| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
аасавагкаяан̃аан̣агат̇аа
Āsavakkhayañāṇakathā
14. вибассанаабаад̣̇аганд̇и вибассанааяа бад̣̇адтаанабхууд̇ам̣. вибассанаа жа д̇ивид̇хаа вибассагабуг̇г̇алабхзд̣̇зна. махааб̣од̇хисад̇д̇аанан̃хи бажжзгаб̣од̇хисад̇д̇аанан̃жа жинд̇аамаяан̃аан̣асам̣вад̣̇д̇хид̇ад̇д̇аа саяамбхуун̃аан̣абхууд̇аа, ид̇арзсам̣ суд̇амаяан̃аан̣асам̣вад̣̇д̇хид̇ад̇д̇аа баробад̣̇зсасамбхууд̇аа. саа ‘‘табзд̇ваа нзвасан̃н̃аанаасан̃н̃ааяад̇анам̣ авасзсаруубааруубаж̇жхаанаанам̣ ан̃н̃ад̇арад̇о вудтааяаа’’д̇иаад̣̇инаа анзгад̇хаа аруубамукавасзна жад̇уд̇хаад̇увавад̇т̇аанз вуд̇д̇аанам̣ д̇зсам̣ д̇зсам̣ д̇хаад̇убариг̇г̇ахамукаанам̣ ан̃н̃ад̇арамукавасзна анзгад̇хаава висуд̣̇д̇химаг̇г̇з наанаанаяад̇о вибхаавид̇аа. махааб̣од̇хисад̇д̇аанам̣ бана жад̇увийсад̇игодисад̇асахассамукзна бабхзд̣̇аг̇аманад̇о наанаанаяам̣ саб̣б̣ан̃н̃уд̇ан̃н̃аан̣асанниссаяасса арияамаг̇г̇ан̃аан̣асса ад̇хидтаанабхууд̇ам̣ буб̣б̣абхааг̇ан̃аан̣аг̇аб̣бхам̣ г̇ан̣хаабзнд̇ам̣ барибаагам̣ г̇ажчанд̇ам̣ барамаг̇амбхийрам̣ сан̣хасукумад̇арам̣ анан̃н̃асаад̇хааран̣ам̣ вибассанаан̃аан̣ам̣ ход̇и. яам̣ адтагат̇аасу махааваж̇иран̃н̃аан̣анд̇и вужжад̇и. яасса жа бавад̇д̇ивибхааг̇зна жад̇увийсад̇игодисад̇асахассабабхзд̣̇асса баад̣̇агабхаавзна самаабаж̇ж̇ияамаанаа жад̇увийсад̇игодисад̇асахассасан̇кяаа д̣̇звасигам̣ сад̇т̇у вал̣ан̃ж̇анагасамаабад̇д̇ияо вужжанд̇и, свааяам̣ б̣уд̣̇д̇хаанам̣ вибассанаажааро барамад̇т̇аман̃ж̇усааяам̣ висуд̣̇д̇химаг̇г̇аван̣н̣анааяам̣ уд̣̇д̣̇зсад̇о д̣̇ассид̇о, ад̇т̇игзхи д̇ад̇о г̇ахзд̇аб̣б̣о.
14.Vipassanāpādakanti vipassanāya padaṭṭhānabhūtaṃ. Vipassanā ca tividhā vipassakapuggalabhedena. Mahābodhisattānañhi paccekabodhisattānañca cintāmayañāṇasaṃvaddhitattā sayambhūñāṇabhūtā, itaresaṃ sutamayañāṇasaṃvaddhitattā paropadesasambhūtā. Sā ‘‘ṭhapetvā nevasaññānāsaññāyatanaṃ avasesarūpārūpajjhānānaṃ aññatarato vuṭṭhāyā’’tiādinā anekadhā arūpamukhavasena catudhātuvavatthāne vuttānaṃ tesaṃ tesaṃ dhātupariggahamukhānaṃ aññataramukhavasena anekadhāva visuddhimagge nānānayato vibhāvitā. Mahābodhisattānaṃ pana catuvīsatikoṭisatasahassamukhena pabhedagamanato nānānayaṃ sabbaññutaññāṇasannissayassa ariyamaggañāṇassa adhiṭṭhānabhūtaṃ pubbabhāgañāṇagabbhaṃ gaṇhāpentaṃ paripākaṃ gacchantaṃ paramagambhīraṃ saṇhasukhumataraṃ anaññasādhāraṇaṃ vipassanāñāṇaṃ hoti. Yaṃ aṭṭhakathāsu mahāvajiraññāṇanti vuccati. Yassa ca pavattivibhāgena catuvīsatikoṭisatasahassapabhedassa pādakabhāvena samāpajjiyamānā catuvīsatikoṭisatasahassasaṅkhyā devasikaṃ satthu vaḷañjanakasamāpattiyo vuccanti, svāyaṃ buddhānaṃ vipassanācāro paramatthamañjusāyaṃ visuddhimaggavaṇṇanāyaṃ uddesato dassito, atthikehi tato gahetabbo.
аасаваанам̣ кзбанад̇о самужчинд̣̇анад̇о аасавагкаяо арияамаг̇г̇о, уггадтанид̣̇д̣̇зсавасзна арахад̇д̇амаг̇г̇аг̇г̇ахан̣ам̣. аасаваанам̣ каяз н̃аан̣ам̣ аасавагкаяан̃аан̣анд̇и д̣̇ассзнд̇о ‘‘д̇ад̇ра жзд̇ам̣ н̃аан̣а’’нд̇и вад̇ваа каязд̇и жа аад̇хаарз бхуммам̣, на висаязд̇и д̣̇ассзнд̇о ‘‘д̇аббарияаабаннад̇д̇аа’’д̇и ааха. ид̣̇ам̣ д̣̇угканд̇и д̣̇угкасса арияасажжасса д̇ад̣̇аа бажжагкад̇о г̇ахид̇абхаавад̣̇ассанам̣. зд̇д̇агам̣ д̣̇угканд̇и д̇асса барижчиж̇ж̇а г̇ахид̇абхаавад̣̇ассанам̣. на ид̇о бхияяод̇и анавасзсзд̇ваа г̇ахид̇абхаавад̣̇ассанам̣. д̇знааха ‘‘саб̣б̣амби д̣̇угкасажжа’’нд̇иаад̣̇и. сарасалагкан̣абадивзд̇хзнаад̇и сабхаавасан̇каад̇асса лагкан̣асса асаммохад̇о бадивиж̇жханзна. асаммохабадивзд̇ход̇и жа яат̇аа д̇асмим̣ н̃аан̣з бавад̇д̇з бажчаа д̣̇угкасса саруубаад̣̇ибарижчзд̣̇з саммохо на ход̇и, д̇ат̇аа бавад̇д̇и. д̇знааха ‘‘яат̇аабхууд̇ам̣ аб̣бхан̃н̃ааси’’нд̇и. ниб̣б̣ад̇д̇иганд̇и нибпаад̣̇знд̇ам̣. яам̣ таанам̣ бад̇ваад̇и яам̣ ниб̣б̣аанам̣ маг̇г̇асса аарамман̣абажжаяадтзна гааран̣абхууд̇ам̣ ааг̇амма. д̇ад̣̇убхаяавад̇о хи буг̇г̇аласса бад̇д̇и д̇ад̣̇убхаяасса бад̇д̇ийд̇и вуд̇д̇ам̣. бад̇ваад̇и ваа баабун̣анахзд̇у. аббавад̇д̇инд̇и аббавад̇д̇инимид̇д̇ам̣. д̇з ваа на бавад̇д̇анд̇и зд̇т̇аад̇и аббавад̇д̇и, ниб̣б̣аанам̣. д̇ассаад̇и д̣̇угканирод̇хасса. самбаабаганд̇и сажчигирияаавасзна саммад̣̇зва баабагам̣.
Āsavānaṃ khepanato samucchindanato āsavakkhayo ariyamaggo, ukkaṭṭhaniddesavasena arahattamaggaggahaṇaṃ. Āsavānaṃ khaye ñāṇaṃ āsavakkhayañāṇanti dassento ‘‘tatra cetaṃ ñāṇa’’nti vatvā khayeti ca ādhāre bhummaṃ, na visayeti dassento ‘‘tappariyāpannattā’’ti āha. Idaṃ dukkhanti dukkhassa ariyasaccassa tadā paccakkhato gahitabhāvadassanaṃ. Ettakaṃ dukkhanti tassa paricchijja gahitabhāvadassanaṃ. Na ito bhiyyoti anavasesetvā gahitabhāvadassanaṃ. Tenāha ‘‘sabbampi dukkhasacca’’ntiādi. Sarasalakkhaṇapaṭivedhenāti sabhāvasaṅkhātassa lakkhaṇassa asammohato paṭivijjhanena. Asammohapaṭivedhoti ca yathā tasmiṃ ñāṇe pavatte pacchā dukkhassa sarūpādiparicchede sammoho na hoti, tathā pavatti. Tenāha ‘‘yathābhūtaṃ abbhaññāsi’’nti. Nibbattikanti nipphādentaṃ. Yaṃ ṭhānaṃ patvāti yaṃ nibbānaṃ maggassa ārammaṇapaccayaṭṭhena kāraṇabhūtaṃ āgamma. Tadubhayavato hi puggalassa patti tadubhayassa pattīti vuttaṃ. Patvāti vā pāpuṇanahetu. Appavattinti appavattinimittaṃ. Te vā na pavattanti etthāti appavatti, nibbānaṃ. Tassāti dukkhanirodhassa. Sampāpakanti sacchikiriyāvasena sammadeva pāpakaṃ.
гилзсавасзнаад̇и аасавасан̇каад̇агилзсавасзна. яасмаа аасаваанам̣ д̣̇угкасажжабарияааяо, д̇аббарияаабаннад̇д̇аа, сзсасажжаанан̃жа д̇ам̣самуд̣̇аяаад̣̇ибарияааяо ад̇т̇и, д̇асмаа вуд̇д̇ам̣ ‘‘барияааяад̇о’’д̇и. д̣̇ассзнд̇о сажжаанийд̇и яож̇анаа. аасаваанам̣язва жзд̇т̇а г̇ахан̣ам̣ ‘‘аасаваанам̣ каяан̃аан̣ааяаа’’д̇и аарад̣̇д̇хад̇д̇аа. д̇ат̇аа хи аасававимуд̇д̇исийсзнзва саб̣б̣асам̣гилзсавимуд̇д̇и вуд̇д̇аа. ид̣̇ам̣ д̣̇угканд̇и яат̇аабхууд̇ам̣ аб̣бхан̃н̃аасинд̇иаад̣̇инаа миссагамаг̇г̇о ид̇ха гат̇ид̇од̇и ‘‘саха вибассанааяа годиббад̇д̇ам̣ маг̇г̇ам̣ гат̇зд̇ий’’д̇и вуд̇д̇ам̣. зд̇т̇а жа сажжаббадивзд̇хасса д̇ад̣̇аа ад̇ийд̇агаалигад̇д̇аа ‘‘яат̇аабхууд̇ам̣ аб̣бхан̃н̃ааси’’нд̇и вад̇вааби абхисамаяагаалз д̇асса бажжуббаннад̇ам̣ убаад̣̇ааяа ‘‘звам̣ ж̇аанад̇о звам̣ бассад̇о’’д̇и вад̇д̇амаанагаалзна нид̣̇д̣̇зсо гад̇о. со жа гаамам̣ маг̇г̇агкан̣ад̇о барам̣ яааваж̇ж̇ад̇анаа ад̇ийд̇агаалиго зва, саб̣б̣абатамам̣ банасса ад̇ийд̇агаалигад̇д̇ам̣ палагкан̣знзва взд̣̇ид̇аб̣б̣анд̇и ааха ‘‘вимужжид̇т̇аад̇и иминаа палагкан̣ам̣ д̣̇ассзд̇ий’’д̇и. ж̇аанад̇о бассад̇од̇и ваа хзд̇унид̣̇д̣̇зсояам̣. ж̇аананахзд̇у д̣̇ассанахзд̇у гаамаасавааби жид̇д̇ам̣ вимужжид̇т̇аад̇и яож̇анаа. бхаваасаваг̇г̇ахан̣знзва жзд̇т̇а бхаварааг̇асса вияа бхавад̣̇идтияааби самаварод̇ход̇и д̣̇идтаасавассаби сан̇г̇ахо д̣̇адтаб̣б̣о.
Kilesavasenāti āsavasaṅkhātakilesavasena. Yasmā āsavānaṃ dukkhasaccapariyāyo, tappariyāpannattā, sesasaccānañca taṃsamudayādipariyāyo atthi, tasmā vuttaṃ ‘‘pariyāyato’’ti. Dassento saccānīti yojanā. Āsavānaṃyeva cettha gahaṇaṃ ‘‘āsavānaṃ khayañāṇāyā’’ti āraddhattā. Tathā hi āsavavimuttisīseneva sabbasaṃkilesavimutti vuttā. Idaṃ dukkhanti yathābhūtaṃ abbhaññāsintiādinā missakamaggo idha kathitoti ‘‘saha vipassanāya koṭippattaṃ maggaṃ kathetī’’ti vuttaṃ. Ettha ca saccappaṭivedhassa tadā atītakālikattā ‘‘yathābhūtaṃ abbhaññāsi’’nti vatvāpi abhisamayakāle tassa paccuppannataṃ upādāya ‘‘evaṃ jānato evaṃ passato’’ti vattamānakālena niddeso kato. So ca kāmaṃ maggakkhaṇato paraṃ yāvajjatanā atītakāliko eva, sabbapaṭhamaṃ panassa atītakālikattaṃ phalakkhaṇeneva veditabbanti āha ‘‘vimuccitthāti iminā phalakkhaṇaṃ dassetī’’ti. Jānato passatoti vā hetuniddesoyaṃ. Jānanahetu dassanahetu kāmāsavāpi cittaṃ vimuccitthāti yojanā. Bhavāsavaggahaṇeneva cettha bhavarāgassa viya bhavadiṭṭhiyāpi samavarodhoti diṭṭhāsavassapi saṅgaho daṭṭhabbo.
яасмаа бахийнагилзсабажжавзгкан̣зна виж̇ж̇амаанассаби гаммасса ааяад̇им̣ аббадисанд̇хигабхаавад̇о ‘‘кийн̣аа ж̇аад̇ий’’д̇и ж̇аанаад̇и, яасмаа жа маг̇г̇абажжавзгкан̣аад̣̇ийхи вусид̇ам̣ б̣рахмажарияанд̇иаад̣̇им̣ баж̇аанаад̇и, д̇асмаа вуд̇д̇ам̣ ‘‘кийн̣аа ж̇аад̇ийд̇и аад̣̇ийхи д̇асса бхууми’’нд̇и. д̇ад̇т̇а д̇ассаад̇и бажжавзгкан̣ан̃аан̣асса. бхууминд̇и бавад̇д̇идтаанам̣. язнаад̇хиббааязна ‘‘гад̇амаа банаа’’д̇иаад̣̇инаа жод̣̇анаа гад̇аа, д̇ам̣ багаасзд̇ваа барихаарам̣ вад̇д̇угаамо ааха ‘‘на д̇аавассаа’’д̇иаад̣̇и. на д̇аавасса ад̇ийд̇аа ж̇аад̇и кийн̣аад̇и маг̇г̇абхааванааяа на кийн̣аад̇и ад̇хиббааяо. д̇ад̇т̇а гааран̣амааха ‘‘буб̣б̣зва кийн̣ад̇д̇аа’’д̇и. на анааг̇ад̇аа асса ж̇аад̇и кийн̣аад̇и яож̇анаа. на анааг̇ад̇аад̇и жа анааг̇ад̇ад̇д̇асааман̃н̃ам̣ г̇ахзд̇ваа лзсзна вад̣̇ад̇и. д̇знааха ‘‘анааг̇ад̇з вааяаамаабхаавад̇о’’д̇и. виж̇ж̇амаанзязва хи баяог̇о самбхавад̇и, наавиж̇ж̇амаанзд̇и ад̇хиббааяо. анааг̇ад̇ависзсо банзд̇т̇а ад̇хиббзд̇о, д̇асса жа кзбанз вааяаамоби лаб̣бхад̇зва. д̇знааха ‘‘яаа бана маг̇г̇ассаа’’д̇иаад̣̇и. ‘‘яаа банаа’’д̇и хи аад̣̇инаа маг̇г̇абхааванааяа анааг̇ад̇аж̇аад̇ияаа зва хзд̇увинаасанад̣̇ваарзна кийн̣абхааво багаасийяад̇и. згажад̇убан̃жавогаарабхавзсууд̇и бхавад̇д̇аяаг̇г̇ахан̣ам̣ вуд̇д̇анаязна анавасзсад̇о ж̇аад̇ияаа кийн̣абхаавад̣̇ассанад̇т̇ам̣. д̇анд̇и яат̇аавуд̇д̇аж̇аад̇им̣. сод̇и бхаг̇аваа.
Yasmā pahīnakilesapaccavekkhaṇena vijjamānassapi kammassa āyatiṃ appaṭisandhikabhāvato ‘‘khīṇā jātī’’ti jānāti, yasmā ca maggapaccavekkhaṇādīhi vusitaṃ brahmacariyantiādiṃ pajānāti, tasmā vuttaṃ ‘‘khīṇā jātīti ādīhi tassa bhūmi’’nti. Tattha tassāti paccavekkhaṇañāṇassa. Bhūminti pavattiṭṭhānaṃ. Yenādhippāyena ‘‘katamā panā’’tiādinā codanā katā, taṃ pakāsetvā parihāraṃ vattukāmo āha ‘‘na tāvassā’’tiādi. Na tāvassa atītā jāti khīṇāti maggabhāvanāya na khīṇāti adhippāyo. Tattha kāraṇamāha ‘‘pubbeva khīṇattā’’ti. Na anāgatā assa jāti khīṇāti yojanā. Na anāgatāti ca anāgatattasāmaññaṃ gahetvā lesena vadati. Tenāha ‘‘anāgate vāyāmābhāvato’’ti. Vijjamāneyeva hi payogo sambhavati, nāvijjamāneti adhippāyo. Anāgataviseso panettha adhippeto, tassa ca khepane vāyāmopi labbhateva. Tenāha ‘‘yā pana maggassā’’tiādi. ‘‘Yā panā’’ti hi ādinā maggabhāvanāya anāgatajātiyā eva hetuvināsanadvārena khīṇabhāvo pakāsīyati. Ekacatupañcavokārabhavesūti bhavattayaggahaṇaṃ vuttanayena anavasesato jātiyā khīṇabhāvadassanatthaṃ. Tanti yathāvuttajātiṃ. Soti bhagavā.
б̣рахмажарияаваасо наама ид̇ха маг̇г̇аб̣рахмажарияасса ниб̣б̣ад̇д̇анамзваад̇и ааха ‘‘нидтид̇а’’нд̇и. саммаад̣̇идтияаа жад̇уусу сажжзсу барин̃н̃аад̣̇игижжасаад̇ханавасзна бавад̇д̇амаанааяа саммаасан̇габбаад̣̇ийнамби д̣̇угкасажжз барин̃н̃аабхисамаяаануг̇ун̣аа бавад̇д̇и, ид̇арасажжзсу жа нзсам̣ бахаанаабхисамаяаад̣̇ивасзна бавад̇д̇и баагадаа зва. д̇зна вуд̇д̇ам̣ ‘‘жад̇уухи маг̇г̇зхи барин̃н̃аабахаанасажчигирияаабхааванаабхисамаяавасзнаа’’д̇и. наабарам̣ ид̇т̇ад̇д̇ааяаад̇и имз багаараа ид̇т̇ам̣, д̇аб̣бхааво ид̇т̇ад̇д̇ам̣, д̇ад̣̇ад̇т̇анд̇и вуд̇д̇ам̣ ход̇и. д̇з бана багаараа арияамаг̇г̇аб̣яаабаарабхууд̇аа барин̃н̃аад̣̇аяо ид̇хаад̇хиббзд̇аад̇и ааха ‘‘звам̣сол̣асагижжабхаавааяаа’’д̇и. д̇з хи маг̇г̇ам̣ бажжавзгкад̇о маг̇г̇аанубхаавзна баагадаа худ̇ваа убадтаханд̇и , барин̃н̃аад̣̇ийсу жа бахаанамзва бад̇хаанам̣, д̇ад̣̇ад̇т̇ад̇д̇ааяа ид̇арзсанд̇и ааха ‘‘гилзсагкаяааяа ваа’’д̇и. бахийнагилзсабажжавзгкан̣авасзна ваа зд̇ам̣ вуд̇д̇ам̣. ‘‘наабарам̣ ид̇т̇ад̇д̇ааяаад̇и аб̣бхан̃н̃ааси’’нд̇и зд̇т̇ааяамабаро наяо – ид̇т̇ад̇д̇ааяаад̇и ниссаггз самбад̣̇аанаважанам̣. д̇знааяамад̇т̇о – ид̇т̇ад̇д̇ааяа ид̇т̇амбхаавад̇о имасмаа звам̣багаараа ид̣̇аани вад̇д̇амаанагканд̇хасанд̇аанаа абарам̣ анааг̇ад̇агканд̇хасанд̇аанам̣ маяхам̣ над̇т̇и, имз бана жаримад̇д̇абхаавасан̇каад̇аа бан̃жагканд̇хаа барин̃н̃аад̇аа аббад̇идтаа д̇идтанд̇и чиннамуулагаа ругкаа вияа. абарин̃н̃аад̇амуулагаа хи бад̇идтаа. яат̇ааха ‘‘габ̣ал̣ийгаарз жз, бхигкавз, аахаарз ад̇т̇и рааг̇о ад̇т̇и нанд̣̇ий ад̇т̇и д̇ан̣хаа, бад̇идтид̇ам̣ д̇ад̇т̇а вин̃н̃аан̣ам̣ вирул̣ха’’нд̇иаад̣̇и (сам̣. ни. 2.64; гат̇аа. 296; махаани. 7). д̇з бана бан̃жагканд̇хаа жаримагавин̃н̃аан̣анирод̇хзна анубаад̣̇аано вияа ж̇аад̇авзд̣̇о ниб̣б̣ааяиссанд̇ийд̇и аб̣бхан̃н̃аасинд̇и.
Brahmacariyavāso nāma idha maggabrahmacariyassa nibbattanamevāti āha ‘‘niṭṭhita’’nti. Sammādiṭṭhiyā catūsu saccesu pariññādikiccasādhanavasena pavattamānāya sammāsaṅkappādīnampi dukkhasacce pariññābhisamayānuguṇā pavatti, itarasaccesu ca nesaṃ pahānābhisamayādivasena pavatti pākaṭā eva. Tena vuttaṃ ‘‘catūhi maggehi pariññāpahānasacchikiriyābhāvanābhisamayavasenā’’ti. Nāparaṃ itthattāyāti ime pakārā itthaṃ, tabbhāvo itthattaṃ, tadatthanti vuttaṃ hoti. Te pana pakārā ariyamaggabyāpārabhūtā pariññādayo idhādhippetāti āha ‘‘evaṃsoḷasakiccabhāvāyā’’ti. Te hi maggaṃ paccavekkhato maggānubhāvena pākaṭā hutvā upaṭṭhahanti , pariññādīsu ca pahānameva padhānaṃ, tadatthattāya itaresanti āha ‘‘kilesakkhayāya vā’’ti. Pahīnakilesapaccavekkhaṇavasena vā etaṃ vuttaṃ. ‘‘Nāparaṃ itthattāyāti abbhaññāsi’’nti etthāyamaparo nayo – itthattāyāti nissakke sampadānavacanaṃ. Tenāyamattho – itthattāya itthambhāvato imasmā evaṃpakārā idāni vattamānakkhandhasantānā aparaṃ anāgatakkhandhasantānaṃ mayhaṃ natthi, ime pana carimattabhāvasaṅkhātā pañcakkhandhā pariññātā appatiṭṭhā tiṭṭhanti chinnamūlakā rukkhā viya. Apariññātamūlakā hi patiṭṭhā. Yathāha ‘‘kabaḷīkāre ce, bhikkhave, āhāre atthi rāgo atthi nandī atthi taṇhā, patiṭṭhitaṃ tattha viññāṇaṃ viruḷha’’ntiādi (saṃ. ni. 2.64; kathā. 296; mahāni. 7). Te pana pañcakkhandhā carimakaviññāṇanirodhena anupādāno viya jātavedo nibbāyissantīti abbhaññāsinti.
бажжавзгкан̣ан̃аан̣абариг̇г̇ахид̇анд̇и на батамад̣̇уд̇ияан̃аан̣ад̣̇ваяаад̇хиг̇амам̣ вияа гзваланд̇и ад̇хиббааяо. д̣̇ассзнд̇од̇и ниг̇аманавасзна д̣̇ассзнд̇о. саруубад̇о хи буб̣б̣з д̣̇ассид̇амзваад̇и. сзсамзд̇т̇а вуд̇д̇анаяад̇д̇аа сувин̃н̃зяяамзва.
Paccavekkhaṇañāṇapariggahitanti na paṭhamadutiyañāṇadvayādhigamaṃ viya kevalanti adhippāyo. Dassentoti nigamanavasena dassento. Sarūpato hi pubbe dassitamevāti. Sesamettha vuttanayattā suviññeyyameva.
д̇игкад̇д̇ум̣ ж̇аад̇од̇и иминаа бана ид̣̇ам̣ д̣̇ассзд̇и ‘‘ахам̣, б̣раахман̣а, батамавиж̇ж̇ааяа ж̇аад̇оязва бурзж̇аад̇асса сахаж̇аад̇асса ваа абхаавад̇о саб̣б̣зсам̣ вуд̣дхо махаллаго, гиман̇г̇ам̣ бана д̇ийхи виж̇ж̇аахи д̇игкад̇д̇ум̣ ж̇аад̇од̇и. буб̣б̣зниваасан̃аан̣зна ад̇ийд̇ам̣сан̃аан̣анд̇и ад̇ийд̇аарамман̣асабхааг̇ад̇ааяа д̇аб̣бхаавийбхаавад̇о жа буб̣б̣зниваасан̃аан̣зна ад̇ийд̇ам̣сан̃аан̣ам̣ багаасзд̇ваад̇и яож̇зд̇аб̣б̣ам̣. д̇ад̇т̇а ад̇ийд̇ам̣сан̃аан̣анд̇и ад̇ийд̇агканд̇хааяад̇анад̇хаад̇усан̇каад̇з ад̇ийд̇агодтаасз аббадихад̇ан̃аан̣ам̣. д̣̇иб̣б̣ажагкун̃аан̣асса бажжуббаннаарамман̣ад̇д̇аа яат̇аагаммуубаг̇ан̃аан̣асса анааг̇ад̇ам̣сан̃аан̣асса жа д̣̇иб̣б̣ажагкувасзнзва иж̇жханад̇о д̣̇иб̣б̣ажагкуно барибхан̣д̣ан̃аан̣ад̇д̇аа д̣̇иб̣б̣ажагкумхиязва жа тид̇асса жзд̇обарияан̃аан̣асид̣̇д̇хид̇о вуд̇д̇ам̣ ‘‘д̣̇иб̣б̣ажагкунаа бажжуббаннаанааг̇ад̇ам̣сан̃аан̣а’’нд̇и. д̇ад̇т̇а д̣̇иб̣б̣ажагкунаад̇и сабарибхан̣д̣зна д̣̇иб̣б̣ажагкун̃аан̣зна. бажжуббаннам̣со жа анааг̇ад̇ам̣со жа бажжуббаннаанааг̇ад̇ам̣сам̣, д̇ад̇т̇а н̃аан̣ам̣ бажжуббаннаанааг̇ад̇ам̣сан̃аан̣ам̣. аасавагкаяан̃аан̣аад̇хиг̇амзнзва саб̣б̣ан̃н̃уд̇ан̃н̃аан̣асса вияа сзсаасаад̇хааран̣ан̃аан̣ад̣̇асаб̣алан̃аан̣ааавзн̣игаб̣уд̣̇д̇хад̇хаммаад̣̇ийнамби анан̃н̃асаад̇хааран̣аанам̣ б̣уд̣̇д̇хаг̇ун̣аанам̣ иж̇жханад̇о вуд̇д̇ам̣ ‘‘аасавагкаязна сагалалогияалогуд̇д̇араг̇ун̣а’’нд̇и. д̇знааха ‘‘саб̣б̣зби саб̣б̣ан̃н̃уг̇ун̣з багаасзд̇ваа’’д̇и.
Tikkhattuṃ jātoti iminā pana idaṃ dasseti ‘‘ahaṃ, brāhmaṇa, paṭhamavijjāya jātoyeva purejātassa sahajātassa vā abhāvato sabbesaṃ vuḍḍho mahallako, kimaṅgaṃ pana tīhi vijjāhi tikkhattuṃ jātoti. Pubbenivāsañāṇena atītaṃsañāṇanti atītārammaṇasabhāgatāya tabbhāvībhāvato ca pubbenivāsañāṇena atītaṃsañāṇaṃ pakāsetvāti yojetabbaṃ. Tattha atītaṃsañāṇanti atītakkhandhāyatanadhātusaṅkhāte atītakoṭṭhāse appaṭihatañāṇaṃ. Dibbacakkhuñāṇassa paccuppannārammaṇattā yathākammūpagañāṇassa anāgataṃsañāṇassa ca dibbacakkhuvaseneva ijjhanato dibbacakkhuno paribhaṇḍañāṇattā dibbacakkhumhiyeva ca ṭhitassa cetopariyañāṇasiddhito vuttaṃ ‘‘dibbacakkhunā paccuppannānāgataṃsañāṇa’’nti. Tattha dibbacakkhunāti saparibhaṇḍena dibbacakkhuñāṇena. Paccuppannaṃso ca anāgataṃso ca paccuppannānāgataṃsaṃ, tattha ñāṇaṃ paccuppannānāgataṃsañāṇaṃ. Āsavakkhayañāṇādhigameneva sabbaññutaññāṇassa viya sesāsādhāraṇañāṇadasabalañāṇaāveṇikabuddhadhammādīnampi anaññasādhāraṇānaṃ buddhaguṇānaṃ ijjhanato vuttaṃ ‘‘āsavakkhayena sakalalokiyalokuttaraguṇa’’nti. Tenāha ‘‘sabbepi sabbaññuguṇe pakāsetvā’’ti.
аасавагкаяан̃аан̣агат̇аа нидтид̇аа.
Āsavakkhayañāṇakathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / взран̃ж̇аган̣д̣ам̣ • Verañjakaṇḍaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / аасавагкаяан̃аан̣агат̇аа • Āsavakkhayañāṇakathā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / аасавагкаяан̃аан̣агат̇ааван̣н̣анаа • Āsavakkhayañāṇakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / аасавагкаяан̃аан̣агат̇ааван̣н̣анаа • Āsavakkhayañāṇakathāvaṇṇanā
