| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੪. ਆਸવਸੁਤ੍ਤવਣ੍ਣਨਾ
4. Āsavasuttavaṇṇanā
੫੮. ਚਤੁਤ੍ਥੇ ਸਂવਰਾ ਪਹਾਤਬ੍ਬਾਤਿ ਸਂવਰੇਨ ਪਹਾਤਬ੍ਬਾ। ਸੇਸੇਸੁਪਿ ਏਸੇવ ਨਯੋ। ਇਧਾਤਿ ਇਮਸ੍ਮਿਂ ਸਾਸਨੇ। ਪਟਿਸਙ੍ਖਾਤਿ ਪਟਿਸਞ੍ਜਾਨਿਤ੍વਾ, ਪਚ੍ਚવੇਕ੍ਖਿਤ੍વਾਤਿ ਅਤ੍ਥੋ। ਯੋਨਿਸੋਤਿ ਉਪਾਯੇਨ ਪਥੇਨ। ਏਤ੍ਥ ਚ ਅਸਂવਰੇ ਆਦੀਨવਪਟਿਸਙ੍ਖਾ ਯੋਨਿਸੋ ਪਟਿਸਙ੍ਖਾਤਿ વੇਦਿਤਬ੍ਬਾ। ਸਾ ਚਾਯਂ ‘‘વਰਂ, ਭਿਕ੍ਖવੇ, ਤਤ੍ਤਾਯ ਅਯੋਸਲਾਕਾਯ ਆਦਿਤ੍ਤਾਯ ਸਮ੍ਪਜ੍ਜਲਿਤਾਯ ਸਜੋਤਿਭੂਤਾਯ ਚਕ੍ਖੁਨ੍ਦ੍ਰਿਯਂ ਸਮ੍ਪਲਿਮਟ੍ਠਂ, ਨ ਤ੍વੇવ ਚਕ੍ਖੁવਿਞ੍ਞੇਯ੍ਯੇਸੁ ਰੂਪੇਸੁ ਅਨੁਬ੍ਯਞ੍ਜਨਸੋ ਨਿਮਿਤ੍ਤਗ੍ਗਾਹੋ’’ਤਿਆਦਿਨਾ ਆਦਿਤ੍ਤਪਰਿਯਾਯੇਨ (ਸਂ॰ ਨਿ॰ ੪.੨੩੫) વੇਦਿਤਬ੍ਬਾ। ਚਕ੍ਖੁਨ੍ਦ੍ਰਿਯਸਂવਰਸਂવੁਤੋ વਿਹਰਤੀਤਿ ਏਤ੍ਥ ਚਕ੍ਖੁਮੇવ ਇਨ੍ਦ੍ਰਿਯਂ ਚਕ੍ਖੁਨ੍ਦ੍ਰਿਯਂ, ਸਂવਰਣਤੋ ਸਂવਰੋ, ਪਿਦਹਨਤੋ ਥਕਨਤੋਤਿ વੁਤ੍ਤਂ ਹੋਤਿ। ਸਤਿਯਾ ਏਤਂ ਅਧਿવਚਨਂ। ਚਕ੍ਖੁਨ੍ਦ੍ਰਿਯੇ ਸਂવਰੋ ਚਕ੍ਖੁਨ੍ਦ੍ਰਿਯਸਂવਰੋ। ਜવਨੇ ਉਪ੍ਪਜ੍ਜਮਾਨੋਪਿ ਹੇਸ ਤਸ੍ਮਿਂ ਦ੍વਾਰੇ ਕਿਲੇਸਾਨਂ ਉਪ੍ਪਤ੍ਤਿવਾਰਣਤੋ ਚਕ੍ਖੁਨ੍ਦ੍ਰਿਯਸਂવਰੋਤਿ વੁਚ੍ਚਤਿ। ਸਂવੁਤੋਤਿ ਤੇਨ ਸਂવਰੇਨ ਉਪੇਤੋ। ਤਥਾ ਹਿ ‘‘ਪਾਤਿਮੋਕ੍ਖਸਂવਰਸਂવੁਤੋ’’ਤਿ ਇਮਸ੍ਸ વਿਭਙ੍ਗੇ ‘‘ਇਮਿਨਾ ਪਾਤਿਮੋਕ੍ਖਸਂવਰੇਨ ਉਪੇਤੋ ਹੋਤਿ…ਪੇ॰… ਸਮਨ੍ਨਾਗਤੋ’’ਤਿ વੁਤ੍ਤਂ। ਅਥ વਾ ਸਂવਰੀਤਿ ਸਂવੁਤੋ, ਥਕੇਸਿ ਪਿਦਹੀਤਿ વੁਤ੍ਤਂ ਹੋਤਿ। ਚਕ੍ਖੁਨ੍ਦ੍ਰਿਯਸਂવਰਸਂવੁਤੋਤਿ ਚਕ੍ਖੁਨ੍ਦ੍ਰਿਯਸਂવਰਸਙ੍ਖਾਤਂ ਸਤਿਕવਾਟਂ ਚਕ੍ਖੁਦ੍વਾਰੇ ਘਰਦ੍વਾਰੇ ਕવਾਟਂ વਿਯ ਸਂવਰਿ ਥਕੇਸਿ ਪਿਦਹੀਤਿ વੁਤ੍ਤਂ ਹੋਤਿ। ਅਯਮੇવੇਤ੍ਥ ਅਤ੍ਥੋ ਸੁਨ੍ਦਰਤਰੋ। ਤਥਾ ਹਿ ‘‘ਚਕ੍ਖੁਨ੍ਦ੍ਰਿਯਸਂવਰਂ ਅਸਂવੁਤਸ੍ਸ વਿਹਰਤੋ, ਸਂવੁਤਸ੍ਸ વਿਹਰਤੋ’’ਤਿ ਏਤੇਸੁ ਪਦੇਸੁ ਅਯਮੇવਤ੍ਥੋ ਦਿਸ੍ਸਤੀਤਿ।
58. Catutthe saṃvarā pahātabbāti saṃvarena pahātabbā. Sesesupi eseva nayo. Idhāti imasmiṃ sāsane. Paṭisaṅkhāti paṭisañjānitvā, paccavekkhitvāti attho. Yonisoti upāyena pathena. Ettha ca asaṃvare ādīnavapaṭisaṅkhā yoniso paṭisaṅkhāti veditabbā. Sā cāyaṃ ‘‘varaṃ, bhikkhave, tattāya ayosalākāya ādittāya sampajjalitāya sajotibhūtāya cakkhundriyaṃ sampalimaṭṭhaṃ, na tveva cakkhuviññeyyesu rūpesu anubyañjanaso nimittaggāho’’tiādinā ādittapariyāyena (saṃ. ni. 4.235) veditabbā. Cakkhundriyasaṃvarasaṃvutoviharatīti ettha cakkhumeva indriyaṃ cakkhundriyaṃ, saṃvaraṇato saṃvaro, pidahanato thakanatoti vuttaṃ hoti. Satiyā etaṃ adhivacanaṃ. Cakkhundriye saṃvaro cakkhundriyasaṃvaro. Javane uppajjamānopi hesa tasmiṃ dvāre kilesānaṃ uppattivāraṇato cakkhundriyasaṃvaroti vuccati. Saṃvutoti tena saṃvarena upeto. Tathā hi ‘‘pātimokkhasaṃvarasaṃvuto’’ti imassa vibhaṅge ‘‘iminā pātimokkhasaṃvarena upeto hoti…pe… samannāgato’’ti vuttaṃ. Atha vā saṃvarīti saṃvuto, thakesi pidahīti vuttaṃ hoti. Cakkhundriyasaṃvarasaṃvutoti cakkhundriyasaṃvarasaṅkhātaṃ satikavāṭaṃ cakkhudvāre gharadvāre kavāṭaṃ viya saṃvari thakesi pidahīti vuttaṃ hoti. Ayamevettha attho sundarataro. Tathā hi ‘‘cakkhundriyasaṃvaraṃ asaṃvutassa viharato, saṃvutassa viharato’’ti etesu padesu ayamevattho dissatīti.
ਯਂ ਹਿਸ੍ਸਾਤਿਆਦਿਮ੍ਹਿ ਯਂ ਚਕ੍ਖੁਨ੍ਦ੍ਰਿਯਸਂવਰਂ ਅਸ੍ਸ ਭਿਕ੍ਖੁਨੋ ਅਸਂવੁਤਸ੍ਸ ਅਥਕੇਤ੍વਾ ਅਪਿਦਹਿਤ੍વਾ વਿਹਰਨ੍ਤਸ੍ਸਾਤਿ ਅਤ੍ਥੋ। ਯੇਕਾਰਸ੍ਸ વਾ ਏਸ ਯਨ੍ਤਿ ਆਦੇਸੋ, ਯੇ ਅਸ੍ਸਾਤਿ ਅਤ੍ਥੋ। ਆਸવਾ વਿਘਾਤਪਰਿਲ਼ਾਹਾਤਿ ਚਤ੍ਤਾਰੋ ਆਸવਾ ਚ ਅਞ੍ਞੇ ਚ વਿਘਾਤਕਰਾ ਕਿਲੇਸਪਰਿਲ਼ਾਹਾ વਿਪਾਕਪਰਿਲ਼ਾਹਾ વਾ। ਚਕ੍ਖੁਦ੍વਾਰਸ੍ਮਿਞ੍ਹਿ ਇਟ੍ਠਾਰਮ੍ਮਣਂ ਆਪਾਥਗਤਂ ਕਾਮਸ੍ਸਾਦવਸੇਨ ਅਸ੍ਸਾਦਯਤੋ ਅਭਿਨਨ੍ਦਤੋ ਕਾਮਾਸવੋ ਉਪ੍ਪਜ੍ਜਤਿ, ‘‘ਈਦਿਸਂ ਅਞ੍ਞਸ੍ਮਿਮ੍ਪਿ ਸੁਗਤਿਭવੇ ਲਭਿਸ੍ਸਾਮੀ’’ਤਿ ਭવਪਤ੍ਥਨਾਯ ਅਸ੍ਸਾਦਯਤੋ ਭવਾਸવੋ ਉਪ੍ਪਜ੍ਜਤਿ, ਸਤ੍ਤੋਤਿ વਾ ਸਤ੍ਤਸ੍ਸਾਤਿ વਾ ਗਣ੍ਹਤੋ ਦਿਟ੍ਠਾਸવੋ ਉਪ੍ਪਜ੍ਜਤਿ, ਸਬ੍ਬੇਹੇવ ਸਹਜਾਤਂ ਅਞ੍ਞਾਣਂ ਅવਿਜ੍ਜਾਸવੋਤਿ ਚਤ੍ਤਾਰੋ ਆਸવਾ ਉਪ੍ਪਜ੍ਜਨ੍ਤਿ । ਏਤੇਹਿ ਸਮ੍ਪਯੁਤ੍ਤਾ ਅਪਰੇ ਕਿਲੇਸਾ વਿਘਾਤਪਰਿਲ਼ਾਹਾ ਆਯਤਿਂ વਾ ਤੇਸਂ વਿਪਾਕਾ ਤੇਹਿਪਿ ਅਸਂવੁਤਸ੍ਸੇવ વਿਹਰਤੋ ਉਪ੍ਪਜ੍ਜੇਯ੍ਯੁਨ੍ਤਿ વੁਚ੍ਚਨ੍ਤਿ। ਏવਂਸ ਤੇਤਿ ਏવਂ ਅਸ੍ਸ ਤੇ, ਏਤੇਨੁਪਾਯੇਨ ਨ ਹੋਨ੍ਤਿ, ਨੋ ਅਞ੍ਞਥਾਤਿ વੁਤ੍ਤਂ ਹੋਤਿ। ਪਟਿਸਙ੍ਖਾ ਯੋਨਿਸੋ ਸੋਤਿਨ੍ਦ੍ਰਿਯਸਂવਰਸਂવੁਤੋਤਿਆਦੀਸੁਪਿ ਏਸੇવ ਨਯੋ। ਇਮੇ વੁਚ੍ਚਨ੍ਤਿ ਆਸવਾ ਸਂવਰਾ ਪਹਾਤਬ੍ਬਾਤਿ ਇਮੇਸੁ ਛਸੁ ਦ੍વਾਰੇਸੁ ਚਤ੍ਤਾਰੋ ਚਤ੍ਤਾਰੋ ਕਤ੍વਾ ਚਤੁવੀਸਤਿ ਆਸવਾ ਸਂવਰੇਨ ਪਹਾਤਬ੍ਬਾਤਿ વੁਚ੍ਚਨ੍ਤਿ।
Yaṃ hissātiādimhi yaṃ cakkhundriyasaṃvaraṃ assa bhikkhuno asaṃvutassa athaketvā apidahitvā viharantassāti attho. Yekārassa vā esa yanti ādeso, ye assāti attho. Āsavā vighātapariḷāhāti cattāro āsavā ca aññe ca vighātakarā kilesapariḷāhā vipākapariḷāhā vā. Cakkhudvārasmiñhi iṭṭhārammaṇaṃ āpāthagataṃ kāmassādavasena assādayato abhinandato kāmāsavo uppajjati, ‘‘īdisaṃ aññasmimpi sugatibhave labhissāmī’’ti bhavapatthanāya assādayato bhavāsavo uppajjati, sattoti vā sattassāti vā gaṇhato diṭṭhāsavo uppajjati, sabbeheva sahajātaṃ aññāṇaṃ avijjāsavoti cattāro āsavā uppajjanti . Etehi sampayuttā apare kilesā vighātapariḷāhā āyatiṃ vā tesaṃ vipākā tehipi asaṃvutasseva viharato uppajjeyyunti vuccanti. Evaṃsateti evaṃ assa te, etenupāyena na honti, no aññathāti vuttaṃ hoti. Paṭisaṅkhā yoniso sotindriyasaṃvarasaṃvutotiādīsupi eseva nayo. Ime vuccanti āsavā saṃvarā pahātabbāti imesu chasu dvāresu cattāro cattāro katvā catuvīsati āsavā saṃvarena pahātabbāti vuccanti.
ਪਟਿਸਙ੍ਖਾ ਯੋਨਿਸੋ ਚੀવਰਨ੍ਤਿਆਦੀਸੁ ਯਂ વਤ੍ਤਬ੍ਬਂ, ਤਂ ਸਬ੍ਬਂ વਿਸੁਦ੍ਧਿਮਗ੍ਗੇ (વਿਸੁਦ੍ਧਿ॰ ੧.੧੮) ਸੀਲਕਥਾਯ વੁਤ੍ਤਮੇવ। ਯਂ ਹਿਸ੍ਸਾਤਿ ਯਞ੍ਹਿ ਚੀવਰਂ ਪਿਣ੍ਡਪਾਤਾਦੀਸੁ વਾ ਅਞ੍ਞਤਰਂ ਅਸ੍ਸ। ਅਪ੍ਪਟਿਸੇવਤੋਤਿ ਏવਂ ਯੋਨਿਸੋ ਅਪ੍ਪਟਿਸੇવਨ੍ਤਸ੍ਸ। ਇਮਸ੍ਮਿਂ વਾਰੇ ਅਲਦ੍ਧਂ ਚੀવਰਾਦਿਂ ਪਤ੍ਥਯਤੋ ਲਦ੍ਧਂ વਾ ਅਸ੍ਸਾਦਯਤੋ ਕਾਮਾਸવਸ੍ਸ ਉਪ੍ਪਤ੍ਤਿ વੇਦਿਤਬ੍ਬਾ, ਈਦਿਸਂ ਅਞ੍ਞਸ੍ਮਿਮ੍ਪਿ ਸੁਗਤਿਭવੇ ਲਭਿਸ੍ਸਾਮੀਤਿ ਭવਪਤ੍ਥਨਾਯ ਅਸ੍ਸਾਦਯਤੋ ਭવਾਸવਸ੍ਸ, ਅਹਂ ਲਭਾਮਿ ਨ ਲਭਾਮੀਤਿ વਾ ਮਯ੍ਹਂ વਾ ਇਦਨ੍ਤਿ ਅਤ੍ਤਸਞ੍ਞਂ ਅਧਿਟ੍ਠਹਤੋ ਦਿਟ੍ਠਾਸવਸ੍ਸ, ਸਬ੍ਬੇਹੇવ ਪਨ ਸਹਜਾਤੋ ਅવਿਜ੍ਜਾਸવੋਤਿ ਏવਂ ਚਤੁਨ੍ਨਂ ਆਸવਾਨਂ ਉਪ੍ਪਤ੍ਤਿ વਿਘਾਤਪਰਿਲ਼ਾਹਾવ ਨવવੇਦਨੁਪ੍ਪਾਦਨਤੋਪਿ વੇਦਿਤਬ੍ਬਾ। ਇਮੇ વੁਚ੍ਚਨ੍ਤਿ, ਭਿਕ੍ਖવੇ, ਆਸવਾ ਪਟਿਸੇવਨਾ ਪਹਾਤਬ੍ਬਾਤਿ ਇਮੇ ਏਕਮੇਕਸ੍ਮਿਂ ਪਚ੍ਚਯੇ ਚਤ੍ਤਾਰੋ ਚਤ੍ਤਾਰੋ ਕਤ੍વਾ ਸੋਲ਼ਸ ਆਸવਾ ਇਮਿਨਾ ਞਾਣਸਂવਰਸਙ੍ਖਾਤੇਨ ਪਚ੍ਚવੇਕ੍ਖਣਪਟਿਸੇવਨੇਨ ਪਹਾਤਬ੍ਬਾਤਿ વੁਚ੍ਚਨ੍ਤਿ।
Paṭisaṅkhā yoniso cīvarantiādīsu yaṃ vattabbaṃ, taṃ sabbaṃ visuddhimagge (visuddhi. 1.18) sīlakathāya vuttameva. Yaṃ hissāti yañhi cīvaraṃ piṇḍapātādīsu vā aññataraṃ assa. Appaṭisevatoti evaṃ yoniso appaṭisevantassa. Imasmiṃ vāre aladdhaṃ cīvarādiṃ patthayato laddhaṃ vā assādayato kāmāsavassa uppatti veditabbā, īdisaṃ aññasmimpi sugatibhave labhissāmīti bhavapatthanāya assādayato bhavāsavassa, ahaṃ labhāmi na labhāmīti vā mayhaṃ vā idanti attasaññaṃ adhiṭṭhahato diṭṭhāsavassa, sabbeheva pana sahajāto avijjāsavoti evaṃ catunnaṃ āsavānaṃ uppatti vighātapariḷāhāva navavedanuppādanatopi veditabbā. Ime vuccanti, bhikkhave, āsavā paṭisevanā pahātabbāti ime ekamekasmiṃ paccaye cattāro cattāro katvā soḷasa āsavā iminā ñāṇasaṃvarasaṅkhātena paccavekkhaṇapaṭisevanena pahātabbāti vuccanti.
ਪਟਿਸਙ੍ਖਾ ਯੋਨਿਸੋ ਖਮੋ ਹੋਤਿ ਸੀਤਸ੍ਸਾਤਿ ਉਪਾਯੇਨ ਪਥੇਨ ਪਚ੍ਚવੇਕ੍ਖਿਤ੍વਾ ਖਨ੍ਤਾ ਹੋਤਿ ਸੀਤਸ੍ਸ, ਸੀਤਂ ਖਮਤਿ ਸਹਤਿ, ਨ ਅવੀਰਪੁਰਿਸੋ વਿਯ ਅਪ੍ਪਮਤ੍ਤਕੇਨਪਿ ਸੀਤੇਨ ਚਲਤਿ ਕਮ੍ਪਤਿ ਕਮ੍ਮਟ੍ਠਾਨਂ વਿਜਹਤਿ। ਉਣ੍ਹਾਦੀਸੁਪਿ ਏਸੇવ ਨਯੋ। ਏਤ੍ਥ ਚ વਚਨਮੇવ વਚਨਪਥੋਤਿ વੇਦਿਤਬ੍ਬੋ। ਦੁਕ੍ਖਾਨਨ੍ਤਿਆਦੀਸੁ ਦੁਕ੍ਖਮਨਟ੍ਠੇਨ ਦੁਕ੍ਖਾ, ਬਹਲਟ੍ਠੇਨ ਤਿਬ੍ਬਾ, ਫਰੁਸਟ੍ਠੇਨ ਖਰਾ, ਤਿਖਿਣਟ੍ਠੇਨ ਕਟੁਕਾ, ਅਸ੍ਸਾਦવਿਰਹਤੋ ਅਸਾਤਾ, ਮਨਂ ਅવਡ੍ਢਨਤੋ ਅਮਨਾਪਾ, ਪਾਣਹਰਣਸਮਤ੍ਥਤਾਯ ਪਾਣਹਰਾਤਿ વੇਦਿਤਬ੍ਬਾ। ਯਂ ਹਿਸ੍ਸਾਤਿ ਸੀਤਾਦੀਸੁ ਯਂਕਿਞ੍ਚਿ ਏਕਧਮ੍ਮਮ੍ਪਿ ਅਸ੍ਸ। ਅਨਧਿવਾਸਤੋਤਿ ਅਨਧਿવਾਸੇਨ੍ਤਸ੍ਸ ਅਕ੍ਖਮਨ੍ਤਸ੍ਸ । ਆਸવੁਪ੍ਪਤ੍ਤਿ ਪਨੇਤ੍ਥ ਏવਂ વੇਦਿਤਬ੍ਬਾ – ਸੀਤੇਨ ਫੁਟ੍ਠਸ੍ਸ ਉਣ੍ਹਂ ਪਤ੍ਥਯਤੋ ਕਾਮਾਸવੋ ਉਪ੍ਪਜ੍ਜਤਿ, ਏવਂ ਸਬ੍ਬਤ੍ਥ। ‘‘ਨਤ੍ਥਿ ਸੁਗਤਿਭવੇ ਸੀਤਂ વਾ ਉਣ੍ਹਂ વਾ’’ਤਿ ਭવਂ ਪਤ੍ਥੇਨ੍ਤਸ੍ਸ ਭવਾਸવੋ, ਮਯ੍ਹਂ ਸੀਤਂ ਉਣ੍ਹਨ੍ਤਿ ਗਾਹੋ ਦਿਟ੍ਠਾਸવੋ, ਸਬ੍ਬੇਹੇવ ਸਮ੍ਪਯੁਤ੍ਤੋ ਅવਿਜ੍ਜਾਸવੋਤਿ। ਇਮੇ વੁਚ੍ਚਨ੍ਤੀਤਿ ਇਮੇ ਸੀਤਾਦੀਸੁ ਏਕਮੇਕਸ੍ਸ વਸੇਨ ਚਤ੍ਤਾਰੋ ਚਤ੍ਤਾਰੋ ਕਤ੍વਾ ਅਨੇਕੇ ਆਸવਾ ਇਮਾਯ ਖਨ੍ਤਿਸਂવਰਸਙ੍ਖਾਤਾਯ ਅਧਿવਾਸਨਾਯ ਪਹਾਤਬ੍ਬਾਤਿ વੁਚ੍ਚਨ੍ਤੀਤਿ ਅਤ੍ਥੋ।
Paṭisaṅkhā yoniso khamo hoti sītassāti upāyena pathena paccavekkhitvā khantā hoti sītassa, sītaṃ khamati sahati, na avīrapuriso viya appamattakenapi sītena calati kampati kammaṭṭhānaṃ vijahati. Uṇhādīsupi eseva nayo. Ettha ca vacanameva vacanapathoti veditabbo. Dukkhānantiādīsu dukkhamanaṭṭhena dukkhā, bahalaṭṭhena tibbā, pharusaṭṭhena kharā, tikhiṇaṭṭhena kaṭukā, assādavirahato asātā, manaṃ avaḍḍhanato amanāpā, pāṇaharaṇasamatthatāya pāṇaharāti veditabbā. Yaṃ hissāti sītādīsu yaṃkiñci ekadhammampi assa. Anadhivāsatoti anadhivāsentassa akkhamantassa . Āsavuppatti panettha evaṃ veditabbā – sītena phuṭṭhassa uṇhaṃ patthayato kāmāsavo uppajjati, evaṃ sabbattha. ‘‘Natthi sugatibhave sītaṃ vā uṇhaṃ vā’’ti bhavaṃ patthentassa bhavāsavo, mayhaṃ sītaṃ uṇhanti gāho diṭṭhāsavo, sabbeheva sampayutto avijjāsavoti. Ime vuccantīti ime sītādīsu ekamekassa vasena cattāro cattāro katvā aneke āsavā imāya khantisaṃvarasaṅkhātāya adhivāsanāya pahātabbāti vuccantīti attho.
ਪਟਿਸਙ੍ਖਾ ਯੋਨਿਸੋ ਚਣ੍ਡਂ ਹਤ੍ਥਿਂ ਪਰਿવਜ੍ਜੇਤੀਤਿ ਅਹਂ ਸਮਣੋਤਿ ਨ ਚਣ੍ਡਸ੍ਸ ਹਤ੍ਥਿਸ੍ਸ ਆਸਨ੍ਨੇ ਠਾਤਬ੍ਬਂ। ਤਤੋਨਿਦਾਨਞ੍ਹਿ ਮਰਣਮ੍ਪਿ ਮਰਣਮਤ੍ਤਮ੍ਪਿ ਦੁਕ੍ਖਂ ਭવੇਯ੍ਯਾਤਿ ਏવਂ ਉਪਾਯੇਨ ਪਥੇਨ ਪਚ੍ਚવੇਕ੍ਖਿਤ੍વਾ ਚਣ੍ਡਂ ਹਤ੍ਥਿਂ ਪਰਿવਜ੍ਜੇਤਿ ਪਟਿਕ੍ਕਮਤਿ। ਏਸ ਨਯੋ ਸਬ੍ਬਤ੍ਥ। ਚਣ੍ਡਨ੍ਤਿ ਦੁਟ੍ਠਂ વਾਲ਼ਂ। ਖਾਣੁਨ੍ਤਿ ਖਦਿਰਖਾਣੁਕਾਦਿਂ। ਕਣ੍ਟਕਟ੍ਠਾਨਨ੍ਤਿ ਯਤ੍ਥ ਕਣ੍ਟਕਾ વਿਜ੍ਝਨ੍ਤਿ, ਤਂ ਓਕਾਸਂ। ਸੋਬ੍ਭਨ੍ਤਿ ਸਬ੍ਬਤੋ ਛਿਨ੍ਨਤਟਂ। ਪਪਾਤਨ੍ਤਿ ਏਕਤੋ ਛਿਨ੍ਨਤਟਂ। ਚਨ੍ਦਨਿਕਨ੍ਤਿ ਉਚ੍ਛਿਟ੍ਠੋਦਕਗਬ੍ਭਮਲਾਦੀਨਂ ਛਡ੍ਡਨਟ੍ਠਾਨਂ। ਓਲ਼ਿਗਲ੍ਲਨ੍ਤਿ ਤੇਸਂਯੇવ ਕਦ੍ਦਮਾਦੀਨਂ ਸਨ੍ਦਨੋਕਾਸਂ। ਤਂ ਜਣ੍ਣੁਮਤ੍ਤਮ੍ਪਿ ਅਸੁਚਿਭਰਿਤਂ ਹੋਤਿ। ਦ੍વੇਪਿ ਚੇਤਾਨਿ ਠਾਨਾਨਿ ਅਮਨੁਸ੍ਸੁਸ੍ਸਦਟ੍ਠਾਨਾਨਿ ਹੋਨ੍ਤਿ, ਤਸ੍ਮਾ વਜ੍ਜੇਤਬ੍ਬਾਨਿ। ਅਨਾਸਨੇਤਿ ਏਤ੍ਥ ਅਯੁਤ੍ਤਂ ਆਸਨਂ ਅਨਾਸਨਂ, ਤਂ ਅਤ੍ਥਤੋ ਅਨਿਯਤવਤ੍ਥੁਭੂਤਂ ਰਹੋਪਟਿਚ੍ਛਨ੍ਨਾਸਨਨ੍ਤਿ વੇਦਿਤਬ੍ਬਂ। ਅਗੋਚਰੇਤਿ ਏਤ੍ਥਪਿ ਅਯੁਤ੍ਤੋ ਗੋਚਰੋ ਅਗੋਚਰੋ। ਸੋ વੇਸਿਯਾਦਿਭੇਦਤੋ ਪਞ੍ਚવਿਧੋ। ਪਾਪਕੇ ਮਿਤ੍ਤੇਤਿ ਲਾਮਕੇ ਦੁਸ੍ਸੀਲੇ ਮਿਤ੍ਤਪਤਿਰੂਪਕੇ ਅਮਿਤ੍ਤੇ। ਪਾਪਕੇਸੂਤਿ ਲਾਮਕੇਸੁ। ਓਕਪ੍ਪੇਯ੍ਯੁਨ੍ਤਿ ਸਦ੍ਦਹੇਯ੍ਯੁਂ ਅਧਿਮੁਚ੍ਚੇਯ੍ਯੁਂ ‘‘ਅਦ੍ਧਾ ਅਯਮਾਯਸ੍ਮਾ ਅਕਾਸਿ વਾ ਕਰਿਸ੍ਸਤਿ વਾ’’ਤਿ। ਯਂ ਹਿਸ੍ਸਾਤਿ ਹਤ੍ਥਿਆਦੀਸੁ ਯਂਕਿਞ੍ਚਿ ਏਕਮ੍ਪਿ ਅਸ੍ਸ। ਆਸવੁਪ੍ਪਤ੍ਤਿ ਪਨੇਤ੍ਥ ਏવਂ વੇਦਿਤਬ੍ਬਾ – ਹਤ੍ਥਿਆਦਿਨਿਦਾਨੇਨ ਦੁਕ੍ਖੇਨ ਫੁਟ੍ਠਸ੍ਸ ਸੁਖਂ ਪਤ੍ਥਯਤੋ ਕਾਮਾਸવੋ ਉਪ੍ਪਜ੍ਜਤਿ, ‘‘ਨਤ੍ਥਿ ਸੁਗਤਿਭવੇ ਈਦਿਸਂ ਦੁਕ੍ਖ’’ਨ੍ਤਿ ਭવਂ ਪਤ੍ਥੇਨ੍ਤਸ੍ਸ ਭવਾਸવੋ, ਮਂ ਹਤ੍ਥੀ ਮਦ੍ਦਤਿ ਮਂ ਅਸ੍ਸੋਤਿ ਗਾਹੋ ਦਿਟ੍ਠਾਸવੋ, ਸਬ੍ਬੇਹੇવ ਸਮ੍ਪਯੁਤ੍ਤੋ ਅવਿਜ੍ਜਾਸવੋਤਿ। ਇਮੇ વੁਚ੍ਚਨ੍ਤੀਤਿ ਇਮੇ ਹਤ੍ਥਿਆਦੀਸੁ ਏਕੇਕਸ੍ਸ વਸੇਨ ਚਤ੍ਤਾਰੋ ਚਤ੍ਤਾਰੋ ਕਤ੍વਾ ਅਨੇਕੇ ਆਸવਾ ਇਮਿਨਾ ਸੀਲਸਂવਰਸਙ੍ਖਾਤੇਨ ਪਰਿવਜ੍ਜਨੇਨ ਪਹਾਤਬ੍ਬਾਤਿ વੁਚ੍ਚਨ੍ਤਿ।
Paṭisaṅkhā yoniso caṇḍaṃ hatthiṃ parivajjetīti ahaṃ samaṇoti na caṇḍassa hatthissa āsanne ṭhātabbaṃ. Tatonidānañhi maraṇampi maraṇamattampi dukkhaṃ bhaveyyāti evaṃ upāyena pathena paccavekkhitvā caṇḍaṃ hatthiṃ parivajjeti paṭikkamati. Esa nayo sabbattha. Caṇḍanti duṭṭhaṃ vāḷaṃ. Khāṇunti khadirakhāṇukādiṃ. Kaṇṭakaṭṭhānanti yattha kaṇṭakā vijjhanti, taṃ okāsaṃ. Sobbhanti sabbato chinnataṭaṃ. Papātanti ekato chinnataṭaṃ. Candanikanti ucchiṭṭhodakagabbhamalādīnaṃ chaḍḍanaṭṭhānaṃ. Oḷigallanti tesaṃyeva kaddamādīnaṃ sandanokāsaṃ. Taṃ jaṇṇumattampi asucibharitaṃ hoti. Dvepi cetāni ṭhānāni amanussussadaṭṭhānāni honti, tasmā vajjetabbāni. Anāsaneti ettha ayuttaṃ āsanaṃ anāsanaṃ, taṃ atthato aniyatavatthubhūtaṃ rahopaṭicchannāsananti veditabbaṃ. Agocareti etthapi ayutto gocaro agocaro. So vesiyādibhedato pañcavidho. Pāpake mitteti lāmake dussīle mittapatirūpake amitte. Pāpakesūti lāmakesu. Okappeyyunti saddaheyyuṃ adhimucceyyuṃ ‘‘addhā ayamāyasmā akāsi vā karissati vā’’ti. Yaṃ hissāti hatthiādīsu yaṃkiñci ekampi assa. Āsavuppatti panettha evaṃ veditabbā – hatthiādinidānena dukkhena phuṭṭhassa sukhaṃ patthayato kāmāsavo uppajjati, ‘‘natthi sugatibhave īdisaṃ dukkha’’nti bhavaṃ patthentassa bhavāsavo, maṃ hatthī maddati maṃ assoti gāho diṭṭhāsavo, sabbeheva sampayutto avijjāsavoti. Ime vuccantīti ime hatthiādīsu ekekassa vasena cattāro cattāro katvā aneke āsavā iminā sīlasaṃvarasaṅkhātena parivajjanena pahātabbāti vuccanti.
ਪਟਿਸਙ੍ਖਾ ਯੋਨਿਸੋ ਉਪ੍ਪਨ੍ਨਂ ਕਾਮવਿਤਕ੍ਕਂ ਨਾਧਿવਾਸੇਤੀਤਿ ‘‘ਇਤਿਪਾਯਂ વਿਤਕ੍ਕੋ ਅਕੁਸਲੋ, ਇਤਿਪਿ ਸਾવਜ੍ਜੋ, ਇਤਿਪਿ ਦੁਕ੍ਖવਿਪਾਕੋ, ਸੋ ਚ ਖੋ ਅਤ੍ਤਬ੍ਯਾਬਾਧਾਯ ਸਂવਤ੍ਤਤੀ’’ਤਿਆਦਿਨਾ (ਮ॰ ਨਿ॰ ੧.੨੦੭-੨੦੮) ਨਯੇਨ ਯੋਨਿਸੋ ਕਾਮવਿਤਕ੍ਕੇ ਆਦੀਨવਂ ਪਚ੍ਚવੇਕ੍ਖਿਤ੍વਾ ਤਸ੍ਮਿਂ ਤਸ੍ਮਿਂ ਆਰਮ੍ਮਣੇ ਉਪ੍ਪਨ੍ਨਂ ਕਾਮવਿਤਕ੍ਕਂ ਨਾਧਿવਾਸੇਤਿ, ਚਿਤ੍ਤਂ ਆਰੋਪੇਤ੍વਾ ਨ વਾਸੇਤਿ, ਅਬ੍ਭਨ੍ਤਰੇ વਾ ਨ વਾਸੇਤੀਤਿ ਅਤ੍ਥੋ। ਅਨਧਿવਾਸੇਨ੍ਤੋ ਕਿਂ ਕਰੋਤੀਤਿ? ਪਜਹਤਿ। ਕਿਂ ਕਚવਰਂ વਿਯ ਪਿਟਕੇਨਾਤਿ? ਨ ਹਿ, ਅਪਿ ਚ ਖੋ ਨਂ વਿਨੋਦੇਤਿ ਤੁਦਤਿ વਿਜ੍ਝਤਿ ਨੀਹਰਤਿ। ਕਿਂ ਬਲਿਬਦ੍ਦਂ વਿਯ ਪਤੋਦੇਨਾਤਿ? ਨ ਹਿ, ਅਥ ਖੋ ਨਂ ਬ੍ਯਨ੍ਤੀਕਰੋਤਿ વਿਗਤਨ੍ਤਂ ਕਰੋਤਿ, ਯਥਾਸ੍ਸ ਅਨ੍ਤੋਪਿ ਨਾવਸਿਸ੍ਸਤਿ ਅਨ੍ਤਮਸੋ ਭਙ੍ਗਮਤ੍ਤਮ੍ਪਿ, ਤਥਾ ਨਂ ਕਰੋਤਿ। ਕਥਂ ਪਨ ਨਂ ਤਥਾ ਕਰੋਤੀਤਿ? ਅਨਭਾવਂ ਗਮੇਤਿ ਅਨੁ ਅਨੁ ਅਭਾવਂ ਗਮੇਤਿ, વਿਕ੍ਖਮ੍ਭਨਪ੍ਪਹਾਨੇਨ ਯਥਾ ਸੁવਿਕ੍ਖਮ੍ਭਿਤੋ ਹੋਤਿ, ਤਥਾ ਕਰੋਤਿ। ਸੇਸવਿਤਕ੍ਕਦ੍વਯੇਪਿ ਏਸੇવ ਨਯੋ। ਉਪ੍ਪਨ੍ਨੁਪ੍ਪਨ੍ਨੇਤਿ ਉਪ੍ਪਨ੍ਨੇ ਉਪ੍ਪਨ੍ਨੇ, ਉਪ੍ਪਨ੍ਨਮਤ੍ਤੇਯੇવਾਤਿ વੁਤ੍ਤਂ ਹੋਤਿ। ਸਕਿਂ વਾ ਉਪ੍ਪਨ੍ਨੇ વਿਨੋਦੇਤ੍વਾ ਦੁਤਿਯੇ વਾਰੇ ਅਜ੍ਝੁਪੇਕ੍ਖਿਤਾ ਨ ਹੋਤਿ, ਸਤਕ੍ਖਤ੍ਤੁਮ੍ਪਿ ਉਪ੍ਪਨ੍ਨੇ ਉਪ੍ਪਨ੍ਨੇ વਿਨੋਦੇਤਿਯੇવ। ਪਾਪਕੇ ਅਕੁਸਲੇ ਧਮ੍ਮੇਤਿ ਤੇਯੇવ ਕਾਮવਿਤਕ੍ਕਾਦਯੋ, ਸਬ੍ਬੇਪਿ વਾ ਨવ ਮਹਾવਿਤਕ੍ਕੇ। ਤਤ੍ਥ ਤਯੋ વੁਤ੍ਤਾ, ਅવਸੇਸਾ ‘‘ਞਾਤਿવਿਤਕ੍ਕੋ, ਜਨਪਦવਿਤਕ੍ਕੋ, ਅਮਰਾવਿਤਕ੍ਕੋ, ਪਰਾਨੁਦ੍ਦਯਤਾਪਟਿਸਂਯੁਤ੍ਤੋ વਿਤਕ੍ਕੋ, ਲਾਭਸਕ੍ਕਾਰਸਿਲੋਕਪ੍ਪਟਿਸਂਯੁਤ੍ਤੋ વਿਤਕ੍ਕੋ, ਅਨવਞ੍ਞਤ੍ਤਿਪ੍ਪਟਿਸਂਯੁਤ੍ਤੋ વਿਤਕ੍ਕੋ’’ਤਿ (ਮਹਾਨਿ॰ ੨੦੭) ਇਮੇ ਛ। ਯਂ ਹਿਸ੍ਸਾਤਿ ਏਤੇਸੁ વਿਤਕ੍ਕੇਸੁ ਯਂਕਿਞ੍ਚਿ ਅਸ੍ਸ। ਕਾਮવਿਤਕ੍ਕੋ ਪਨੇਤ੍ਥ ਕਾਮਾਸવੋ ਏવ, ਤਬ੍ਬਿਸੇਸੋ ਭવਾਸવੋ, ਤਂਸਮ੍ਪਯੁਤ੍ਤੋ ਦਿਟ੍ਠਾਸવੋ, ਸਬ੍ਬવਿਤਕ੍ਕੇਸੁ ਅવਿਜ੍ਜਾ ਅવਿਜ੍ਜਾਸવੋਤਿ ਏવਂ ਆਸવੁਪ੍ਪਤ੍ਤਿ વੇਦਿਤਬ੍ਬਾ। ਇਮੇ વੁਚ੍ਚਨ੍ਤੀਤਿ ਇਮੇ ਕਾਮવਿਤਕ੍ਕਾਦਿવਸੇਨ વੁਤ੍ਤਪ੍ਪਕਾਰਾ ਆਸવਾ ਇਮਿਨਾ ਤਸ੍ਮਿਂ ਤਸ੍ਮਿਂ વਿਤਕ੍ਕੇ ਆਦੀਨવਪਚ੍ਚવੇਕ੍ਖਣਸਹਿਤੇਨ વੀਰਿਯਸਂવਰਸਙ੍ਖਾਤੇਨ વਿਨੋਦਨੇਨ ਪਹਾਤਬ੍ਬਾਤਿ વੁਚ੍ਚਨ੍ਤਿ।
Paṭisaṅkhāyoniso uppannaṃ kāmavitakkaṃ nādhivāsetīti ‘‘itipāyaṃ vitakko akusalo, itipi sāvajjo, itipi dukkhavipāko, so ca kho attabyābādhāya saṃvattatī’’tiādinā (ma. ni. 1.207-208) nayena yoniso kāmavitakke ādīnavaṃ paccavekkhitvā tasmiṃ tasmiṃ ārammaṇe uppannaṃ kāmavitakkaṃ nādhivāseti, cittaṃ āropetvā na vāseti, abbhantare vā na vāsetīti attho. Anadhivāsento kiṃ karotīti? Pajahati. Kiṃ kacavaraṃ viya piṭakenāti? Na hi, api ca kho naṃ vinodeti tudati vijjhati nīharati. Kiṃ balibaddaṃ viya patodenāti? Na hi, atha kho naṃ byantīkaroti vigatantaṃ karoti, yathāssa antopi nāvasissati antamaso bhaṅgamattampi, tathā naṃ karoti. Kathaṃ pana naṃ tathā karotīti? Anabhāvaṃ gameti anu anu abhāvaṃ gameti, vikkhambhanappahānena yathā suvikkhambhito hoti, tathā karoti. Sesavitakkadvayepi eseva nayo. Uppannuppanneti uppanne uppanne, uppannamatteyevāti vuttaṃ hoti. Sakiṃ vā uppanne vinodetvā dutiye vāre ajjhupekkhitā na hoti, satakkhattumpi uppanne uppanne vinodetiyeva. Pāpake akusale dhammeti teyeva kāmavitakkādayo, sabbepi vā nava mahāvitakke. Tattha tayo vuttā, avasesā ‘‘ñātivitakko, janapadavitakko, amarāvitakko, parānuddayatāpaṭisaṃyutto vitakko, lābhasakkārasilokappaṭisaṃyutto vitakko, anavaññattippaṭisaṃyutto vitakko’’ti (mahāni. 207) ime cha. Yaṃ hissāti etesu vitakkesu yaṃkiñci assa. Kāmavitakko panettha kāmāsavo eva, tabbiseso bhavāsavo, taṃsampayutto diṭṭhāsavo, sabbavitakkesu avijjā avijjāsavoti evaṃ āsavuppatti veditabbā. Imevuccantīti ime kāmavitakkādivasena vuttappakārā āsavā iminā tasmiṃ tasmiṃ vitakke ādīnavapaccavekkhaṇasahitena vīriyasaṃvarasaṅkhātena vinodanena pahātabbāti vuccanti.
ਪਟਿਸਙ੍ਖਾ ਯੋਨਿਸੋ ਸਤਿਸਮ੍ਬੋਜ੍ਝਙ੍ਗਂ ਭਾવੇਤੀਤਿ ਅਭਾવਨਾਯ ਆਦੀਨવਂ ਭਾવਨਾਯ ਚ ਆਨਿਸਂਸਂ ਉਪਾਯੇਨ ਪਥੇਨ ਪਚ੍ਚવੇਕ੍ਖਿਤ੍વਾ ਸਤਿਸਮ੍ਬੋਜ੍ਝਙ੍ਗਂ ਭਾવੇਤਿ। ਏਸੇવ ਨਯੋ ਸਬ੍ਬਤ੍ਥ। ਬੋਜ੍ਝਙ੍ਗਾਨਂ ਭਾવਨਾ ਹੇਟ੍ਠਾ વਿਤ੍ਥਾਰਿਤਾવ। ਯਂ ਹਿਸ੍ਸਾਤਿ ਏਤੇਸੁ ਬੋਜ੍ਝਙ੍ਗੇਸੁ ਯਂਕਿਞ੍ਚਿ ਅਸ੍ਸ। ਆਸવੁਪ੍ਪਤ੍ਤਿਯਂ ਪਨੇਤ੍ਥ ਇਮੇਸਂ ਅਰਿਯਮਗ੍ਗਸਮ੍ਪਯੁਤ੍ਤਾਨਂ ਬੋਜ੍ਝਙ੍ਗਾਨਂ ਅਭਾવਿਤਤ੍ਤਾ ਯੇ ਉਪ੍ਪਜ੍ਜੇਯ੍ਯੁਂ ਕਾਮਾਸવਾਦਯੋ ਆਸવਾ, ਭਾવਯਤੋ ਏવਂਸ ਤੇ ਨ ਹੋਨ੍ਤੀਤਿ ਅਯਂ ਨਯੋ વੇਦਿਤਬ੍ਬੋ। ਇਮੇ વੁਚ੍ਚਨ੍ਤੀਤਿ ਇਮੇ ਕਾਮਾਸવਾਦਯੋ ਆਸવਾ ਇਮਾਯ ਲੋਕੁਤ੍ਤਰਾਯ ਬੋਜ੍ਝਙ੍ਗਭਾવਨਾਯ ਪਹਾਤਬ੍ਬਾਤਿ વੁਚ੍ਚਨ੍ਤਿ। ਇਮੇਹਿ ਛਹਾਕਾਰੇਹਿ ਪਹੀਨਾਸવਂ ਭਿਕ੍ਖੁਂ ਥੋਮੇਨ੍ਤੋ ਯਤੋ ਖੋ, ਭਿਕ੍ਖવੇਤਿਆਦਿਮਾਹ। ਤਤ੍ਥ ਯਤੋਤਿ ਸਾਮਿવਚਨੇ ਤੋ-ਕਾਰੋ, ਯਸ੍ਸਾਤਿ વੁਤ੍ਤਂ ਹੋਤਿ। ਪੋਰਾਣਾ ਪਨ ਯਮ੍ਹਿ ਕਾਲੇਤਿ વਣ੍ਣਯਨ੍ਤਿ। ਯੇ ਆਸવਾ ਸਂવਰਾ ਪਹਾਤਬ੍ਬਾ, ਤੇ ਸਂવਰਾ ਪਹੀਨਾ ਹੋਨ੍ਤੀਤਿ ਯੇ ਆਸવਾ ਸਂવਰੇਨ ਪਹਾਤਬ੍ਬਾ, ਤੇ ਸਂવਰੇਨੇવ ਪਹੀਨਾ ਹੋਨ੍ਤਿ, ਨ ਅਪ੍ਪਹੀਨੇਸੁਯੇવ ਪਹੀਨਸਞ੍ਞੀ ਹੋਤੀਤਿ।
Paṭisaṅkhā yoniso satisambojjhaṅgaṃ bhāvetīti abhāvanāya ādīnavaṃ bhāvanāya ca ānisaṃsaṃ upāyena pathena paccavekkhitvā satisambojjhaṅgaṃ bhāveti. Eseva nayo sabbattha. Bojjhaṅgānaṃ bhāvanā heṭṭhā vitthāritāva. Yaṃ hissāti etesu bojjhaṅgesu yaṃkiñci assa. Āsavuppattiyaṃ panettha imesaṃ ariyamaggasampayuttānaṃ bojjhaṅgānaṃ abhāvitattā ye uppajjeyyuṃ kāmāsavādayo āsavā, bhāvayato evaṃsa te na hontīti ayaṃ nayo veditabbo. Ime vuccantīti ime kāmāsavādayo āsavā imāya lokuttarāya bojjhaṅgabhāvanāya pahātabbāti vuccanti. Imehi chahākārehi pahīnāsavaṃ bhikkhuṃ thomento yato kho, bhikkhavetiādimāha. Tattha yatoti sāmivacane to-kāro, yassāti vuttaṃ hoti. Porāṇā pana yamhi kāleti vaṇṇayanti. Ye āsavā saṃvarā pahātabbā, te saṃvarā pahīnā hontīti ye āsavā saṃvarena pahātabbā, te saṃvareneva pahīnā honti, na appahīnesuyeva pahīnasaññī hotīti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੪. ਆਸવਸੁਤ੍ਤਂ • 4. Āsavasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੪. ਆਸવਸੁਤ੍ਤવਣ੍ਣਨਾ • 4. Āsavasuttavaṇṇanā
