| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৩. তেরসমৰগ্গো
13. Terasamavaggo
(১৩৩) ৮. অসাতরাগকথা
(133) 8. Asātarāgakathā
৬৭৪. অত্থি অসাতরাগোতি? আমন্তা। দুক্খাভিনন্দিনো সত্তা, অত্থি কেচি দুক্খং পত্থেন্তি পিহেন্তি এসন্তি গৰেসন্তি পরিযেসন্তি, দুক্খং অজ্ঝোসায তিট্ঠন্তীতি? ন হেৰং ৰত্তব্বে…পে॰… ননু সুখাভিনন্দিনো সত্তা, অত্থি কেচি সুখং পত্থেন্তি পিহেন্তি এসন্তি গৰেসন্তি পরিযেসন্তি, সুখং অজ্ঝোসায তিট্ঠন্তীতি? আমন্তা। হঞ্চি সুখাভিনন্দিনো সত্তা, অত্থি কেচি সুখং পত্থেন্তি পিহেন্তি এসন্তি গৰেসন্তি পরিযেসন্তি, সুখং অজ্ঝোসায তিট্ঠন্তি, নো চ ৰত রে ৰত্তব্বে – ‘‘অত্থি অসাতরাগো’’তি।
674. Atthi asātarāgoti? Āmantā. Dukkhābhinandino sattā, atthi keci dukkhaṃ patthenti pihenti esanti gavesanti pariyesanti, dukkhaṃ ajjhosāya tiṭṭhantīti? Na hevaṃ vattabbe…pe… nanu sukhābhinandino sattā, atthi keci sukhaṃ patthenti pihenti esanti gavesanti pariyesanti, sukhaṃ ajjhosāya tiṭṭhantīti? Āmantā. Hañci sukhābhinandino sattā, atthi keci sukhaṃ patthenti pihenti esanti gavesanti pariyesanti, sukhaṃ ajjhosāya tiṭṭhanti, no ca vata re vattabbe – ‘‘atthi asātarāgo’’ti.
অত্থি অসাতরাগোতি? আমন্তা। দুক্খায ৰেদনায রাগানুসযো অনুসেতি, সুখায ৰেদনায পটিঘানুসযো অনুসেতীতি? ন হেৰং ৰত্তব্বে…পে॰… ননু সুখায ৰেদনায রাগানুসযো অনুসেতি, দুক্খায ৰেদনায পটিঘানুসযো অনুসেতীতি? আমন্তা। হঞ্চি সুখায ৰেদনায রাগানুসযো অনুসেতি, দুক্খায ৰেদনায পটিঘানুসযো অনুসেতি, নো চ ৰত রে ৰত্তব্বে – ‘‘অত্থি অসাতরাগো’’তি।
Atthi asātarāgoti? Āmantā. Dukkhāya vedanāya rāgānusayo anuseti, sukhāya vedanāya paṭighānusayo anusetīti? Na hevaṃ vattabbe…pe… nanu sukhāya vedanāya rāgānusayo anuseti, dukkhāya vedanāya paṭighānusayo anusetīti? Āmantā. Hañci sukhāya vedanāya rāgānusayo anuseti, dukkhāya vedanāya paṭighānusayo anuseti, no ca vata re vattabbe – ‘‘atthi asātarāgo’’ti.
৬৭৫. ন ৰত্তব্বং – ‘‘অত্থি অসাতরাগো’’তি? আমন্তা। ননু ৰুত্তং ভগৰতা – ‘‘সো এৰং অনুরোধৰিরোধং সমাপন্নো যং কিঞ্চি ৰেদনং ৰেদযতি সুখং ৰা দুক্খং ৰা অদুক্খমসুখং ৰা, সো তং ৰেদনং অভিনন্দতি অভিৰদতি অজ্ঝোসায তিট্ঠতী’’তি 1! অত্থেৰ সুত্তন্তোতি? আমন্তা। তেন হি অত্থি অসাতরাগোতি।
675. Na vattabbaṃ – ‘‘atthi asātarāgo’’ti? Āmantā. Nanu vuttaṃ bhagavatā – ‘‘so evaṃ anurodhavirodhaṃ samāpanno yaṃ kiñci vedanaṃ vedayati sukhaṃ vā dukkhaṃ vā adukkhamasukhaṃ vā, so taṃ vedanaṃ abhinandati abhivadati ajjhosāya tiṭṭhatī’’ti 2! Attheva suttantoti? Āmantā. Tena hi atthi asātarāgoti.
অসাতরাগকথা নিট্ঠিতা।
Asātarāgakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৮. অসাতরাগকথাৰণ্ণনা • 8. Asātarāgakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৮. অসাতরাগকথাৰণ্ণনা • 8. Asātarāgakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৮. অসাতরাগকথাৰণ্ণনা • 8. Asātarāgakathāvaṇṇanā
