| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೧೦. ಅಸಞ್ಞಸತ್ತುಪಿಕಾಕಥಾವಣ್ಣನಾ
10. Asaññasattupikākathāvaṇṇanā
೭೩೫. ಇದಾನಿ ಅಸಞ್ಞಸತ್ತುಪಿಕಾಕಥಾ ನಾಮ ಹೋತಿ। ತತ್ಥ ಸಞ್ಞಾವಿರಾಗವಸೇನ ಪವತ್ತಭಾವನಾ ಅಸಞ್ಞಸಮಾಪತ್ತಿಪಿ ನಿರೋಧಸಮಾಪತ್ತಿಪಿ ಸಞ್ಞಾವೇದಯಿತನಿರೋಧಸಮಾಪತ್ತಿ ನಾಮ। ಇತಿ ದ್ವೇ ಸಞ್ಞಾವೇದಯಿತನಿರೋಧಸಮಾಪತ್ತಿಯೋ ಲೋಕಿಯಾ ಚ ಲೋಕುತ್ತರಾ ಚ। ತತ್ಥ ಲೋಕಿಯಾ ಪುಥುಜ್ಜನಸ್ಸ ಅಸಞ್ಞಸತ್ತುಪಿಕಾ ಹೋತಿ, ಲೋಕುತ್ತರಾ ಅರಿಯಾನಂ, ಸಾ ಚ ನಾಸಞ್ಞಸತ್ತುಪಿಕಾ। ಇಮಂ ಪನ ವಿಭಾಗಂ ಅಕತ್ವಾ ಅವಿಸೇಸೇನ ಸಞ್ಞಾವೇದಯಿತನಿರೋಧಸಮಾಪತ್ತಿ ಅಸಞ್ಞಸತ್ತುಪಿಕಾತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಹೇತುವಾದಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಅಥ ನಂ ಯಸ್ಮಾ ಅಸಞ್ಞಸಮಾಪತ್ತಿಂ ಸಮಾಪನ್ನಸ್ಸ ಅಲೋಭಾದಯೋ ಅತ್ಥಿ, ನ ನಿರೋಧಸಮಾಪತ್ತಿಂ, ತಸ್ಮಾ ತೇಸಂ ವಸೇನ ಚೋದೇತುಂ ಅತ್ಥೀತಿಆದಿಮಾಹ।
735. Idāni asaññasattupikākathā nāma hoti. Tattha saññāvirāgavasena pavattabhāvanā asaññasamāpattipi nirodhasamāpattipi saññāvedayitanirodhasamāpatti nāma. Iti dve saññāvedayitanirodhasamāpattiyo lokiyā ca lokuttarā ca. Tattha lokiyā puthujjanassa asaññasattupikā hoti, lokuttarā ariyānaṃ, sā ca nāsaññasattupikā. Imaṃ pana vibhāgaṃ akatvā avisesena saññāvedayitanirodhasamāpatti asaññasattupikāti yesaṃ laddhi, seyyathāpi hetuvādānaṃ; te sandhāya pucchā sakavādissa, paṭiññā itarassa. Atha naṃ yasmā asaññasamāpattiṃ samāpannassa alobhādayo atthi, na nirodhasamāpattiṃ, tasmā tesaṃ vasena codetuṃ atthītiādimāha.
೭೩೬. ಇಧಾಪಿ ಅಸಞ್ಞೀತಿ ಪಞ್ಹೇ ಇಧ ಸಞ್ಞಾವಿರಾಗವಸೇನ ಸಮಾಪನ್ನತ್ತಾ ಅಸಞ್ಞಿತಾ ಅನುಞ್ಞಾತಾ, ತತ್ರಾಪಿ ಅಸಞ್ಞಸತ್ತೇನೇವ। ತಸ್ಮಾ ಇಮಂ ಪಟಿಞ್ಞಂ ಗಹೇತ್ವಾ ಲದ್ಧಿಂ ಪತಿಟ್ಠಪೇನ್ತೇನ ಛಲೇನ ಪತಿಟ್ಠಾಪಿತಾ ಹೋತಿ। ಇಧ ವಾ ನಿರೋಧಸಮಾಪತ್ತಿಂ ಸನ್ಧಾಯ ಅಸಞ್ಞಿತಾ ಅನುಞ್ಞಾತಾ। ತತ್ರಾಪಿ ಇತೋ ಚುತಸ್ಸ ಅನಾಗಾಮಿನೋ ನಿರೋಧಸಮಾಪತ್ತಿಮೇವ ತಸ್ಮಾಪಿ ಇಮಾಯ ಪಟಿಞ್ಞಾಯ ಪತಿಟ್ಠಾಪಿತಾ ಲದ್ಧಿ ಅಪ್ಪತಿಟ್ಠಿತಾಯೇವಾತಿ।
736. Idhāpi asaññīti pañhe idha saññāvirāgavasena samāpannattā asaññitā anuññātā, tatrāpi asaññasatteneva. Tasmā imaṃ paṭiññaṃ gahetvā laddhiṃ patiṭṭhapentena chalena patiṭṭhāpitā hoti. Idha vā nirodhasamāpattiṃ sandhāya asaññitā anuññātā. Tatrāpi ito cutassa anāgāmino nirodhasamāpattimeva tasmāpi imāya paṭiññāya patiṭṭhāpitā laddhi appatiṭṭhitāyevāti.
ಅಸಞ್ಞಸತ್ತುಪಿಕಾಕಥಾವಣ್ಣನಾ।
Asaññasattupikākathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೫೪) ೧೦. ಅಸಞ್ಞಸತ್ತುಪಿಕಕಥಾ • (154) 10. Asaññasattupikakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧೦. ಅಸಞ್ಞಸತ್ತುಪಿಕಾಕಥಾವಣ್ಣನಾ • 10. Asaññasattupikākathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧೦. ಅಸಞ್ಞಸತ್ತುಪಿಕಾಕಥಾವಣ್ಣನಾ • 10. Asaññasattupikākathāvaṇṇanā
