| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
69. аасаяаанусаяан̃аан̣анид̣̇д̣̇зсаван̣н̣анаа
69. Āsayānusayañāṇaniddesavaṇṇanā
113. аасаяаанусаяан̃аан̣анид̣̇д̣̇зсз ид̇ха д̇ат̇ааг̇ад̇од̇иаад̣̇и бан̃жад̇хаа табид̇о нид̣̇д̣̇зсо. д̇ад̇т̇а аасаяаанусаяаа вуд̇д̇ад̇т̇аа зва. жарид̇анд̇и буб̣б̣з гад̇ам̣ гусалаагусалам̣ гаммам̣. ад̇химуд̇д̇инд̇и самбад̇и гусалз агусалз ваа жид̇д̇авосаг̇г̇о. бхаб̣б̣аабхаб̣б̣зд̇и бхаб̣б̣з жа абхаб̣б̣з жа. арияааяа ж̇аад̇ияаа самбхаванд̇и ж̇ааяанд̇ийд̇и бхаб̣б̣аа. вад̇д̇амаанасамийбз вад̇д̇амаанаважанам̣. бхависсанд̇и ж̇ааяиссанд̇ийд̇и ваа бхаб̣б̣аа, бхааж̇анабхууд̇аад̇и ад̇т̇о. яз арияамаг̇г̇абадивзд̇хасса анужчавигаа убаниссаяасамбаннаа, д̇з бхаб̣б̣аа. вуд̇д̇абадибагкаа абхаб̣б̣аа.
113. Āsayānusayañāṇaniddese idha tathāgatotiādi pañcadhā ṭhapito niddeso. Tattha āsayānusayā vuttatthā eva. Caritanti pubbe kataṃ kusalākusalaṃ kammaṃ. Adhimuttinti sampati kusale akusale vā cittavosaggo. Bhabbābhabbeti bhabbe ca abhabbe ca. Ariyāya jātiyā sambhavanti jāyantīti bhabbā. Vattamānasamīpe vattamānavacanaṃ. Bhavissanti jāyissantīti vā bhabbā, bhājanabhūtāti attho. Ye ariyamaggapaṭivedhassa anucchavikā upanissayasampannā, te bhabbā. Vuttapaṭipakkhā abhabbā.
гад̇амо сад̇д̇аанам̣ аасаяод̇иаад̣̇и нид̣̇д̣̇зсасса бадинид̣̇д̣̇зсо. д̇ад̇т̇а сассад̇од̇и нижжо. логод̇и ад̇д̇аа. ид̇ха сарийрам̣язва нассад̇и, ад̇д̇аа бана ид̇ха барад̇т̇а жа соязваад̇и ман̃н̃анд̇и. со хи саяам̣язва аалогзд̇ийд̇и гад̇ваа ‘‘лого’’д̇и ман̃н̃анд̇и. асассад̇од̇и анижжо. ад̇д̇аа сарийрзнзва саха нассад̇ийд̇и ман̃н̃анд̇и. анд̇аваад̇и барид̇д̇з гасин̣з жхаанам̣ уббаад̣̇зд̇ваа д̇ам̣барид̇д̇агасин̣аарамман̣ам̣ жид̇д̇ам̣ сабарияанд̇о ад̇д̇аад̇и ман̃н̃анд̇и. ананд̇аваад̇и на анд̇аваа аббамаан̣з гасин̣з жхаанам̣ уббаад̣̇зд̇ваа д̇ам̣аббамаан̣агасин̣аарамман̣ам̣ жид̇д̇ам̣ абарияанд̇о ад̇д̇аад̇и ман̃н̃анд̇и. д̇ам̣ ж̇ийвам̣ д̇ам̣ сарийранд̇и ж̇ийво жа сарийран̃жа д̇ам̣язва. ж̇ийвод̇и ад̇д̇аа, лин̇г̇авибаллаасзна набум̣сагаважанам̣ гад̇ам̣. сарийранд̇и раасадтзна канд̇хабан̃жагам̣. ан̃н̃ам̣ ж̇ийвам̣ ан̃н̃ам̣ сарийранд̇и ан̃н̃о ж̇ийво ан̃н̃ам̣ канд̇хабан̃жагам̣. ход̇и д̇ат̇ааг̇ад̇о барам̣ маран̣аад̇и канд̇хаа ид̇хзва винассанд̇и, сад̇д̇о маран̣ад̇о барам̣ ход̇и виж̇ж̇ад̇и на нассад̇и. ‘‘д̇ат̇ааг̇ад̇о’’д̇и жзд̇т̇а сад̇д̇аад̇хиважананд̇и вад̣̇анд̇и. гзжи бана ‘‘д̇ат̇ааг̇ад̇од̇и арахаа’’д̇и вад̣̇анд̇и. имз ‘‘на ход̇ий’’д̇и багкз д̣̇осам̣ д̣̇исваа звам̣ г̇ан̣ханд̇и. на ход̇и д̇ат̇ааг̇ад̇о барам̣ маран̣аад̇и канд̇хааби ид̇хзва нассанд̇и, д̇ат̇ааг̇ад̇о жа маран̣ад̇о барам̣ на ход̇и ужчиж̇ж̇ад̇и винассад̇и. имз ‘‘ход̇ий’’д̇и багкз д̣̇осам̣ д̣̇исваа звам̣ г̇ан̣ханд̇и. ход̇и жа на жа ход̇ийд̇и имз згзгабагкабариг̇г̇ахз д̣̇осам̣ д̣̇исваа убхаяабагкам̣ г̇ан̣ханд̇и. нзва ход̇и на на ход̇ийд̇и имз убхаяабагкабариг̇г̇ахз убхаяад̣̇осаабад̇д̇им̣ д̣̇исваа ‘‘ход̇ийд̇и жа на ход̇и, нзва ход̇ийд̇и жа на ход̇ий’’д̇и амараавигкзбабагкам̣ г̇ан̣ханд̇и.
Katamo sattānaṃ āsayotiādi niddesassa paṭiniddeso. Tattha sassatoti nicco. Lokoti attā. Idha sarīraṃyeva nassati, attā pana idha parattha ca soyevāti maññanti. So hi sayaṃyeva āloketīti katvā ‘‘loko’’ti maññanti. Asassatoti anicco. Attā sarīreneva saha nassatīti maññanti. Antavāti paritte kasiṇe jhānaṃ uppādetvā taṃparittakasiṇārammaṇaṃ cittaṃ sapariyanto attāti maññanti. Anantavāti na antavā appamāṇe kasiṇe jhānaṃ uppādetvā taṃappamāṇakasiṇārammaṇaṃ cittaṃ apariyanto attāti maññanti. Taṃ jīvaṃ taṃ sarīranti jīvo ca sarīrañca taṃyeva. Jīvoti attā, liṅgavipallāsena napuṃsakavacanaṃ kataṃ. Sarīranti rāsaṭṭhena khandhapañcakaṃ. Aññaṃ jīvaṃ aññaṃ sarīranti añño jīvo aññaṃ khandhapañcakaṃ. Hoti tathāgato paraṃ maraṇāti khandhā idheva vinassanti, satto maraṇato paraṃ hoti vijjati na nassati. ‘‘Tathāgato’’ti cettha sattādhivacananti vadanti. Keci pana ‘‘tathāgatoti arahā’’ti vadanti. Ime ‘‘na hotī’’ti pakkhe dosaṃ disvā evaṃ gaṇhanti. Na hoti tathāgato paraṃ maraṇāti khandhāpi idheva nassanti, tathāgato ca maraṇato paraṃ na hoti ucchijjati vinassati. Ime ‘‘hotī’’ti pakkhe dosaṃ disvā evaṃ gaṇhanti. Hoti ca na ca hotīti ime ekekapakkhapariggahe dosaṃ disvā ubhayapakkhaṃ gaṇhanti. Neva hoti na na hotīti ime ubhayapakkhapariggahe ubhayadosāpattiṃ disvā ‘‘hotīti ca na hoti, neva hotīti ca na hotī’’ti amarāvikkhepapakkhaṃ gaṇhanti.
аяам̣ банзд̇т̇а адтагат̇аанаяо – ‘‘сассад̇о логод̇и ваа’’д̇иаад̣̇ийхи д̣̇асахаагаарзхи д̣̇идтибабхзд̣̇ова вуд̇д̇о. д̇ад̇т̇а сассад̇о логод̇и жа канд̇хабан̃жагам̣ логод̇и г̇ахзд̇ваа ‘‘аяам̣ лого нижжо д̇хуво саб̣б̣агаалиго’’д̇и г̇ан̣ханд̇асса сассад̇анд̇и г̇ахан̣аагаараббавад̇д̇аа д̣̇идти. асассад̇од̇и д̇амзва логам̣ ‘‘ужчиж̇ж̇ад̇и винассад̇ий’’д̇и г̇ан̣ханд̇асса ужчзд̣̇аг̇г̇ахан̣аагаараббавад̇д̇аа д̣̇идти. анд̇аваад̇и барид̇д̇агасин̣алаабхино суббамад̇д̇з ваа сараавамад̇д̇з ваа гасин̣з самаабаннасса анд̇осамаабад̇д̇ияам̣ бавад̇д̇ид̇аруубааруубад̇хаммз ‘‘лого’’д̇и жа гасин̣абарижчзд̣̇анд̇зна ‘‘анд̇аваа’’д̇и жа г̇ан̣ханд̇асса ‘‘анд̇аваа лого’’д̇и г̇ахан̣аагаараббавад̇д̇аа д̣̇идти. саа сассад̇ад̣̇идтиби ход̇и ужчзд̣̇ад̣̇идтиби. вибулагасин̣алаабхино бана д̇асмим̣ гасин̣з самаабаннасса анд̇осамаабад̇д̇ияам̣ бавад̇д̇ид̇аруубааруубад̇хаммз ‘‘лого’’д̇и жа гасин̣абарижчзд̣̇анд̇зна ‘‘на анд̇аваа’’д̇и жа г̇ан̣ханд̇асса ‘‘ананд̇аваа лого’’д̇и г̇ахан̣аагаараббавад̇д̇аа д̣̇идти. саа сассад̇ад̣̇идтиби ход̇и ужчзд̣̇ад̣̇идтиби. д̇ам̣ ж̇ийвам̣ д̇ам̣ сарийранд̇и бхзд̣̇анад̇хаммасса сарийрассзва ‘‘ж̇ийва’’нд̇и г̇ахид̇ад̇д̇аа ‘‘сарийрз ужчиж̇ж̇амаанз ж̇ийвамби ужчиж̇ж̇ад̇ий’’д̇и ужчзд̣̇аг̇г̇ахан̣аагаараббавад̇д̇аа д̣̇идти. д̣̇уд̇ияабад̣̇з сарийрад̇о ан̃н̃асса ж̇ийвасса г̇ахид̇ад̇д̇аа ‘‘сарийрз ужчиж̇ж̇амаанзби ж̇ийвам̣ на ужчиж̇ж̇ад̇ий’’д̇и сассад̇аг̇г̇ахан̣аагаараббавад̇д̇аа д̣̇идти. ход̇и д̇ат̇ааг̇ад̇од̇иаад̣̇ийсу ‘‘сад̇д̇о д̇ат̇ааг̇ад̇о наама, со барам̣ маран̣аа ход̇ий’’д̇и г̇ан̣хад̇о батамаа сассад̇ад̣̇идти. ‘‘на ход̇ий’’д̇и г̇ан̣хад̇о д̣̇уд̇ияаа ужчзд̣̇ад̣̇идти. ‘‘ход̇и жа на жа ход̇ий’’д̇и г̇ан̣хад̇о д̇ад̇ияаа згажжасассад̇ад̣̇идти. ‘‘нзва ход̇и на на ход̇ий’’д̇и г̇ан̣хад̇о жад̇уд̇т̇аа амараавигкзбад̣̇идтийд̇и.
Ayaṃ panettha aṭṭhakathānayo – ‘‘sassato lokoti vā’’tiādīhi dasahākārehi diṭṭhipabhedova vutto. Tattha sassato lokoti ca khandhapañcakaṃ lokoti gahetvā ‘‘ayaṃ loko nicco dhuvo sabbakāliko’’ti gaṇhantassa sassatanti gahaṇākārappavattā diṭṭhi. Asassatoti tameva lokaṃ ‘‘ucchijjati vinassatī’’ti gaṇhantassa ucchedaggahaṇākārappavattā diṭṭhi. Antavāti parittakasiṇalābhino suppamatte vā sarāvamatte vā kasiṇe samāpannassa antosamāpattiyaṃ pavattitarūpārūpadhamme ‘‘loko’’ti ca kasiṇaparicchedantena ‘‘antavā’’ti ca gaṇhantassa ‘‘antavā loko’’ti gahaṇākārappavattā diṭṭhi. Sā sassatadiṭṭhipi hoti ucchedadiṭṭhipi. Vipulakasiṇalābhino pana tasmiṃ kasiṇe samāpannassa antosamāpattiyaṃ pavattitarūpārūpadhamme ‘‘loko’’ti ca kasiṇaparicchedantena ‘‘na antavā’’ti ca gaṇhantassa ‘‘anantavā loko’’ti gahaṇākārappavattā diṭṭhi. Sā sassatadiṭṭhipi hoti ucchedadiṭṭhipi. Taṃ jīvaṃ taṃ sarīranti bhedanadhammassa sarīrasseva ‘‘jīva’’nti gahitattā ‘‘sarīre ucchijjamāne jīvampi ucchijjatī’’ti ucchedaggahaṇākārappavattā diṭṭhi. Dutiyapade sarīrato aññassa jīvassa gahitattā ‘‘sarīre ucchijjamānepi jīvaṃ na ucchijjatī’’ti sassataggahaṇākārappavattā diṭṭhi. Hoti tathāgatotiādīsu ‘‘satto tathāgato nāma, so paraṃ maraṇā hotī’’ti gaṇhato paṭhamā sassatadiṭṭhi. ‘‘Na hotī’’ti gaṇhato dutiyā ucchedadiṭṭhi. ‘‘Hoti ca na ca hotī’’ti gaṇhato tatiyā ekaccasassatadiṭṭhi. ‘‘Neva hoti na na hotī’’ti gaṇhato catutthā amarāvikkhepadiṭṭhīti.
ид̇ийд̇и вуд̇д̇аббагаарад̣̇идтиниссаяанид̣̇ассанам̣. бхавад̣̇идтисанниссид̇аа ваа сад̇д̇аа хонд̇и вибхавад̣̇идтисанниссид̇аа ваад̇и бхаво вужжад̇и сассад̇о, сассад̇авасзна уббаж̇ж̇амаанад̣̇идти бхавад̣̇идти, бхавод̇и д̣̇идтийд̇и вуд̇д̇ам̣ ход̇и. вибхаво вужжад̇и ужчзд̣̇о , ужчзд̣̇авасзна уббаж̇ж̇амаанад̣̇идти вибхавад̣̇идти, вибхавод̇и д̣̇идтийд̇и вуд̇д̇ам̣ ход̇и. вуд̇д̇аббагаараа д̣̇асавид̇хаа д̣̇идти бхавад̣̇идти жа вибхавад̣̇идти жаад̇и д̣̇вид̇хаава ход̇и. д̇аасу д̣̇вийсу згзгам̣ санниссид̇аа абассид̇аа аллийнаа сад̇д̇аа хонд̇и.
Itīti vuttappakāradiṭṭhinissayanidassanaṃ. Bhavadiṭṭhisannissitā vā sattā honti vibhavadiṭṭhisannissitā vāti bhavo vuccati sassato, sassatavasena uppajjamānadiṭṭhi bhavadiṭṭhi, bhavoti diṭṭhīti vuttaṃ hoti. Vibhavo vuccati ucchedo , ucchedavasena uppajjamānadiṭṭhi vibhavadiṭṭhi, vibhavoti diṭṭhīti vuttaṃ hoti. Vuttappakārā dasavidhā diṭṭhi bhavadiṭṭhi ca vibhavadiṭṭhi cāti dvidhāva hoti. Tāsu dvīsu ekekaṃ sannissitā apassitā allīnā sattā honti.
зд̇з ваа бана убхо анд̇з анубаг̇аммаад̇и зд̇т̇а ‘‘аг̇г̇ид̇о ваа уд̣̇агад̇о ваа мит̇убхзд̣̇аа ваа’’д̇иаад̣̇ийсу (д̣̇ий. ни. 2.152) вияа ваа-сад̣̇д̣̇о самужжаяад̇т̇о. зд̇з вуд̇д̇аббагаарз сассад̇ужчзд̣̇авасзна д̣̇вз багкз жа на убаг̇анд̇ваа аналлийяид̇ваа бахааяаад̇и ад̇т̇о. ‘‘ануломигаа ваа канд̇ий’’д̇и вигаббад̇т̇ова. ид̣̇аббажжаяад̇аабадижжасамуббаннзсууд̇и имзсам̣ ж̇араамаран̣аад̣̇ийнам̣ бажжаяаа ид̣̇аббажжаяаа, ид̣̇аббажжаяаа зва ид̣̇аббажжаяад̇аа, ид̣̇аббажжаяаанам̣ ваа самуухо ид̣̇аббажжаяад̇аа. лагкан̣ам̣ банзд̇т̇а сад̣̇д̣̇асад̇т̇ад̇о бариязсид̇аб̣б̣ам̣. д̇з д̇з бажжаяз бадижжа саха саммаа жа уббаннаа бадижжасамуббаннаа. д̇ассаа ид̣̇аббажжаяад̇ааяа жа д̇зсу бадижжасамуббаннзсу жа д̇хаммзсу. ануломигаад̇и логуд̇д̇арад̇хаммаанам̣ ануломад̇о ануломигаа. канд̇ийд̇и н̃аан̣ам̣. н̃аан̣ан̃хи каманад̇о канд̇и. бадилад̣̇д̇хаа ход̇ийд̇и сад̇д̇зхи ад̇хиг̇ад̇аа ход̇и. ид̣̇аббажжаяад̇ааяа канд̇ияаа ужчзд̣̇ад̇д̇аанубаг̇амо ход̇и бажжаяуббаннад̇хаммаанам̣ бажжаяасаамаг̇г̇ияам̣ ааяад̇д̇авуд̇д̇ид̇д̇аа бажжаяаанубарамад̣̇ассанзна палаанубарамад̣̇ассанад̇о. бадижжасамуббаннзсу д̇хаммзсу канд̇ияаа сассад̇ад̇д̇аанубаг̇амо ход̇и бажжаяасаамаг̇г̇ияам̣ наванаваанам̣ бажжаяуббаннад̇хаммаанам̣ уббаад̣̇ад̣̇ассанад̇о. звамзд̇з убхо анд̇з анубаг̇амма бадижжасамуббаад̣̇абадижжасамуббаннад̇хаммад̣̇ассанзна на ужчзд̣̇о на сассад̇од̇и бавад̇д̇ам̣ саммаад̣̇ассанам̣ ‘‘ануломигаа канд̇ий’’д̇и взд̣̇ид̇аб̣б̣ам̣. зван̃хи д̇ад̣̇убхаяад̣̇идтибадибагкабхууд̇аа саммаад̣̇идти вуд̇д̇аа ход̇и. яат̇аабхууд̇ам̣ ваа н̃аан̣анд̇и яат̇аабхууд̇ам̣ яат̇аасабхаавам̣ нзяяам̣. д̇ад̇т̇а бавад̇д̇ан̃аан̣амби висаяавохаарзна ‘‘яат̇аабхууд̇ан̃аан̣а’’нд̇и вуд̇д̇ам̣. д̇ам̣ бана сан̇каарубзгкаабарияанд̇ам̣ вибассанаан̃аан̣ам̣ ид̇хаад̇хиббзд̇ам̣. хздтаа бана ‘‘яат̇аабхууд̇ан̃аан̣ад̣̇ассана’’нд̇и бхаяад̇уубадтаанан̃аан̣ам̣ вуд̇д̇ам̣. яат̇аабхууд̇ам̣ ваа н̃аан̣ам̣ сад̇д̇зхи бадилад̣̇д̇хам̣ ход̇ийд̇и самб̣анд̇хо.
Ete vā pana ubho ante anupagammāti ettha ‘‘aggito vā udakato vā mithubhedā vā’’tiādīsu (dī. ni. 2.152) viya vā-saddo samuccayattho. Ete vuttappakāre sassatucchedavasena dve pakkhe ca na upagantvā anallīyitvā pahāyāti attho. ‘‘Anulomikā vā khantī’’ti vikappatthova. Idappaccayatāpaṭiccasamuppannesūti imesaṃ jarāmaraṇādīnaṃ paccayā idappaccayā, idappaccayā eva idappaccayatā, idappaccayānaṃ vā samūho idappaccayatā. Lakkhaṇaṃ panettha saddasatthato pariyesitabbaṃ. Te te paccaye paṭicca saha sammā ca uppannā paṭiccasamuppannā. Tassā idappaccayatāya ca tesu paṭiccasamuppannesu ca dhammesu. Anulomikāti lokuttaradhammānaṃ anulomato anulomikā. Khantīti ñāṇaṃ. Ñāṇañhi khamanato khanti. Paṭiladdhā hotīti sattehi adhigatā hoti. Idappaccayatāya khantiyā ucchedattānupagamo hoti paccayuppannadhammānaṃ paccayasāmaggiyaṃ āyattavuttittā paccayānuparamadassanena phalānuparamadassanato. Paṭiccasamuppannesu dhammesu khantiyā sassatattānupagamo hoti paccayasāmaggiyaṃ navanavānaṃ paccayuppannadhammānaṃ uppādadassanato. Evamete ubho ante anupagamma paṭiccasamuppādapaṭiccasamuppannadhammadassanena na ucchedo na sassatoti pavattaṃ sammādassanaṃ ‘‘anulomikā khantī’’ti veditabbaṃ. Evañhi tadubhayadiṭṭhipaṭipakkhabhūtā sammādiṭṭhi vuttā hoti. Yathābhūtaṃ vā ñāṇanti yathābhūtaṃ yathāsabhāvaṃ neyyaṃ. Tattha pavattañāṇampi visayavohārena ‘‘yathābhūtañāṇa’’nti vuttaṃ. Taṃ pana saṅkhārupekkhāpariyantaṃ vipassanāñāṇaṃ idhādhippetaṃ. Heṭṭhā pana ‘‘yathābhūtañāṇadassana’’nti bhayatūpaṭṭhānañāṇaṃ vuttaṃ. Yathābhūtaṃ vā ñāṇaṃ sattehi paṭiladdhaṃ hotīti sambandho.
ид̣̇аани ‘‘сассад̇о лого’’д̇иаад̣̇ийхи мижчаад̣̇идтибарибхаавид̇ам̣ ‘‘зд̇з ваа банаа’’д̇иаад̣̇ийхи саммаад̣̇идтибарибхаавид̇ам̣ сад̇д̇асанд̇аанам̣ д̣̇ассзд̇ваа ‘‘гаамам̣ сзванд̇ан̃н̃зваа’’д̇иаад̣̇ийхи сзсаагусалзхи сзсагусалзхи жа барибхаавид̇ам̣ сад̇д̇асанд̇аанам̣ д̣̇ассзд̇и. д̇ад̇т̇а гаамам̣ сзванд̇ам̣язва буг̇г̇алам̣ д̇ат̇ааг̇ад̇о ж̇аанаад̇ийд̇и яож̇анаа гаад̇аб̣б̣аа. сзванд̇анд̇и жа абхин̣хасамуд̣̇аажааравасзна сзвамаанам̣. буб̣б̣з аасзвид̇авасзна гилзсагаамо г̇ару ассаад̇и гаамаг̇аруго. д̇ат̇зва гаамо аасаяз санд̇аанз ассаад̇и гаамаасаяо. санд̇аанавасзнзва гаамз ад̇химуд̇д̇о лаг̇г̇од̇и гаамаад̇химуд̇д̇о. сзсзсуби зсзва наяо. нзгкаммаад̣̇ийни вуд̇д̇ад̇т̇аанзва. гаамаад̣̇ийхи жа д̇ийхи сзсаагусалаа, нзгкаммаад̣̇ийхи д̇ийхи сзсагусалаа г̇ахид̇аава хонд̇ийд̇и взд̣̇ид̇аб̣б̣аа. ‘‘аяам̣ сад̇д̇аанам̣ аасаяо’’д̇и д̇ид̇хаа вуд̇д̇ам̣ санд̇аанамзва д̣̇ассзд̇и.
Idāni ‘‘sassato loko’’tiādīhi micchādiṭṭhiparibhāvitaṃ ‘‘ete vā panā’’tiādīhi sammādiṭṭhiparibhāvitaṃ sattasantānaṃ dassetvā ‘‘kāmaṃ sevantaññevā’’tiādīhi sesākusalehi sesakusalehi ca paribhāvitaṃ sattasantānaṃ dasseti. Tattha kāmaṃ sevantaṃyeva puggalaṃ tathāgato jānātīti yojanā kātabbā. Sevantanti ca abhiṇhasamudācāravasena sevamānaṃ. Pubbe āsevitavasena kilesakāmo garu assāti kāmagaruko. Tatheva kāmo āsaye santāne assāti kāmāsayo. Santānavaseneva kāme adhimutto laggoti kāmādhimutto. Sesesupi eseva nayo. Nekkhammādīni vuttatthāneva. Kāmādīhi ca tīhi sesākusalā, nekkhammādīhi tīhi sesakusalā gahitāva hontīti veditabbā. ‘‘Ayaṃ sattānaṃ āsayo’’ti tidhā vuttaṃ santānameva dasseti.
аяам̣ банзд̇т̇а адтагат̇аанаяо – ‘‘ид̇и бхавад̣̇идтисанниссид̇аа ваа’’д̇и звам̣ сассад̇ад̣̇идтим̣ ваа санниссид̇аа. сассад̇ад̣̇идти хи зд̇т̇а бхавад̣̇идтийд̇и вуд̇д̇аа, ужчзд̣̇ад̣̇идти жа вибхавад̣̇идтийд̇и. саб̣б̣ад̣̇идтийнан̃хи сассад̇ужчзд̣̇ад̣̇идтийхи сан̇г̇ахид̇ад̇д̇аа саб̣б̣збимз д̣̇идтиг̇ад̇игаа сад̇д̇аа имаава д̣̇вз д̣̇идтияо санниссид̇аа хонд̇и. вуд̇д̇амби жзд̇ам̣ ‘‘д̣̇ваяаниссид̇о квааяам̣, гажжаана, лого язбхуяязна ад̇т̇ид̇ан̃жзва над̇т̇ид̇ан̃жаа’’д̇и (сам̣. ни. 2.15). зд̇т̇а хи ад̇т̇ид̇аад̇и сассад̇ам̣. над̇т̇ид̇аад̇и ужчзд̣̇о. аяам̣ д̇аава вадданиссид̇аанам̣ бут̇уж̇ж̇анаанам̣ сад̇д̇аанам̣ аасаяо. ид̣̇аани вивадданиссид̇аанам̣ суд̣̇д̇хасад̇д̇аанам̣ аасаяам̣ д̣̇ассзд̇ум̣ ‘‘зд̇з ваа бана убхо анд̇з анубаг̇аммаа’’д̇иаад̣̇и вуд̇д̇ам̣. д̇ад̇т̇а ‘‘зд̇з ваа банаа’’д̇и зд̇зязва. ‘‘убхо анд̇з’’д̇и сассад̇ужчзд̣̇асан̇каад̇з д̣̇вз анд̇з. ‘‘анубаг̇аммаа’’д̇и на аллийяид̇ваа. ‘‘ид̣̇аббажжаяад̇аабадижжасамуббаннзсу д̇хаммзсуу’’д̇и ид̣̇аббажжаяад̇ааяа жзва бадижжасамуббаннад̇хаммзсу жа. ‘‘ануломигаа канд̇ий’’д̇и вибассанаан̃аан̣ам̣. ‘‘яат̇аабхууд̇ам̣ н̃аан̣а’’нд̇и маг̇г̇ан̃аан̣ам̣. ид̣̇ам̣ вуд̇д̇ам̣ ход̇и – яаа бадижжасамуббаад̣̇з жзва бадижжасамуббаннад̇хаммзсу жа зд̇з убхо сассад̇ужчзд̣̇аанд̇з анубаг̇анд̇ваа вибассанаа бадилад̣̇д̇хаа, яан̃жа д̇ад̇о уд̇д̇ари маг̇г̇ан̃аан̣ам̣, аяам̣ сад̇д̇аанам̣ аасаяо. аяам̣ вадданиссид̇аанан̃жа вивадданиссид̇аанан̃жа саб̣б̣зсамби сад̇д̇аанам̣ аасаяо ид̣̇ам̣ васанадтаананд̇и. аяам̣ аажарияаанам̣ самаанадтагат̇аа.
Ayaṃ panettha aṭṭhakathānayo – ‘‘iti bhavadiṭṭhisannissitā vā’’ti evaṃ sassatadiṭṭhiṃ vā sannissitā. Sassatadiṭṭhi hi ettha bhavadiṭṭhīti vuttā, ucchedadiṭṭhi ca vibhavadiṭṭhīti. Sabbadiṭṭhīnañhi sassatucchedadiṭṭhīhi saṅgahitattā sabbepime diṭṭhigatikā sattā imāva dve diṭṭhiyo sannissitā honti. Vuttampi cetaṃ ‘‘dvayanissito khvāyaṃ, kaccāna, loko yebhuyyena atthitañceva natthitañcā’’ti (saṃ. ni. 2.15). Ettha hi atthitāti sassataṃ. Natthitāti ucchedo. Ayaṃ tāva vaṭṭanissitānaṃ puthujjanānaṃ sattānaṃ āsayo. Idāni vivaṭṭanissitānaṃ suddhasattānaṃ āsayaṃ dassetuṃ ‘‘ete vā pana ubho ante anupagammā’’tiādi vuttaṃ. Tattha ‘‘ete vā panā’’ti eteyeva. ‘‘Ubho ante’’ti sassatucchedasaṅkhāte dve ante. ‘‘Anupagammā’’ti na allīyitvā. ‘‘Idappaccayatāpaṭiccasamuppannesu dhammesū’’ti idappaccayatāya ceva paṭiccasamuppannadhammesu ca. ‘‘Anulomikā khantī’’ti vipassanāñāṇaṃ. ‘‘Yathābhūtaṃ ñāṇa’’nti maggañāṇaṃ. Idaṃ vuttaṃ hoti – yā paṭiccasamuppāde ceva paṭiccasamuppannadhammesu ca ete ubho sassatucchedaante anupagantvā vipassanā paṭiladdhā, yañca tato uttari maggañāṇaṃ, ayaṃ sattānaṃ āsayo. Ayaṃ vaṭṭanissitānañca vivaṭṭanissitānañca sabbesampi sattānaṃ āsayo idaṃ vasanaṭṭhānanti. Ayaṃ ācariyānaṃ samānaṭṭhakathā.
вид̇ан̣д̣аваад̣̇ий банааха ‘‘маг̇г̇о наама ваасам̣ вид̣̇д̇хам̣сзнд̇о г̇ажчад̇и, д̇вам̣ маг̇г̇о ваасод̇и вад̣̇зсий’’д̇и? со вад̇д̇аб̣б̣о ‘‘д̇вам̣ арияаваасабхаан̣аго хоси на хосий’’д̇и? сажз ‘‘на хомий’’д̇и вад̣̇ад̇и, ‘‘д̇вам̣ абхаан̣агад̇ааяа на ж̇аанаасий’’д̇и вад̇д̇аб̣б̣о. сажз ‘‘бхаан̣агосмий’’д̇и вад̣̇ад̇и, ‘‘суд̇д̇ам̣ аахараа’’д̇и вад̇д̇аб̣б̣о. сажз аахарад̇и, ижжзд̇ам̣ гусалам̣. но жз аахарад̇и, саяам̣ аахарид̇аб̣б̣ам̣ ‘‘д̣̇асаяимз, бхигкавз, арияааваасаа, яад̣̇арияаа аавасим̣су ваа аавасанд̇и ваа аавасиссанд̇и ваа’’д̇и (а. ни. 10.19). зд̇ан̃хи суд̇д̇ам̣ маг̇г̇асса ваасабхаавам̣ д̣̇ийбзд̇и. д̇асмаа сугат̇ид̇амзвзд̇анд̇и. имам̣ бана бхаг̇аваа сад̇д̇аанам̣ аасаяам̣ ж̇аананд̇о имзсан̃жа д̣̇идтиг̇ад̇аанам̣ имзсан̃жа вибассанаан̃аан̣амаг̇г̇ан̃аан̣аанам̣ аббавад̇д̇игкан̣зби ж̇аанаад̇и зва. д̇асмааязва жа ‘‘гаамам̣ сзванд̇ам̣язва ж̇аанаад̇ий’’д̇иаад̣̇и вуд̇д̇анд̇и.
Vitaṇḍavādī panāha ‘‘maggo nāma vāsaṃ viddhaṃsento gacchati, tvaṃ maggo vāsoti vadesī’’ti? So vattabbo ‘‘tvaṃ ariyavāsabhāṇako hosi na hosī’’ti? Sace ‘‘na homī’’ti vadati, ‘‘tvaṃ abhāṇakatāya na jānāsī’’ti vattabbo. Sace ‘‘bhāṇakosmī’’ti vadati, ‘‘suttaṃ āharā’’ti vattabbo. Sace āharati, iccetaṃ kusalaṃ. No ce āharati, sayaṃ āharitabbaṃ ‘‘dasayime, bhikkhave, ariyāvāsā, yadariyā āvasiṃsu vā āvasanti vā āvasissanti vā’’ti (a. ni. 10.19). Etañhi suttaṃ maggassa vāsabhāvaṃ dīpeti. Tasmā sukathitamevetanti. Imaṃ pana bhagavā sattānaṃ āsayaṃ jānanto imesañca diṭṭhigatānaṃ imesañca vipassanāñāṇamaggañāṇānaṃ appavattikkhaṇepi jānāti eva. Tasmāyeva ca ‘‘kāmaṃ sevantaṃyeva jānātī’’tiādi vuttanti.
анусаяанид̣̇д̣̇зсз анусаяаад̇и гзнадтзна анусаяаа? анусаяанадтзна. го зса анусаяанадто наамаад̇и? аббахийнадто. зд̇з хи аббахийнадтзна д̇асса д̇асса санд̇аанз анусзнд̇и наама. д̇асмаа ‘‘анусаяаа’’д̇и вужжанд̇и. анусзнд̇ийд̇и ануруубам̣ гааран̣ам̣ лабхид̇ваа уббаж̇ж̇анд̇ийд̇и ад̇т̇о. ат̇ааби сияаа – анусаяанадто наама аббахийнаагааро, со жа уббаж̇ж̇ад̇ийд̇и вад̇д̇ум̣ на яуж̇ж̇ад̇и, д̇асмаа на анусаяаа уббаж̇ж̇анд̇ийд̇и. д̇ад̇рид̣̇ам̣ бадиважанам̣ – на аббахийнаагааро, анусаяод̇и бана аббахийнадтзна т̇аамаг̇ад̇агилзсо вужжад̇и. со жид̇д̇асамбаяуд̇д̇о саарамман̣о саббажжаяадтзна сахзд̇уго зганд̇аагусало ад̇ийд̇оби ход̇и анааг̇ад̇оби бажжуббанноби, д̇асмаа уббаж̇ж̇ад̇ийд̇и вад̇д̇ум̣ яуж̇ж̇ад̇ийд̇и. д̇ад̇рид̣̇ам̣ бамаан̣ам̣ – ид̇хзва д̇аава абхисамаяагат̇ааяа (бади. ма. 3.21) ‘‘бажжуббаннз гилзсз баж̇ахад̇ий’’д̇и бужчам̣ гад̇ваа анусаяаанам̣ бажжуббаннабхаавасса ад̇т̇ид̇ааяа ‘‘т̇аамаг̇ад̇о анусаяам̣ баж̇ахад̇ий’’д̇и вуд̇д̇ам̣. д̇хаммасан̇г̇ан̣ияам̣ мохасса бад̣̇абхааж̇анз ‘‘авиж̇ж̇аанусаяо авиж̇ж̇аабарияудтаанам̣ авиж̇ж̇аалан̇г̇ий мохо агусаламуулам̣, аяам̣ д̇асмим̣ самаяз мохо ход̇ий’’д̇и (д̇ха. са. 390) агусалажид̇д̇зна сад̣̇д̇хим̣ мохасса уббаннабхааво вуд̇д̇о . гат̇аавад̇т̇усмим̣ ‘‘анусаяаа аб̣яаагад̇аа анусаяаа ахзд̇угаа анусаяаа жид̇д̇авиббаяуд̇д̇аа’’д̇и саб̣б̣з ваад̣̇аа бадисзд̇хид̇аа. анусаяаяамагз сад̇д̇аннам̣ махааваараанам̣ ан̃н̃ад̇арасмим̣ уббаж̇ж̇анаваарз ‘‘яасса гаамарааг̇аанусаяо уббаж̇ж̇ад̇и, д̇асса бадигхаанусаяо уббаж̇ж̇ад̇ий’’д̇иаад̣̇и (яама. 2.анусаяаяамага.300) вуд̇д̇ам̣. д̇асмаа ‘‘анусзнд̇ийд̇и ануруубам̣ гааран̣ам̣ лабхид̇ваа уббаж̇ж̇анд̇ий’’д̇и яам̣ вуд̇д̇ам̣, д̇ам̣ иминаа д̇анд̇иббамаан̣зна яуд̇д̇анд̇и взд̣̇ид̇аб̣б̣ам̣. яамби ‘‘жид̇д̇асамбаяуд̇д̇о саарамман̣о’’д̇иаад̣̇и вуд̇д̇ам̣, д̇амби сувуд̇д̇амзва. анусаяо хи наамзса баринибпанно жид̇д̇асамбаяуд̇д̇о агусалад̇хаммод̇и нидтамзд̇т̇а г̇анд̇аб̣б̣ам̣.
Anusayaniddese anusayāti kenaṭṭhena anusayā? Anusayanaṭṭhena. Ko esa anusayanaṭṭho nāmāti? Appahīnaṭṭho. Ete hi appahīnaṭṭhena tassa tassa santāne anusenti nāma. Tasmā ‘‘anusayā’’ti vuccanti. Anusentīti anurūpaṃ kāraṇaṃ labhitvā uppajjantīti attho. Athāpi siyā – anusayanaṭṭho nāma appahīnākāro, so ca uppajjatīti vattuṃ na yujjati, tasmā na anusayā uppajjantīti. Tatridaṃ paṭivacanaṃ – na appahīnākāro, anusayoti pana appahīnaṭṭhena thāmagatakileso vuccati. So cittasampayutto sārammaṇo sappaccayaṭṭhena sahetuko ekantākusalo atītopi hoti anāgatopi paccuppannopi, tasmā uppajjatīti vattuṃ yujjatīti. Tatridaṃ pamāṇaṃ – idheva tāva abhisamayakathāya (paṭi. ma. 3.21) ‘‘paccuppanne kilese pajahatī’’ti pucchaṃ katvā anusayānaṃ paccuppannabhāvassa atthitāya ‘‘thāmagato anusayaṃ pajahatī’’ti vuttaṃ. Dhammasaṅgaṇiyaṃ mohassa padabhājane ‘‘avijjānusayo avijjāpariyuṭṭhānaṃ avijjālaṅgī moho akusalamūlaṃ, ayaṃ tasmiṃ samaye moho hotī’’ti (dha. sa. 390) akusalacittena saddhiṃ mohassa uppannabhāvo vutto . Kathāvatthusmiṃ ‘‘anusayā abyākatā anusayā ahetukā anusayā cittavippayuttā’’ti sabbe vādā paṭisedhitā. Anusayayamake sattannaṃ mahāvārānaṃ aññatarasmiṃ uppajjanavāre ‘‘yassa kāmarāgānusayo uppajjati, tassa paṭighānusayo uppajjatī’’tiādi (yama. 2.anusayayamaka.300) vuttaṃ. Tasmā ‘‘anusentīti anurūpaṃ kāraṇaṃ labhitvā uppajjantī’’ti yaṃ vuttaṃ, taṃ iminā tantippamāṇena yuttanti veditabbaṃ. Yampi ‘‘cittasampayutto sārammaṇo’’tiādi vuttaṃ, tampi suvuttameva. Anusayo hi nāmesa parinipphanno cittasampayutto akusaladhammoti niṭṭhamettha gantabbaṃ.
гаамарааг̇аанусаяод̇иаад̣̇ийсу гаамарааг̇о жа со аббахийнадтзна анусаяо жаад̇и гаамарааг̇аанусаяо. сзсабад̣̇зсуби зсзва наяо. гаамарааг̇аанусаяо жзд̇т̇а лобхасахаг̇ад̇ажид̇д̇зсу сахаж̇аад̇авасзна аарамман̣авасзна жа манаабзсу авасзсагаамааважарад̇хаммзсу аарамман̣авасзнзва уббаж̇ж̇амаано лобхо. бадигхаанусаяо жа д̣̇оманассасахаг̇ад̇ажид̇д̇зсу сахаж̇аад̇авасзна аарамман̣авасзна жа аманаабзсу авасзсагаамааважарад̇хаммзсу аарамман̣авасзнзва уббаж̇ж̇амаано д̣̇осо. маанаанусаяо д̣̇идтиг̇ад̇авиббаяуд̇д̇алобхасахаг̇ад̇ажид̇д̇зсу сахаж̇аад̇авасзна аарамман̣авасзна жа д̣̇угкавзд̣̇анааваж̇ж̇зсу авасзсагаамааважарад̇хаммзсу руубааруубааважарад̇хаммзсу жа аарамман̣авасзнзва уббаж̇ж̇амаано маано. д̣̇идтаанусаяо жад̇уусу д̣̇идтиг̇ад̇асамбаяуд̇д̇зсу. вижигижчаанусаяо вижигижчаасахаг̇ад̇з. авиж̇ж̇аанусаяо д̣̇ваад̣̇асасу агусалажид̇д̇зсу сахаж̇аад̇авасзна аарамман̣авасзна жа. д̇аяоби авасзсад̇збхуумагад̇хаммзсу аарамман̣авасзнзва уббаж̇ж̇амаанаа д̣̇идтивижигижчаамохаа. бхаварааг̇аанусаяо жад̇уусу д̣̇идтиг̇ад̇авиббаяуд̇д̇зсу уббаж̇ж̇амааноби сахаж̇аад̇авасзна на вуд̇д̇о, аарамман̣авасзнзва бана руубааруубааважарад̇хаммзсу уббаж̇ж̇амаано лобхо вуд̇д̇о.
Kāmarāgānusayotiādīsu kāmarāgo ca so appahīnaṭṭhena anusayo cāti kāmarāgānusayo. Sesapadesupi eseva nayo. Kāmarāgānusayo cettha lobhasahagatacittesu sahajātavasena ārammaṇavasena ca manāpesu avasesakāmāvacaradhammesu ārammaṇavaseneva uppajjamāno lobho. Paṭighānusayo ca domanassasahagatacittesu sahajātavasena ārammaṇavasena ca amanāpesu avasesakāmāvacaradhammesu ārammaṇavaseneva uppajjamāno doso. Mānānusayo diṭṭhigatavippayuttalobhasahagatacittesu sahajātavasena ārammaṇavasena ca dukkhavedanāvajjesu avasesakāmāvacaradhammesu rūpārūpāvacaradhammesu ca ārammaṇavaseneva uppajjamāno māno. Diṭṭhānusayo catūsu diṭṭhigatasampayuttesu. Vicikicchānusayo vicikicchāsahagate. Avijjānusayo dvādasasu akusalacittesu sahajātavasena ārammaṇavasena ca. Tayopi avasesatebhūmakadhammesu ārammaṇavaseneva uppajjamānā diṭṭhivicikicchāmohā. Bhavarāgānusayo catūsu diṭṭhigatavippayuttesu uppajjamānopi sahajātavasena na vutto, ārammaṇavaseneva pana rūpārūpāvacaradhammesu uppajjamāno lobho vutto.
114. ид̣̇аани яат̇аавуд̇д̇аанам̣ анусаяаанам̣ анусаяанадтаанам̣ д̣̇ассзнд̇о яам̣ логзд̇иаад̣̇имааха. д̇ад̇т̇а яам̣ логз бияаруубанд̇и яам̣ имасмим̣ логз бияаж̇аад̇игам̣ бияасабхаавам̣. саад̇аруубанд̇и саад̇аж̇аад̇игам̣ ассаад̣̇абад̣̇адтаанам̣ идтаарамман̣ам̣. зд̇т̇а сад̇д̇аанам̣ гаамарааг̇аанусаяо анусзд̇ийд̇и зд̇асмим̣ идтаарамман̣з сад̇д̇аанам̣ аббахийнадтзна гаамарааг̇аанусаяо анусзд̇и. ‘‘бияаруубам̣ саад̇арууба’’нд̇и жа ид̇ха гаамааважарад̇хаммоязва ад̇хиббзд̇о. яат̇аа наама уд̣̇агз нимуг̇г̇асса хздтаа жа убари жа саманд̇аа жа уд̣̇агамзва ход̇и, звамзва идтаарамман̣з рааг̇уббад̇д̇и наама сад̇д̇аанам̣ аажин̣н̣асамаажин̣н̣аа. д̇ат̇аа анидтаарамман̣з бадигхуббад̇д̇и. ид̇и имзсу д̣̇вийсу д̇хаммзсууд̇и звам̣ имзсу д̣̇вийсу идтаанидтаарамман̣ад̇хаммзсу. авиж̇ж̇аанубад̇ид̇аад̇и гаамарааг̇абадигхасамбаяуд̇д̇аа худ̇ваа аарамман̣агаран̣авасзна авиж̇ж̇аа анубад̇ид̇аа ануг̇ад̇аа. вижчзд̣̇ам̣ гад̇вааби баато. д̇ад̣̇згадтод̇и д̇ааяа авиж̇ж̇ааяа сахаж̇згадтавасзна згад̇о тид̇о. маано жа д̣̇идти жа вижигижчаа жаад̇и нававид̇хамаано, д̣̇ваасадтивид̇хаа д̣̇идти, адтавад̇т̇угаа вижигижчаа, д̇ад̣̇згадто маано жа д̇ад̣̇згадтаа д̣̇идти жа д̇ад̣̇згадтаа вижигижчаа жаад̇и яож̇анаа. д̣̇адтаб̣б̣аад̇и бассид̇аб̣б̣аа аваг̇анд̇аб̣б̣аа. д̇аяо згад̇о гад̇ваа б̣ахуважанам̣ гад̇ам̣. бхаварааг̇аанусаяо банзд̇т̇а гаамарааг̇аанусаязнзва сан̇г̇ахид̇од̇и взд̣̇ид̇аб̣б̣о.
114. Idāni yathāvuttānaṃ anusayānaṃ anusayanaṭṭhānaṃ dassento yaṃ loketiādimāha. Tattha yaṃ loke piyarūpanti yaṃ imasmiṃ loke piyajātikaṃ piyasabhāvaṃ. Sātarūpanti sātajātikaṃ assādapadaṭṭhānaṃ iṭṭhārammaṇaṃ. Ettha sattānaṃ kāmarāgānusayo anusetīti etasmiṃ iṭṭhārammaṇe sattānaṃ appahīnaṭṭhena kāmarāgānusayo anuseti. ‘‘Piyarūpaṃ sātarūpa’’nti ca idha kāmāvacaradhammoyeva adhippeto. Yathā nāma udake nimuggassa heṭṭhā ca upari ca samantā ca udakameva hoti, evameva iṭṭhārammaṇe rāguppatti nāma sattānaṃ āciṇṇasamāciṇṇā. Tathā aniṭṭhārammaṇe paṭighuppatti. Iti imesu dvīsu dhammesūti evaṃ imesu dvīsu iṭṭhāniṭṭhārammaṇadhammesu. Avijjānupatitāti kāmarāgapaṭighasampayuttā hutvā ārammaṇakaraṇavasena avijjā anupatitā anugatā. Vicchedaṃ katvāpi pāṭho. Tadekaṭṭhoti tāya avijjāya sahajekaṭṭhavasena ekato ṭhito. Māno ca diṭṭhi ca vicikicchā cāti navavidhamāno, dvāsaṭṭhividhā diṭṭhi, aṭṭhavatthukā vicikicchā, tadekaṭṭho māno ca tadekaṭṭhā diṭṭhi ca tadekaṭṭhā vicikicchā cāti yojanā. Daṭṭhabbāti passitabbā avagantabbā. Tayo ekato katvā bahuvacanaṃ kataṃ. Bhavarāgānusayo panettha kāmarāgānusayeneva saṅgahitoti veditabbo.
жарид̇анид̣̇д̣̇зсз д̇зраса жзд̇анаа бун̃н̃аабхисан̇кааро. д̣̇ваад̣̇аса абун̃н̃аабхисан̇кааро. жад̇ассо аанзн̃ж̇аабхисан̇кааро. д̇ад̇т̇а гаамааважаро барид̇д̇абхуумаго. ид̇аро махаабхуумаго. д̇ийсуби ваа зд̇зсу яо гожи аббавибааго барид̇д̇абхуумаго, махаавибааго махаабхуумагод̇и взд̣̇ид̇аб̣б̣о.
Caritaniddese terasa cetanā puññābhisaṅkhāro. Dvādasa apuññābhisaṅkhāro. Catasso āneñjābhisaṅkhāro. Tattha kāmāvacaro parittabhūmako. Itaro mahābhūmako. Tīsupi vā etesu yo koci appavipāko parittabhūmako, mahāvipāko mahābhūmakoti veditabbo.
115. ад̇химуд̇д̇инид̣̇д̣̇зсз санд̇ийд̇и сам̣виж̇ж̇анд̇и. хийнаад̇химуд̇д̇игаад̇и лаамагаж̇жхаасаяаа. бан̣ийд̇аад̇химуд̇д̇игаад̇и галяаан̣аж̇жхаасаяаа. сзванд̇ийд̇и ниссаяанд̇и аллийяанд̇и. бхаж̇анд̇ийд̇и убасан̇гаманд̇и. баяирубаасанд̇ийд̇и бунаббунам̣ убасан̇гаманд̇и. сажз хи аажарияубаж̇жхааяаа на сийлаванд̇о хонд̇и, анд̇зваасигасад̣̇д̇хивихааригаа сийлаванд̇о, д̇з ад̇д̇ано аажарияубаж̇жхааязби на убасан̇гаманд̇и, ад̇д̇ано сад̣̇исз сааруббз бхигкууязва убасан̇гаманд̇и. сажзби аажарияубаж̇жхааяаа сааруббаа бхигкуу, ид̇арз асааруббаа, д̇зби на аажарияубаж̇жхааяз убасан̇гаманд̇и, ад̇д̇ано сад̣̇исз хийнаад̇химуд̇д̇игзязва убасан̇гаманд̇и. звам̣ убасан̇гаманам̣ бана на гзвалам̣ зд̇арахиязва, ад̇ийд̇аанааг̇ад̇збийд̇и д̣̇ассзд̇ум̣ ад̇ийд̇амби ад̣̇д̇хаананд̇иаад̣̇имааха. д̇ад̇т̇а ад̇ийд̇амби ад̣̇д̇хаананд̇и ад̇ийд̇асмим̣ гаалз, ажжанд̇асам̣яог̇ад̇т̇з ваа убаяог̇аважанам̣. сзсам̣ уд̇д̇аанад̇т̇амзва. ид̣̇ам̣ бана д̣̇уссийлаанам̣ д̣̇уссийласзванамзва, сийлаванд̇аанам̣ сийлаванд̇асзванамзва, д̣̇уббан̃н̃аанам̣ д̣̇уббан̃н̃асзванамзва, бан̃н̃аванд̇аанам̣ бан̃н̃аванд̇асзванамзва го нияамзд̇ийд̇и? аж̇жхаасаяад̇хаад̇у нияамзд̇ийд̇и.
115. Adhimuttiniddese santīti saṃvijjanti. Hīnādhimuttikāti lāmakajjhāsayā. Paṇītādhimuttikāti kalyāṇajjhāsayā. Sevantīti nissayanti allīyanti. Bhajantīti upasaṅkamanti. Payirupāsantīti punappunaṃ upasaṅkamanti. Sace hi ācariyupajjhāyā na sīlavanto honti, antevāsikasaddhivihārikā sīlavanto, te attano ācariyupajjhāyepi na upasaṅkamanti, attano sadise sāruppe bhikkhūyeva upasaṅkamanti. Sacepi ācariyupajjhāyā sāruppā bhikkhū, itare asāruppā, tepi na ācariyupajjhāye upasaṅkamanti, attano sadise hīnādhimuttikeyeva upasaṅkamanti. Evaṃ upasaṅkamanaṃ pana na kevalaṃ etarahiyeva, atītānāgatepīti dassetuṃ atītampi addhānantiādimāha. Tattha atītampi addhānanti atītasmiṃ kāle, accantasaṃyogatthe vā upayogavacanaṃ. Sesaṃ uttānatthameva. Idaṃ pana dussīlānaṃ dussīlasevanameva, sīlavantānaṃ sīlavantasevanameva, duppaññānaṃ duppaññasevanameva, paññavantānaṃ paññavantasevanameva ko niyametīti? Ajjhāsayadhātu niyametīti.
бхаб̣б̣аабхаб̣б̣анид̣̇д̣̇зсз чад̣д̣зд̇аб̣б̣з батамам̣ нид̣̇д̣̇исид̇ваа г̇ахзд̇аб̣б̣з бажчаа нид̣̇д̣̇исид̇ум̣ уд̣̇д̣̇зсасса уббадибаадияаа батамам̣ абхаб̣б̣аа нид̣̇д̣̇идтаа. уд̣̇д̣̇зсз бана д̣̇ванд̣̇асамаасз ажжид̇асса жа манд̣̇агкарасса жа бад̣̇асса буб̣б̣анибаад̇алагкан̣авасзна бхаб̣б̣асад̣̇д̣̇о буб̣б̣ам̣ баяуд̇д̇о. гаммааваран̣знаад̇и бан̃жавид̇хзна аананд̇арияагаммзна. саманнааг̇ад̇аад̇и саман̇г̇ийбхууд̇аа. гилзсааваран̣знаад̇и нияад̇амижчаад̣̇идтияаа. имаани д̣̇вз саг̇г̇амаг̇г̇аанам̣ ааваран̣ад̇о ааваран̣аани. бхигкунийд̣̇уусагаад̣̇ийни гаммааниби гаммааваран̣знзва сан̇г̇ахид̇аани. вибаагааваран̣знаад̇и ахзд̇угабадисанд̇хияаа. яасмаа бана д̣̇ухзд̇угаанамби арияамаг̇г̇абадивзд̇хо над̇т̇и, д̇асмаа д̣̇ухзд̇угаа бадисанд̇хиби вибаагааваран̣амзваад̇и взд̣̇ид̇аб̣б̣аа, ассад̣̇д̇хаад̇и б̣уд̣̇д̇хаад̣̇ийсу сад̣̇д̇хаарахид̇аа. ажчанд̣̇игаад̇и гад̇д̇угамяад̇аагусалажчанд̣̇арахид̇аа. уд̇д̇арагуругаа мануссаа ажчанд̣̇игадтаанам̣ бавидтаа. д̣̇уббан̃н̃аад̇и бхаван̇г̇абан̃н̃ааяа барихийнаа. бхаван̇г̇абан̃н̃ааяа бана барибун̣н̣ааяаби яасса бхаван̇г̇ам̣ логуд̇д̇арасса баад̣̇агам̣ на ход̇и, соби д̣̇уббан̃н̃оязва наама. абхаб̣б̣аа нияаамам̣ оггамид̇ум̣ гусалзсу д̇хаммзсу саммад̇д̇анд̇и гусалзсу д̇хаммзсу саммад̇д̇анияаамасан̇каад̇ам̣ арияамаг̇г̇ам̣ оггамид̇ум̣ абхаб̣б̣аа. арияамаг̇г̇о хи саммаа сабхаавод̇и саммад̇д̇ам̣, соязва ананд̇арапалад̣̇аанз, саяамзва ваа ажалабхаавад̇о нияаамо, д̇ам̣ оггамид̇ум̣ бависид̇ум̣ абхаб̣б̣аа. на гаммааваран̣знаад̇иаад̣̇ийни вуд̇д̇авибарияааязнзва взд̣̇ид̇аб̣б̣аанийд̇и.
Bhabbābhabbaniddese chaḍḍetabbe paṭhamaṃ niddisitvā gahetabbe pacchā niddisituṃ uddesassa uppaṭipāṭiyā paṭhamaṃ abhabbā niddiṭṭhā. Uddese pana dvandasamāse accitassa ca mandakkharassa ca padassa pubbanipātalakkhaṇavasena bhabbasaddo pubbaṃ payutto. Kammāvaraṇenāti pañcavidhena ānantariyakammena. Samannāgatāti samaṅgībhūtā. Kilesāvaraṇenāti niyatamicchādiṭṭhiyā. Imāni dve saggamaggānaṃ āvaraṇato āvaraṇāni. Bhikkhunīdūsakādīni kammānipi kammāvaraṇeneva saṅgahitāni. Vipākāvaraṇenāti ahetukapaṭisandhiyā. Yasmā pana duhetukānampi ariyamaggapaṭivedho natthi, tasmā duhetukā paṭisandhipi vipākāvaraṇamevāti veditabbā, assaddhāti buddhādīsu saddhārahitā. Acchandikāti kattukamyatākusalacchandarahitā. Uttarakurukā manussā acchandikaṭṭhānaṃ paviṭṭhā. Duppaññāti bhavaṅgapaññāya parihīnā. Bhavaṅgapaññāya pana paripuṇṇāyapi yassa bhavaṅgaṃ lokuttarassa pādakaṃ na hoti, sopi duppaññoyeva nāma. Abhabbā niyāmaṃ okkamituṃ kusalesu dhammesu sammattanti kusalesu dhammesu sammattaniyāmasaṅkhātaṃ ariyamaggaṃ okkamituṃ abhabbā. Ariyamaggo hi sammā sabhāvoti sammattaṃ, soyeva anantaraphaladāne, sayameva vā acalabhāvato niyāmo, taṃ okkamituṃ pavisituṃ abhabbā. Na kammāvaraṇenātiādīni vuttavipariyāyeneva veditabbānīti.
аасаяаанусаяан̃аан̣анид̣̇д̣̇зсаван̣н̣анаа нидтид̇аа.
Āsayānusayañāṇaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 69. аасаяаанусаяан̃аан̣анид̣̇д̣̇зсо • 69. Āsayānusayañāṇaniddeso
