| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๗. อสปฺปุริสทานสุตฺตวณฺณนา
7. Asappurisadānasuttavaṇṇanā
๑๔๗. สตฺตเม อสกฺกจฺจํ เทตีติ น สกฺกริตฺวา สุจิํ กตฺวา เทติฯ อจิตฺตีกตฺวา เทตีติ อจิตฺตีกาเรน อคารววเสน เทติฯ อปวิทฺธํ เทตีติ น นิรนฺตรํ เทติ, อถ วา ฉเฑฺฑตุกาโม วิย เทติฯ อนาคมนทิฎฺฐิโก เทตีติ กตสฺส นาม ผลํ อาคมิสฺสตีติ น เอวํ อาคมนทิฎฺฐิํ น อุปฺปาเทตฺวา เทติฯ
147. Sattame asakkaccaṃ detīti na sakkaritvā suciṃ katvā deti. Acittīkatvā detīti acittīkārena agāravavasena deti. Apaviddhaṃ detīti na nirantaraṃ deti, atha vā chaḍḍetukāmo viya deti. Anāgamanadiṭṭhiko detīti katassa nāma phalaṃ āgamissatīti na evaṃ āgamanadiṭṭhiṃ na uppādetvā deti.
สุกฺกปเกฺข จิตฺตีกตฺวา เทตีติ เทยฺยธเมฺม จ ทกฺขิเณเยฺยสุ จ จิตฺตีการํ อุปฎฺฐเปตฺวา เทติฯ ตตฺถ เทยฺยธมฺมํ ปณีตํ โอชวนฺตํ กตฺวา เทโนฺต เทยฺยธเมฺม จิตฺตีการํ อุปฎฺฐเปติ นามฯ ปุคฺคลํ วิจินิตฺวา เทโนฺต ทกฺขิเณเยฺยสุ จิตฺตีการํ อุปฎฺฐเปติ นามฯ สหตฺถา เทตีติ อาณตฺติยา ปรหเตฺถน อทตฺวา ‘‘อนมตเคฺค สํสาเร วิจรเนฺตน เม หตฺถปาทานํ อลทฺธกาลสฺส ปมาณํ นาม นตฺถิ, วฎฺฎโมกฺขํ ภวนิสฺสรณํ กริสฺสามี’’ติ สหเตฺถเนว เทติฯ อาคมนทิฎฺฐิโกติ ‘‘อนาคตภวสฺส ปจฺจโย ภวิสฺสตี’’ติ กมฺมญฺจ วิปากญฺจ สทฺทหิตฺวา เทตีติฯ
Sukkapakkhe cittīkatvā detīti deyyadhamme ca dakkhiṇeyyesu ca cittīkāraṃ upaṭṭhapetvā deti. Tattha deyyadhammaṃ paṇītaṃ ojavantaṃ katvā dento deyyadhamme cittīkāraṃ upaṭṭhapeti nāma. Puggalaṃ vicinitvā dento dakkhiṇeyyesu cittīkāraṃ upaṭṭhapeti nāma. Sahatthā detīti āṇattiyā parahatthena adatvā ‘‘anamatagge saṃsāre vicarantena me hatthapādānaṃ aladdhakālassa pamāṇaṃ nāma natthi, vaṭṭamokkhaṃ bhavanissaraṇaṃ karissāmī’’ti sahattheneva deti. Āgamanadiṭṭhikoti ‘‘anāgatabhavassa paccayo bhavissatī’’ti kammañca vipākañca saddahitvā detīti.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๗. อสปฺปุริสทานสุตฺตํ • 7. Asappurisadānasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๗-๑๐. อสปฺปุริสทานสุตฺตาทิวณฺณนา • 7-10. Asappurisadānasuttādivaṇṇanā
