| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஆஸவக்க²யஞாணகதா²வண்ணனா
Āsavakkhayañāṇakathāvaṇṇanā
14. ஸரஸலக்க²ணபடிவேதே⁴னாதி ஸபா⁴வஸங்கா²தஸ்ஸ லக்க²ணஸ்ஸ அஸம்மோஹதோ படிவிஜ்ஜ²னேன. நிப்³ப³த்திகந்தி நிப்பா²த³னங். யங் டா²னங் பத்வாதி யங் நிப்³பா³னங் மக்³க³ஸ்ஸ ஆரம்மணபச்சயட்டே²ன டா²னங் காரணபூ⁴தங் ஆக³ம்ம. அப்பவத்திந்தி அப்பவத்திஹேதுங். கிலேஸவஸேனாதி யேஸங் ஆஸவானங் கே²பனேன இத³ங் ஞாணங் ஆஸவக்க²யஞாணங் ஜாதங், தேஸங் கிலேஸானங் வஸேன, தேஸங் ஆஸவானங் வஸேன ஸப்³ப³கிலேஸானங் ஸங்க³ஹணதோ பரியாயதோ பகாரந்தரதோதி அத்தோ². பாளியங் அதீதகாலவஸேன ‘‘அப்³ப⁴ஞ்ஞாஸி’’ந்தி வத்வாபி அபி⁴ஸமயகாலே தஸ்ஸ தஸ்ஸ ஜானநஸ்ஸ பச்சுப்பன்னதங் உபாதா³ய ‘‘ஏவங் ஜானதோ ஏவங் பஸ்ஸதோ’’தி வத்தமானகாலேன நித்³தே³ஸோ கதோ. காமாஸவாதீ³னங் விமுச்சனேனேவ தத³வினாபா⁴வதோ தி³ட்டா²ஸவஸ்ஸாபி விமுத்தி வேதி³தப்³பா³.
14.Sarasalakkhaṇapaṭivedhenāti sabhāvasaṅkhātassa lakkhaṇassa asammohato paṭivijjhanena. Nibbattikanti nipphādanaṃ. Yaṃ ṭhānaṃ patvāti yaṃ nibbānaṃ maggassa ārammaṇapaccayaṭṭhena ṭhānaṃ kāraṇabhūtaṃ āgamma. Appavattinti appavattihetuṃ. Kilesavasenāti yesaṃ āsavānaṃ khepanena idaṃ ñāṇaṃ āsavakkhayañāṇaṃ jātaṃ, tesaṃ kilesānaṃ vasena, tesaṃ āsavānaṃ vasena sabbakilesānaṃ saṅgahaṇato pariyāyato pakārantaratoti attho. Pāḷiyaṃ atītakālavasena ‘‘abbhaññāsi’’nti vatvāpi abhisamayakāle tassa tassa jānanassa paccuppannataṃ upādāya ‘‘evaṃ jānato evaṃ passato’’ti vattamānakālena niddeso kato. Kāmāsavādīnaṃ vimuccaneneva tadavinābhāvato diṭṭhāsavassāpi vimutti veditabbā.
‘‘கீ²ணா ஜாதீ’’தி ஜானநங் கிலேஸக்க²யபச்சவெக்க²ணவஸேன, வுஸிதங் ப்³ரஹ்மசரியந்திஆதி³ஜானநங் மக்³க³ப²லனிப்³பா³னபச்சவெக்க²ணவஸேன ஹோதீதி ஆஹ ‘‘கீ²ணா ஜாதீதிஆதீ³ஹி தஸ்ஸ பூ⁴மி’’ந்தி. தத்த² பூ⁴மிந்தி விஸயங், தீஸு காலேஸுபி ஜாதிக்க²யங் பதி உஜுகமேவ வாயாமாஸம்ப⁴வேபி தங் பதி வாயாமகரணஸ்ஸ ஸாத்த²கதங், தஸ்ஸ அனாக³தக்க²ந்தா⁴னுப்பத்திப²லதஞ்ச த³ஸ்ஸேதுங் யா பனாதிஆதி³ வுத்தங். யா பன மக்³க³ஸ்ஸ அபா⁴விதத்தாதிஆதி³னா ஹி மக்³கே³னாவிஹதகிலேஸேஹேவ ஆயதிங் க²ந்தா⁴னங் ஜாதி ஹெஸ்ஸதி, தேஸஞ்ச கிலேஸானங் மக்³கே³ன வினாஸே ஸதி க²ந்தா⁴ ந ஜாயிஸ்ஸந்தி, கிலேஸானஞ்ச தேகாலிகதாய ஜாதியங் வுத்தனயேன கேனசி பச்சயேன வினாஸயோகே³பி சித்தஸந்தானே கிலேஸவிருத்³த⁴அரியமக்³க³க்க²ணுப்பாத³னமேவ தப்³பி³னாஸோ விருத்³த⁴பச்சயோபனிபாதேன ஆயதிங் அனுப்பஜ்ஜனதோ பீ³ஜஸந்தானே அக்³கி³க்க²ந்தோ⁴பனிபாதேன ஆயதிங் பீ³ஜத்தானுப்பத்தி விய, இதி மக்³க³க்க²ணுப்பத்திஸங்கா²தகிலேஸாபா⁴வேன கிலேஸப²லானங் க²ந்தா⁴னங் ஆயதிங் அனுப்பத்தியேவ ஜாதிக்க²யோதி அயமத்தோ² விபா⁴வீயதி, தேனாஹ ‘‘மக்³க³ஸ்ஸ பா⁴விதத்தா அனுப்பாத³த⁴ம்மதங் ஆபஜ்ஜனேன கீ²ணா’’தி. எத்த² சாயமத்தோ² கிலேஸாபா⁴வஸங்கா²தஸ்ஸ மக்³க³ஸ்ஸ பா⁴விதத்தா உப்பாதி³தத்தா பச்சயாபா⁴வேன அனுப்பஜ்ஜந்தீ க²ந்தா⁴னங் ஜாதி தேன ஆயதிங் அனுப்பஜ்ஜனஸங்கா²தேன அனுப்பாத³த⁴ம்மதங் ஆபஜ்ஜனேன வோஹாரதோ கீ²ணா மே ஜாதீதி. ந ஹி ஸங்க²தத⁴ம்மானங் பச்சயந்தரேன வினாஸோ ஸம்ப⁴வதி, ஸம்ப⁴வே ச தஸ்ஸ பச்சயந்தரதாதி³ப்பஸங்க³தோ. தப்³பி³ருத்³த⁴க்க²ணுப்பாத³னமேவ தப்³பி³னாஸுப்பாத³னங். தந்தி கீ²ணஜாதிங் அப்³ப⁴ஞ்ஞாஸிந்தி ஸம்ப³ந்தோ⁴. இத்த²த்தாயாதி இமே பகாரா இத்த²ங், தப்³பா⁴வோ இத்த²த்தங், தத³த்தா²ய. த³ஸ்ஸெந்தோதி நிக³மனவஸேன த³ஸ்ஸெந்தோதி.
‘‘Khīṇā jātī’’ti jānanaṃ kilesakkhayapaccavekkhaṇavasena, vusitaṃ brahmacariyantiādijānanaṃ maggaphalanibbānapaccavekkhaṇavasena hotīti āha ‘‘khīṇā jātītiādīhi tassa bhūmi’’nti. Tattha bhūminti visayaṃ, tīsu kālesupi jātikkhayaṃ pati ujukameva vāyāmāsambhavepi taṃ pati vāyāmakaraṇassa sātthakataṃ, tassa anāgatakkhandhānuppattiphalatañca dassetuṃ yā panātiādi vuttaṃ. Yā pana maggassa abhāvitattātiādinā hi maggenāvihatakileseheva āyatiṃ khandhānaṃ jāti hessati, tesañca kilesānaṃ maggena vināse sati khandhā na jāyissanti, kilesānañca tekālikatāya jātiyaṃ vuttanayena kenaci paccayena vināsayogepi cittasantāne kilesaviruddhaariyamaggakkhaṇuppādanameva tabbināso viruddhapaccayopanipātena āyatiṃ anuppajjanato bījasantāne aggikkhandhopanipātena āyatiṃ bījattānuppatti viya, iti maggakkhaṇuppattisaṅkhātakilesābhāvena kilesaphalānaṃ khandhānaṃ āyatiṃ anuppattiyeva jātikkhayoti ayamattho vibhāvīyati, tenāha ‘‘maggassa bhāvitattā anuppādadhammataṃ āpajjanena khīṇā’’ti. Ettha cāyamattho kilesābhāvasaṅkhātassa maggassa bhāvitattā uppāditattā paccayābhāvena anuppajjantī khandhānaṃ jāti tena āyatiṃ anuppajjanasaṅkhātena anuppādadhammataṃ āpajjanena vohārato khīṇā me jātīti. Na hi saṅkhatadhammānaṃ paccayantarena vināso sambhavati, sambhave ca tassa paccayantaratādippasaṅgato. Tabbiruddhakkhaṇuppādanameva tabbināsuppādanaṃ. Tanti khīṇajātiṃ abbhaññāsinti sambandho. Itthattāyāti ime pakārā itthaṃ, tabbhāvo itthattaṃ, tadatthāya. Dassentoti nigamanavasena dassentoti.
விஜ்ஜாத்தயகதா²வண்ணனானயோ நிட்டி²தோ.
Vijjāttayakathāvaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / வேரஞ்ஜகண்ட³ங் • Verañjakaṇḍaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / ஆஸவக்க²யஞாணகதா² • Āsavakkhayañāṇakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
ஆஸவக்க²யஞாணகதா² • Āsavakkhayañāṇakathā
1. ஸுக்கவிஸ்ஸட்டி²ஸிக்கா²பத³வண்ணனா • 1. Sukkavissaṭṭhisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஆஸவக்க²யஞாணகதா²வண்ணனா • Āsavakkhayañāṇakathāvaṇṇanā
