| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
2. දුතියවග්‌ගො
2. Dutiyavaggo
23-33. අසඞ්‌ඛතසුත්‌තාදිවණ්‌ණනා
23-33. Asaṅkhatasuttādivaṇṇanā
377-409. තත්‌ථ ච නත්‌ථි එත්‌ථ තණ්‌හාසඞ්‌ඛාතං නතං, නත්‌ථි එතස්‌මිං වා අධිගතෙ පුග්‌ගලභාවොති අනතං. අනාසවන්‌ති එත්‌ථාපි එසෙව නයො. සච්‌චධම්‌මතාය සච්‌චං. වට්‌ටදුක්‌ඛතො පාරමෙතීති පාරං. සණ්‌හට්‌ඨෙනාති සුඛුමට්‌ඨෙන නිපුණං. තතො එව දුද්‌දසතාය. අජජ්‌ජරං නිච්‌චසභාවත්‌තා. නත්‌ථි එතස්‌ස නිදස්‌සනන්‌ති වා අනිදස්‌සනං. එතස්‌මිං අධිගතෙ නත්‌ථි සංසාරෙ. පපඤ්‌චන්‌ති වා නිප්‌පපඤ්‌චං.
377-409. Tattha ca natthi ettha taṇhāsaṅkhātaṃ nataṃ, natthi etasmiṃ vā adhigate puggalabhāvoti anataṃ. Anāsavanti etthāpi eseva nayo. Saccadhammatāya saccaṃ. Vaṭṭadukkhato pārametīti pāraṃ. Saṇhaṭṭhenāti sukhumaṭṭhena nipuṇaṃ. Tato eva duddasatāya. Ajajjaraṃ niccasabhāvattā. Natthi etassa nidassananti vā anidassanaṃ. Etasmiṃ adhigate natthi saṃsāre. Papañcanti vā nippapañcaṃ.
එතස්‌මිං අධිගතෙ පුග්‌ගලස්‌ස මරණං නත්‌ථීති වා අමතං. අතප්‌පකට්‌ඨෙන වා පණීතං. සුඛහෙතුතාය වා සිවං. තණ්‌හා ඛීයන්‌ති එත්‌ථාති තණ්‌හක්‌ඛයං.
Etasmiṃ adhigate puggalassa maraṇaṃ natthīti vā amataṃ. Atappakaṭṭhena vā paṇītaṃ. Sukhahetutāya vā sivaṃ. Taṇhā khīyanti etthāti taṇhakkhayaṃ.
අඤ්‌ඤස්‌ස තාදිසස්‌ස අභාවතො විම්‌හාපනීයතාය අභූතමෙවාති. කුතොචි පච්‌චයතො අනිබ්‌බත්‌තමෙව හුත්‌වා භූතං විජ්‌ජමානං. තෙනාහ ‘‘අජාතං හුත්‌වා අත්‌ථී’’ති. නත්‌ථි එත්‌ථ දුක්‌ඛන්‌ති නිද්‌දුක්‌ඛං, තස්‌ස භාවො නිද්‌දුක්‌ඛත්‌තං. තස්‌මා අනීතිකං ඊතිරහිතං. වානං වුච්‌චති තණ්‌හා, තදභාවෙන නිබ්‌බානං. බ්‍යාබජ්‌ඣං වුච්‌චති දුක්‌ඛං, තදභාවෙන අබ්‍යාබජ්‌ඣං. පරමත්‌ථතො සච්‌චතො සුද්‌ධිභාවෙන. කාමා එව පුථුජ්‌ජනෙහි අල්‌ලීයිතබ්‌බතො ආලයා. එස නයො සෙසෙසුපි. පතිට්‌ඨට්‌ඨෙනාති පතිට්‌ඨාභාවෙන වට්‌ටදුක්‌ඛතො මුච්‌චිතුකාමානං දීපසදිසං ඔඝෙහි අනජ්‌ඣොත්‌ථරණීයත්‌තා. අල්‌ලීයිතබ්‌බයුත්‌තට්‌ඨෙනාති අල්‌ලීයිතුං අරහභාවතො. තායනට්‌ඨෙනාති සපරතායනට්‌ඨෙන. භයසරණට්‌ඨෙනාති භයස්‌ස හිංසනට්‌ඨෙන. සෙට්‌ඨං උත්‌තමං. ගතීති ගන්‌ධබ්‌බට්‌ඨානං.
Aññassa tādisassa abhāvato vimhāpanīyatāya abhūtamevāti. Kutoci paccayato anibbattameva hutvā bhūtaṃ vijjamānaṃ. Tenāha ‘‘ajātaṃ hutvā atthī’’ti. Natthi ettha dukkhanti niddukkhaṃ, tassa bhāvo niddukkhattaṃ. Tasmā anītikaṃ ītirahitaṃ. Vānaṃ vuccati taṇhā, tadabhāvena nibbānaṃ. Byābajjhaṃ vuccati dukkhaṃ, tadabhāvena abyābajjhaṃ. Paramatthato saccato suddhibhāvena. Kāmā eva puthujjanehi allīyitabbato ālayā. Esa nayo sesesupi. Patiṭṭhaṭṭhenāti patiṭṭhābhāvena vaṭṭadukkhato muccitukāmānaṃ dīpasadisaṃ oghehi anajjhottharaṇīyattā. Allīyitabbayuttaṭṭhenāti allīyituṃ arahabhāvato. Tāyanaṭṭhenāti saparatāyanaṭṭhena. Bhayasaraṇaṭṭhenāti bhayassa hiṃsanaṭṭhena. Seṭṭhaṃ uttamaṃ. Gatīti gandhabbaṭṭhānaṃ.
අසඞ්‌ඛතසුත්‌තාදිවණ්‌ණනා නිට්‌ඨිතා.
Asaṅkhatasuttādivaṇṇanā niṭṭhitā.
අසඞ්‌ඛතසංයුත්‌තවණ්‌ණනා නිට්‌ඨිතා.
Asaṅkhatasaṃyuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya
1. අසඞ්‌ඛතසුත්‌තං • 1. Asaṅkhatasuttaṃ
2. අනතසුත්‌තං • 2. Anatasuttaṃ
3-32. අනාසවාදිසුත්‌තං • 3-32. Anāsavādisuttaṃ
33. පරායනසුත්‌තං • 33. Parāyanasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-33. අසඞ්‌ඛතසුත්‌තාදිවණ්‌ණනා • 1-33. Asaṅkhatasuttādivaṇṇanā
