| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
13. තෙරසමවග්‌ගො
13. Terasamavaggo
(133) 8. අසාතරාගකථා
(133) 8. Asātarāgakathā
674. අත්‌ථි අසාතරාගොති? ආමන්‌තා. දුක්‌ඛාභිනන්‌දිනො සත්‌තා, අත්‌ථි කෙචි දුක්‌ඛං පත්‌ථෙන්‌ති පිහෙන්‌ති එසන්‌ති ගවෙසන්‌ති පරියෙසන්‌ති, දුක්‌ඛං අජ්‌ඣොසාය තිට්‌ඨන්‌තීති? න හෙවං වත්‌තබ්‌බෙ…පෙ.… නනු සුඛාභිනන්‌දිනො සත්‌තා, අත්‌ථි කෙචි සුඛං පත්‌ථෙන්‌ති පිහෙන්‌ති එසන්‌ති ගවෙසන්‌ති පරියෙසන්‌ති, සුඛං අජ්‌ඣොසාය තිට්‌ඨන්‌තීති? ආමන්‌තා. හඤ්‌චි සුඛාභිනන්‌දිනො සත්‌තා, අත්‌ථි කෙචි සුඛං පත්‌ථෙන්‌ති පිහෙන්‌ති එසන්‌ති ගවෙසන්‌ති පරියෙසන්‌ති, සුඛං අජ්‌ඣොසාය තිට්‌ඨන්‌ති, නො ච වත රෙ වත්‌තබ්‌බෙ – ‘‘අත්‌ථි අසාතරාගො’’ති.
674. Atthi asātarāgoti? Āmantā. Dukkhābhinandino sattā, atthi keci dukkhaṃ patthenti pihenti esanti gavesanti pariyesanti, dukkhaṃ ajjhosāya tiṭṭhantīti? Na hevaṃ vattabbe…pe… nanu sukhābhinandino sattā, atthi keci sukhaṃ patthenti pihenti esanti gavesanti pariyesanti, sukhaṃ ajjhosāya tiṭṭhantīti? Āmantā. Hañci sukhābhinandino sattā, atthi keci sukhaṃ patthenti pihenti esanti gavesanti pariyesanti, sukhaṃ ajjhosāya tiṭṭhanti, no ca vata re vattabbe – ‘‘atthi asātarāgo’’ti.
අත්‌ථි අසාතරාගොති? ආමන්‌තා. දුක්‌ඛාය වෙදනාය රාගානුසයො අනුසෙති, සුඛාය වෙදනාය පටිඝානුසයො අනුසෙතීති? න හෙවං වත්‌තබ්‌බෙ…පෙ.… නනු සුඛාය වෙදනාය රාගානුසයො අනුසෙති, දුක්‌ඛාය වෙදනාය පටිඝානුසයො අනුසෙතීති? ආමන්‌තා. හඤ්‌චි සුඛාය වෙදනාය රාගානුසයො අනුසෙති, දුක්‌ඛාය වෙදනාය පටිඝානුසයො අනුසෙති, නො ච වත රෙ වත්‌තබ්‌බෙ – ‘‘අත්‌ථි අසාතරාගො’’ති.
Atthi asātarāgoti? Āmantā. Dukkhāya vedanāya rāgānusayo anuseti, sukhāya vedanāya paṭighānusayo anusetīti? Na hevaṃ vattabbe…pe… nanu sukhāya vedanāya rāgānusayo anuseti, dukkhāya vedanāya paṭighānusayo anusetīti? Āmantā. Hañci sukhāya vedanāya rāgānusayo anuseti, dukkhāya vedanāya paṭighānusayo anuseti, no ca vata re vattabbe – ‘‘atthi asātarāgo’’ti.
675. න වත්‌තබ්‌බං – ‘‘අත්‌ථි අසාතරාගො’’ති? ආමන්‌තා. නනු වුත්‌තං භගවතා – ‘‘සො එවං අනුරොධවිරොධං සමාපන්‌නො යං කිඤ්‌චි වෙදනං වෙදයති සුඛං වා දුක්‌ඛං වා අදුක්‌ඛමසුඛං වා, සො තං වෙදනං අභිනන්‌දති අභිවදති අජ්‌ඣොසාය තිට්‌ඨතී’’ති 1! අත්‌ථෙව සුත්‌තන්‌තොති? ආමන්‌තා. තෙන හි අත්‌ථි අසාතරාගොති.
675. Na vattabbaṃ – ‘‘atthi asātarāgo’’ti? Āmantā. Nanu vuttaṃ bhagavatā – ‘‘so evaṃ anurodhavirodhaṃ samāpanno yaṃ kiñci vedanaṃ vedayati sukhaṃ vā dukkhaṃ vā adukkhamasukhaṃ vā, so taṃ vedanaṃ abhinandati abhivadati ajjhosāya tiṭṭhatī’’ti 2! Attheva suttantoti? Āmantā. Tena hi atthi asātarāgoti.
අසාතරාගකථා නිට්‌ඨිතා.
Asātarāgakathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 8. අසාතරාගකථාවණ්‌ණනා • 8. Asātarāgakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 8. අසාතරාගකථාවණ්‌ණනා • 8. Asātarāgakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 8. අසාතරාගකථාවණ්‌ණනා • 8. Asātarāgakathāvaṇṇanā
