| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
३. आसवक्खयसुत्तं
3. Āsavakkhayasuttaṃ
१०२. वुत्तञ्हेतं भगवता, वुत्तमरहताति मे सुतं –
102. Vuttañhetaṃ bhagavatā, vuttamarahatāti me sutaṃ –
‘‘जानतोहं, भिक्खवे, पस्सतो आसवानं खयं वदामि , नो अजानतो नो अपस्सतो। किञ्च, भिक्खवे, जानतो, किं पस्सतो आसवानं खयो होति? इदं दुक्खन्ति, भिक्खवे, जानतो पस्सतो आसवानं खयो होति। अयं दुक्खसमुदयोति, भिक्खवे, जानतो पस्सतो आसवानं खयो होति। अयं दुक्खनिरोधोति, भिक्खवे, जानतो पस्सतो आसवानं खयो होति। अयं दुक्खनिरोधगामिनी पटिपदाति, भिक्खवे, जानतो पस्सतो आसवानं खयो होति। एवं खो , भिक्खवे, जानतो एवं पस्सतो आसवानं खयो होती’’ति। एतमत्थं भगवा अवोच। तत्थेतं इति वुच्चति –
‘‘Jānatohaṃ, bhikkhave, passato āsavānaṃ khayaṃ vadāmi , no ajānato no apassato. Kiñca, bhikkhave, jānato, kiṃ passato āsavānaṃ khayo hoti? Idaṃ dukkhanti, bhikkhave, jānato passato āsavānaṃ khayo hoti. Ayaṃ dukkhasamudayoti, bhikkhave, jānato passato āsavānaṃ khayo hoti. Ayaṃ dukkhanirodhoti, bhikkhave, jānato passato āsavānaṃ khayo hoti. Ayaṃ dukkhanirodhagāminī paṭipadāti, bhikkhave, jānato passato āsavānaṃ khayo hoti. Evaṃ kho , bhikkhave, jānato evaṃ passato āsavānaṃ khayo hotī’’ti. Etamatthaṃ bhagavā avoca. Tatthetaṃ iti vuccati –
‘‘सेखस्स सिक्खमानस्स, उजुमग्गानुसारिनो।
‘‘Sekhassa sikkhamānassa, ujumaggānusārino;
खयस्मिं पठमं ञाणं, ततो अञ्ञा अनन्तरा॥
Khayasmiṃ paṭhamaṃ ñāṇaṃ, tato aññā anantarā.
‘‘ततो अञ्ञा विमुत्तस्स, विमुत्तिञाणमुत्तमं।
‘‘Tato aññā vimuttassa, vimuttiñāṇamuttamaṃ;
उप्पज्जति खये ञाणं, खीणा संयोजना इति॥
Uppajjati khaye ñāṇaṃ, khīṇā saṃyojanā iti.
‘‘न त्वेविदं कुसीतेन, बालेनमविजानता।
‘‘Na tvevidaṃ kusītena, bālenamavijānatā;
निब्बानं अधिगन्तब्बं, सब्बगन्थप्पमोचन’’न्ति॥
Nibbānaṃ adhigantabbaṃ, sabbaganthappamocana’’nti.
अयम्पि अत्थो वुत्तो भगवता, इति मे सुतन्ति। ततियं।
Ayampi attho vutto bhagavatā, iti me sutanti. Tatiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ३. आसवक्खयसुत्तवण्णना • 3. Āsavakkhayasuttavaṇṇanā
