| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៣. តេរសមវគ្គោ
13. Terasamavaggo
(១៣៣) ៨. អសាតរាគកថា
(133) 8. Asātarāgakathā
៦៧៤. អត្ថិ អសាតរាគោតិ? អាមន្តា។ ទុក្ខាភិនន្ទិនោ សត្តា, អត្ថិ កេចិ ទុក្ខំ បត្ថេន្តិ បិហេន្តិ ឯសន្តិ គវេសន្តិ បរិយេសន្តិ, ទុក្ខំ អជ្ឈោសាយ តិដ្ឋន្តីតិ? ន ហេវំ វត្តព្ពេ…បេ.… ននុ សុខាភិនន្ទិនោ សត្តា, អត្ថិ កេចិ សុខំ បត្ថេន្តិ បិហេន្តិ ឯសន្តិ គវេសន្តិ បរិយេសន្តិ, សុខំ អជ្ឈោសាយ តិដ្ឋន្តីតិ? អាមន្តា។ ហញ្ចិ សុខាភិនន្ទិនោ សត្តា, អត្ថិ កេចិ សុខំ បត្ថេន្តិ បិហេន្តិ ឯសន្តិ គវេសន្តិ បរិយេសន្តិ, សុខំ អជ្ឈោសាយ តិដ្ឋន្តិ, នោ ច វត រេ វត្តព្ពេ – ‘‘អត្ថិ អសាតរាគោ’’តិ។
674. Atthi asātarāgoti? Āmantā. Dukkhābhinandino sattā, atthi keci dukkhaṃ patthenti pihenti esanti gavesanti pariyesanti, dukkhaṃ ajjhosāya tiṭṭhantīti? Na hevaṃ vattabbe…pe… nanu sukhābhinandino sattā, atthi keci sukhaṃ patthenti pihenti esanti gavesanti pariyesanti, sukhaṃ ajjhosāya tiṭṭhantīti? Āmantā. Hañci sukhābhinandino sattā, atthi keci sukhaṃ patthenti pihenti esanti gavesanti pariyesanti, sukhaṃ ajjhosāya tiṭṭhanti, no ca vata re vattabbe – ‘‘atthi asātarāgo’’ti.
អត្ថិ អសាតរាគោតិ? អាមន្តា។ ទុក្ខាយ វេទនាយ រាគានុសយោ អនុសេតិ, សុខាយ វេទនាយ បដិឃានុសយោ អនុសេតីតិ? ន ហេវំ វត្តព្ពេ…បេ.… ននុ សុខាយ វេទនាយ រាគានុសយោ អនុសេតិ, ទុក្ខាយ វេទនាយ បដិឃានុសយោ អនុសេតីតិ? អាមន្តា។ ហញ្ចិ សុខាយ វេទនាយ រាគានុសយោ អនុសេតិ, ទុក្ខាយ វេទនាយ បដិឃានុសយោ អនុសេតិ, នោ ច វត រេ វត្តព្ពេ – ‘‘អត្ថិ អសាតរាគោ’’តិ។
Atthi asātarāgoti? Āmantā. Dukkhāya vedanāya rāgānusayo anuseti, sukhāya vedanāya paṭighānusayo anusetīti? Na hevaṃ vattabbe…pe… nanu sukhāya vedanāya rāgānusayo anuseti, dukkhāya vedanāya paṭighānusayo anusetīti? Āmantā. Hañci sukhāya vedanāya rāgānusayo anuseti, dukkhāya vedanāya paṭighānusayo anuseti, no ca vata re vattabbe – ‘‘atthi asātarāgo’’ti.
៦៧៥. ន វត្តព្ពំ – ‘‘អត្ថិ អសាតរាគោ’’តិ? អាមន្តា។ ននុ វុត្តំ ភគវតា – ‘‘សោ ឯវំ អនុរោធវិរោធំ សមាបន្នោ យំ កិញ្ចិ វេទនំ វេទយតិ សុខំ វា ទុក្ខំ វា អទុក្ខមសុខំ វា, សោ តំ វេទនំ អភិនន្ទតិ អភិវទតិ អជ្ឈោសាយ តិដ្ឋតី’’តិ 1! អត្ថេវ សុត្តន្តោតិ? អាមន្តា។ តេន ហិ អត្ថិ អសាតរាគោតិ។
675. Na vattabbaṃ – ‘‘atthi asātarāgo’’ti? Āmantā. Nanu vuttaṃ bhagavatā – ‘‘so evaṃ anurodhavirodhaṃ samāpanno yaṃ kiñci vedanaṃ vedayati sukhaṃ vā dukkhaṃ vā adukkhamasukhaṃ vā, so taṃ vedanaṃ abhinandati abhivadati ajjhosāya tiṭṭhatī’’ti 2! Attheva suttantoti? Āmantā. Tena hi atthi asātarāgoti.
អសាតរាគកថា និដ្ឋិតា។
Asātarāgakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៨. អសាតរាគកថាវណ្ណនា • 8. Asātarāgakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៨. អសាតរាគកថាវណ្ណនា • 8. Asātarāgakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៨. អសាតរាគកថាវណ្ណនា • 8. Asātarāgakathāvaṇṇanā
