| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৩. আসৰক্খযসুত্তং
3. Āsavakkhayasuttaṃ
১০২. ৰুত্তঞ্হেতং ভগৰতা, ৰুত্তমরহতাতি মে সুতং –
102. Vuttañhetaṃ bhagavatā, vuttamarahatāti me sutaṃ –
‘‘জানতোহং, ভিক্খৰে, পস্সতো আসৰানং খযং ৰদামি , নো অজানতো নো অপস্সতো। কিঞ্চ, ভিক্খৰে, জানতো, কিং পস্সতো আসৰানং খযো হোতি? ইদং দুক্খন্তি, ভিক্খৰে, জানতো পস্সতো আসৰানং খযো হোতি। অযং দুক্খসমুদযোতি, ভিক্খৰে, জানতো পস্সতো আসৰানং খযো হোতি। অযং দুক্খনিরোধোতি, ভিক্খৰে, জানতো পস্সতো আসৰানং খযো হোতি। অযং দুক্খনিরোধগামিনী পটিপদাতি, ভিক্খৰে, জানতো পস্সতো আসৰানং খযো হোতি। এৰং খো , ভিক্খৰে, জানতো এৰং পস্সতো আসৰানং খযো হোতী’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Jānatohaṃ, bhikkhave, passato āsavānaṃ khayaṃ vadāmi , no ajānato no apassato. Kiñca, bhikkhave, jānato, kiṃ passato āsavānaṃ khayo hoti? Idaṃ dukkhanti, bhikkhave, jānato passato āsavānaṃ khayo hoti. Ayaṃ dukkhasamudayoti, bhikkhave, jānato passato āsavānaṃ khayo hoti. Ayaṃ dukkhanirodhoti, bhikkhave, jānato passato āsavānaṃ khayo hoti. Ayaṃ dukkhanirodhagāminī paṭipadāti, bhikkhave, jānato passato āsavānaṃ khayo hoti. Evaṃ kho , bhikkhave, jānato evaṃ passato āsavānaṃ khayo hotī’’ti. Etamatthaṃ bhagavā avoca. Tatthetaṃ iti vuccati –
‘‘সেখস্স সিক্খমানস্স, উজুমগ্গানুসারিনো।
‘‘Sekhassa sikkhamānassa, ujumaggānusārino;
খযস্মিং পঠমং ঞাণং, ততো অঞ্ঞা অনন্তরা॥
Khayasmiṃ paṭhamaṃ ñāṇaṃ, tato aññā anantarā.
‘‘ততো অঞ্ঞা ৰিমুত্তস্স, ৰিমুত্তিঞাণমুত্তমং।
‘‘Tato aññā vimuttassa, vimuttiñāṇamuttamaṃ;
উপ্পজ্জতি খযে ঞাণং, খীণা সংযোজনা ইতি॥
Uppajjati khaye ñāṇaṃ, khīṇā saṃyojanā iti.
‘‘ন ত্ৰেৰিদং কুসীতেন, বালেনমৰিজানতা।
‘‘Na tvevidaṃ kusītena, bālenamavijānatā;
নিব্বানং অধিগন্তব্বং, সব্বগন্থপ্পমোচন’’ন্তি॥
Nibbānaṃ adhigantabbaṃ, sabbaganthappamocana’’nti.
অযম্পি অত্থো ৰুত্তো ভগৰতা, ইতি মে সুতন্তি। ততিযং।
Ayampi attho vutto bhagavatā, iti me sutanti. Tatiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৩. আসৰক্খযসুত্তৰণ্ণনা • 3. Āsavakkhayasuttavaṇṇanā
