| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. ஆஸவஸுத்தவண்ணனா
4. Āsavasuttavaṇṇanā
58. சதுத்தே² ஸங்வரா பஹாதப்³பா³தி ஸங்வரேன பஹாதப்³பா³. ஸேஸேஸுபி ஏஸேவ நயோ. இதா⁴தி இமஸ்மிங் ஸாஸனே. படிஸங்கா²தி படிஸஞ்ஜானித்வா, பச்சவெக்கி²த்வாதி அத்தோ². யோனிஸோதி உபாயேன பதே²ன. எத்த² ச அஸங்வரே ஆதீ³னவபடிஸங்கா² யோனிஸோ படிஸங்கா²தி வேதி³தப்³பா³. ஸா சாயங் ‘‘வரங், பி⁴க்க²வே, தத்தாய அயோஸலாகாய ஆதி³த்தாய ஸம்பஜ்ஜலிதாய ஸஜோதிபூ⁴தாய சக்கு²ந்த்³ரியங் ஸம்பலிமட்ட²ங், ந த்வேவ சக்கு²விஞ்ஞெய்யேஸு ரூபேஸு அனுப்³யஞ்ஜனஸோ நிமித்தக்³கா³ஹோ’’திஆதி³னா ஆதி³த்தபரியாயேன (ஸங்॰ நி॰ 4.235) வேதி³தப்³பா³. சக்கு²ந்த்³ரியஸங்வரஸங்வுதோ விஹரதீதி எத்த² சக்கு²மேவ இந்த்³ரியங் சக்கு²ந்த்³ரியங், ஸங்வரணதோ ஸங்வரோ, பித³ஹனதோ த²கனதோதி வுத்தங் ஹோதி. ஸதியா ஏதங் அதி⁴வசனங். சக்கு²ந்த்³ரியே ஸங்வரோ சக்கு²ந்த்³ரியஸங்வரோ. ஜவனே உப்பஜ்ஜமானோபி ஹேஸ தஸ்மிங் த்³வாரே கிலேஸானங் உப்பத்திவாரணதோ சக்கு²ந்த்³ரியஸங்வரோதி வுச்சதி. ஸங்வுதோதி தேன ஸங்வரேன உபேதோ. ததா² ஹி ‘‘பாதிமொக்க²ஸங்வரஸங்வுதோ’’தி இமஸ்ஸ விப⁴ங்கே³ ‘‘இமினா பாதிமொக்க²ஸங்வரேன உபேதோ ஹோதி…பே॰… ஸமன்னாக³தோ’’தி வுத்தங். அத² வா ஸங்வரீதி ஸங்வுதோ, த²கேஸி பித³ஹீதி வுத்தங் ஹோதி. சக்கு²ந்த்³ரியஸங்வரஸங்வுதோதி சக்கு²ந்த்³ரியஸங்வரஸங்கா²தங் ஸதிகவாடங் சக்கு²த்³வாரே க⁴ரத்³வாரே கவாடங் விய ஸங்வரி த²கேஸி பித³ஹீதி வுத்தங் ஹோதி. அயமேவெத்த² அத்தோ² ஸுந்த³ரதரோ. ததா² ஹி ‘‘சக்கு²ந்த்³ரியஸங்வரங் அஸங்வுதஸ்ஸ விஹரதோ, ஸங்வுதஸ்ஸ விஹரதோ’’தி ஏதேஸு பதே³ஸு அயமேவத்தோ² தி³ஸ்ஸதீதி.
58. Catutthe saṃvarā pahātabbāti saṃvarena pahātabbā. Sesesupi eseva nayo. Idhāti imasmiṃ sāsane. Paṭisaṅkhāti paṭisañjānitvā, paccavekkhitvāti attho. Yonisoti upāyena pathena. Ettha ca asaṃvare ādīnavapaṭisaṅkhā yoniso paṭisaṅkhāti veditabbā. Sā cāyaṃ ‘‘varaṃ, bhikkhave, tattāya ayosalākāya ādittāya sampajjalitāya sajotibhūtāya cakkhundriyaṃ sampalimaṭṭhaṃ, na tveva cakkhuviññeyyesu rūpesu anubyañjanaso nimittaggāho’’tiādinā ādittapariyāyena (saṃ. ni. 4.235) veditabbā. Cakkhundriyasaṃvarasaṃvutoviharatīti ettha cakkhumeva indriyaṃ cakkhundriyaṃ, saṃvaraṇato saṃvaro, pidahanato thakanatoti vuttaṃ hoti. Satiyā etaṃ adhivacanaṃ. Cakkhundriye saṃvaro cakkhundriyasaṃvaro. Javane uppajjamānopi hesa tasmiṃ dvāre kilesānaṃ uppattivāraṇato cakkhundriyasaṃvaroti vuccati. Saṃvutoti tena saṃvarena upeto. Tathā hi ‘‘pātimokkhasaṃvarasaṃvuto’’ti imassa vibhaṅge ‘‘iminā pātimokkhasaṃvarena upeto hoti…pe… samannāgato’’ti vuttaṃ. Atha vā saṃvarīti saṃvuto, thakesi pidahīti vuttaṃ hoti. Cakkhundriyasaṃvarasaṃvutoti cakkhundriyasaṃvarasaṅkhātaṃ satikavāṭaṃ cakkhudvāre gharadvāre kavāṭaṃ viya saṃvari thakesi pidahīti vuttaṃ hoti. Ayamevettha attho sundarataro. Tathā hi ‘‘cakkhundriyasaṃvaraṃ asaṃvutassa viharato, saṃvutassa viharato’’ti etesu padesu ayamevattho dissatīti.
யங் ஹிஸ்ஸாதிஆதி³ம்ஹி யங் சக்கு²ந்த்³ரியஸங்வரங் அஸ்ஸ பி⁴க்கு²னோ அஸங்வுதஸ்ஸ அத²கெத்வா அபித³ஹித்வா விஹரந்தஸ்ஸாதி அத்தோ². யேகாரஸ்ஸ வா ஏஸ யந்தி ஆதே³ஸோ, யே அஸ்ஸாதி அத்தோ². ஆஸவா விகா⁴தபரிளாஹாதி சத்தாரோ ஆஸவா ச அஞ்ஞே ச விகா⁴தகரா கிலேஸபரிளாஹா விபாகபரிளாஹா வா. சக்கு²த்³வாரஸ்மிஞ்ஹி இட்டா²ரம்மணங் ஆபாத²க³தங் காமஸ்ஸாத³வஸேன அஸ்ஸாத³யதோ அபி⁴னந்த³தோ காமாஸவோ உப்பஜ்ஜதி, ‘‘ஈதி³ஸங் அஞ்ஞஸ்மிம்பி ஸுக³திப⁴வே லபி⁴ஸ்ஸாமீ’’தி ப⁴வபத்த²னாய அஸ்ஸாத³யதோ ப⁴வாஸவோ உப்பஜ்ஜதி, ஸத்தோதி வா ஸத்தஸ்ஸாதி வா க³ண்ஹதோ தி³ட்டா²ஸவோ உப்பஜ்ஜதி, ஸப்³பே³ஹேவ ஸஹஜாதங் அஞ்ஞாணங் அவிஜ்ஜாஸவோதி சத்தாரோ ஆஸவா உப்பஜ்ஜந்தி . ஏதேஹி ஸம்பயுத்தா அபரே கிலேஸா விகா⁴தபரிளாஹா ஆயதிங் வா தேஸங் விபாகா தேஹிபி அஸங்வுதஸ்ஸேவ விஹரதோ உப்பஜ்ஜெய்யுந்தி வுச்சந்தி. ஏவங்ஸ தேதி ஏவங் அஸ்ஸ தே, ஏதேனுபாயேன ந ஹொந்தி, நோ அஞ்ஞதா²தி வுத்தங் ஹோதி. படிஸங்கா² யோனிஸோ ஸோதிந்த்³ரியஸங்வரஸங்வுதோதிஆதீ³ஸுபி ஏஸேவ நயோ. இமே வுச்சந்தி ஆஸவா ஸங்வரா பஹாதப்³பா³தி இமேஸு ச²ஸு த்³வாரேஸு சத்தாரோ சத்தாரோ கத்வா சதுவீஸதி ஆஸவா ஸங்வரேன பஹாதப்³பா³தி வுச்சந்தி.
Yaṃ hissātiādimhi yaṃ cakkhundriyasaṃvaraṃ assa bhikkhuno asaṃvutassa athaketvā apidahitvā viharantassāti attho. Yekārassa vā esa yanti ādeso, ye assāti attho. Āsavā vighātapariḷāhāti cattāro āsavā ca aññe ca vighātakarā kilesapariḷāhā vipākapariḷāhā vā. Cakkhudvārasmiñhi iṭṭhārammaṇaṃ āpāthagataṃ kāmassādavasena assādayato abhinandato kāmāsavo uppajjati, ‘‘īdisaṃ aññasmimpi sugatibhave labhissāmī’’ti bhavapatthanāya assādayato bhavāsavo uppajjati, sattoti vā sattassāti vā gaṇhato diṭṭhāsavo uppajjati, sabbeheva sahajātaṃ aññāṇaṃ avijjāsavoti cattāro āsavā uppajjanti . Etehi sampayuttā apare kilesā vighātapariḷāhā āyatiṃ vā tesaṃ vipākā tehipi asaṃvutasseva viharato uppajjeyyunti vuccanti. Evaṃsateti evaṃ assa te, etenupāyena na honti, no aññathāti vuttaṃ hoti. Paṭisaṅkhā yoniso sotindriyasaṃvarasaṃvutotiādīsupi eseva nayo. Ime vuccanti āsavā saṃvarā pahātabbāti imesu chasu dvāresu cattāro cattāro katvā catuvīsati āsavā saṃvarena pahātabbāti vuccanti.
படிஸங்கா² யோனிஸோ சீவரந்திஆதீ³ஸு யங் வத்தப்³ப³ங், தங் ஸப்³ப³ங் விஸுத்³தி⁴மக்³கே³ (விஸுத்³தி⁴॰ 1.18) ஸீலகதா²ய வுத்தமேவ. யங் ஹிஸ்ஸாதி யஞ்ஹி சீவரங் பிண்ட³பாதாதீ³ஸு வா அஞ்ஞதரங் அஸ்ஸ. அப்படிஸேவதோதி ஏவங் யோனிஸோ அப்படிஸேவந்தஸ்ஸ. இமஸ்மிங் வாரே அலத்³த⁴ங் சீவராதி³ங் பத்த²யதோ லத்³த⁴ங் வா அஸ்ஸாத³யதோ காமாஸவஸ்ஸ உப்பத்தி வேதி³தப்³பா³, ஈதி³ஸங் அஞ்ஞஸ்மிம்பி ஸுக³திப⁴வே லபி⁴ஸ்ஸாமீதி ப⁴வபத்த²னாய அஸ்ஸாத³யதோ ப⁴வாஸவஸ்ஸ, அஹங் லபா⁴மி ந லபா⁴மீதி வா மய்ஹங் வா இத³ந்தி அத்தஸஞ்ஞங் அதி⁴ட்ட²ஹதோ தி³ட்டா²ஸவஸ்ஸ, ஸப்³பே³ஹேவ பன ஸஹஜாதோ அவிஜ்ஜாஸவோதி ஏவங் சதுன்னங் ஆஸவானங் உப்பத்தி விகா⁴தபரிளாஹாவ நவவேத³னுப்பாத³னதோபி வேதி³தப்³பா³. இமே வுச்சந்தி, பி⁴க்க²வே, ஆஸவா படிஸேவனா பஹாதப்³பா³தி இமே ஏகமேகஸ்மிங் பச்சயே சத்தாரோ சத்தாரோ கத்வா ஸோளஸ ஆஸவா இமினா ஞாணஸங்வரஸங்கா²தேன பச்சவெக்க²ணபடிஸேவனேன பஹாதப்³பா³தி வுச்சந்தி.
Paṭisaṅkhā yoniso cīvarantiādīsu yaṃ vattabbaṃ, taṃ sabbaṃ visuddhimagge (visuddhi. 1.18) sīlakathāya vuttameva. Yaṃ hissāti yañhi cīvaraṃ piṇḍapātādīsu vā aññataraṃ assa. Appaṭisevatoti evaṃ yoniso appaṭisevantassa. Imasmiṃ vāre aladdhaṃ cīvarādiṃ patthayato laddhaṃ vā assādayato kāmāsavassa uppatti veditabbā, īdisaṃ aññasmimpi sugatibhave labhissāmīti bhavapatthanāya assādayato bhavāsavassa, ahaṃ labhāmi na labhāmīti vā mayhaṃ vā idanti attasaññaṃ adhiṭṭhahato diṭṭhāsavassa, sabbeheva pana sahajāto avijjāsavoti evaṃ catunnaṃ āsavānaṃ uppatti vighātapariḷāhāva navavedanuppādanatopi veditabbā. Ime vuccanti, bhikkhave, āsavā paṭisevanā pahātabbāti ime ekamekasmiṃ paccaye cattāro cattāro katvā soḷasa āsavā iminā ñāṇasaṃvarasaṅkhātena paccavekkhaṇapaṭisevanena pahātabbāti vuccanti.
படிஸங்கா² யோனிஸோ க²மோ ஹோதி ஸீதஸ்ஸாதி உபாயேன பதே²ன பச்சவெக்கி²த்வா க²ந்தா ஹோதி ஸீதஸ்ஸ, ஸீதங் க²மதி ஸஹதி, ந அவீரபுரிஸோ விய அப்பமத்தகேனபி ஸீதேன சலதி கம்பதி கம்மட்டா²னங் விஜஹதி. உண்ஹாதீ³ஸுபி ஏஸேவ நயோ. எத்த² ச வசனமேவ வசனபதோ²தி வேதி³தப்³போ³. து³க்கா²னந்திஆதீ³ஸு து³க்க²மனட்டே²ன து³க்கா², ப³ஹலட்டே²ன திப்³பா³, ப²ருஸட்டே²ன க²ரா, திகி²ணட்டே²ன கடுகா, அஸ்ஸாத³விரஹதோ அஸாதா, மனங் அவட்³ட⁴னதோ அமனாபா, பாணஹரணஸமத்த²தாய பாணஹராதி வேதி³தப்³பா³. யங் ஹிஸ்ஸாதி ஸீதாதீ³ஸு யங்கிஞ்சி ஏகத⁴ம்மம்பி அஸ்ஸ. அனதி⁴வாஸதோதி அனதி⁴வாஸெந்தஸ்ஸ அக்க²மந்தஸ்ஸ . ஆஸவுப்பத்தி பனெத்த² ஏவங் வேதி³தப்³பா³ – ஸீதேன பு²ட்ட²ஸ்ஸ உண்ஹங் பத்த²யதோ காமாஸவோ உப்பஜ்ஜதி, ஏவங் ஸப்³ப³த்த². ‘‘நத்தி² ஸுக³திப⁴வே ஸீதங் வா உண்ஹங் வா’’தி ப⁴வங் பத்தெ²ந்தஸ்ஸ ப⁴வாஸவோ, மய்ஹங் ஸீதங் உண்ஹந்தி கா³ஹோ தி³ட்டா²ஸவோ, ஸப்³பே³ஹேவ ஸம்பயுத்தோ அவிஜ்ஜாஸவோதி. இமே வுச்சந்தீதி இமே ஸீதாதீ³ஸு ஏகமேகஸ்ஸ வஸேன சத்தாரோ சத்தாரோ கத்வா அனேகே ஆஸவா இமாய க²ந்திஸங்வரஸங்கா²தாய அதி⁴வாஸனாய பஹாதப்³பா³தி வுச்சந்தீதி அத்தோ².
Paṭisaṅkhā yoniso khamo hoti sītassāti upāyena pathena paccavekkhitvā khantā hoti sītassa, sītaṃ khamati sahati, na avīrapuriso viya appamattakenapi sītena calati kampati kammaṭṭhānaṃ vijahati. Uṇhādīsupi eseva nayo. Ettha ca vacanameva vacanapathoti veditabbo. Dukkhānantiādīsu dukkhamanaṭṭhena dukkhā, bahalaṭṭhena tibbā, pharusaṭṭhena kharā, tikhiṇaṭṭhena kaṭukā, assādavirahato asātā, manaṃ avaḍḍhanato amanāpā, pāṇaharaṇasamatthatāya pāṇaharāti veditabbā. Yaṃ hissāti sītādīsu yaṃkiñci ekadhammampi assa. Anadhivāsatoti anadhivāsentassa akkhamantassa . Āsavuppatti panettha evaṃ veditabbā – sītena phuṭṭhassa uṇhaṃ patthayato kāmāsavo uppajjati, evaṃ sabbattha. ‘‘Natthi sugatibhave sītaṃ vā uṇhaṃ vā’’ti bhavaṃ patthentassa bhavāsavo, mayhaṃ sītaṃ uṇhanti gāho diṭṭhāsavo, sabbeheva sampayutto avijjāsavoti. Ime vuccantīti ime sītādīsu ekamekassa vasena cattāro cattāro katvā aneke āsavā imāya khantisaṃvarasaṅkhātāya adhivāsanāya pahātabbāti vuccantīti attho.
படிஸங்கா² யோனிஸோ சண்ட³ங் ஹத்தி²ங் பரிவஜ்ஜேதீதி அஹங் ஸமணோதி ந சண்ட³ஸ்ஸ ஹத்தி²ஸ்ஸ ஆஸன்னே டா²தப்³ப³ங். ததோனிதா³னஞ்ஹி மரணம்பி மரணமத்தம்பி து³க்க²ங் ப⁴வெய்யாதி ஏவங் உபாயேன பதே²ன பச்சவெக்கி²த்வா சண்ட³ங் ஹத்தி²ங் பரிவஜ்ஜேதி படிக்கமதி. ஏஸ நயோ ஸப்³ப³த்த². சண்ட³ந்தி து³ட்ட²ங் வாளங். கா²ணுந்தி க²தி³ரகா²ணுகாதி³ங். கண்டகட்டா²னந்தி யத்த² கண்டகா விஜ்ஜ²ந்தி, தங் ஓகாஸங். ஸொப்³ப⁴ந்தி ஸப்³ப³தோ சி²ன்னதடங். பபாதந்தி ஏகதோ சி²ன்னதடங். சந்த³னிகந்தி உச்சி²ட்டோ²த³கக³ப்³ப⁴மலாதீ³னங் ச²ட்³ட³னட்டா²னங். ஓளிக³ல்லந்தி தேஸங்யேவ கத்³த³மாதீ³னங் ஸந்த³னோகாஸங். தங் ஜண்ணுமத்தம்பி அஸுசிப⁴ரிதங் ஹோதி. த்³வேபி சேதானி டா²னானி அமனுஸ்ஸுஸ்ஸத³ட்டா²னானி ஹொந்தி, தஸ்மா வஜ்ஜேதப்³பா³னி. அனாஸனேதி எத்த² அயுத்தங் ஆஸனங் அனாஸனங், தங் அத்த²தோ அனியதவத்து²பூ⁴தங் ரஹோபடிச்ச²ன்னாஸனந்தி வேதி³தப்³ப³ங். அகோ³சரேதி எத்த²பி அயுத்தோ கோ³சரோ அகோ³சரோ. ஸோ வேஸியாதி³பே⁴த³தோ பஞ்சவிதோ⁴. பாபகே மித்தேதி லாமகே து³ஸ்ஸீலே மித்தபதிரூபகே அமித்தே. பாபகேஸூதி லாமகேஸு. ஓகப்பெய்யுந்தி ஸத்³த³ஹெய்யுங் அதி⁴முச்செய்யுங் ‘‘அத்³தா⁴ அயமாயஸ்மா அகாஸி வா கரிஸ்ஸதி வா’’தி. யங் ஹிஸ்ஸாதி ஹத்தி²ஆதீ³ஸு யங்கிஞ்சி ஏகம்பி அஸ்ஸ. ஆஸவுப்பத்தி பனெத்த² ஏவங் வேதி³தப்³பா³ – ஹத்தி²ஆதி³னிதா³னேன து³க்கே²ன பு²ட்ட²ஸ்ஸ ஸுக²ங் பத்த²யதோ காமாஸவோ உப்பஜ்ஜதி, ‘‘நத்தி² ஸுக³திப⁴வே ஈதி³ஸங் து³க்க²’’ந்தி ப⁴வங் பத்தெ²ந்தஸ்ஸ ப⁴வாஸவோ, மங் ஹத்தீ² மத்³த³தி மங் அஸ்ஸோதி கா³ஹோ தி³ட்டா²ஸவோ, ஸப்³பே³ஹேவ ஸம்பயுத்தோ அவிஜ்ஜாஸவோதி. இமே வுச்சந்தீதி இமே ஹத்தி²ஆதீ³ஸு ஏகேகஸ்ஸ வஸேன சத்தாரோ சத்தாரோ கத்வா அனேகே ஆஸவா இமினா ஸீலஸங்வரஸங்கா²தேன பரிவஜ்ஜனேன பஹாதப்³பா³தி வுச்சந்தி.
Paṭisaṅkhā yoniso caṇḍaṃ hatthiṃ parivajjetīti ahaṃ samaṇoti na caṇḍassa hatthissa āsanne ṭhātabbaṃ. Tatonidānañhi maraṇampi maraṇamattampi dukkhaṃ bhaveyyāti evaṃ upāyena pathena paccavekkhitvā caṇḍaṃ hatthiṃ parivajjeti paṭikkamati. Esa nayo sabbattha. Caṇḍanti duṭṭhaṃ vāḷaṃ. Khāṇunti khadirakhāṇukādiṃ. Kaṇṭakaṭṭhānanti yattha kaṇṭakā vijjhanti, taṃ okāsaṃ. Sobbhanti sabbato chinnataṭaṃ. Papātanti ekato chinnataṭaṃ. Candanikanti ucchiṭṭhodakagabbhamalādīnaṃ chaḍḍanaṭṭhānaṃ. Oḷigallanti tesaṃyeva kaddamādīnaṃ sandanokāsaṃ. Taṃ jaṇṇumattampi asucibharitaṃ hoti. Dvepi cetāni ṭhānāni amanussussadaṭṭhānāni honti, tasmā vajjetabbāni. Anāsaneti ettha ayuttaṃ āsanaṃ anāsanaṃ, taṃ atthato aniyatavatthubhūtaṃ rahopaṭicchannāsananti veditabbaṃ. Agocareti etthapi ayutto gocaro agocaro. So vesiyādibhedato pañcavidho. Pāpake mitteti lāmake dussīle mittapatirūpake amitte. Pāpakesūti lāmakesu. Okappeyyunti saddaheyyuṃ adhimucceyyuṃ ‘‘addhā ayamāyasmā akāsi vā karissati vā’’ti. Yaṃ hissāti hatthiādīsu yaṃkiñci ekampi assa. Āsavuppatti panettha evaṃ veditabbā – hatthiādinidānena dukkhena phuṭṭhassa sukhaṃ patthayato kāmāsavo uppajjati, ‘‘natthi sugatibhave īdisaṃ dukkha’’nti bhavaṃ patthentassa bhavāsavo, maṃ hatthī maddati maṃ assoti gāho diṭṭhāsavo, sabbeheva sampayutto avijjāsavoti. Ime vuccantīti ime hatthiādīsu ekekassa vasena cattāro cattāro katvā aneke āsavā iminā sīlasaṃvarasaṅkhātena parivajjanena pahātabbāti vuccanti.
படிஸங்கா² யோனிஸோ உப்பன்னங் காமவிதக்கங் நாதி⁴வாஸேதீதி ‘‘இதிபாயங் விதக்கோ அகுஸலோ, இதிபி ஸாவஜ்ஜோ, இதிபி து³க்க²விபாகோ, ஸோ ச கோ² அத்தப்³யாபா³தா⁴ய ஸங்வத்ததீ’’திஆதி³னா (ம॰ நி॰ 1.207-208) நயேன யோனிஸோ காமவிதக்கே ஆதீ³னவங் பச்சவெக்கி²த்வா தஸ்மிங் தஸ்மிங் ஆரம்மணே உப்பன்னங் காமவிதக்கங் நாதி⁴வாஸேதி, சித்தங் ஆரோபெத்வா ந வாஸேதி, அப்³ப⁴ந்தரே வா ந வாஸேதீதி அத்தோ². அனதி⁴வாஸெந்தோ கிங் கரோதீதி? பஜஹதி. கிங் கசவரங் விய பிடகேனாதி? ந ஹி, அபி ச கோ² நங் வினோதே³தி துத³தி விஜ்ஜ²தி நீஹரதி. கிங் ப³லிப³த்³த³ங் விய பதோதே³னாதி? ந ஹி, அத² கோ² நங் ப்³யந்தீகரோதி விக³தந்தங் கரோதி, யதா²ஸ்ஸ அந்தோபி நாவஸிஸ்ஸதி அந்தமஸோ ப⁴ங்க³மத்தம்பி, ததா² நங் கரோதி. கத²ங் பன நங் ததா² கரோதீதி? அனபா⁴வங் க³மேதி அனு அனு அபா⁴வங் க³மேதி, விக்க²ம்ப⁴னப்பஹானேன யதா² ஸுவிக்க²ம்பி⁴தோ ஹோதி, ததா² கரோதி. ஸேஸவிதக்கத்³வயேபி ஏஸேவ நயோ. உப்பன்னுப்பன்னேதி உப்பன்னே உப்பன்னே, உப்பன்னமத்தேயேவாதி வுத்தங் ஹோதி. ஸகிங் வா உப்பன்னே வினோதெ³த்வா து³தியே வாரே அஜ்ஜு²பெக்கி²தா ந ஹோதி, ஸதக்க²த்தும்பி உப்பன்னே உப்பன்னே வினோதே³தியேவ. பாபகே அகுஸலே த⁴ம்மேதி தேயேவ காமவிதக்காத³யோ, ஸப்³பே³பி வா நவ மஹாவிதக்கே. தத்த² தயோ வுத்தா, அவஸேஸா ‘‘ஞாதிவிதக்கோ, ஜனபத³விதக்கோ, அமராவிதக்கோ, பரானுத்³த³யதாபடிஸங்யுத்தோ விதக்கோ, லாப⁴ஸக்காரஸிலோகப்படிஸங்யுத்தோ விதக்கோ, அனவஞ்ஞத்திப்படிஸங்யுத்தோ விதக்கோ’’தி (மஹானி॰ 207) இமே ச². யங் ஹிஸ்ஸாதி ஏதேஸு விதக்கேஸு யங்கிஞ்சி அஸ்ஸ. காமவிதக்கோ பனெத்த² காமாஸவோ ஏவ, தப்³பி³ஸேஸோ ப⁴வாஸவோ, தங்ஸம்பயுத்தோ தி³ட்டா²ஸவோ, ஸப்³ப³விதக்கேஸு அவிஜ்ஜா அவிஜ்ஜாஸவோதி ஏவங் ஆஸவுப்பத்தி வேதி³தப்³பா³. இமே வுச்சந்தீதி இமே காமவிதக்காதி³வஸேன வுத்தப்பகாரா ஆஸவா இமினா தஸ்மிங் தஸ்மிங் விதக்கே ஆதீ³னவபச்சவெக்க²ணஸஹிதேன வீரியஸங்வரஸங்கா²தேன வினோத³னேன பஹாதப்³பா³தி வுச்சந்தி.
Paṭisaṅkhāyoniso uppannaṃ kāmavitakkaṃ nādhivāsetīti ‘‘itipāyaṃ vitakko akusalo, itipi sāvajjo, itipi dukkhavipāko, so ca kho attabyābādhāya saṃvattatī’’tiādinā (ma. ni. 1.207-208) nayena yoniso kāmavitakke ādīnavaṃ paccavekkhitvā tasmiṃ tasmiṃ ārammaṇe uppannaṃ kāmavitakkaṃ nādhivāseti, cittaṃ āropetvā na vāseti, abbhantare vā na vāsetīti attho. Anadhivāsento kiṃ karotīti? Pajahati. Kiṃ kacavaraṃ viya piṭakenāti? Na hi, api ca kho naṃ vinodeti tudati vijjhati nīharati. Kiṃ balibaddaṃ viya patodenāti? Na hi, atha kho naṃ byantīkaroti vigatantaṃ karoti, yathāssa antopi nāvasissati antamaso bhaṅgamattampi, tathā naṃ karoti. Kathaṃ pana naṃ tathā karotīti? Anabhāvaṃ gameti anu anu abhāvaṃ gameti, vikkhambhanappahānena yathā suvikkhambhito hoti, tathā karoti. Sesavitakkadvayepi eseva nayo. Uppannuppanneti uppanne uppanne, uppannamatteyevāti vuttaṃ hoti. Sakiṃ vā uppanne vinodetvā dutiye vāre ajjhupekkhitā na hoti, satakkhattumpi uppanne uppanne vinodetiyeva. Pāpake akusale dhammeti teyeva kāmavitakkādayo, sabbepi vā nava mahāvitakke. Tattha tayo vuttā, avasesā ‘‘ñātivitakko, janapadavitakko, amarāvitakko, parānuddayatāpaṭisaṃyutto vitakko, lābhasakkārasilokappaṭisaṃyutto vitakko, anavaññattippaṭisaṃyutto vitakko’’ti (mahāni. 207) ime cha. Yaṃ hissāti etesu vitakkesu yaṃkiñci assa. Kāmavitakko panettha kāmāsavo eva, tabbiseso bhavāsavo, taṃsampayutto diṭṭhāsavo, sabbavitakkesu avijjā avijjāsavoti evaṃ āsavuppatti veditabbā. Imevuccantīti ime kāmavitakkādivasena vuttappakārā āsavā iminā tasmiṃ tasmiṃ vitakke ādīnavapaccavekkhaṇasahitena vīriyasaṃvarasaṅkhātena vinodanena pahātabbāti vuccanti.
படிஸங்கா² யோனிஸோ ஸதிஸம்பொ³ஜ்ஜ²ங்க³ங் பா⁴வேதீதி அபா⁴வனாய ஆதீ³னவங் பா⁴வனாய ச ஆனிஸங்ஸங் உபாயேன பதே²ன பச்சவெக்கி²த்வா ஸதிஸம்பொ³ஜ்ஜ²ங்க³ங் பா⁴வேதி. ஏஸேவ நயோ ஸப்³ப³த்த². பொ³ஜ்ஜ²ங்கா³னங் பா⁴வனா ஹெட்டா² வித்தா²ரிதாவ. யங் ஹிஸ்ஸாதி ஏதேஸு பொ³ஜ்ஜ²ங்கே³ஸு யங்கிஞ்சி அஸ்ஸ. ஆஸவுப்பத்தியங் பனெத்த² இமேஸங் அரியமக்³க³ஸம்பயுத்தானங் பொ³ஜ்ஜ²ங்கா³னங் அபா⁴விதத்தா யே உப்பஜ்ஜெய்யுங் காமாஸவாத³யோ ஆஸவா, பா⁴வயதோ ஏவங்ஸ தே ந ஹொந்தீதி அயங் நயோ வேதி³தப்³போ³. இமே வுச்சந்தீதி இமே காமாஸவாத³யோ ஆஸவா இமாய லோகுத்தராய பொ³ஜ்ஜ²ங்க³பா⁴வனாய பஹாதப்³பா³தி வுச்சந்தி. இமேஹி ச²ஹாகாரேஹி பஹீனாஸவங் பி⁴க்கு²ங் தோ²மெந்தோ யதோ கோ², பி⁴க்க²வேதிஆதி³மாஹ. தத்த² யதோதி ஸாமிவசனே தோ-காரோ, யஸ்ஸாதி வுத்தங் ஹோதி. போராணா பன யம்ஹி காலேதி வண்ணயந்தி. யே ஆஸவா ஸங்வரா பஹாதப்³பா³, தே ஸங்வரா பஹீனா ஹொந்தீதி யே ஆஸவா ஸங்வரேன பஹாதப்³பா³, தே ஸங்வரேனேவ பஹீனா ஹொந்தி, ந அப்பஹீனேஸுயேவ பஹீனஸஞ்ஞீ ஹோதீதி.
Paṭisaṅkhā yoniso satisambojjhaṅgaṃ bhāvetīti abhāvanāya ādīnavaṃ bhāvanāya ca ānisaṃsaṃ upāyena pathena paccavekkhitvā satisambojjhaṅgaṃ bhāveti. Eseva nayo sabbattha. Bojjhaṅgānaṃ bhāvanā heṭṭhā vitthāritāva. Yaṃ hissāti etesu bojjhaṅgesu yaṃkiñci assa. Āsavuppattiyaṃ panettha imesaṃ ariyamaggasampayuttānaṃ bojjhaṅgānaṃ abhāvitattā ye uppajjeyyuṃ kāmāsavādayo āsavā, bhāvayato evaṃsa te na hontīti ayaṃ nayo veditabbo. Ime vuccantīti ime kāmāsavādayo āsavā imāya lokuttarāya bojjhaṅgabhāvanāya pahātabbāti vuccanti. Imehi chahākārehi pahīnāsavaṃ bhikkhuṃ thomento yato kho, bhikkhavetiādimāha. Tattha yatoti sāmivacane to-kāro, yassāti vuttaṃ hoti. Porāṇā pana yamhi kāleti vaṇṇayanti. Ye āsavā saṃvarā pahātabbā, te saṃvarā pahīnā hontīti ye āsavā saṃvarena pahātabbā, te saṃvareneva pahīnā honti, na appahīnesuyeva pahīnasaññī hotīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. ஆஸவஸுத்தங் • 4. Āsavasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. ஆஸவஸுத்தவண்ணனா • 4. Āsavasuttavaṇṇanā
