| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
7. இத்தி²வக்³கோ³
7. Itthivaggo
[61] 1. அஸாதமந்தஜாதகவண்ணனா
[61] 1. Asātamantajātakavaṇṇanā
அஸா லோகித்தி²யோ நாமாதி இத³ங் ஸத்தா² ஜேதவனே விஹரந்தோ உக்கண்டி²தங் பி⁴க்கு²ங் ஆரப்³ப⁴ கதே²ஸி. தஸ்ஸ வத்து² உம்மாத³ந்திஜாதகே ஆவி ப⁴விஸ்ஸதி. தங் பன பி⁴க்கு²ங் ஸத்தா² ‘‘பி⁴க்கு² இத்தி²யோ நாம அஸாதா அஸதியோ லாமிகா பச்சி²மிகா, த்வங் ஏவரூபங் லாமிகங் இத்தி²ங் நிஸ்ஸாய கஸ்மா உக்கண்டி²தோஸீ’’தி வத்வா அதீதங் ஆஹரி.
Asālokitthiyo nāmāti idaṃ satthā jetavane viharanto ukkaṇṭhitaṃ bhikkhuṃ ārabbha kathesi. Tassa vatthu ummādantijātake āvi bhavissati. Taṃ pana bhikkhuṃ satthā ‘‘bhikkhu itthiyo nāma asātā asatiyo lāmikā pacchimikā, tvaṃ evarūpaṃ lāmikaṃ itthiṃ nissāya kasmā ukkaṇṭhitosī’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ க³ந்தா⁴ரரட்டே² தக்கஸிலாயங் ப்³ராஹ்மணகுலே நிப்³ப³த்தித்வா விஞ்ஞுதங் பத்தோ தீஸு வேதே³ஸு ஸப்³ப³ஸிப்பேஸு ச நிப்ப²த்திங் பத்தோ தி³ஸாபாமொக்கோ² ஆசரியோ அஹோஸி. ததா³ பா³ராணஸியங் ஏகஸ்மிங் ப்³ராஹ்மணகுலே புத்தஸ்ஸ ஜாததி³வஸே அக்³கி³ங் க³ஹெத்வா அனிப்³பா³யந்தங் ட²பயிங்ஸு. அத² நங் ப்³ராஹ்மணகுமாரங் ஸோளஸவஸ்ஸகாலே மாதாபிதரோ ஆஹங்ஸு ‘‘புத்த, மயங் தவ ஜாததி³வஸே அக்³கி³ங் க³ஹெத்வா ட²பயிம்ஹ. ஸசே ப்³ரஹ்மலோகபராயணோ ப⁴விதுகாமோ, த்வங் அக்³கி³ங் ஆதா³ய அரஞ்ஞங் பவிஸித்வா அக்³கி³ங் ப⁴க³வந்தங் நமஸ்ஸமானோ ப்³ரஹ்மலோகபராயணோ ஹோஹி. ஸசே அகா³ரங் அஜ்ஜா²வஸிதுகாமோ, தக்கஸிலங் க³ந்த்வா தி³ஸாபாமொக்க²ஸ்ஸ ஆசரியஸ்ஸ ஸந்திகே ஸிப்பங் உக்³க³ண்ஹித்வா குடும்ப³ங் ஸண்ட²பேஹீ’’தி. மாணவோ ‘‘நாஹங் ஸக்கி²ஸ்ஸாமி அரஞ்ஞே அக்³கி³ங் பரிசரிதுங், குடும்ப³மேவ ஸண்ட²பெஸ்ஸாமீ’’தி மாதாபிதரோ வந்தி³த்வா ஆசரியபா⁴க³ங் ஸஹஸ்ஸங் க³ஹெத்வா தக்கஸிலங் க³ந்த்வா ஸிப்பங் உக்³க³ண்ஹித்வா பச்சாக³மாஸி.
Atīte bārāṇasiyaṃ brahmadatte rajjaṃ kārente bodhisatto gandhāraraṭṭhe takkasilāyaṃ brāhmaṇakule nibbattitvā viññutaṃ patto tīsu vedesu sabbasippesu ca nipphattiṃ patto disāpāmokkho ācariyo ahosi. Tadā bārāṇasiyaṃ ekasmiṃ brāhmaṇakule puttassa jātadivase aggiṃ gahetvā anibbāyantaṃ ṭhapayiṃsu. Atha naṃ brāhmaṇakumāraṃ soḷasavassakāle mātāpitaro āhaṃsu ‘‘putta, mayaṃ tava jātadivase aggiṃ gahetvā ṭhapayimha. Sace brahmalokaparāyaṇo bhavitukāmo, tvaṃ aggiṃ ādāya araññaṃ pavisitvā aggiṃ bhagavantaṃ namassamāno brahmalokaparāyaṇo hohi. Sace agāraṃ ajjhāvasitukāmo, takkasilaṃ gantvā disāpāmokkhassa ācariyassa santike sippaṃ uggaṇhitvā kuṭumbaṃ saṇṭhapehī’’ti. Māṇavo ‘‘nāhaṃ sakkhissāmi araññe aggiṃ paricarituṃ, kuṭumbameva saṇṭhapessāmī’’ti mātāpitaro vanditvā ācariyabhāgaṃ sahassaṃ gahetvā takkasilaṃ gantvā sippaṃ uggaṇhitvā paccāgamāsi.
மாதாபிதரோ பனஸ்ஸ அனத்தி²கா க⁴ராவாஸேன, அரஞ்ஞே அக்³கி³ங் பரிசராபேதுகாமா ஹொந்தி. அத² நங் மாதா இத்தீ²னங் தோ³ஸங் த³ஸ்ஸெத்வா அரஞ்ஞங் பேஸேதுகாமா ‘‘ஸோ ஆசரியோ பண்டி³தோ ப்³யத்தோ ஸக்கி²ஸ்ஸதி மே புத்தஸ்ஸ இத்தீ²னங் தோ³ஸங் கதே²து’’ந்தி சிந்தெத்வா ஆஹ – ‘‘உக்³க³ஹிதங் தே, தாத, ஸிப்ப’’ந்தி. ‘‘ஆம, அம்மா’’தி. ‘‘அஸாதமந்தோபி தே உக்³க³ஹிதோ’’தி. ‘‘ந உக்³க³ஹிதோ, அம்மா’’தி. ‘‘தாத, யதி³ தே அஸாதமந்தோ ந உக்³க³ஹிதோ, கிங் நாம தே ஸிப்பங் உக்³க³ஹிதங், க³ச்ச², உக்³க³ண்ஹித்வா ஏஹீ’’தி. ஸோ ‘‘ஸாதூ⁴’’தி புன தக்கஸிலாபி⁴முகோ² பாயாஸி. தஸ்ஸபி ஆசரியஸ்ஸ மாதா மஹல்லிகா வீஸதிவஸ்ஸஸதிகா . ஸோ தங் ஸஹத்தா² ந்ஹாபெந்தோ போ⁴ஜெந்தோ பாயெந்தோ படிஜக்³க³தி. அஞ்ஞே மனுஸ்ஸா நங் ததா² கரொந்தங் ஜிகு³ச்ச²ந்தி. ஸோ சிந்தேஸி ‘‘யங்னூனாஹங் அரஞ்ஞங் பவிஸித்வா தத்த² மாதரங் படிஜக்³க³ந்தோ விஹரெய்ய’’ந்தி. அதே²கஸ்மிங் விவித்தே அரஞ்ஞே உத³கபா²ஸுகட்டா²னே பண்ணஸாலங் காரெத்வா ஸப்பிதண்டு³லாதீ³னி ஆஹராபெத்வா மாதரங் உக்கி²பித்வா தத்த² க³ந்த்வா மாதரங் படிஜக்³க³ந்தோ வாஸங் கப்பேஸி.
Mātāpitaro panassa anatthikā gharāvāsena, araññe aggiṃ paricarāpetukāmā honti. Atha naṃ mātā itthīnaṃ dosaṃ dassetvā araññaṃ pesetukāmā ‘‘so ācariyo paṇḍito byatto sakkhissati me puttassa itthīnaṃ dosaṃ kathetu’’nti cintetvā āha – ‘‘uggahitaṃ te, tāta, sippa’’nti. ‘‘Āma, ammā’’ti. ‘‘Asātamantopi te uggahito’’ti. ‘‘Na uggahito, ammā’’ti. ‘‘Tāta, yadi te asātamanto na uggahito, kiṃ nāma te sippaṃ uggahitaṃ, gaccha, uggaṇhitvā ehī’’ti. So ‘‘sādhū’’ti puna takkasilābhimukho pāyāsi. Tassapi ācariyassa mātā mahallikā vīsativassasatikā . So taṃ sahatthā nhāpento bhojento pāyento paṭijaggati. Aññe manussā naṃ tathā karontaṃ jigucchanti. So cintesi ‘‘yaṃnūnāhaṃ araññaṃ pavisitvā tattha mātaraṃ paṭijagganto vihareyya’’nti. Athekasmiṃ vivitte araññe udakaphāsukaṭṭhāne paṇṇasālaṃ kāretvā sappitaṇḍulādīni āharāpetvā mātaraṃ ukkhipitvā tattha gantvā mātaraṃ paṭijagganto vāsaṃ kappesi.
ஸோபி கோ² மாணவோ தக்கஸிலங் க³ந்த்வா ஆசரியங் அபஸ்ஸந்தோ ‘‘கஹங் ஆசரியோ’’தி புச்சி²த்வா தங் பவத்திங் ஸுத்வா தத்த² க³ந்த்வா வந்தி³த்வா அட்டா²ஸி. அத² நங் ஆசரியோ ‘‘கிங் நு கோ², தாத, அதிஸீக⁴ங் ஆக³தோஸீ’’தி? ‘‘நனு அஹங் தும்ஹேஹி அஸாதமந்தோ நாம ந உக்³க³ண்ஹாபிதோ’’தி? ‘‘கோ பன தே அஸாதமந்தே உக்³க³ண்ஹிதப்³பே³ கத்வா கதே²ஸீ’’தி? ‘‘மய்ஹங் மாதா ஆசரியா’’தி. போ³தி⁴ஸத்தோ சிந்தேஸி ‘‘அஸாதமந்தோ நாம கோசி நத்தி², இமஸ்ஸ பன மாதா இமங் இத்தி²தோ³ஸே ஜானாபேதுகாமா ப⁴விஸ்ஸதீ’’தி. அத² நங் ‘‘ஸாது⁴, தாத, த³ஸ்ஸாமி தே அஸாதமந்தே, த்வங் அஜ்ஜ ஆதி³ங் கத்வா மம டா²னே ட²த்வா மம மாதரங் ஸஹத்தா² ந்ஹாபெந்தோ போ⁴ஜெந்தோ பாயெந்தோ படிஜக்³கா³ஹி, ஹத்த²பாத³ஸீஸபிட்டி²ஸம்பா³ஹனாதீ³னி சஸ்ஸா கரொந்தோ ‘அய்யே ஜரங் பத்தகாலேபி தாவ தே ஏவரூபங் ஸரீரங், த³ஹரகாலே கீதி³ஸங் அஹோஸீ’தி ஹத்த²பாத³பரிகம்மாதி³கரணகாலே ஹத்த²பாதா³தீ³னங் வண்ணங் கதெ²ய்யாஸி. யஞ்ச தே மம மாதா கதே²தி, தங் அலஜ்ஜந்தோ அனிகு³ஹந்தோ மய்ஹங் ஆரோசெய்யாஸி, ஏவங் கரொந்தோ அஸாதமந்தே லச்ச²ஸி, அகரொந்தோ ந லச்ச²ஸீ’’தி ஆஹ. ஸோ ‘‘ஸாது⁴ ஆசரியா’’தி தஸ்ஸ வசனங் ஸம்படிச்சி²த்வா ததோ பட்டா²ய ஸப்³ப³ங் யதா²வுத்தவிதா⁴னங் அகாஸி.
Sopi kho māṇavo takkasilaṃ gantvā ācariyaṃ apassanto ‘‘kahaṃ ācariyo’’ti pucchitvā taṃ pavattiṃ sutvā tattha gantvā vanditvā aṭṭhāsi. Atha naṃ ācariyo ‘‘kiṃ nu kho, tāta, atisīghaṃ āgatosī’’ti? ‘‘Nanu ahaṃ tumhehi asātamanto nāma na uggaṇhāpito’’ti? ‘‘Ko pana te asātamante uggaṇhitabbe katvā kathesī’’ti? ‘‘Mayhaṃ mātā ācariyā’’ti. Bodhisatto cintesi ‘‘asātamanto nāma koci natthi, imassa pana mātā imaṃ itthidose jānāpetukāmā bhavissatī’’ti. Atha naṃ ‘‘sādhu, tāta, dassāmi te asātamante, tvaṃ ajja ādiṃ katvā mama ṭhāne ṭhatvā mama mātaraṃ sahatthā nhāpento bhojento pāyento paṭijaggāhi, hatthapādasīsapiṭṭhisambāhanādīni cassā karonto ‘ayye jaraṃ pattakālepi tāva te evarūpaṃ sarīraṃ, daharakāle kīdisaṃ ahosī’ti hatthapādaparikammādikaraṇakāle hatthapādādīnaṃ vaṇṇaṃ katheyyāsi. Yañca te mama mātā katheti, taṃ alajjanto aniguhanto mayhaṃ āroceyyāsi, evaṃ karonto asātamante lacchasi, akaronto na lacchasī’’ti āha. So ‘‘sādhu ācariyā’’ti tassa vacanaṃ sampaṭicchitvā tato paṭṭhāya sabbaṃ yathāvuttavidhānaṃ akāsi.
அத²ஸ்ஸா தஸ்மிங் மாணவே புனப்புனங் வண்ணயமானே ‘‘அயங் மயா ஸத்³தி⁴ங் அபி⁴ரமிதுகாமோ ப⁴விஸ்ஸதீ’’தி அந்தா⁴ய ஜராஜிண்ணாய அப்³ப⁴ந்தரே கிலேஸோ உப்பஜ்ஜி . ஸா ஏகதி³வஸங் அத்தனோ ஸரீரவண்ணங் கத²யமானங் மாணவங் ஆஹ ‘‘மயா ஸத்³தி⁴ங் அபி⁴ரமிதுங் இச்ச²ஸீ’’தி? ‘‘அய்யே, அஹங் தாவ இச்செ²ய்யங், ஆசரியோ பன க³ருகோ’’தி. ‘‘ஸசே மங் இச்ச²ஸி, புத்தங் மே மாரேஹீ’’தி. ‘‘அஹங் ஆசரியஸ்ஸ ஸந்திகே எத்தகங் ஸிப்பங் உக்³க³ண்ஹித்வா கிலேஸமத்தங் நிஸ்ஸாய கிந்தி கத்வா ஆசரியங் மாரெஸ்ஸாமீ’’தி. ‘‘தேன ஹி ஸசே த்வங் மங் ந பரிச்சஜஸி, அஹமேவ நங் மாரெஸ்ஸாமீ’’தி. ஏவங் இத்தி²யோ நாம அஸாதா லாமிகா பச்சி²மிகா, ததா²ரூபே நாம வயே டி²தா ராக³சித்தங் உப்பாதெ³த்வா கிலேஸங் அனுவத்தமானா ஏவங் உபகாரகங் புத்தங் மாரேதுகாமா ஜாதா. மாணவோ ஸப்³ப³ங் தங் கத²ங் போ³தி⁴ஸத்தஸ்ஸ ஆரோசேஸி.
Athassā tasmiṃ māṇave punappunaṃ vaṇṇayamāne ‘‘ayaṃ mayā saddhiṃ abhiramitukāmo bhavissatī’’ti andhāya jarājiṇṇāya abbhantare kileso uppajji . Sā ekadivasaṃ attano sarīravaṇṇaṃ kathayamānaṃ māṇavaṃ āha ‘‘mayā saddhiṃ abhiramituṃ icchasī’’ti? ‘‘Ayye, ahaṃ tāva iccheyyaṃ, ācariyo pana garuko’’ti. ‘‘Sace maṃ icchasi, puttaṃ me mārehī’’ti. ‘‘Ahaṃ ācariyassa santike ettakaṃ sippaṃ uggaṇhitvā kilesamattaṃ nissāya kinti katvā ācariyaṃ māressāmī’’ti. ‘‘Tena hi sace tvaṃ maṃ na pariccajasi, ahameva naṃ māressāmī’’ti. Evaṃ itthiyo nāma asātā lāmikā pacchimikā, tathārūpe nāma vaye ṭhitā rāgacittaṃ uppādetvā kilesaṃ anuvattamānā evaṃ upakārakaṃ puttaṃ māretukāmā jātā. Māṇavo sabbaṃ taṃ kathaṃ bodhisattassa ārocesi.
போ³தி⁴ஸத்தோ ‘‘ஸுட்டு² தே, மாணவ, கதங் மய்ஹங் ஆரோசெந்தேனா’’தி வத்வா மாது ஆயுஸங்கா²ரங் ஓலோகெந்தோ ‘‘அஜ்ஜேவ மரிஸ்ஸதீ’’தி ஞத்வா ‘‘ஏஹி, மாணவ, வீமங்ஸிஸ்ஸாம ந’’ந்தி ஏகங் உது³ம்ப³ரருக்க²ங் சி²ந்தி³த்வா அத்தனோ பமாணேன கட்ட²ரூபகங் கத்வா ஸஸீஸங் பாருபித்வா அத்தனோ ஸயனட்டா²னே உத்தானங் நிபஜ்ஜாபெத்வா ரஜ்ஜுகங் ப³ந்தி⁴த்வா அந்தேவாஸிகங் ஆஹ – ‘‘தாத, ப²ரஸுங் ஆதா³ய க³ந்த்வா மம மாது ஸஞ்ஞங் தே³ஹீ’’தி. மாணவோ க³ந்த்வா ‘‘அய்யே, ஆசரியோ பண்ணஸாலாயங் அத்தனோ ஸயனட்டா²னே நிபன்னோ, ரஜ்ஜுஸஞ்ஞா மே ப³த்³தா⁴, இமங் ப²ரஸுங் ஆதா³ய க³ந்த்வா ஸசே ஸக்கோஸி, மாரேஹி ந’’ந்தி ஆஹ. ‘‘த்வங் பன மங் ந பரிச்சஜிஸ்ஸஸீ’’தி? ‘‘கிங்காரணா பரிச்சஜிஸ்ஸாமீ’’தி? ஸா ப²ரஸுங் ஆதா³ய பவேத⁴மானா உட்டா²ய ரஜ்ஜுஸஞ்ஞாய க³ந்த்வா ஹத்தே²ன பராமஸித்வா ‘‘அயங் மே புத்தோ’’தி ஸஞ்ஞாய கட்ட²ரூபகஸ்ஸ முக²தோ ஸாடகங் அபனெத்வா ப²ரஸுங் ஆதா³ய ‘‘ஏகப்பஹாரேனேவ மாரெஸ்ஸாமீ’’தி கீ³வாயமேவ பஹரித்வா ‘‘த⁴’’ந்தி ஸத்³தே³ உப்பன்னே ருக்க²பா⁴வங் அஞ்ஞாஸி. அத² போ³தி⁴ஸத்தேன ‘‘கிங் கரோஸி, அம்மா’’தி வுத்தே ஸா ‘‘வஞ்சிதாம்ஹீ’’தி தத்தே²வ மரித்வா பதிதா. அத்தனோ கிர பண்ணஸாலாய நிபன்னாயபி தங்க²ணஞ்ஞேவ தாய மரிதப்³ப³மேவ.
Bodhisatto ‘‘suṭṭhu te, māṇava, kataṃ mayhaṃ ārocentenā’’ti vatvā mātu āyusaṅkhāraṃ olokento ‘‘ajjeva marissatī’’ti ñatvā ‘‘ehi, māṇava, vīmaṃsissāma na’’nti ekaṃ udumbararukkhaṃ chinditvā attano pamāṇena kaṭṭharūpakaṃ katvā sasīsaṃ pārupitvā attano sayanaṭṭhāne uttānaṃ nipajjāpetvā rajjukaṃ bandhitvā antevāsikaṃ āha – ‘‘tāta, pharasuṃ ādāya gantvā mama mātu saññaṃ dehī’’ti. Māṇavo gantvā ‘‘ayye, ācariyo paṇṇasālāyaṃ attano sayanaṭṭhāne nipanno, rajjusaññā me baddhā, imaṃ pharasuṃ ādāya gantvā sace sakkosi, mārehi na’’nti āha. ‘‘Tvaṃ pana maṃ na pariccajissasī’’ti? ‘‘Kiṃkāraṇā pariccajissāmī’’ti? Sā pharasuṃ ādāya pavedhamānā uṭṭhāya rajjusaññāya gantvā hatthena parāmasitvā ‘‘ayaṃ me putto’’ti saññāya kaṭṭharūpakassa mukhato sāṭakaṃ apanetvā pharasuṃ ādāya ‘‘ekappahāreneva māressāmī’’ti gīvāyameva paharitvā ‘‘dha’’nti sadde uppanne rukkhabhāvaṃ aññāsi. Atha bodhisattena ‘‘kiṃ karosi, ammā’’ti vutte sā ‘‘vañcitāmhī’’ti tattheva maritvā patitā. Attano kira paṇṇasālāya nipannāyapi taṅkhaṇaññeva tāya maritabbameva.
ஸோ தஸ்ஸா மதபா⁴வங் ஞத்வா ஸரீரகிச்சங் கத்வா ஆளாஹனங் நிப்³பா³பெத்வா வனபுப்பே²ஹி பூஜெத்வா மாணவங் ஆதா³ய பண்ணஸாலத்³வாரே நிஸீதி³த்வா ‘‘தாத, பாடியேக்கோ அஸாதமந்தோ நாம நத்தி², இத்தி²யோ அஸாதா நாம, தவ மாதா ‘அஸாதமந்தங் உக்³க³ண்ஹா’தி மம ஸந்திகங் பேஸயமானா இத்தீ²னங் தோ³ஸங் ஜானநத்த²ங் பேஸேஸி. இதா³னி பன தே பச்சக்க²மேவ மம மாது தோ³ஸோ தி³ட்டோ², இமினா காரணேன ‘இத்தி²யோ நாம அஸாதா லாமிகா பச்சி²மிகா’தி ஜானெய்யாஸீ’’தி தங் ஓவதி³த்வா உய்யோஜேஸி. ஸோபி ஆசரியங் வந்தி³த்வா மாதாபிதூனங் ஸந்திகங் அக³மாஸி. அத² நங் மாதா புச்சி² ‘‘தாத, உக்³க³ஹிதோ தே அஸாதமந்தோ’’தி? ‘‘ஆம, அம்மா’’தி. ‘‘இதா³னி கிங் கரிஸ்ஸஸி, பப்³ப³ஜித்வா அக்³கி³ங் வா பரிசரிஸ்ஸஸி, அகா³ரமஜ்ஜே² வா வஸிஸ்ஸஸீ’’தி? மாணவோ ‘‘மயா, அம்ம, பச்சக்க²தோ இத்தீ²னங் தோ³ஸா தி³ட்டா² , அகா³ரேன மே கிச்சங் நத்தி², பப்³ப³ஜிஸ்ஸாமஹ’’ந்தி அத்தனோ அதி⁴ப்பாயங் பகாஸெந்தோ இமங் கா³த²மாஹ –
So tassā matabhāvaṃ ñatvā sarīrakiccaṃ katvā āḷāhanaṃ nibbāpetvā vanapupphehi pūjetvā māṇavaṃ ādāya paṇṇasāladvāre nisīditvā ‘‘tāta, pāṭiyekko asātamanto nāma natthi, itthiyo asātā nāma, tava mātā ‘asātamantaṃ uggaṇhā’ti mama santikaṃ pesayamānā itthīnaṃ dosaṃ jānanatthaṃ pesesi. Idāni pana te paccakkhameva mama mātu doso diṭṭho, iminā kāraṇena ‘itthiyo nāma asātā lāmikā pacchimikā’ti jāneyyāsī’’ti taṃ ovaditvā uyyojesi. Sopi ācariyaṃ vanditvā mātāpitūnaṃ santikaṃ agamāsi. Atha naṃ mātā pucchi ‘‘tāta, uggahito te asātamanto’’ti? ‘‘Āma, ammā’’ti. ‘‘Idāni kiṃ karissasi, pabbajitvā aggiṃ vā paricarissasi, agāramajjhe vā vasissasī’’ti? Māṇavo ‘‘mayā, amma, paccakkhato itthīnaṃ dosā diṭṭhā , agārena me kiccaṃ natthi, pabbajissāmaha’’nti attano adhippāyaṃ pakāsento imaṃ gāthamāha –
61.
61.
‘‘அஸா லோகித்தி²யோ நாம, வேலா தாஸங் ந விஜ்ஜதி;
‘‘Asā lokitthiyo nāma, velā tāsaṃ na vijjati;
ஸாரத்தா ச பக³ப்³பா⁴ ச, ஸிகீ² ஸப்³ப³க⁴ஸோ யதா²;
Sārattā ca pagabbhā ca, sikhī sabbaghaso yathā;
தா ஹித்வா பப்³ப³ஜிஸ்ஸாமி, விவேகமனுப்³ரூஹய’’ந்தி.
Tā hitvā pabbajissāmi, vivekamanubrūhaya’’nti.
தத்த² அஸாதி அஸதியோ லாமிகா. அத² வா ஸாதங் வுச்சதி ஸுக²ங், தங் தாஸு நத்தி². அத்தனி படிப³த்³த⁴சித்தானங் அஸாதமேவ தெ³ந்தீதிபி அஸா, து³க்கா² து³க்க²வத்து²பூ⁴தாதி அத்தோ². இமஸ்ஸ பனத்த²ஸ்ஸ ஸாத⁴னத்தா²ய இத³ங் ஸுத்தங் ஆஹரிதப்³ப³ங் –
Tattha asāti asatiyo lāmikā. Atha vā sātaṃ vuccati sukhaṃ, taṃ tāsu natthi. Attani paṭibaddhacittānaṃ asātameva dentītipi asā, dukkhā dukkhavatthubhūtāti attho. Imassa panatthassa sādhanatthāya idaṃ suttaṃ āharitabbaṃ –
‘‘மாயா சேதா மரீசீ ச, ஸோகோ ரோகோ³ சுபத்³த³வோ;
‘‘Māyā cetā marīcī ca, soko rogo cupaddavo;
க²ரா ச ப³ந்த⁴னா சேதா, மச்சுபாஸா கு³ஹாஸயா;
Kharā ca bandhanā cetā, maccupāsā guhāsayā;
தாஸு யோ விஸ்ஸஸே போஸோ, ஸோ நரேஸு நராத⁴மோ’’தி. (ஜா॰ 2.21.118);
Tāsu yo vissase poso, so naresu narādhamo’’ti. (jā. 2.21.118);
லோகித்தி²யோதி லோகே இத்தி²யோ. வேலா தாஸங் ந விஜ்ஜதீதி அம்ம, தாஸங் இத்தீ²னங் கிலேஸுப்பத்திங் பத்வா வேலா ஸங்வரோ மரியாதா³ பமாணங் நாம நத்தி². ஸாரத்தா ச பக³ப்³பா⁴ சாதி வேலா ச ஏதாஸங் நத்தி², பஞ்சஸு காமகு³ணேஸு ஸாரத்தா அல்லீனா, ததா² காயபாக³ப்³பி⁴யேன, வாசாபாக³ப்³பி⁴யேன, மனோபாக³ப்³பி⁴யேனாதி திவிதே⁴ன பாக³ப்³பி⁴யேன ஸமன்னாக³தத்தா பக³ப்³பா⁴ சேதா. ஏதாஸஞ்ஹி அப்³ப⁴ந்தரே காயத்³வாராதீ³னி பத்வா ஸங்வரோ நாம நத்தி², லோலா காகபடிபா⁴கா³தி த³ஸ்ஸேதி. ஸிகீ² ஸப்³ப³க⁴ஸோ யதா²தி அம்ம, யதா² ஜாலஸிகா²ய ‘‘ஸிகீ²’’தி ஸங்க²ங் க³தோ அக்³கி³ நாம கூ³த²க³தாதி³பே⁴த³ங் அஸுசிம்பி, ஸப்பிமது⁴பா²ணிதாதி³பே⁴த³ங் ஸுசிம்பி, இட்ட²ம்பி அனிட்ட²ம்பி யங் யதே³வ லப⁴தி, ஸப்³ப³ங் க⁴ஸதி கா²த³தி, தஸ்மா ‘‘ஸப்³ப³க⁴ஸோ’’தி வுச்சதி. ததே²வ தா இத்தி²யோபி ஹத்தி²மெண்ட³கோ³மெண்டா³த³யோ வா ஹொந்து ஹீனஜச்சா ஹீனகம்மந்தா, க²த்தியாத³யோ வா ஹொந்து உத்தமகம்மந்தா, ஹீனுக்கட்ட²பா⁴வங் அசிந்தெத்வா லோகஸ்ஸாத³வஸேன கிலேஸஸந்த²வே உப்பன்னே யங் யங் லப⁴ந்தி, ஸப்³ப³மேவ ஸேவந்தீதி ஸப்³ப³க⁴ஸஸிகி²ஸதி³ஸா ஹொந்தி. தஸ்மா ஸிகீ² ஸப்³ப³க⁴ஸோ யதா², ததே²வேதாதி வேதி³தப்³பா³.
Lokitthiyoti loke itthiyo. Velā tāsaṃ na vijjatīti amma, tāsaṃ itthīnaṃ kilesuppattiṃ patvā velā saṃvaro mariyādā pamāṇaṃ nāma natthi. Sārattā ca pagabbhā cāti velā ca etāsaṃ natthi, pañcasu kāmaguṇesu sārattā allīnā, tathā kāyapāgabbhiyena, vācāpāgabbhiyena, manopāgabbhiyenāti tividhena pāgabbhiyena samannāgatattā pagabbhā cetā. Etāsañhi abbhantare kāyadvārādīni patvā saṃvaro nāma natthi, lolā kākapaṭibhāgāti dasseti. Sikhī sabbaghaso yathāti amma, yathā jālasikhāya ‘‘sikhī’’ti saṅkhaṃ gato aggi nāma gūthagatādibhedaṃ asucimpi, sappimadhuphāṇitādibhedaṃ sucimpi, iṭṭhampi aniṭṭhampi yaṃ yadeva labhati, sabbaṃ ghasati khādati, tasmā ‘‘sabbaghaso’’ti vuccati. Tatheva tā itthiyopi hatthimeṇḍagomeṇḍādayo vā hontu hīnajaccā hīnakammantā, khattiyādayo vā hontu uttamakammantā, hīnukkaṭṭhabhāvaṃ acintetvā lokassādavasena kilesasanthave uppanne yaṃ yaṃ labhanti, sabbameva sevantīti sabbaghasasikhisadisā honti. Tasmā sikhī sabbaghaso yathā, tathevetāti veditabbā.
தா ஹித்வா பப்³ப³ஜிஸ்ஸாமீதி அஹங் தா லாமிகா து³க்க²வத்து²பூ⁴தா இத்தி²யோ ஹித்வா அரஞ்ஞங் பவிஸித்வா இஸிபப்³ப³ஜ்ஜங் பப்³ப³ஜிஸ்ஸாமி. விவேகமனுப்³ரூஹயந்தி காயவிவேகோ சித்தவிவேகோ உபதி⁴விவேகோதி தயோ விவேகா, தேஸு இத⁴ காயவிவேகோபி வட்டதி சித்தவிவேகோபி. இத³ங் வுத்தங் ஹோதி – அஹங், அம்ம, பப்³ப³ஜித்வா கஸிணபரிகம்மங் கத்வா அட்ட² ஸமாபத்தியோ ச பஞ்சாபி⁴ஞ்ஞா ச உப்பாதெ³த்வா க³ணதோ காயங், கிலேஸேஹி ச சித்தங் விவேசெத்வா இமங் விவேகங் ப்³ரூஹெந்தோ வட்³டெ⁴ந்தோ ப்³ரஹ்மலோகபராயணோ ப⁴விஸ்ஸாமி, அலங் மே அகா³ரேனாதி. ஏவங் இத்தி²யோ க³ரஹித்வா மாதாபிதரோ வந்தி³த்வா ஹிமவந்தங் பவிஸித்வா பப்³ப³ஜித்வா வுத்தப்பகாரங் விவேகங் ப்³ரூஹெந்தோ ப்³ரஹ்மலோகபராயணோ அஹோஸி.
Tāhitvā pabbajissāmīti ahaṃ tā lāmikā dukkhavatthubhūtā itthiyo hitvā araññaṃ pavisitvā isipabbajjaṃ pabbajissāmi. Vivekamanubrūhayanti kāyaviveko cittaviveko upadhivivekoti tayo vivekā, tesu idha kāyavivekopi vaṭṭati cittavivekopi. Idaṃ vuttaṃ hoti – ahaṃ, amma, pabbajitvā kasiṇaparikammaṃ katvā aṭṭha samāpattiyo ca pañcābhiññā ca uppādetvā gaṇato kāyaṃ, kilesehi ca cittaṃ vivecetvā imaṃ vivekaṃ brūhento vaḍḍhento brahmalokaparāyaṇo bhavissāmi, alaṃ me agārenāti. Evaṃ itthiyo garahitvā mātāpitaro vanditvā himavantaṃ pavisitvā pabbajitvā vuttappakāraṃ vivekaṃ brūhento brahmalokaparāyaṇo ahosi.
ஸத்தா²பி ‘‘ஏவங் பி⁴க்கு² இத்தி²யோ நாம அஸாதா லாமிகா பச்சி²மிகா து³க்க²தா³யிகா’’தி இத்தீ²னங் அகு³ணங் கதெ²த்வா ஸச்சானி பகாஸேஸி, ஸச்சபரியோஸானே ஸோ பி⁴க்கு² ஸோதாபத்திப²லே பதிட்டா²ஸி. ஸத்தா² அனுஸந்தி⁴ங் க⁴டெத்வா ஜாதகங் ஸமோதா⁴னேஸி – ‘‘ததா³ மாதா ப⁴த்³த³காபிலானீ, பிதா மஹாகஸ்ஸபோ அஹோஸி, அந்தேவாஸிகோ ஆனந்தோ³, ஆசரியோ பன அஹமேவ அஹோஸி’’ந்தி.
Satthāpi ‘‘evaṃ bhikkhu itthiyo nāma asātā lāmikā pacchimikā dukkhadāyikā’’ti itthīnaṃ aguṇaṃ kathetvā saccāni pakāsesi, saccapariyosāne so bhikkhu sotāpattiphale patiṭṭhāsi. Satthā anusandhiṃ ghaṭetvā jātakaṃ samodhānesi – ‘‘tadā mātā bhaddakāpilānī, pitā mahākassapo ahosi, antevāsiko ānando, ācariyo pana ahameva ahosi’’nti.
அஸாதமந்தஜாதகவண்ணனா பட²மா.
Asātamantajātakavaṇṇanā paṭhamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 61. அஸாதமந்தஜாதகங் • 61. Asātamantajātakaṃ
