙ್ಖತಸುತ್ತಾದಿವಣ್ಣನಾ
23-33. Asaṅkhatasuttādivaṇṇanā
೩೭೭-೪೦೯. ತತ್ಥ ಚ ನತ್ಥಿ ಏತ್ಥ ತಣ್ಹಾಸಙ್ಖಾತಂ ನತಂ, ನತ್ಥಿ ಏತಸ್ಮಿಂ ವಾ ಅಧಿಗತೇ ಪುಗ್ಗಲಭಾವೋತಿ ಅನತಂ। ಅನಾಸವನ್ತಿ ಏತ್ಥಾಪಿ ಏಸೇವ ನಯೋ। ಸಚ್ಚಧಮ್ಮತಾಯ ಸಚ್ಚಂ। ವಟ್ಟದುಕ್ಖತೋ ಪಾರಮೇತೀತಿ ಪಾರಂ। ಸಣ್ಹಟ್ಠೇನಾತಿ ಸುಖುಮಟ್ಠೇನ ನಿಪುಣಂ। ತತೋ ಏವ ದುದ್ದಸತಾಯ। ಅಜಜ್ಜರಂ ನಿಚ್ಚಸಭಾವತ್ತಾ। ನತ್ಥಿ ಏತಸ್ಸ ನಿದಸ್ಸನನ್ತಿ ವಾ ಅನಿದಸ್ಸನಂ। ಏತಸ್ಮಿಂ ಅಧಿಗತೇ ನತ್ಥಿ ಸಂಸಾರೇ। ಪಪಞ್ಚನ್ತಿ ವಾ ನಿಪ್ಪಪಞ್ಚಂ।
377-409. Tattha ca natthi ettha taṇhāsaṅkhātaṃ nataṃ, natthi etasmiṃ vā adhigate puggalabhāvoti anataṃ. Anāsavanti etthāpi eseva nayo. Saccadhammatāya saccaṃ. Vaṭṭadukkhato pārametīti pāraṃ. Saṇhaṭṭhenāti sukhumaṭṭhena nipuṇaṃ. Tato eva duddasatāya. Ajajjaraṃ niccasabhāvattā. Natthi etassa nidassananti vā anidassanaṃ. Etasmiṃ adhigate natthi saṃsāre. Papañcanti vā nippapañcaṃ.
ಏತಸ್ಮಿಂ ಅಧಿಗತೇ ಪುಗ್ಗಲಸ್ಸ ಮರಣಂ ನತ್ಥೀತಿ ವಾ ಅಮತಂ। ಅತಪ್ಪಕಟ್ಠೇನ ವಾ ಪಣೀತಂ। ಸುಖಹೇತುತಾಯ ವಾ ಸಿವಂ। ತಣ್ಹಾ ಖೀಯನ್ತಿ ಏತ್ಥಾತಿ ತಣ್ಹಕ್ಖಯಂ।
Etasmiṃ adhigate puggalassa maraṇaṃ natthīti vā amataṃ. Atappakaṭṭhena vā paṇītaṃ. Sukhahetutāya vā sivaṃ. Taṇhā khīyanti etthāti taṇhakkhayaṃ.
ಅಞ್ಞಸ್ಸ ತಾದಿಸಸ್ಸ ಅಭಾವತೋ ವಿಮ್ಹಾಪನೀಯತಾಯ ಅಭೂತಮೇವಾತಿ। ಕುತೋಚಿ ಪಚ್ಚಯತೋ ಅನಿಬ್ಬತ್ತಮೇವ ಹುತ್ವಾ ಭೂತಂ ವಿಜ್ಜಮಾನಂ। ತೇನಾಹ ‘‘ಅಜಾತಂ ಹುತ್ವಾ ಅತ್ಥೀ’’ತಿ। ನತ್ಥಿ ಏತ್ಥ ದುಕ್ಖನ್ತಿ ನಿದ್ದುಕ್ಖಂ, ತಸ್ಸ ಭಾವೋ ನಿದ್ದುಕ್ಖತ್ತಂ। ತಸ್ಮಾ ಅನೀತಿಕಂ ಈತಿರಹಿತಂ। ವಾನಂ ವುಚ್ಚತಿ ತಣ್ಹಾ, ತದಭಾವೇನ ನಿಬ್ಬಾನಂ। ಬ್ಯಾಬಜ್ಝಂ ವುಚ್ಚತಿ ದುಕ್ಖಂ, ತದಭಾವೇನ ಅಬ್ಯಾಬಜ್ಝಂ। ಪರಮತ್ಥತೋ ಸಚ್ಚತೋ ಸುದ್ಧಿಭಾವೇನ। ಕಾಮಾ ಏವ ಪುಥುಜ್ಜನೇಹಿ ಅಲ್ಲೀಯಿತಬ್ಬತೋ ಆಲಯಾ। ಏಸ ನಯೋ ಸೇಸೇಸುಪಿ। ಪತಿಟ್ಠಟ್ಠೇನಾತಿ ಪತಿಟ್ಠಾಭಾವೇನ ವಟ್ಟದುಕ್ಖತೋ ಮುಚ್ಚಿತುಕಾಮಾನಂ ದೀಪಸದಿಸಂ ಓಘೇಹಿ ಅನಜ್ಝೋತ್ಥರಣೀಯತ್ತಾ। ಅಲ್ಲೀಯಿತಬ್ಬಯುತ್ತಟ್ಠೇನಾತಿ ಅಲ್ಲೀಯಿತುಂ ಅರಹಭಾವತೋ। ತಾಯನಟ್ಠೇನಾತಿ ಸಪರತಾಯನಟ್ಠೇನ। ಭಯಸರಣಟ್ಠೇನಾತಿ ಭಯಸ್ಸ ಹಿಂಸನಟ್ಠೇನ। ಸೇಟ್ಠಂ ಉತ್ತಮಂ। ಗತೀತಿ ಗನ್ಧಬ್ಬಟ್ಠಾನಂ।
Aññassa tādisassa abhāvato vimhāpanīyatāya abhūtamevāti. Kutoci paccayato anibbattameva hutvā bhūtaṃ vijjamānaṃ. Tenāha ‘‘ajātaṃ hutvā atthī’’ti. Natthi ettha dukkhanti niddukkhaṃ, tassa bhāvo niddukkhattaṃ. Tasmā anītikaṃ ītirahitaṃ. Vānaṃ vuccati taṇhā, tadabhāvena nibbānaṃ. Byābajjhaṃ vuccati dukkhaṃ, tadabhāvena abyābajjhaṃ. Paramatthato saccato suddhibhāvena. Kāmā eva puthujjanehi allīyitabbato ālayā. Esa nayo sesesupi. Patiṭṭhaṭṭhenāti patiṭṭhābhāvena vaṭṭadukkhato muccitukāmānaṃ dīpasadisaṃ oghehi anajjhottharaṇīyattā. Allīyitabbayuttaṭṭhenāti allīyituṃ arahabhāvato. Tāyanaṭṭhenāti saparatāyanaṭṭhena. Bhayasaraṇaṭṭhenāti bhayassa hiṃsanaṭṭhena. Seṭṭhaṃ uttamaṃ. Gatīti gandhabbaṭṭhānaṃ.
ಅಸಙ್ಖತಸುತ್ತಾದಿವಣ್ಣನಾ ನಿಟ್ಠಿತಾ।
Asaṅkhatasuttādivaṇṇanā niṭṭhitā.
ಅಸಙ್ಖತಸಂಯುತ್ತವಣ್ಣನಾ ನಿಟ್ಠಿತಾ।
Asaṅkhatasaṃyuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya
೧. ಅಸಙ್ಖತಸುತ್ತಂ • 1. Asaṅkhatasuttaṃ
೨. ಅನತಸುತ್ತಂ • 2. Anatasuttaṃ
೩-೩೨. ಅನಾಸವಾದಿಸುತ್ತಂ • 3-32. Anāsavādisuttaṃ
೩೩. ಪರಾಯನಸುತ್ತಂ • 33. Parāyanasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧-೩೩. ಅಸಙ್ಖತಸುತ್ತಾದಿವಣ್ಣನಾ • 1-33. Asaṅkhatasuttādivaṇṇanā
