| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. ආසවසුත්‌තං
10. Āsavasuttaṃ
416. ‘‘තයොමෙ , භික්‌ඛවෙ ආසවා. කතමෙ තයො? කාමාසවො, භවාසවො, අවිජ්‌ජාසවො – ඉමෙ ඛො, භික්‌ඛවෙ, තයො ආසවා. ඉමෙසං ඛො, භික්‌ඛවෙ, තිණ්‌ණන්‌නං ආසවානං පහානාය චත්‌තාරො සතිපට්‌ඨානා භාවෙතබ්‌බා.
416. ‘‘Tayome , bhikkhave āsavā. Katame tayo? Kāmāsavo, bhavāsavo, avijjāsavo – ime kho, bhikkhave, tayo āsavā. Imesaṃ kho, bhikkhave, tiṇṇannaṃ āsavānaṃ pahānāya cattāro satipaṭṭhānā bhāvetabbā.
‘‘කතමෙ චත්‌තාරො? ඉධ, භික්‌ඛවෙ, භික්‌ඛු කායෙ කායානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං; වෙදනාසු…පෙ.… චිත්‌තෙ…පෙ.… ධම්‌මෙසු ධම්‌මානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. ඉමෙසං ඛො, භික්‌ඛවෙ, තිණ්‌ණන්‌නං ආසවානං පහානාය ඉමෙ චත්‌තාරො සතිපට්‌ඨානා භාවෙතබ්‌බා’’ති. දසමං.
‘‘Katame cattāro? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Imesaṃ kho, bhikkhave, tiṇṇannaṃ āsavānaṃ pahānāya ime cattāro satipaṭṭhānā bhāvetabbā’’ti. Dasamaṃ.
අමතවග්‌ගො පඤ්‌චමො.
Amatavaggo pañcamo.
තස්‌සුද්‌දානං –
Tassuddānaṃ –
අමතං සමුදයො මග්‌ගො, සති කුසලරාසි ච;
Amataṃ samudayo maggo, sati kusalarāsi ca;
පාතිමොක්‌ඛං දුච්‌චරිතං, මිත්‌තවෙදනා ආසවෙන චාති.
Pātimokkhaṃ duccaritaṃ, mittavedanā āsavena cāti.
