| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. ஆஸவஸுத்தவண்ணனா
4. Āsavasuttavaṇṇanā
58. சதுத்தே² ஸங்வரேனாதி ஸங்வரேன ஹேதுபூ⁴தேன வா. இதா⁴தி அயங் இத⁴-ஸத்³தோ³ ஸப்³பா³காரதோ இந்தி³யஸங்வரஸங்வுதஸ்ஸ புக்³க³லஸ்ஸ ஸன்னிஸ்ஸயபூ⁴தஸாஸனபரிதீ³பனோ, அஞ்ஞஸ்ஸ ததா²பா⁴வப்படிஸேத⁴னோ வாதி வுத்தங் ‘‘இதா⁴தி இத⁴ஸ்மிங் ஸாஸனே’’தி. படிஸங்கா²தி படிஸங்கா²ய. ஸங்கா²-ஸத்³தோ³ ஞாணகொட்டா²ஸபஞ்ஞத்திக³ணனாதீ³ஸு தி³ஸ்ஸதி ‘‘ஸங்கா²யேகங் படிஸேவதீ’’திஆதீ³ஸு (ம॰ நி॰ 2.168) ஹி ஞாணே தி³ஸ்ஸதி. ‘‘பபஞ்சஸஞ்ஞாஸங்கா² ஸமுதா³சரந்தீ’’திஆதீ³ஸு (ம॰ நி॰ 1.202, 204) கொட்டா²ஸே. ‘‘தேஸங் தேஸங் த⁴ம்மானங் ஸங்கா² ஸமஞ்ஞா’’திஆதீ³ஸு (த⁴॰ ஸ॰ 1313-1315) பஞ்ஞத்தியங். ‘‘ந ஸுகரங் ஸங்கா²து’’ந்திஆதீ³ஸு (ஸங்॰ நி॰ 2.128) க³ணனாய. இத⁴ பன ஞாணே த³ட்ட²ப்³போ³. தேனேவாஹ ‘‘படிஸஞ்ஜானித்வா பச்சவெக்கி²த்வாதி அத்தோ²’’தி. ஆதீ³னவபச்சவெக்க²ணா ஆதீ³னவபடிஸங்கா²தி யோஜனா. ஸம்பலிமட்ட²ந்தி க⁴ங்ஸிதங். அனுப்³யஞ்ஜனஸோதி ஹத்த²பாத³ஸிதஆலோகிதவிலோகிதாதி³ப்பகாரபா⁴க³ஸோ. தஞ்ஹி அயோனிஸோமனஸிகரோதோ கிலேஸானங் அனுப்³யஞ்ஜனதோ ‘‘அனுப்³யஞ்ஜன’’ந்தி வுச்சதி. நிமித்தக்³கா³ஹோதி இத்தி²புரிஸனிமித்தஸ்ஸ ஸுப⁴னிமித்தாதி³கஸ்ஸ வா கிலேஸவத்து²பூ⁴தஸ்ஸ நிமித்தஸ்ஸ கா³ஹோ. ஆதி³த்தபரியாயேனாதி ஆதி³த்தபரியாயே (ஸங்॰ நி॰ 4.28; மஹாவ॰ 54) ஆக³தனயேன வேதி³தப்³போ³.
58. Catutthe saṃvarenāti saṃvarena hetubhūtena vā. Idhāti ayaṃ idha-saddo sabbākārato indiyasaṃvarasaṃvutassa puggalassa sannissayabhūtasāsanaparidīpano, aññassa tathābhāvappaṭisedhano vāti vuttaṃ ‘‘idhāti idhasmiṃ sāsane’’ti. Paṭisaṅkhāti paṭisaṅkhāya. Saṅkhā-saddo ñāṇakoṭṭhāsapaññattigaṇanādīsu dissati ‘‘saṅkhāyekaṃ paṭisevatī’’tiādīsu (ma. ni. 2.168) hi ñāṇe dissati. ‘‘Papañcasaññāsaṅkhā samudācarantī’’tiādīsu (ma. ni. 1.202, 204) koṭṭhāse. ‘‘Tesaṃ tesaṃ dhammānaṃ saṅkhā samaññā’’tiādīsu (dha. sa. 1313-1315) paññattiyaṃ. ‘‘Na sukaraṃ saṅkhātu’’ntiādīsu (saṃ. ni. 2.128) gaṇanāya. Idha pana ñāṇe daṭṭhabbo. Tenevāha ‘‘paṭisañjānitvā paccavekkhitvāti attho’’ti. Ādīnavapaccavekkhaṇā ādīnavapaṭisaṅkhāti yojanā. Sampalimaṭṭhanti ghaṃsitaṃ. Anubyañjanasoti hatthapādasitaālokitavilokitādippakārabhāgaso. Tañhi ayonisomanasikaroto kilesānaṃ anubyañjanato ‘‘anubyañjana’’nti vuccati. Nimittaggāhoti itthipurisanimittassa subhanimittādikassa vā kilesavatthubhūtassa nimittassa gāho. Ādittapariyāyenāti ādittapariyāye (saṃ. ni. 4.28; mahāva. 54) āgatanayena veditabbo.
யதா² இத்தி²யா இந்த்³ரியங் இத்தி²ந்த்³ரியங், ந ஏவமித³ங், இத³ங் பன சக்கு²மேவ இந்த்³ரியந்தி சக்கு²ந்த்³ரியங். தேனாஹ ‘‘சக்கு²மேவ இந்த்³ரிய’’ந்தி. யதா² ஆவாடே நியதட்டி²திகோ கச்ச²போ ‘‘ஆவாடகச்ச²போ’’தி வுச்சதி, ஏவங் தப்படிப³த்³த⁴வுத்திதாய தங் டா²னோ ஸங்வரோ சக்கு²ந்த்³ரியஸங்வரோ. தேனாஹ ‘‘சக்கு²ந்த்³ரியே ஸங்வரோ சக்கு²ந்த்³ரியஸங்வரோ’’தி. நனு ச சக்கு²ந்த்³ரியே ஸங்வரோ வா அஸங்வரோ வா நத்தி². ந ஹி சக்கு²பஸாத³ங் நிஸ்ஸாய ஸதி வா முட்ட²ஸ்ஸச்சங் வா உப்பஜ்ஜதி. அபிச யதா³ ரூபாரம்மணங் சக்கு²ஸ்ஸ ஆபாத²ங் ஆக³ச்ச²தி, ததா³ ப⁴வங்கே³ த்³விக்க²த்துங் உப்பஜ்ஜித்வா நிருத்³தே⁴ கிரியமனோதா⁴து ஆவஜ்ஜனகிச்சங் ஸாத⁴யமானா உப்பஜ்ஜித்வா நிருஜ்ஜ²தி. ததோ சக்கு²விஞ்ஞாணங் த³ஸ்ஸனகிச்சங், ததோ விபாகமனோதா⁴து ஸம்படிச்ச²னகிச்சங், ததோ விபாகமனோவிஞ்ஞாணதா⁴து ஸந்தீரணகிச்சங், ததோ கிரியாஹேதுகமனோவிஞ்ஞாணதா⁴து வொட்ட²ப்³ப³னகிச்சங் ஸாத⁴யமானா உப்பஜ்ஜித்வா நிருஜ்ஜ²தி , தத³னந்தரங் ஜவனங் ஜவதி. தத்தா²பி நேவ ப⁴வங்க³ஸமயே, ந ஆவஜ்ஜனாதீ³னங் அஞ்ஞதரஸமயே ச ஸங்வரோ வா அஸங்வரோ வா அத்தி². ஜவனக்க²ணே பன ஸசே து³ஸ்ஸீல்யங் வா முட்ட²ஸ்ஸச்சங் வா அஞ்ஞாணங் வா அக்க²ந்தி வா கோஸஜ்ஜங் வா உப்பஜ்ஜதி, அஸங்வரோ ஹோதி. தஸ்மிங் பன ஸீலாதீ³ஸு உப்பன்னேஸு ஸங்வரோ ஹோதி, தஸ்மா ‘‘சக்கு²ந்த்³ரியே ஸங்வரோ’’தி கஸ்மா வுத்தந்தி ஆஹ ‘‘ஜவனே உப்பஜ்ஜமானோபி ஹேஸ…பே॰… சக்கு²ந்த்³ரியஸங்வரோதி வுச்சதீ’’தி.
Yathā itthiyā indriyaṃ itthindriyaṃ, na evamidaṃ, idaṃ pana cakkhumeva indriyanti cakkhundriyaṃ. Tenāha ‘‘cakkhumeva indriya’’nti. Yathā āvāṭe niyataṭṭhitiko kacchapo ‘‘āvāṭakacchapo’’ti vuccati, evaṃ tappaṭibaddhavuttitāya taṃ ṭhāno saṃvaro cakkhundriyasaṃvaro. Tenāha ‘‘cakkhundriye saṃvaro cakkhundriyasaṃvaro’’ti. Nanu ca cakkhundriye saṃvaro vā asaṃvaro vā natthi. Na hi cakkhupasādaṃ nissāya sati vā muṭṭhassaccaṃ vā uppajjati. Apica yadā rūpārammaṇaṃ cakkhussa āpāthaṃ āgacchati, tadā bhavaṅge dvikkhattuṃ uppajjitvā niruddhe kiriyamanodhātu āvajjanakiccaṃ sādhayamānā uppajjitvā nirujjhati. Tato cakkhuviññāṇaṃ dassanakiccaṃ, tato vipākamanodhātu sampaṭicchanakiccaṃ, tato vipākamanoviññāṇadhātu santīraṇakiccaṃ, tato kiriyāhetukamanoviññāṇadhātu voṭṭhabbanakiccaṃ sādhayamānā uppajjitvā nirujjhati , tadanantaraṃ javanaṃ javati. Tatthāpi neva bhavaṅgasamaye, na āvajjanādīnaṃ aññatarasamaye ca saṃvaro vā asaṃvaro vā atthi. Javanakkhaṇe pana sace dussīlyaṃ vā muṭṭhassaccaṃ vā aññāṇaṃ vā akkhanti vā kosajjaṃ vā uppajjati, asaṃvaro hoti. Tasmiṃ pana sīlādīsu uppannesu saṃvaro hoti, tasmā ‘‘cakkhundriye saṃvaro’’ti kasmā vuttanti āha ‘‘javane uppajjamānopi hesa…pe… cakkhundriyasaṃvaroti vuccatī’’ti.
இத³ங் வுத்தங் ஹோதி – யதா² நக³ரே சதூஸு த்³வாரேஸு அஸங்வுதேஸு கிஞ்சாபி அந்தோக⁴ரத்³வாரகொட்ட²கக³ப்³பா⁴த³யோ ஸுஸங்வுதா, ததா²பி அந்தோனக³ரே ஸப்³ப³ங் ப⁴ண்ட³ங் அரக்கி²தங் அகோ³பிதமேவ ஹோதி. நக³ரத்³வாரேன ஹி பவிஸித்வா சோரா யதி³ச்ச²கங் கரெய்யுங், ஏவமேவங் ஜவனே து³ஸ்ஸீல்யாதீ³ஸு உப்பன்னேஸு தஸ்மிங் அஸங்வரே ஸதி த்³வாரம்பி அகு³த்தங் ஹோதி ப⁴வங்க³ம்பி ஆவஜ்ஜனாதீ³னி வீதி²சித்தானிபி. யதா² பன நக³ரத்³வாரேஸு ஸங்வுதேஸு கிஞ்சாபி அந்தோக⁴ராத³யோ அஸங்வுதா, ததா²பி அந்தோனக³ரே ஸப்³ப³ங் ப⁴ண்ட³ங் ஸுரக்கி²தங் ஸுகோ³பிதமேவ ஹோதி. நக³ரத்³வாரேஸு ஹி பிஹிதேஸு சோரானங் பவேஸோ நத்தி², ஏவமேவங் ஜவனே ஸீலாதீ³ஸு உப்பன்னேஸு த்³வாரம்பி ஸுகு³த்தங் ஹோதி ப⁴வங்க³ம்பி ஆவஜ்ஜனாதீ³னி வீதி²சித்தானிபி, தஸ்மா ஜவனக்க²ணே உப்பஜ்ஜமானோபி சக்கு²ந்த்³ரியஸங்வரோதி வுத்தோதி.
Idaṃ vuttaṃ hoti – yathā nagare catūsu dvāresu asaṃvutesu kiñcāpi antogharadvārakoṭṭhakagabbhādayo susaṃvutā, tathāpi antonagare sabbaṃ bhaṇḍaṃ arakkhitaṃ agopitameva hoti. Nagaradvārena hi pavisitvā corā yadicchakaṃ kareyyuṃ, evamevaṃ javane dussīlyādīsu uppannesu tasmiṃ asaṃvare sati dvārampi aguttaṃ hoti bhavaṅgampi āvajjanādīni vīthicittānipi. Yathā pana nagaradvāresu saṃvutesu kiñcāpi antogharādayo asaṃvutā, tathāpi antonagare sabbaṃ bhaṇḍaṃ surakkhitaṃ sugopitameva hoti. Nagaradvāresu hi pihitesu corānaṃ paveso natthi, evamevaṃ javane sīlādīsu uppannesu dvārampi suguttaṃ hoti bhavaṅgampi āvajjanādīni vīthicittānipi, tasmā javanakkhaṇe uppajjamānopi cakkhundriyasaṃvaroti vuttoti.
ஸங்வரேன ஸமன்னாக³தோ புக்³க³லோ ஸங்வுதோதி ஆஹ ‘‘உபேதோ’’தி. அயமேவெத்த² அத்தோ² ஸுந்த³ரதரோதி உபரி பாளியங் ஸந்தி³ஸ்ஸனதோ வுத்தங். தேனாஹ ‘‘ததா² ஹீ’’திஆதி³.
Saṃvarena samannāgato puggalo saṃvutoti āha ‘‘upeto’’ti. Ayamevettha attho sundarataroti upari pāḷiyaṃ sandissanato vuttaṃ. Tenāha ‘‘tathā hī’’tiādi.
யந்தி ஆதே³ஸோதி இமினா லிங்க³விபல்லாஸேன ஸத்³தி⁴ங் வசனவிபல்லாஸோ கதோதி த³ஸ்ஸேதி, நிபாதபத³ங் வா ஏதங் புது²வசனத்த²ங். விகா⁴தகராதி சித்தவிகா⁴தகரா , காயசித்தது³க்க²னிப்³ப³த்தகா வா. யதா²வுத்தகிலேஸஹேதுகா தா³ஹானுப³ந்தா⁴ விபாகா ஏவ விபாகபரிளாஹா. யதா² பனெத்த² ஆஸவா அஞ்ஞே ச விகா⁴தகரா கிலேஸபரிளாஹா ஸம்ப⁴வந்தி, தங் த³ஸ்ஸேதுங் ‘‘சக்கு²த்³வாரஸ்மிஞ்ஹீ’’திஆதி³ வுத்தங். தங் ஸுவிஞ்ஞெய்யமேவ. எத்த² ச ஸங்வரணூபாயோ, ஸங்வரிதப்³ப³ங், ஸங்வரோ, யதோ ஸோ ஸங்வரோ, யத்த² ஸங்வரோ, யதா² ஸங்வரோ, யஞ்ச ஸங்வரப²லந்தி அயங் விபா⁴கோ³ வேதி³தப்³போ³. கத²ங்? ‘‘படிஸங்கா² யோனிஸோ’’தி ஹி ஸங்வரணூபாயோ. சக்கு²ந்த்³ரியங் ஸங்வரிதப்³ப³ங். ஸங்வரக்³க³ஹணேன க³ஹிதா ஸதி ஸங்வரோ. ‘‘அஸங்வுதஸ்ஸா’’தி ஸங்வரணாவதி⁴. அஸங்வரதோ ஹி ஸங்வரணங். ஸங்வரிதப்³ப³க்³க³ஹணஸித்³தோ⁴ இத⁴ ஸங்வரவிஸயோ. சக்கு²ந்த்³ரியஞ்ஹி ஸங்வரணங் ஞாணங் ரூபாரம்மணே ஸங்வரயதீதி அவுத்தஸித்³தோ⁴யமத்தோ². ஆஸவதன்னிமித்தகிலேஸபரிளாஹாபா⁴வோ ப²லங். ஏவங் ஸோதத்³வாராதீ³ஸு யோஜேதப்³ப³ங். ஸப்³ப³த்தே²வாதி மனொத்³வாரே பஞ்சத்³வாரே சாதி ஸப்³ப³ஸ்மிங் த்³வாரே.
Yanti ādesoti iminā liṅgavipallāsena saddhiṃ vacanavipallāso katoti dasseti, nipātapadaṃ vā etaṃ puthuvacanatthaṃ. Vighātakarāti cittavighātakarā , kāyacittadukkhanibbattakā vā. Yathāvuttakilesahetukā dāhānubandhā vipākā eva vipākapariḷāhā. Yathā panettha āsavā aññe ca vighātakarā kilesapariḷāhā sambhavanti, taṃ dassetuṃ ‘‘cakkhudvārasmiñhī’’tiādi vuttaṃ. Taṃ suviññeyyameva. Ettha ca saṃvaraṇūpāyo, saṃvaritabbaṃ, saṃvaro, yato so saṃvaro, yattha saṃvaro, yathā saṃvaro, yañca saṃvaraphalanti ayaṃ vibhāgo veditabbo. Kathaṃ? ‘‘Paṭisaṅkhā yoniso’’ti hi saṃvaraṇūpāyo. Cakkhundriyaṃ saṃvaritabbaṃ. Saṃvaraggahaṇena gahitā sati saṃvaro. ‘‘Asaṃvutassā’’ti saṃvaraṇāvadhi. Asaṃvarato hi saṃvaraṇaṃ. Saṃvaritabbaggahaṇasiddho idha saṃvaravisayo. Cakkhundriyañhi saṃvaraṇaṃ ñāṇaṃ rūpārammaṇe saṃvarayatīti avuttasiddhoyamattho. Āsavatannimittakilesapariḷāhābhāvo phalaṃ. Evaṃ sotadvārādīsu yojetabbaṃ. Sabbatthevāti manodvāre pañcadvāre cāti sabbasmiṃ dvāre.
படிஸங்கா² யோனிஸோ சீவரந்திஆதீ³ஸு ‘‘ஸீதஸ்ஸ படிகா⁴தாயா’’திஆதி³னா பச்சவெக்க²ணமேவ யோனிஸோ படிஸங்கா². ஈதி³ஸந்தி ஏவரூபங் இட்டா²ரம்மணங். ப⁴வபத்த²னாய அஸ்ஸாத³யதோதி ப⁴வபத்த²னாமுகே²ன பா⁴விதங் ஆரம்மணங் அஸ்ஸாதெ³ந்தஸ்ஸ. சீவரந்தி நிவாஸனாதி³ யங் கிஞ்சிசீவரங். படிஸேவதீதி நிவாஸனாதி³வஸேன பரிபு⁴ஞ்ஜதி. யாவதே³வாதி பயோஜனபரிமாணனியமனங். ஸீதப்படிகா⁴தாதி³யேவ ஹி யோகி³னோ சீவரப்படிஸேவனப்பயோஜனங். ஸீதஸ்ஸாதி ஸீததா⁴துக்கோ²ப⁴தோ வா உதுபரிணாமதோ வா உப்பன்னஸ்ஸ ஸீதஸ்ஸ. படிகா⁴தாயாதி படிகா⁴தனத்த²ங் தப்பச்சயஸ்ஸ விகாரஸ்ஸ வினோத³னத்த²ங். உண்ஹஸ்ஸாதி அக்³கி³ஸந்தாபதோ உப்பன்னஸ்ஸ உண்ஹஸ்ஸ. ட³ங்ஸாத³யோ பாகடாயேவ. புன யாவதே³வாதி நியதப்பயோஜனபரிமாணனியமனங். நியதஞ்ஹி பயோஜனங் சீவரங் படிஸேவந்தஸ்ஸ ஹிரிகோபீனப்படிச்சா²த³னங், இதரங் கதா³சி. ஹிரிகோபீனந்தி ஸம்பா³த⁴ட்டா²னங். யஸ்மிஞ்ஹி அங்கே³ விவடே ஹிரீ குப்பதி வினஸ்ஸதி, தங் ஹிரியா கோபனதோ ஹிரிகோபீனங், தங்படிச்சா²த³னத்த²ங் சீவரங் படிஸேவதி.
Paṭisaṅkhāyoniso cīvarantiādīsu ‘‘sītassa paṭighātāyā’’tiādinā paccavekkhaṇameva yoniso paṭisaṅkhā. Īdisanti evarūpaṃ iṭṭhārammaṇaṃ. Bhavapatthanāya assādayatoti bhavapatthanāmukhena bhāvitaṃ ārammaṇaṃ assādentassa. Cīvaranti nivāsanādi yaṃ kiñcicīvaraṃ. Paṭisevatīti nivāsanādivasena paribhuñjati. Yāvadevāti payojanaparimāṇaniyamanaṃ. Sītappaṭighātādiyeva hi yogino cīvarappaṭisevanappayojanaṃ. Sītassāti sītadhātukkhobhato vā utupariṇāmato vā uppannassa sītassa. Paṭighātāyāti paṭighātanatthaṃ tappaccayassa vikārassa vinodanatthaṃ. Uṇhassāti aggisantāpato uppannassa uṇhassa. Ḍaṃsādayo pākaṭāyeva. Puna yāvadevāti niyatappayojanaparimāṇaniyamanaṃ. Niyatañhi payojanaṃ cīvaraṃ paṭisevantassa hirikopīnappaṭicchādanaṃ, itaraṃ kadāci. Hirikopīnanti sambādhaṭṭhānaṃ. Yasmiñhi aṅge vivaṭe hirī kuppati vinassati, taṃ hiriyā kopanato hirikopīnaṃ, taṃpaṭicchādanatthaṃ cīvaraṃ paṭisevati.
பிண்ட³பாதந்தி யங் கிஞ்சி ஆஹாரங். ஸோ ஹி பிண்டொ³ல்யேன பி⁴க்கு²னோ பத்தே பதனதோ, தத்த² தத்த² லத்³த⁴பி⁴க்கா²பிண்டா³னங் பாதோ ஸன்னிபாதோதி வா ‘‘பிண்ட³பாதோ’’தி வுச்சதி. நேவ த³வாயாதி ந கீளனாய. ந மதா³யாதி ந ப³லமத³மானமத³புரிஸமத³த்த²ங். ந மண்ட³னாயாதி ந அங்க³பச்சங்கா³னங் பீணனபா⁴வத்த²ங். ந விபூ⁴ஸனாயாதி ந தேஸங்யேவ ஸோப⁴த்த²ங், ச²விஸம்பத்திஅத்த²ந்தி அத்தோ² . இமானி யதா²க்கமங் மோஹதோ³ஸஸண்டா²னவண்ணராகூ³பனிஸ்ஸயப்பஹானத்தா²னி வேதி³தப்³பா³னி. புரிமங் வா த்³வயங் அத்தனோ ஸங்கிலேஸுப்பத்தினிஸேத⁴னத்த²ங், இதரங் பரஸ்ஸபி. சத்தாரிபி காமஸுக²ல்லிகானுயோக³ஸ்ஸ பஹானத்த²ங் வுத்தானீதி வேதி³தப்³பா³னி. காயஸ்ஸாதி ரூபகாயஸ்ஸ. டி²தியா யாபனாயாதி பப³ந்த⁴ட்டி²தத்த²ஞ்சேவ பவத்தியா அவிச்சே²த³னத்த²ஞ்ச, சிரகாலட்டி²தத்த²ங் ஜீவிதிந்த்³ரியஸ்ஸ பவத்தாபனத்த²ங். விஹிங்ஸூபரதியாதி ஜிக⁴ச்சா²து³க்க²ஸ்ஸ உபரமத்த²ங். ப்³ரஹ்மசரியானுக்³க³ஹாயாதி ஸாஸனமக்³க³ப்³ரஹ்மசரியானங் அனுக்³க³ண்ஹனத்த²ங். இதீதி ஏவங் இமினா உபாயேன. புராணஞ்ச வேத³னங் படிஹங்கா²மீதி புராணங் அபு⁴த்தபச்சயா உப்பஜ்ஜனகவேத³னங் படிஹனிஸ்ஸாமி. நவஞ்ச வேத³னங் ந உப்பாதெ³ஸ்ஸாமீதி நவங் பு⁴த்தபச்சயா உப்பஜ்ஜனகவேத³னங் ந உப்பாதெ³ஸ்ஸாமி. தஸ்ஸா ஹி அனுப்பஜ்ஜனத்த²மேவ ஆஹாரங் பரிபு⁴ஞ்ஜதி. எத்த² அபு⁴த்தபச்சயா உப்பஜ்ஜனகவேத³னா நாம யதா²வுத்தஜிக⁴ச்சா²னிமித்தா வேத³னா. ஸா ஹி அபு⁴ஞ்ஜந்தஸ்ஸ பி⁴ய்யோ பி⁴ய்யோபவட்³ட⁴னவஸேன உப்பஜ்ஜதி, பு⁴த்தபச்சயா அனுப்பஜ்ஜனகவேத³னாபி கு²தா³னிமித்தாவ அங்க³தா³ஹஸூலாதி³வேத³னா அப்பவத்தா. ஸா ஹி பு⁴த்தபச்சயா அனுப்பன்னாவ ந உப்பஜ்ஜிஸ்ஸதி. விஹிங்ஸானிமித்ததா சேதாஸங் விஹிங்ஸாய விஸேஸோ.
Piṇḍapātanti yaṃ kiñci āhāraṃ. So hi piṇḍolyena bhikkhuno patte patanato, tattha tattha laddhabhikkhāpiṇḍānaṃ pāto sannipātoti vā ‘‘piṇḍapāto’’ti vuccati. Neva davāyāti na kīḷanāya. Na madāyāti na balamadamānamadapurisamadatthaṃ. Na maṇḍanāyāti na aṅgapaccaṅgānaṃ pīṇanabhāvatthaṃ. Na vibhūsanāyāti na tesaṃyeva sobhatthaṃ, chavisampattiatthanti attho . Imāni yathākkamaṃ mohadosasaṇṭhānavaṇṇarāgūpanissayappahānatthāni veditabbāni. Purimaṃ vā dvayaṃ attano saṃkilesuppattinisedhanatthaṃ, itaraṃ parassapi. Cattāripi kāmasukhallikānuyogassa pahānatthaṃ vuttānīti veditabbāni. Kāyassāti rūpakāyassa. Ṭhitiyā yāpanāyāti pabandhaṭṭhitatthañceva pavattiyā avicchedanatthañca, cirakālaṭṭhitatthaṃ jīvitindriyassa pavattāpanatthaṃ. Vihiṃsūparatiyāti jighacchādukkhassa uparamatthaṃ. Brahmacariyānuggahāyāti sāsanamaggabrahmacariyānaṃ anuggaṇhanatthaṃ. Itīti evaṃ iminā upāyena. Purāṇañca vedanaṃ paṭihaṅkhāmīti purāṇaṃ abhuttapaccayā uppajjanakavedanaṃ paṭihanissāmi. Navañca vedanaṃ na uppādessāmīti navaṃ bhuttapaccayā uppajjanakavedanaṃ na uppādessāmi. Tassā hi anuppajjanatthameva āhāraṃ paribhuñjati. Ettha abhuttapaccayā uppajjanakavedanā nāma yathāvuttajighacchānimittā vedanā. Sā hi abhuñjantassa bhiyyo bhiyyopavaḍḍhanavasena uppajjati, bhuttapaccayā anuppajjanakavedanāpi khudānimittāva aṅgadāhasūlādivedanā appavattā. Sā hi bhuttapaccayā anuppannāva na uppajjissati. Vihiṃsānimittatā cetāsaṃ vihiṃsāya viseso.
யாத்ரா ச மே ப⁴விஸ்ஸதீதி யாபனா ச மே சதுன்னங் இரியாபதா²னங் ப⁴விஸ்ஸதி. ‘‘யாபனாயா’’தி இமினா ஜீவிதிந்த்³ரியயாபனா வுத்தா, இத⁴ சதுன்னங் இரியாபதா²னங் அவிச்சே²த³ஸங்கா²தா யாபனாதி அயமேதாஸங் விஸேஸோ. அனவஜ்ஜதா ச பா²ஸுவிஹாரோ சாதி அயுத்தபரியேஸனப்படிக்³க³ஹணபரிபோ⁴க³பரிவஜ்ஜனேன அனவஜ்ஜதா, பரிமிதபரிபோ⁴கே³ன பா²ஸுவிஹாரோ. அஸப்பாயாபரிமிதபோ⁴ஜனபச்சயா அரதிதந்தீ³விஜம்பி⁴தாவிஞ்ஞுக³ரஹாதி³தோ³ஸாபா⁴வேன வா அனவஜ்ஜதா. ஸப்பாயபரிமிதபோ⁴ஜனபச்சயா காயப³லஸம்ப⁴வேன பா²ஸுவிஹாரோ. யாவத³த்த²ங் உத³ராவதே³ஹகபோ⁴ஜனபரிவஜ்ஜனேன வா ஸெய்யஸுக²பஸ்ஸஸுக²மித்³த⁴ஸுகா²தீ³னங் அபா⁴வதோ அனவஜ்ஜதா. சதுபஞ்சாலோபமத்தஊனபோ⁴ஜனேன சதுஇரியாபத²யொக்³யதாபாத³னதோ பா²ஸுவிஹாரோ. வுத்தஞ்ஹேதங் –
Yātrā ca me bhavissatīti yāpanā ca me catunnaṃ iriyāpathānaṃ bhavissati. ‘‘Yāpanāyā’’ti iminā jīvitindriyayāpanā vuttā, idha catunnaṃ iriyāpathānaṃ avicchedasaṅkhātā yāpanāti ayametāsaṃ viseso. Anavajjatā ca phāsuvihāro cāti ayuttapariyesanappaṭiggahaṇaparibhogaparivajjanena anavajjatā, parimitaparibhogena phāsuvihāro. Asappāyāparimitabhojanapaccayā aratitandīvijambhitāviññugarahādidosābhāvena vā anavajjatā. Sappāyaparimitabhojanapaccayā kāyabalasambhavena phāsuvihāro. Yāvadatthaṃ udarāvadehakabhojanaparivajjanena vā seyyasukhapassasukhamiddhasukhādīnaṃ abhāvato anavajjatā. Catupañcālopamattaūnabhojanena catuiriyāpathayogyatāpādanato phāsuvihāro. Vuttañhetaṃ –
‘‘சத்தாரோ பஞ்ச ஆலோபே, அபு⁴த்வா உத³கங் பிவே;
‘‘Cattāro pañca ālope, abhutvā udakaṃ pive;
அலங் பா²ஸுவிஹாராய, பஹிதத்தஸ்ஸ பி⁴க்கு²னோ’’தி. (தே²ரகா³॰ 983; மி॰ ப॰ 6.5.10);
Alaṃ phāsuvihārāya, pahitattassa bhikkhuno’’ti. (theragā. 983; mi. pa. 6.5.10);
எத்தாவதா ச பயோஜனபரிக்³க³ஹோ, மஜ்ஜி²மா ச படிபதா³ தீ³பிதா ஹோதி. யாத்ரா ச மே ப⁴விஸ்ஸதீதி பயோஜனபரிக்³க³ஹதீ³பனா. யாத்ரா ஹி நங் ஆஹாரூபயோக³ங் பயோஜேதி. த⁴ம்மிகஸுகா²பரிச்சாக³ஹேதுகோ பா²ஸுவிஹாரோ மஜ்ஜி²மா படிபதா³ அந்தத்³வயபரிவஜ்ஜனதோ.
Ettāvatā ca payojanapariggaho, majjhimā ca paṭipadā dīpitā hoti. Yātrā ca me bhavissatīti payojanapariggahadīpanā. Yātrā hi naṃ āhārūpayogaṃ payojeti. Dhammikasukhāpariccāgahetuko phāsuvihāro majjhimā paṭipadā antadvayaparivajjanato.
ஸேனாஸனந்தி ஸேனஞ்ச ஆஸனஞ்ச. யத்த² விஹாராதி³கே ஸேதி நிபஜ்ஜதி ஆஸதி நிஸீத³தி, தங் ஸேனாஸனங். உதுபரிஸ்ஸயவினோத³னப்படிஸல்லானாராமத்த²ந்தி உதுயேவ பரிஸஹனட்டே²ன பரிஸ்ஸயோ ஸரீராபா³த⁴சித்தவிக்கே²பகரோ, தஸ்ஸ வினோத³னத்த²ங், அனுப்பன்னஸ்ஸ அனுப்பாத³னத்த²ங், உப்பன்னஸ்ஸ வூபஸமனத்த²ஞ்சாதி அத்தோ². அத² வா யதா²வுத்தோ உது ச ஸீஹப்³யக்³கா⁴தி³பாகடபரிஸ்ஸயோ ச ராக³தோ³ஸாதி³படிச்ச²ன்னபரிஸ்ஸயோ ச உதுபரிஸ்ஸயோ, தஸ்ஸ வினோத³னத்த²ஞ்சேவ ஏகீபா⁴வபா²ஸுகத்த²ஞ்ச. சீவரப்படிஸேவனே ஹிரீகோபீனப்படிச்சா²த³னங் விய தங் நியதபயோஜனந்தி புன ‘‘யாவதே³வா’’தி வுத்தங்.
Senāsananti senañca āsanañca. Yattha vihārādike seti nipajjati āsati nisīdati, taṃ senāsanaṃ. Utuparissayavinodanappaṭisallānārāmatthanti utuyeva parisahanaṭṭhena parissayo sarīrābādhacittavikkhepakaro, tassa vinodanatthaṃ, anuppannassa anuppādanatthaṃ, uppannassa vūpasamanatthañcāti attho. Atha vā yathāvutto utu ca sīhabyagghādipākaṭaparissayo ca rāgadosādipaṭicchannaparissayo ca utuparissayo, tassa vinodanatthañceva ekībhāvaphāsukatthañca. Cīvarappaṭisevane hirīkopīnappaṭicchādanaṃ viya taṃ niyatapayojananti puna ‘‘yāvadevā’’ti vuttaṃ.
கி³லானபச்சயபே⁴ஸஜ்ஜபரிக்கா²ரந்தி ரோக³ஸ்ஸ பச்சனீகப்பவத்தியா கி³லானபச்சயோ, ததோ ஏவ பி⁴ஸக்கஸ்ஸ அனுஞ்ஞாதவத்து²தாய பே⁴ஸஜ்ஜங், ஜீவிதஸ்ஸ பரிவாரஸம்பா⁴ரபா⁴வேஹி பரிக்கா²ரோ சாதி கி³லானபச்சயபே⁴ஸஜ்ஜபரிக்கா²ரோ, தங். வெய்யாபா³தி⁴கானந்தி வெய்யாபா³த⁴தோ தா⁴துக்கோ²ப⁴தோ ச தங்னிப்³ப³த்தகுட்ட²க³ண்ட³பீளகாதி³ரோக³தோ உப்பன்னானங். வேத³னானந்தி து³க்க²வேத³னானங். அப்³யாப³ஜ்ஜ²பரமதாயாதி நித்³து³க்க²பரமபா⁴வாய. யாவ தங் து³க்க²ங் ஸப்³ப³ங் பஹீனங் ஹோதி, தாவ படிஸேவாமீதி யோஜனா. ஏவமெத்த² ஸங்கே²பேனேவ பாளிவண்ணனா வேதி³தப்³பா³. நவவேத³னுப்பாத³தோபீதி ந கேவலங் ஆயதிங் ஏவ விபாகபரிளாஹா , அத² கோ² அதிபோ⁴ஜனபச்சயா அலங்ஸாடகாதீ³னங் விய நவவேத³னுப்பாத³தோபி வேதி³தப்³பா³.
Gilānapaccayabhesajjaparikkhāranti rogassa paccanīkappavattiyā gilānapaccayo, tato eva bhisakkassa anuññātavatthutāya bhesajjaṃ, jīvitassa parivārasambhārabhāvehi parikkhāro cāti gilānapaccayabhesajjaparikkhāro, taṃ. Veyyābādhikānanti veyyābādhato dhātukkhobhato ca taṃnibbattakuṭṭhagaṇḍapīḷakādirogato uppannānaṃ. Vedanānanti dukkhavedanānaṃ. Abyābajjhaparamatāyāti niddukkhaparamabhāvāya. Yāva taṃ dukkhaṃ sabbaṃ pahīnaṃ hoti, tāva paṭisevāmīti yojanā. Evamettha saṅkhepeneva pāḷivaṇṇanā veditabbā. Navavedanuppādatopīti na kevalaṃ āyatiṃ eva vipākapariḷāhā , atha kho atibhojanapaccayā alaṃsāṭakādīnaṃ viya navavedanuppādatopi veditabbā.
கம்மட்டா²னிகஸ்ஸ சலனங் நாம கம்மட்டா²னபரிச்சாகோ³தி ஆஹ ‘‘சலதி கம்பதி கம்மட்டா²னங் விஜஹதீ’’தி. ‘‘க²மோ ஹோதி ஸீதஸ்ஸ உண்ஹஸ்ஸா’’தி எத்த² ச லோமஸனாக³த்தே²ரஸ்ஸ வத்து² கதே²தப்³ப³ங். தே²ரோ கிர சேதியபப்³ப³தே பியங்கு³கு³ஹாய பதா⁴னக⁴ரே விஹரந்தோ அந்தரட்ட²கே ஹிமபாதஸமயே லோகந்தரிகனிரயங் பச்சவெக்கி²த்வா கம்மட்டா²னங் அவிஜஹந்தோவ அப்³போ⁴காஸே வீதினாமேஸி. கி³ம்ஹஸமயே ச பச்சா²ப⁴த்தங் ப³ஹிசங்கமே கம்மட்டா²னங் மனஸிகரோதோ ஸேதா³பிஸ்ஸ கச்சே²ஹி முச்சந்தி. அத² நங் அந்தேவாஸிகோ ஆஹ – ‘‘இத⁴, ப⁴ந்தே, நிஸீத³த², ஸீதலோ ஓகாஸோ’’தி. தே²ரோ ‘‘உண்ஹப⁴யேனேவம்ஹி, ஆவுஸோ, இத⁴ நிஸின்னோ’’தி அவீசிமஹானிரயங் பச்சவெக்கி²த்வா நிஸீதி³யேவ. உண்ஹந்தி செத்த² அக்³கி³ஸந்தாபோவ வேதி³தப்³போ³ ஸூரியஸந்தாபஸ்ஸ பரதோ வுச்சமானத்தா. ஸூரியஸந்தாபவஸேன பனேதங் வத்து² வுத்தங்.
Kammaṭṭhānikassa calanaṃ nāma kammaṭṭhānapariccāgoti āha ‘‘calati kampati kammaṭṭhānaṃ vijahatī’’ti. ‘‘Khamo hoti sītassa uṇhassā’’ti ettha ca lomasanāgattherassa vatthu kathetabbaṃ. Thero kira cetiyapabbate piyaṅguguhāya padhānaghare viharanto antaraṭṭhake himapātasamaye lokantarikanirayaṃ paccavekkhitvā kammaṭṭhānaṃ avijahantova abbhokāse vītināmesi. Gimhasamaye ca pacchābhattaṃ bahicaṅkame kammaṭṭhānaṃ manasikaroto sedāpissa kacchehi muccanti. Atha naṃ antevāsiko āha – ‘‘idha, bhante, nisīdatha, sītalo okāso’’ti. Thero ‘‘uṇhabhayenevamhi, āvuso, idha nisinno’’ti avīcimahānirayaṃ paccavekkhitvā nisīdiyeva. Uṇhanti cettha aggisantāpova veditabbo sūriyasantāpassa parato vuccamānattā. Sūriyasantāpavasena panetaṃ vatthu vuttaṃ.
யோ ச த்³வே தயோ வாரே ப⁴த்தங் வா பானீயங் வா அலப⁴மானோபி அனமதக்³கே³ ஸங்ஸாரே அத்தனோ பெத்திவிஸயூபபத்திங் பச்சவெக்கி²த்வா அவேத⁴ந்தோ கம்மட்டா²னங் ந விஜஹதியேவ. ட³ங்ஸமகஸவாதாதபஸம்ப²ஸ்ஸேஹி பு²ட்டோ² சேபி திரச்சா²னூபபத்திங் பச்சவெக்கி²த்வா அவேத⁴ந்தோ கம்மட்டா²னங் ந விஜஹதியேவ. ஸரீஸபஸம்ப²ஸ்ஸேன பு²ட்டோ² சாபி அனமதக்³கே³ ஸங்ஸாரே ஸீஹப்³யக்³கா⁴தி³முகே²ஸு அனேகவாரங் பரிவத்திதபுப்³ப³பா⁴வங் பச்சவெக்கி²த்வா அவேத⁴ந்தோ கம்மட்டா²னங் ந விஜஹதியேவ பதா⁴னியத்தே²ரோ விய, அயங் ‘‘க²மோ ஜிக⁴ச்சா²ய…பே॰… ஸரீஸபஸம்ப²ஸ்ஸான’’ந்தி வேதி³தப்³போ³. தே²ரங் கிர க²ண்ட³சேலவிஹாரே கணிகாரபதா⁴னியக⁴ரே அரியவங்ஸத⁴ம்மங் ஸுணந்தஞ்ஞேவ கோ⁴ரவிஸோ ஸப்போ ட³ங்ஸி. தே²ரோ ஜானித்வாபி பஸன்னசித்தோ நிஸின்னோ த⁴ம்மங்யேவ ஸுணாதி, விஸவேகோ³ த²த்³தோ⁴ அஹோஸி. தே²ரோ உபஸம்பத³மாளங் ஆதி³ங் கத்வா ஸீலங் பச்சவெக்கி²த்வா ‘‘விஸுத்³த⁴ஸீலொம்ஹீ’’தி பீதிங் உப்பாதே³ஸி, ஸஹ பீதுப்பாதா³ விஸங் நிவத்தித்வா பத²விங் பாவிஸி. தே²ரோ தத்தே²வ சித்தேகக்³க³தங் லபி⁴த்வா விபஸ்ஸனங் வட்³டெ⁴த்வா அரஹத்தங் பாபுணி.
Yo ca dve tayo vāre bhattaṃ vā pānīyaṃ vā alabhamānopi anamatagge saṃsāre attano pettivisayūpapattiṃ paccavekkhitvā avedhanto kammaṭṭhānaṃ na vijahatiyeva. Ḍaṃsamakasavātātapasamphassehi phuṭṭho cepi tiracchānūpapattiṃ paccavekkhitvā avedhanto kammaṭṭhānaṃ na vijahatiyeva. Sarīsapasamphassena phuṭṭho cāpi anamatagge saṃsāre sīhabyagghādimukhesu anekavāraṃ parivattitapubbabhāvaṃ paccavekkhitvā avedhanto kammaṭṭhānaṃ na vijahatiyeva padhāniyatthero viya, ayaṃ ‘‘khamo jighacchāya…pe… sarīsapasamphassāna’’nti veditabbo. Theraṃ kira khaṇḍacelavihāre kaṇikārapadhāniyaghare ariyavaṃsadhammaṃ suṇantaññeva ghoraviso sappo ḍaṃsi. Thero jānitvāpi pasannacitto nisinno dhammaṃyeva suṇāti, visavego thaddho ahosi. Thero upasampadamāḷaṃ ādiṃ katvā sīlaṃ paccavekkhitvā ‘‘visuddhasīlomhī’’ti pītiṃ uppādesi, saha pītuppādā visaṃ nivattitvā pathaviṃ pāvisi. Thero tattheva cittekaggataṃ labhitvā vipassanaṃ vaḍḍhetvā arahattaṃ pāpuṇi.
யோ பன அக்கோஸவஸேன து³ருத்தே து³ருத்தத்தாயேவ ச து³ராக³தே அபி அந்திமவத்து²ஸஞ்ஞிதே வசனபதே² ஸுத்வா க²ந்திகு³ணங்யேவ பச்சவெக்கி²த்வா ந வேத⁴தி தீ³க⁴பா⁴ணகஅப⁴யத்தே²ரோ விய, அயங் ‘‘க²மோ து³ருத்தானங் து³ராக³தானங் வசனபதா²ன’’ந்தி வேதி³தப்³போ³. தே²ரோ கிர பச்சயஸந்தோஸபா⁴வனாராமதாய மஹாஅரியவங்ஸப்படிபத³ங் கதே²ஸி, ஸப்³போ³ மஹாகா³மோ ஆக³ச்ச²தி, தே²ரஸ்ஸ மஹாஸக்காரோ உப்பஜ்ஜி. தங் அஞ்ஞதரோ மஹாதே²ரோ அதி⁴வாஸேதுங் அஸக்கொந்தோ ‘‘தீ³க⁴பா⁴ணகோ ‘அரியவங்ஸங் கதே²மீ’தி ஸப்³ப³ரத்திங் கோலாஹலங் கரோதீ’’திஆதீ³ஹி அக்கோஸி. உபோ⁴பி ச அத்தனோ அத்தனோ விஹாரங் க³ச்ச²ந்தா கா³வுதமத்தங் ஏகபதே²ன அக³மங்ஸு. ஸகலகா³வுதம்பி ஸோ தங் அக்கோஸியேவ. ததோ யத்த² த்³வின்னங் விஹாரானங் மக்³கோ³ பி⁴ஜ்ஜதி, தத்த² ட²த்வா தீ³க⁴பா⁴ணகத்தே²ரோ தங் வந்தி³த்வா ‘‘ஏஸோ, ப⁴ந்தே, தும்ஹாகங் மக்³கோ³’’தி ஆஹ. ஸோ அஸ்ஸுணந்தோ விய அக³மாஸி. தே²ரோபி விஹாரங் க³ந்த்வா பாதே³ பக்கா²லெத்வா நிஸீதி³. தமேனங் அந்தேவாஸிகோ ‘‘கிங், ப⁴ந்தே, ஸகலகா³வுதங் பரிபா⁴ஸந்தங் ந கிஞ்சி அவோசுத்தா²’’தி ஆஹ. தே²ரோ ‘‘க²ந்தியேவாவுஸோ, மய்ஹங் பா⁴ரோ, ந அக்க²ந்தி, ஏகபது³த்³தா⁴ரேபி கம்மட்டா²னவியோக³ங் ந பஸ்ஸாமீ’’தி ஆஹ.
Yo pana akkosavasena durutte duruttattāyeva ca durāgate api antimavatthusaññite vacanapathe sutvā khantiguṇaṃyeva paccavekkhitvā na vedhati dīghabhāṇakaabhayatthero viya, ayaṃ ‘‘khamo duruttānaṃ durāgatānaṃ vacanapathāna’’nti veditabbo. Thero kira paccayasantosabhāvanārāmatāya mahāariyavaṃsappaṭipadaṃ kathesi, sabbo mahāgāmo āgacchati, therassa mahāsakkāro uppajji. Taṃ aññataro mahāthero adhivāsetuṃ asakkonto ‘‘dīghabhāṇako ‘ariyavaṃsaṃ kathemī’ti sabbarattiṃ kolāhalaṃ karotī’’tiādīhi akkosi. Ubhopi ca attano attano vihāraṃ gacchantā gāvutamattaṃ ekapathena agamaṃsu. Sakalagāvutampi so taṃ akkosiyeva. Tato yattha dvinnaṃ vihārānaṃ maggo bhijjati, tattha ṭhatvā dīghabhāṇakatthero taṃ vanditvā ‘‘eso, bhante, tumhākaṃ maggo’’ti āha. So assuṇanto viya agamāsi. Theropi vihāraṃ gantvā pāde pakkhāletvā nisīdi. Tamenaṃ antevāsiko ‘‘kiṃ, bhante, sakalagāvutaṃ paribhāsantaṃ na kiñci avocutthā’’ti āha. Thero ‘‘khantiyevāvuso, mayhaṃ bhāro, na akkhanti, ekapaduddhārepi kammaṭṭhānaviyogaṃ na passāmī’’ti āha.
வசனமேவ தத³த்த²ங் ஞாபேதுகாமானஞ்ச பதோ² உபாயோதி ஆஹ ‘‘வசனமேவ வசனபதோ²’’தி. அஸுக²ட்டே²ன வா திப்³பா³. யஞ்ஹி ந ஸுக²ங், தங் அனிட்ட²ங் திப்³ப³ந்தி வுச்சதி. அதி⁴வாஸகஜாதிகோ ஹோதீதி யதா²வுத்தவேத³னானங் அதி⁴வாஸகஸபா⁴வோ ஹோதி. சித்தலபப்³ப³தே பதா⁴னியத்தே²ரஸ்ஸ கிர ரத்திங் பதா⁴னேன வீதினாமெத்வா டி²தஸ்ஸ உத³ரவாதோ உப்பஜ்ஜதி. ஸோ தங் அதி⁴வாஸேதுங் அஸக்கொந்தோ ஆவத்ததி பரிவத்ததி. தமேனங் சங்கமனபஸ்ஸே டி²தோ பிண்ட³பாதியத்தே²ரோ ஆஹ – ‘‘ஆவுஸோ, பப்³ப³ஜிதோ நாம அதி⁴வாஸனஸீலோ ஹோதீ’’தி. ஸோ ‘‘ஸாது⁴, ப⁴ந்தே’’தி அதி⁴வாஸெத்வா நிச்சலோ ஸயி. வாதோ நாபி⁴தோ யாவ ஹத³யங் பா²லேஸி. தே²ரோ வேத³னங் விக்க²ம்பெ⁴த்வா விபஸ்ஸந்தோ முஹுத்தேன அனாகா³மீ ஹுத்வா பரினிப்³பா³யி. ஏவங் ஸப்³ப³த்தா²தி ‘‘உண்ஹேன பு²ட்ட²ஸ்ஸ ஸீதங் பத்த²யதோ’’திஆதி³னா ஸப்³ப³த்த² உண்ஹாதி³னிமித்தங் காமாஸவுப்பத்தி வேதி³தப்³பா³. நத்தி² ஸுக³திப⁴வே ஸீதங் வா உண்ஹங் வாதி அனிட்ட²ங் ஸீதங் வா உண்ஹங் வா நத்தீ²தி அதி⁴ப்பாயோ. அத்தக்³கா³ஹே ஸதி அத்தனியக்³கா³ஹோதி ஆஹ ‘‘மய்ஹங் ஸீதங் உண்ஹந்தி கா³ஹோ தி³ட்டா²ஸவோ’’தி.
Vacanameva tadatthaṃ ñāpetukāmānañca patho upāyoti āha ‘‘vacanameva vacanapatho’’ti. Asukhaṭṭhena vā tibbā. Yañhi na sukhaṃ, taṃ aniṭṭhaṃ tibbanti vuccati. Adhivāsakajātiko hotīti yathāvuttavedanānaṃ adhivāsakasabhāvo hoti. Cittalapabbate padhāniyattherassa kira rattiṃ padhānena vītināmetvā ṭhitassa udaravāto uppajjati. So taṃ adhivāsetuṃ asakkonto āvattati parivattati. Tamenaṃ caṅkamanapasse ṭhito piṇḍapātiyatthero āha – ‘‘āvuso, pabbajito nāma adhivāsanasīlo hotī’’ti. So ‘‘sādhu, bhante’’ti adhivāsetvā niccalo sayi. Vāto nābhito yāva hadayaṃ phālesi. Thero vedanaṃ vikkhambhetvā vipassanto muhuttena anāgāmī hutvā parinibbāyi. Evaṃ sabbatthāti ‘‘uṇhena phuṭṭhassa sītaṃ patthayato’’tiādinā sabbattha uṇhādinimittaṃ kāmāsavuppatti veditabbā. Natthi sugatibhave sītaṃ vā uṇhaṃ vāti aniṭṭhaṃ sītaṃ vā uṇhaṃ vā natthīti adhippāyo. Attaggāhe sati attaniyaggāhoti āha ‘‘mayhaṃ sītaṃ uṇhanti gāho diṭṭhāsavo’’ti.
அஹங் ஸமணோதி ‘‘அஹங் ஸமணோ, கிங் மம ஜீவிதேன வா மரணேன வா’’தி ஏவங் சிந்தெத்வாதி அதி⁴ப்பாயோ. பச்சவெக்கி²த்வாதி கா³மப்பவேஸப்பயோஜனாதி³ஞ்ச பச்சவெக்கி²த்வா. படிக்கமதீதி ஹத்தி²ஆதீ³னங் ஸமீபக³மனதோ அபக்கமதி. டா²யந்தி எத்தா²தி டா²னங், கண்டகானங் டா²னங் கண்டகட்டா²னங், யத்த² கண்டகானி ஸந்தி, தங் ஓகாஸந்தி வுத்தங் ஹோதி. அமனுஸ்ஸது³ட்டா²னீதி அமனுஸ்ஸஸஞ்சாரேன தூ³ஸிதானி, ஸபரிஸ்ஸயானீதி அத்தோ². அனியதவத்து²பூ⁴தந்தி அனியதஸிக்கா²பத³ஸ்ஸ காரணபூ⁴தங். வேஸியாதி³பே⁴த³தோதி வேஸியாவித⁴வாது²ல்லகுமாரிகாபண்ட³கபானாகா³ரபி⁴க்கு²னிபே⁴த³தோ. ஸமானந்தி ஸமங், அவிஸமந்தி அத்தோ². அகாஸி வாதி தாதி³ஸங் அனாசாரங் அகாஸி வா. ஸீலஸங்வரஸங்கா²தேனாதி கத²ங் பரிவஜ்ஜனங் ஸீலங்? அனாஸனபரிவஜ்ஜனேன ஹி அனாசாரபரிவஜ்ஜனங் வுத்தங். அனாசாராகோ³சரபரிவஜ்ஜனங் சாரித்தஸீலதாய ஸீலஸங்வரோ. ததா² ஹி ப⁴க³வதா ‘‘பாதிமொக்க²ஸங்வரஸங்வுதோ விஹரதீ’’தி (விப⁴॰ 508) ஸீலஸங்வரவிப⁴ஜனே ஆசாரகோ³சரஸம்பத்திங் த³ஸ்ஸெந்தேன ‘‘அத்தி² அனாசாரோ, அத்தி² அகோ³சரோ’’திஆதி³னா (விப⁴॰ 513-514) ஆசாரகோ³சரா விப⁴ஜித்வா த³ஸ்ஸிதா. ‘‘சண்ட³ங் ஹத்தி²ங் பரிவஜ்ஜேதீ’’தி வசனதோ ஹத்தி²ஆதி³பரிவஜ்ஜனம்பி ப⁴க³வதோ வசனானுட்டா²னந்தி கத்வா ஆசாரஸீலமேவாதி வேதி³தப்³ப³ங்.
Ahaṃ samaṇoti ‘‘ahaṃ samaṇo, kiṃ mama jīvitena vā maraṇena vā’’ti evaṃ cintetvāti adhippāyo. Paccavekkhitvāti gāmappavesappayojanādiñca paccavekkhitvā. Paṭikkamatīti hatthiādīnaṃ samīpagamanato apakkamati. Ṭhāyanti etthāti ṭhānaṃ, kaṇṭakānaṃ ṭhānaṃ kaṇṭakaṭṭhānaṃ, yattha kaṇṭakāni santi, taṃ okāsanti vuttaṃ hoti. Amanussaduṭṭhānīti amanussasañcārena dūsitāni, saparissayānīti attho. Aniyatavatthubhūtanti aniyatasikkhāpadassa kāraṇabhūtaṃ. Vesiyādibhedatoti vesiyāvidhavāthullakumārikāpaṇḍakapānāgārabhikkhunibhedato. Samānanti samaṃ, avisamanti attho. Akāsi vāti tādisaṃ anācāraṃ akāsi vā. Sīlasaṃvarasaṅkhātenāti kathaṃ parivajjanaṃ sīlaṃ? Anāsanaparivajjanena hi anācāraparivajjanaṃ vuttaṃ. Anācārāgocaraparivajjanaṃ cārittasīlatāya sīlasaṃvaro. Tathā hi bhagavatā ‘‘pātimokkhasaṃvarasaṃvuto viharatī’’ti (vibha. 508) sīlasaṃvaravibhajane ācāragocarasampattiṃ dassentena ‘‘atthi anācāro, atthi agocaro’’tiādinā (vibha. 513-514) ācāragocarā vibhajitvā dassitā. ‘‘Caṇḍaṃ hatthiṃ parivajjetī’’ti vacanato hatthiādiparivajjanampi bhagavato vacanānuṭṭhānanti katvā ācārasīlamevāti veditabbaṃ.
இதிபீதி இமினாபி காரணேன அயோனிஸோமனஸிகாரஸமுட்டி²தத்தாபி, லோபா⁴தி³ஸஹக³தத்தாபி, குஸலப்படிபக்க²தோபீதிஆதீ³ஹி காரணேஹி அயங் விதக்கோ அகுஸலோதி அத்தோ². இமினா நயேன ஸாவஜ்ஜோதிஆதீ³ஸுபி அத்தோ² வேதி³தப்³போ³. எத்த² ச அகுஸலோதிஆதி³னா தி³ட்ட²த⁴ம்மிகங் காமவிதக்கஸ்ஸ ஆதீ³னவங் த³ஸ்ஸேதி, து³க்க²விபாகோதி இமினா ஸம்பராயிகங். அத்தப்³யாபா³தா⁴ய ஸங்வத்ததீதிஆதீ³ஸுபி இமினாவ நயேன ஆதீ³னவவிபா⁴வனா வேதி³தப்³பா³. உப்பன்னஸ்ஸ காமவிதக்கஸ்ஸ அனதி⁴வாஸனங் நாம புன தாதி³ஸஸ்ஸ அனுப்பாத³னங். தங் பனஸ்ஸ பஹானங் வினோத³னங் ப்³யந்திகரணங் அனபா⁴வக³மனந்தி ச வத்துங் வட்டதீதி பாளியங் – ‘‘உப்பன்னங் காமவிதக்கங் நாதி⁴வாஸேதீ’’தி வத்வா ‘‘பஜஹதீ’’திஆதி³ வுத்தந்தி தமத்த²ங் த³ஸ்ஸெந்தோ ‘‘அனதி⁴வாஸெந்தோ கிங் கரோதீ’’திஆதி³மாஹ. பஹானஞ்செத்த² விக்க²ம்ப⁴னமேவ, ந ஸமுச்சே²தோ³தி த³ஸ்ஸேதுங் ‘‘வினோதே³தீ’’திஆதி³ வுத்தந்தி விக்க²ம்ப⁴னவஸேனேவ அத்தோ² த³ஸ்ஸிதோ. உப்பன்னுப்பன்னேதி தேஸங் பாபவிதக்கானங் உப்பாதா³வத்தா²க³ஹணங் வா கதங் ஸியா அனவஸேஸக்³க³ஹணங் வா. தேஸு பட²மங் ஸந்தா⁴யாஹ ‘‘உப்பன்னமத்தே’’தி, ஸம்பதிஜாதேதி அத்தோ². அனவஸேஸக்³க³ஹணங் ப்³யாபனிச்சா²யங் ஹோதீதி த³ஸ்ஸேதுங் ‘‘ஸதக்க²த்தும்பி உப்பன்னுப்பன்னே’’தி வுத்தங்.
Itipīti imināpi kāraṇena ayonisomanasikārasamuṭṭhitattāpi, lobhādisahagatattāpi, kusalappaṭipakkhatopītiādīhi kāraṇehi ayaṃ vitakko akusaloti attho. Iminā nayena sāvajjotiādīsupi attho veditabbo. Ettha ca akusalotiādinā diṭṭhadhammikaṃ kāmavitakkassa ādīnavaṃ dasseti, dukkhavipākoti iminā samparāyikaṃ. Attabyābādhāya saṃvattatītiādīsupi imināva nayena ādīnavavibhāvanā veditabbā. Uppannassa kāmavitakkassa anadhivāsanaṃ nāma puna tādisassa anuppādanaṃ. Taṃ panassa pahānaṃ vinodanaṃ byantikaraṇaṃ anabhāvagamananti ca vattuṃ vaṭṭatīti pāḷiyaṃ – ‘‘uppannaṃ kāmavitakkaṃ nādhivāsetī’’ti vatvā ‘‘pajahatī’’tiādi vuttanti tamatthaṃ dassento ‘‘anadhivāsento kiṃ karotī’’tiādimāha. Pahānañcettha vikkhambhanameva, na samucchedoti dassetuṃ ‘‘vinodetī’’tiādi vuttanti vikkhambhanavaseneva attho dassito. Uppannuppanneti tesaṃ pāpavitakkānaṃ uppādāvatthāgahaṇaṃ vā kataṃ siyā anavasesaggahaṇaṃ vā. Tesu paṭhamaṃ sandhāyāha ‘‘uppannamatte’’ti, sampatijāteti attho. Anavasesaggahaṇaṃ byāpanicchāyaṃ hotīti dassetuṃ ‘‘satakkhattumpi uppannuppanne’’ti vuttaṃ.
ஞாதிவிதக்கோதி ‘‘அம்ஹாகங் ஞாதயோ ஸுக²ஜீவினோ ஸம்பத்தியுத்தா’’திஆதி³னா கே³ஹஸ்ஸிதபேமவஸேன ஞாதகே ஆரப்³ப⁴ உப்பன்னவிதக்கோ. ஜனபத³விதக்கோதி ‘‘அம்ஹாகங் ஜனபதோ³ ஸுபி⁴க்கோ² ஸம்பன்னஸஸ்ஸோ ரமணீயோ’’திஆதி³னா கே³ஹஸ்ஸிதபேமவஸேன ஜனபத³ங் ஆரப்³ப⁴ உப்பன்னவிதக்கோ. உக்குடிகப்பதா⁴னாதீ³ஹி து³க்கே² நிஜ்ஜிண்ணே ஸம்பராயே ஸத்தா ஸுகீ² ஹொந்தி அமராதி து³க்கரகாரிகாய படிஸங்யுத்தோ அமரத்தா²ய விதக்கோ. தங் வா ஆரப்³ப⁴ அமராவிக்கே²பதி³ட்டி²ஸஹக³தோ அமரோ ச ஸோ விதக்கோ சாதி அமராவிதக்கோ. பரானுத்³த³யதாபடிஸங்யுத்தோதி பரேஸு உபட்டா²காதீ³ஸு ஸஹனந்தி³தாதி³வஸேன பவத்தோ அனுத்³த³யதாபதிரூபகோ கே³ஹஸ்ஸிதபேமப்படிஸங்யுத்தோ விதக்கோ. லாப⁴ஸக்காரஸிலோகப்படிஸங்யுத்தோதி சீவராதி³லாபே⁴ன ச ஸக்காரேன ச கித்திஸத்³தே³ன ச ஆரம்மணகரணவஸேன படிஸங்யுத்தோ. அனவஞ்ஞத்திப்படிஸங்யுத்தோதி ‘‘அஹோ வத மங் பரே ந அவஜானெய்யுங், ந ஹெட்டா² கத்வா மஞ்ஞெய்யுங், பாஸாணச்ச²த்தங் விய க³ருங் கரெய்யு’’ந்தி உப்பன்னவிதக்கோ.
Ñātivitakkoti ‘‘amhākaṃ ñātayo sukhajīvino sampattiyuttā’’tiādinā gehassitapemavasena ñātake ārabbha uppannavitakko. Janapadavitakkoti ‘‘amhākaṃ janapado subhikkho sampannasasso ramaṇīyo’’tiādinā gehassitapemavasena janapadaṃ ārabbha uppannavitakko. Ukkuṭikappadhānādīhi dukkhe nijjiṇṇe samparāye sattā sukhī honti amarāti dukkarakārikāya paṭisaṃyutto amaratthāya vitakko. Taṃ vā ārabbha amarāvikkhepadiṭṭhisahagato amaro ca so vitakko cāti amarāvitakko. Parānuddayatāpaṭisaṃyuttoti paresu upaṭṭhākādīsu sahananditādivasena pavatto anuddayatāpatirūpako gehassitapemappaṭisaṃyutto vitakko. Lābhasakkārasilokappaṭisaṃyuttoti cīvarādilābhena ca sakkārena ca kittisaddena ca ārammaṇakaraṇavasena paṭisaṃyutto. Anavaññattippaṭisaṃyuttoti ‘‘aho vata maṃ pare na avajāneyyuṃ, na heṭṭhā katvā maññeyyuṃ, pāsāṇacchattaṃ viya garuṃ kareyyu’’nti uppannavitakko.
காமவிதக்கோ காமஸங்கப்பனஸபா⁴வதோ காமாஸவப்பத்தியா ஸாதிஸயத்தா ச காமனாகாரோதி ஆஹ ‘‘காமவிதக்கோ பனெத்த² காமாஸவோ’’தி. தப்³பி³ஸேஸோதி காமாஸவவிஸேஸோ ப⁴வஸபா⁴வத்தாதி அதி⁴ப்பாயோ. காமவிதக்காதி³கே வினோதே³தி அத்தனோ ஸந்தானதோ நீஹரதி ஏதேனாதி வினோத³னங், வீரியந்தி ஆஹ ‘‘வீரியஸங்வரஸங்கா²தேன வினோத³னேனா’’தி.
Kāmavitakko kāmasaṅkappanasabhāvato kāmāsavappattiyā sātisayattā ca kāmanākāroti āha ‘‘kāmavitakko panettha kāmāsavo’’ti. Tabbisesoti kāmāsavaviseso bhavasabhāvattāti adhippāyo. Kāmavitakkādike vinodeti attano santānato nīharati etenāti vinodanaṃ, vīriyanti āha ‘‘vīriyasaṃvarasaṅkhātena vinodanenā’’ti.
‘‘ஸத்த பொ³ஜ்ஜ²ங்கா³ பா⁴விதா ப³ஹுலீகதா விஜ்ஜாவிமுத்தியோ பரிபூரெந்தீ’’தி வசனதோ விஜ்ஜாவிமுத்தீனங் அனதி⁴க³மோ ததோ ச ஸகலவட்டது³க்கா²னதிவத்தி அபா⁴வனாய ஆதீ³னவோ. வுத்தவிபரியாயேன ப⁴க³வதோ ஓரஸபுத்தபா⁴வாதி³வஸேன ச பா⁴வனாய ஆனிஸங்ஸோ வேதி³தப்³போ³. தோ²மெந்தோதி ஆஸவபஹானஸ்ஸ து³க்கரத்தா தாய ஏவ து³க்கரகிரியாய தங் அபி⁴த்த²வந்தோ. ஸங்வரேனேவ பஹீனாதி ஸங்வரேன பஹீனா ஏவ. தேன வுத்தங் ‘‘ந அப்பஹீனேஸுயேவ பஹீனஸஞ்ஞீ’’தி.
‘‘Satta bojjhaṅgā bhāvitā bahulīkatā vijjāvimuttiyo paripūrentī’’ti vacanato vijjāvimuttīnaṃ anadhigamo tato ca sakalavaṭṭadukkhānativatti abhāvanāya ādīnavo. Vuttavipariyāyena bhagavato orasaputtabhāvādivasena ca bhāvanāya ānisaṃso veditabbo. Thomentoti āsavapahānassa dukkarattā tāya eva dukkarakiriyāya taṃ abhitthavanto. Saṃvareneva pahīnāti saṃvarena pahīnā eva. Tena vuttaṃ ‘‘na appahīnesuyeva pahīnasaññī’’ti.
ஆஸவஸுத்தவண்ணனா நிட்டி²தா.
Āsavasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. ஆஸவஸுத்தங் • 4. Āsavasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. ஆஸவஸுத்தவண்ணனா • 4. Āsavasuttavaṇṇanā
