| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၃. တေရသမဝဂ္ဂော
13. Terasamavaggo
(၁၃၃) ၈. အသာတရာဂကထာ
(133) 8. Asātarāgakathā
၆၇၄. အတ္ထိ အသာတရာဂောတိ? အာမန္တာ။ ဒုက္ခာဘိနန္ဒိနော သတ္တာ, အတ္ထိ ကေစိ ဒုက္ခံ ပတ္ထေန္တိ ပိဟေန္တိ ဧသန္တိ ဂဝေသန္တိ ပရိယေသန္တိ, ဒုက္ခံ အဇ္ဈောသာယ တိဋ္ဌန္တီတိ? န ဟေဝံ ဝတ္တဗ္ဗေ။ပေ.။ နနု သုခာဘိနန္ဒိနော သတ္တာ, အတ္ထိ ကေစိ သုခံ ပတ္ထေန္တိ ပိဟေန္တိ ဧသန္တိ ဂဝေသန္တိ ပရိယေသန္တိ, သုခံ အဇ္ဈောသာယ တိဋ္ဌန္တီတိ? အာမန္တာ။ ဟဉ္စိ သုခာဘိနန္ဒိနော သတ္တာ, အတ္ထိ ကေစိ သုခံ ပတ္ထေန္တိ ပိဟေန္တိ ဧသန္တိ ဂဝေသန္တိ ပရိယေသန္တိ, သုခံ အဇ္ဈောသာယ တိဋ္ဌန္တိ, နော စ ဝတ ရေ ဝတ္တဗ္ဗေ – ‘‘အတ္ထိ အသာတရာဂော’’တိ။
674. Atthi asātarāgoti? Āmantā. Dukkhābhinandino sattā, atthi keci dukkhaṃ patthenti pihenti esanti gavesanti pariyesanti, dukkhaṃ ajjhosāya tiṭṭhantīti? Na hevaṃ vattabbe…pe… nanu sukhābhinandino sattā, atthi keci sukhaṃ patthenti pihenti esanti gavesanti pariyesanti, sukhaṃ ajjhosāya tiṭṭhantīti? Āmantā. Hañci sukhābhinandino sattā, atthi keci sukhaṃ patthenti pihenti esanti gavesanti pariyesanti, sukhaṃ ajjhosāya tiṭṭhanti, no ca vata re vattabbe – ‘‘atthi asātarāgo’’ti.
အတ္ထိ အသာတရာဂောတိ? အာမန္တာ။ ဒုက္ခာယ ဝေဒနာယ ရာဂာနုသယော အနုသေတိ, သုခာယ ဝေဒနာယ ပဋိဃာနုသယော အနုသေတီတိ? န ဟေဝံ ဝတ္တဗ္ဗေ။ပေ.။ နနု သုခာယ ဝေဒနာယ ရာဂာနုသယော အနုသေတိ, ဒုက္ခာယ ဝေဒနာယ ပဋိဃာနုသယော အနုသေတီတိ? အာမန္တာ။ ဟဉ္စိ သုခာယ ဝေဒနာယ ရာဂာနုသယော အနုသေတိ, ဒုက္ခာယ ဝေဒနာယ ပဋိဃာနုသယော အနုသေတိ, နော စ ဝတ ရေ ဝတ္တဗ္ဗေ – ‘‘အတ္ထိ အသာတရာဂော’’တိ။
Atthi asātarāgoti? Āmantā. Dukkhāya vedanāya rāgānusayo anuseti, sukhāya vedanāya paṭighānusayo anusetīti? Na hevaṃ vattabbe…pe… nanu sukhāya vedanāya rāgānusayo anuseti, dukkhāya vedanāya paṭighānusayo anusetīti? Āmantā. Hañci sukhāya vedanāya rāgānusayo anuseti, dukkhāya vedanāya paṭighānusayo anuseti, no ca vata re vattabbe – ‘‘atthi asātarāgo’’ti.
၆၇၅. န ဝတ္တဗ္ဗံ – ‘‘အတ္ထိ အသာတရာဂော’’တိ? အာမန္တာ။ နနု ဝုတ္တံ ဘဂဝတာ – ‘‘သော ဧဝံ အနုရောဓဝိရောဓံ သမာပန္နော ယံ ကိဉ္စိ ဝေဒနံ ဝေဒယတိ သုခံ ဝာ ဒုက္ခံ ဝာ အဒုက္ခမသုခံ ဝာ, သော တံ ဝေဒနံ အဘိနန္ဒတိ အဘိဝဒတိ အဇ္ဈောသာယ တိဋ္ဌတီ’’တိ 1! အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ အသာတရာဂောတိ။
675. Na vattabbaṃ – ‘‘atthi asātarāgo’’ti? Āmantā. Nanu vuttaṃ bhagavatā – ‘‘so evaṃ anurodhavirodhaṃ samāpanno yaṃ kiñci vedanaṃ vedayati sukhaṃ vā dukkhaṃ vā adukkhamasukhaṃ vā, so taṃ vedanaṃ abhinandati abhivadati ajjhosāya tiṭṭhatī’’ti 2! Attheva suttantoti? Āmantā. Tena hi atthi asātarāgoti.
အသာတရာဂကထာ နိဋ္ဌိတာ။
Asātarāgakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၈. အသာတရာဂကထာဝဏ္ဏနာ • 8. Asātarāgakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၈. အသာတရာဂကထာဝဏ္ဏနာ • 8. Asātarāgakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၈. အသာတရာဂကထာဝဏ္ဏနာ • 8. Asātarāgakathāvaṇṇanā
