| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৫৫. আসৰক্খযঞাণনিদ্দেসো
55. Āsavakkhayañāṇaniddeso
১০৭. কথং চতুসট্ঠিযা আকারেহি তিণ্ণন্নং ইন্দ্রিযানং ৰসিভাৰতা পঞ্ঞা আসৰানং খযে ঞাণং? কতমেসং তিণ্ণন্নং ইন্দ্রিযানং? অনঞ্ঞাতঞ্ঞস্সামীতিন্দ্রিযস্স অঞ্ঞিন্দ্রিযস্স অঞ্ঞাতাৰিন্দ্রিযস্স।
107. Kathaṃ catusaṭṭhiyā ākārehi tiṇṇannaṃ indriyānaṃ vasibhāvatā paññā āsavānaṃ khaye ñāṇaṃ? Katamesaṃ tiṇṇannaṃ indriyānaṃ? Anaññātaññassāmītindriyassa aññindriyassa aññātāvindriyassa.
অনঞ্ঞাতঞ্ঞস্সামীতিন্দ্রিযং কতি ঠানানি গচ্ছতি, অঞ্ঞিন্দ্রিযং কতি ঠানানি গচ্ছতি, অঞ্ঞাতাৰিন্দ্রিযং কতি ঠানানি গচ্ছতি? অনঞ্ঞাতঞ্ঞস্সামীতিন্দ্রিযং একং ঠানং গচ্ছতি – সোতাপত্তিমগ্গং। অঞ্ঞিন্দ্রিযং ছ ঠানানি গচ্ছতি – সোতাপত্তিফলং , সকদাগামিমগ্গং , সকদাগামিফলং, অনাগামিমগ্গং, অনাগামিফলং, অরহত্তমগ্গং। অঞ্ঞাতাৰিন্দ্রিযং একং ঠানং গচ্ছতি – অরহত্তফলং।
Anaññātaññassāmītindriyaṃ kati ṭhānāni gacchati, aññindriyaṃ kati ṭhānāni gacchati, aññātāvindriyaṃ kati ṭhānāni gacchati? Anaññātaññassāmītindriyaṃ ekaṃ ṭhānaṃ gacchati – sotāpattimaggaṃ. Aññindriyaṃ cha ṭhānāni gacchati – sotāpattiphalaṃ , sakadāgāmimaggaṃ , sakadāgāmiphalaṃ, anāgāmimaggaṃ, anāgāmiphalaṃ, arahattamaggaṃ. Aññātāvindriyaṃ ekaṃ ṭhānaṃ gacchati – arahattaphalaṃ.
সোতাপত্তিমগ্গক্খণে অনঞ্ঞাতঞ্ঞস্সামীতিন্দ্রিযস্স সদ্ধিন্দ্রিযং অধিমোক্খপরিৰারং হোতি, ৰীরিযিন্দ্রিযং পগ্গহপরিৰারং হোতি, সতিন্দ্রিযং উপট্ঠানপরিৰারং হোতি, সমাধিন্দ্রিযং অৰিক্খেপপরিৰারং হোতি, পঞ্ঞিন্দ্রিযং দস্সনপরিৰারং হোতি, মনিন্দ্রিযং ৰিজাননপরিৰারং হোতি, সোমনস্সিন্দ্রিযং অভিসন্দনপরিৰারং হোতি, জীৰিতিন্দ্রিযং পৰত্তসন্ততাধিপতেয্যপরিৰারং হোতি। সোতাপত্তিমগ্গক্খণে জাতা ধম্মা ঠপেত্ৰা চিত্তসমুট্ঠানং রূপং সব্বেৰ কুসলা হোন্তি, সব্বেৰ অনাসৰা হোন্তি, সব্বেৰ নিয্যানিকা হোন্তি, সব্বেৰ অপচযগামিনো হোন্তি, সব্বেৰ লোকুত্তরা হোন্তি, সব্বেৰ নিব্বানারম্মণা হোন্তি। সোতাপত্তিমগ্গক্খণে অনঞ্ঞাতঞ্ঞস্সামীতিন্দ্রিযস্স ইমানি অট্ঠিন্দ্রিযানি সহজাতপরিৰারা হোন্তি, অঞ্ঞমঞ্ঞপরিৰারা হোন্তি, নিস্সযপরিৰারা হোন্তি, সম্পযুত্তপরিৰারা হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি। তেৰ তস্স আকারা চেৰ হোন্তি পরিৰারা চ।
Sotāpattimaggakkhaṇe anaññātaññassāmītindriyassa saddhindriyaṃ adhimokkhaparivāraṃ hoti, vīriyindriyaṃ paggahaparivāraṃ hoti, satindriyaṃ upaṭṭhānaparivāraṃ hoti, samādhindriyaṃ avikkhepaparivāraṃ hoti, paññindriyaṃ dassanaparivāraṃ hoti, manindriyaṃ vijānanaparivāraṃ hoti, somanassindriyaṃ abhisandanaparivāraṃ hoti, jīvitindriyaṃ pavattasantatādhipateyyaparivāraṃ hoti. Sotāpattimaggakkhaṇe jātā dhammā ṭhapetvā cittasamuṭṭhānaṃ rūpaṃ sabbeva kusalā honti, sabbeva anāsavā honti, sabbeva niyyānikā honti, sabbeva apacayagāmino honti, sabbeva lokuttarā honti, sabbeva nibbānārammaṇā honti. Sotāpattimaggakkhaṇe anaññātaññassāmītindriyassa imāni aṭṭhindriyāni sahajātaparivārā honti, aññamaññaparivārā honti, nissayaparivārā honti, sampayuttaparivārā honti, sahagatā honti, sahajātā honti, saṃsaṭṭhā honti, sampayuttā honti. Teva tassa ākārā ceva honti parivārā ca.
সোতাপত্তিফলক্খণে অঞ্ঞিন্দ্রিযস্স সদ্ধিন্দ্রিযং অধিমোক্খপরিৰারং হোতি, ৰীরিযিন্দ্রিযং পগ্গহপরিৰারং হোতি, সতিন্দ্রিযং উপট্ঠানপরিৰারং হোতি, সমাধিন্দ্রিযং অৰিক্খেপপরিৰারং হোতি, পঞ্ঞিন্দ্রিযং দস্সনপরিৰারং হোতি, মনিন্দ্রিযং ৰিজাননপরিৰারং হোতি, সোমনস্সিন্দ্রিযং অভিসন্দনপরিৰারং হোতি, জীৰিতিন্দ্রিযং পৰত্তসন্ততাধিপতেয্যপরিৰারং হোতি। সোতাপত্তিফলক্খণে জাতা ধম্মা সব্বেৰ অব্যাকতা হোন্তি, ঠপেত্ৰা চিত্তসমুট্ঠানং রূপং সব্বেৰ অনাসৰা হোন্তি, সব্বেৰ লোকুত্তরা হোন্তি, সব্বেৰ নিব্বানারম্মণা হোন্তি। সোতাপত্তিফলক্খণে অঞ্ঞিন্দ্রিযস্স ইমানি অট্ঠিন্দ্রিযানি সহজাতপরিৰারা হোন্তি, অঞ্ঞমঞ্ঞপরিৰারা হোন্তি, নিস্সযপরিৰারা হোন্তি, সম্পযুত্তপরিৰারা হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি। তেৰ তস্স আকারা চেৰ হোন্তি পরিৰারা চ।
Sotāpattiphalakkhaṇe aññindriyassa saddhindriyaṃ adhimokkhaparivāraṃ hoti, vīriyindriyaṃ paggahaparivāraṃ hoti, satindriyaṃ upaṭṭhānaparivāraṃ hoti, samādhindriyaṃ avikkhepaparivāraṃ hoti, paññindriyaṃ dassanaparivāraṃ hoti, manindriyaṃ vijānanaparivāraṃ hoti, somanassindriyaṃ abhisandanaparivāraṃ hoti, jīvitindriyaṃ pavattasantatādhipateyyaparivāraṃ hoti. Sotāpattiphalakkhaṇe jātā dhammā sabbeva abyākatā honti, ṭhapetvā cittasamuṭṭhānaṃ rūpaṃ sabbeva anāsavā honti, sabbeva lokuttarā honti, sabbeva nibbānārammaṇā honti. Sotāpattiphalakkhaṇe aññindriyassa imāni aṭṭhindriyāni sahajātaparivārā honti, aññamaññaparivārā honti, nissayaparivārā honti, sampayuttaparivārā honti, sahagatā honti, sahajātā honti, saṃsaṭṭhā honti, sampayuttā honti. Teva tassa ākārā ceva honti parivārā ca.
সকদাগামিমগ্গক্খণে …পে॰… সকদাগামিফলক্খণে…পে॰… অনাগামিমগ্গক্খণে…পে॰… অনাগামিফলক্খণে…পে॰… অরহত্তমগ্গক্খণে অঞ্ঞিন্দ্রিযস্স সদ্ধিন্দ্রিযং অধিমোক্খপরিৰারং হোতি…পে॰… জীৰিতিন্দ্রিযং পৰত্তসন্ততাধিপতেয্যপরিৰারং হোতি। অরহত্তমগ্গক্খণে জাতা ধম্মা ঠপেত্ৰা চিত্তসমুট্ঠানং রূপং সব্বেৰ কুসলা হোন্তি, সব্বেৰ অনাসৰা হোন্তি, সব্বেৰ নিয্যানিকা হোন্তি, সব্বেৰ অপচযগামিনো হোন্তি, সব্বেৰ লোকুত্তরা হোন্তি, সব্বেৰ নিব্বানারম্মণা হোন্তি। অরহত্তমগ্গক্খণে অঞ্ঞিন্দ্রিযস্স ইমানি অট্ঠিন্দ্রিযানি সহজাতপরিৰারা হোন্তি, অঞ্ঞমঞ্ঞপরিৰারা হোন্তি, নিস্সযপরিৰারা হোন্তি, সম্পযুত্তপরিৰারা হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি। তেৰ তস্স আকারা চেৰ হোন্তি পরিৰারা চ।
Sakadāgāmimaggakkhaṇe …pe… sakadāgāmiphalakkhaṇe…pe… anāgāmimaggakkhaṇe…pe… anāgāmiphalakkhaṇe…pe… arahattamaggakkhaṇe aññindriyassa saddhindriyaṃ adhimokkhaparivāraṃ hoti…pe… jīvitindriyaṃ pavattasantatādhipateyyaparivāraṃ hoti. Arahattamaggakkhaṇe jātā dhammā ṭhapetvā cittasamuṭṭhānaṃ rūpaṃ sabbeva kusalā honti, sabbeva anāsavā honti, sabbeva niyyānikā honti, sabbeva apacayagāmino honti, sabbeva lokuttarā honti, sabbeva nibbānārammaṇā honti. Arahattamaggakkhaṇe aññindriyassa imāni aṭṭhindriyāni sahajātaparivārā honti, aññamaññaparivārā honti, nissayaparivārā honti, sampayuttaparivārā honti, sahagatā honti, sahajātā honti, saṃsaṭṭhā honti, sampayuttā honti. Teva tassa ākārā ceva honti parivārā ca.
অরহত্তফলক্খণে অঞ্ঞাতাৰিন্দ্রিযস্স সদ্ধিন্দ্রিযং অধিমোক্খপরিৰারং হোতি, ৰীরিযিন্দ্রিযং পগ্গহপরিৰারং হোতি, সতিন্দ্রিযং উপট্ঠানপরিৰারং হোতি, সমাধিন্দ্রিযং অৰিক্খেপপরিৰারং হোতি, পঞ্ঞিন্দ্রিযং দস্সনপরিৰারং হোতি, মনিন্দ্রিযং ৰিজাননপরিৰারং হোতি, সোমনস্সিন্দ্রিযং অভিসন্দনপরিৰারং হোতি, জীৰিতিন্দ্রিযং পৰত্তসন্ততাধিপতেয্যপরিৰারং হোতি। অরহত্তফলক্খণে জাতা ধম্মা সব্বেৰ অব্যাকতা হোন্তি, ঠপেত্ৰা চিত্তসমুট্ঠানং রূপং সব্বেৰ অনাসৰা হোন্তি, সব্বেৰ লোকুত্তরা হোন্তি, সব্বেৰ নিব্বানারম্মণা হোন্তি। অরহত্তফলক্খণে অঞ্ঞাতাৰিন্দ্রিযস্স ইমানি অট্ঠিন্দ্রিযানি সহজাতপরিৰারা হোন্তি, অঞ্ঞমঞ্ঞপরিৰারা হোন্তি, নিস্সযপরিৰারা হোন্তি, সম্পযুত্তপরিৰারা হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি। তেৰ তস্স আকারা চেৰ হোন্তি পরিৰারা চ। ইতি ইমানি অট্ঠট্ঠকানি চতুসট্ঠি হোন্তি।
Arahattaphalakkhaṇe aññātāvindriyassa saddhindriyaṃ adhimokkhaparivāraṃ hoti, vīriyindriyaṃ paggahaparivāraṃ hoti, satindriyaṃ upaṭṭhānaparivāraṃ hoti, samādhindriyaṃ avikkhepaparivāraṃ hoti, paññindriyaṃ dassanaparivāraṃ hoti, manindriyaṃ vijānanaparivāraṃ hoti, somanassindriyaṃ abhisandanaparivāraṃ hoti, jīvitindriyaṃ pavattasantatādhipateyyaparivāraṃ hoti. Arahattaphalakkhaṇe jātā dhammā sabbeva abyākatā honti, ṭhapetvā cittasamuṭṭhānaṃ rūpaṃ sabbeva anāsavā honti, sabbeva lokuttarā honti, sabbeva nibbānārammaṇā honti. Arahattaphalakkhaṇe aññātāvindriyassa imāni aṭṭhindriyāni sahajātaparivārā honti, aññamaññaparivārā honti, nissayaparivārā honti, sampayuttaparivārā honti, sahagatā honti, sahajātā honti, saṃsaṭṭhā honti, sampayuttā honti. Teva tassa ākārā ceva honti parivārā ca. Iti imāni aṭṭhaṭṭhakāni catusaṭṭhi honti.
আসৰাতি কতমে তে আসৰা? কামাসৰো, ভৰাসৰো, দিট্ঠাসৰো, অৰিজ্জাসৰো। কত্থেতে আসৰা খীযন্তি? সোতাপত্তিমগ্গেন অনৰসেসো দিট্ঠাসৰো খীযতি, অপাযগমনীযো কামাসৰো খীযতি, অপাযগমনীযো ভৰাসৰো খীযতি, অপাযগমনীযো অৰিজ্জাসৰো খীযতি। এত্থেতে আসৰা খীযন্তি। সকদাগামিমগ্গেন ওল়ারিকো কামাসৰো খীযতি, তদেকট্ঠো ভৰাসৰো খীযতি, তদেকট্ঠো অৰিজ্জাসৰো খীযতি। এত্থেতে আসৰা খীযন্তি। অনাগামিমগ্গেন অনৰসেসো কামাসৰো খীযতি, তদেকট্ঠো ভৰাসৰো খীযতি, তদেকট্ঠো অৰিজ্জাসৰো খীযতি। এত্থেতে আসৰা খীযন্তি। অরহত্তমগ্গেন অনৰসেসো ভৰাসৰো খীযতি, অনৰসেসো অৰিজ্জাসৰো খীযতি। এত্থেতে আসৰা খীযন্তি। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘চতুসট্ঠিযা আকারেহি তিণ্ণন্নং ইন্দ্রিযানং ৰসিভাৰতা পঞ্ঞা আসৰানং খযে ঞাণং’’।
Āsavāti katame te āsavā? Kāmāsavo, bhavāsavo, diṭṭhāsavo, avijjāsavo. Katthete āsavā khīyanti? Sotāpattimaggena anavaseso diṭṭhāsavo khīyati, apāyagamanīyo kāmāsavo khīyati, apāyagamanīyo bhavāsavo khīyati, apāyagamanīyo avijjāsavo khīyati. Etthete āsavā khīyanti. Sakadāgāmimaggena oḷāriko kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Anāgāmimaggena anavaseso kāmāsavo khīyati, tadekaṭṭho bhavāsavo khīyati, tadekaṭṭho avijjāsavo khīyati. Etthete āsavā khīyanti. Arahattamaggena anavaseso bhavāsavo khīyati, anavaseso avijjāsavo khīyati. Etthete āsavā khīyanti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘catusaṭṭhiyā ākārehi tiṇṇannaṃ indriyānaṃ vasibhāvatā paññā āsavānaṃ khaye ñāṇaṃ’’.
আসৰক্খযঞাণনিদ্দেসো পঞ্চপঞ্ঞাসমো।
Āsavakkhayañāṇaniddeso pañcapaññāsamo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৫৫. আসৰক্খযঞাণনিদ্দেসৰণ্ণনা • 55. Āsavakkhayañāṇaniddesavaṇṇanā
