| Library / Tipiṭaka / తిపిటక • Tipiṭaka / పఞ్చపకరణ-అట్ఠకథా • Pañcapakaraṇa-aṭṭhakathā |
౧౦. అసఞ్ఞసత్తుపికాకథావణ్ణనా
10. Asaññasattupikākathāvaṇṇanā
౭౩౫. ఇదాని అసఞ్ఞసత్తుపికాకథా నామ హోతి. తత్థ సఞ్ఞావిరాగవసేన పవత్తభావనా అసఞ్ఞసమాపత్తిపి నిరోధసమాపత్తిపి సఞ్ఞావేదయితనిరోధసమాపత్తి నామ. ఇతి ద్వే సఞ్ఞావేదయితనిరోధసమాపత్తియో లోకియా చ లోకుత్తరా చ. తత్థ లోకియా పుథుజ్జనస్స అసఞ్ఞసత్తుపికా హోతి, లోకుత్తరా అరియానం, సా చ నాసఞ్ఞసత్తుపికా. ఇమం పన విభాగం అకత్వా అవిసేసేన సఞ్ఞావేదయితనిరోధసమాపత్తి అసఞ్ఞసత్తుపికాతి యేసం లద్ధి, సేయ్యథాపి హేతువాదానం; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. అథ నం యస్మా అసఞ్ఞసమాపత్తిం సమాపన్నస్స అలోభాదయో అత్థి, న నిరోధసమాపత్తిం, తస్మా తేసం వసేన చోదేతుం అత్థీతిఆదిమాహ.
735. Idāni asaññasattupikākathā nāma hoti. Tattha saññāvirāgavasena pavattabhāvanā asaññasamāpattipi nirodhasamāpattipi saññāvedayitanirodhasamāpatti nāma. Iti dve saññāvedayitanirodhasamāpattiyo lokiyā ca lokuttarā ca. Tattha lokiyā puthujjanassa asaññasattupikā hoti, lokuttarā ariyānaṃ, sā ca nāsaññasattupikā. Imaṃ pana vibhāgaṃ akatvā avisesena saññāvedayitanirodhasamāpatti asaññasattupikāti yesaṃ laddhi, seyyathāpi hetuvādānaṃ; te sandhāya pucchā sakavādissa, paṭiññā itarassa. Atha naṃ yasmā asaññasamāpattiṃ samāpannassa alobhādayo atthi, na nirodhasamāpattiṃ, tasmā tesaṃ vasena codetuṃ atthītiādimāha.
౭౩౬. ఇధాపి అసఞ్ఞీతి పఞ్హే ఇధ సఞ్ఞావిరాగవసేన సమాపన్నత్తా అసఞ్ఞితా అనుఞ్ఞాతా, తత్రాపి అసఞ్ఞసత్తేనేవ. తస్మా ఇమం పటిఞ్ఞం గహేత్వా లద్ధిం పతిట్ఠపేన్తేన ఛలేన పతిట్ఠాపితా హోతి. ఇధ వా నిరోధసమాపత్తిం సన్ధాయ అసఞ్ఞితా అనుఞ్ఞాతా. తత్రాపి ఇతో చుతస్స అనాగామినో నిరోధసమాపత్తిమేవ తస్మాపి ఇమాయ పటిఞ్ఞాయ పతిట్ఠాపితా లద్ధి అప్పతిట్ఠితాయేవాతి.
736. Idhāpi asaññīti pañhe idha saññāvirāgavasena samāpannattā asaññitā anuññātā, tatrāpi asaññasatteneva. Tasmā imaṃ paṭiññaṃ gahetvā laddhiṃ patiṭṭhapentena chalena patiṭṭhāpitā hoti. Idha vā nirodhasamāpattiṃ sandhāya asaññitā anuññātā. Tatrāpi ito cutassa anāgāmino nirodhasamāpattimeva tasmāpi imāya paṭiññāya patiṭṭhāpitā laddhi appatiṭṭhitāyevāti.
అసఞ్ఞసత్తుపికాకథావణ్ణనా.
Asaññasattupikākathāvaṇṇanā.
Related texts:
తిపిటక (మూల) • Tipiṭaka (Mūla) / అభిధమ్మపిటక • Abhidhammapiṭaka / కథావత్థుపాళి • Kathāvatthupāḷi / (౧౫౪) ౧౦. అసఞ్ఞసత్తుపికకథా • (154) 10. Asaññasattupikakathā
టీకా • Tīkā / అభిధమ్మపిటక (టీకా) • Abhidhammapiṭaka (ṭīkā) / పఞ్చపకరణ-మూలటీకా • Pañcapakaraṇa-mūlaṭīkā / ౧౦. అసఞ్ఞసత్తుపికాకథావణ్ణనా • 10. Asaññasattupikākathāvaṇṇanā
టీకా • Tīkā / అభిధమ్మపిటక (టీకా) • Abhidhammapiṭaka (ṭīkā) / పఞ్చపకరణ-అనుటీకా • Pañcapakaraṇa-anuṭīkā / ౧౦. అసఞ్ఞసత్తుపికాకథావణ్ణనా • 10. Asaññasattupikākathāvaṇṇanā
