| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৬৯. আসযানুসযঞাণনিদ্দেসো
69. Āsayānusayañāṇaniddeso
১১৩. কতমং তথাগতস্স সত্তানং আসযানুসযে ঞাণং? ইধ তথাগতো সত্তানং আসযং জানাতি, অনুসযং জানাতি, চরিতং জানাতি , অধিমুত্তিং জানাতি, ভব্বাভব্বে সত্তে পজানাতি। কতমো 1 সত্তানং আসযো? ‘‘সস্সতো লোকো’’তি ৰা, ‘‘অসস্সতো লোকো’’তি ৰা, ‘‘অন্তৰা লোকো’’তি ৰা, ‘‘অনন্তৰা লোকো’’তি ৰা, ‘‘তং জীৰং তং সরীর’’ন্তি ৰা, ‘‘অঞ্ঞং জীৰং অঞ্ঞং সরীর’’ন্তি ৰা, ‘‘হোতি তথাগতো পরং মরণা’’তি ৰা, ‘‘ন হোতি তথাগতো পরং মরণা’’তি ৰা, ‘‘হোতি চ ন চ হোতি তথাগতো পরং মরণা’’তি ৰা, ‘‘নেৰ হোতি ন ন হোতি তথাগতো পরং মরণা’’তি ৰা। ইতি ভৰদিট্ঠিসন্নিস্সিতা ৰা সত্তা হোন্তি ৰিভৰদিট্ঠিসন্নিস্সিতা ৰা।
113. Katamaṃ tathāgatassa sattānaṃ āsayānusaye ñāṇaṃ? Idha tathāgato sattānaṃ āsayaṃ jānāti, anusayaṃ jānāti, caritaṃ jānāti , adhimuttiṃ jānāti, bhabbābhabbe satte pajānāti. Katamo 2 sattānaṃ āsayo? ‘‘Sassato loko’’ti vā, ‘‘asassato loko’’ti vā, ‘‘antavā loko’’ti vā, ‘‘anantavā loko’’ti vā, ‘‘taṃ jīvaṃ taṃ sarīra’’nti vā, ‘‘aññaṃ jīvaṃ aññaṃ sarīra’’nti vā, ‘‘hoti tathāgato paraṃ maraṇā’’ti vā, ‘‘na hoti tathāgato paraṃ maraṇā’’ti vā, ‘‘hoti ca na ca hoti tathāgato paraṃ maraṇā’’ti vā, ‘‘neva hoti na na hoti tathāgato paraṃ maraṇā’’ti vā. Iti bhavadiṭṭhisannissitā vā sattā honti vibhavadiṭṭhisannissitā vā.
এতে ৰা পন উভো অন্তে অনুপগম্ম ইদপ্পচ্চযতাপটিচ্চসমুপ্পন্নেসু ধম্মেসু অনুলোমিকা খন্তি পটিলদ্ধা হোতি, যথাভূতং ৰা ঞাণং। কামং সেৰন্তঞ্ঞেৰ জানাতি – ‘‘অযং পুগ্গলো কামগরুকো কামাসযো কামাধিমুত্তো’’তি। কামং সেৰন্তঞ্ঞেৰ জানাতি – ‘‘অযং পুগ্গলো নেক্খম্মগরুকো নেক্খম্মাসযো নেক্খম্মাধিমুত্তো’’তি। নেক্খম্মং সেৰন্তঞ্ঞেৰ জানাতি – ‘‘অযং পুগ্গলো (নেক্খম্মগরুকো নেক্খম্মাসযো নেক্খম্মাধিমুত্তো’’তি। নেক্খম্মং সেৰন্তঞ্ঞেৰ জানাতি – ‘‘অযং পুগ্গলো কামগরুকো কামাসযো কামাধিমুত্তো’’তি। ব্যাপাদং সেৰন্তঞ্ঞেৰ জানাতি) 3 – ‘‘অযং পুগ্গলো ব্যাপাদগরুকো ব্যাপাদাসযো ব্যাপাদাধিমুত্তো’’তি। ব্যাপাদং সেৰন্তঞ্ঞেৰ জানাতি – ‘‘অযং পুগ্গলো (অব্যাপাদগরুকো অব্যাপাদাসযো অব্যাপাদাধিমুত্তো’’তি। অব্যাপাদং সেৰন্তঞ্ঞেৰ জানাতি – ‘‘অযং পুগ্গলো অব্যাপাদগরুকো অব্যাপাদাসযো অব্যাপাদাধিমুত্তো’’তি। অব্যাপাদং সেৰন্তঞ্ঞেৰ জানাতি – ‘‘অযং পুগ্গলো ব্যাপাদগরুকো ব্যাপাদাসযো ব্যাপাদাধিমুত্তো’’তি। থিনমিদ্ধং সেৰন্তঞ্ঞেৰ জানাতি) – ‘‘অযং পুগ্গলো থিনমিদ্ধগরুকো থিনমিদ্ধাসযো থিনমিদ্ধাধিমুত্তো’’তি। থিনমিদ্ধং সেৰন্তঞ্ঞেৰ জানাতি – ‘‘অযং পুগ্গলো আলোকসঞ্ঞাগরুকো আলোকসঞ্ঞাসযো আলোকসঞ্ঞাধিমুত্তো’’তি। আলোকসঞ্ঞং সেৰন্তঞ্ঞেৰ জানাতি – ‘‘অযং পুগ্গলো (আলোকসঞ্ঞাগরুকো আলোকসঞ্ঞাসযো আলোকসঞ্ঞাধিমুত্তো’’তি। আলোকসঞ্ঞং সেৰন্তঞ্ঞেৰ জানাতি – ‘‘অযং পুগ্গলো থিনমিদ্ধগরুকো থিনমিদ্ধাসযো থিনমিদ্ধাধিমুত্তো’’তি।) অযং সত্তানং আসযো।
Ete vā pana ubho ante anupagamma idappaccayatāpaṭiccasamuppannesu dhammesu anulomikā khanti paṭiladdhā hoti, yathābhūtaṃ vā ñāṇaṃ. Kāmaṃ sevantaññeva jānāti – ‘‘ayaṃ puggalo kāmagaruko kāmāsayo kāmādhimutto’’ti. Kāmaṃ sevantaññeva jānāti – ‘‘ayaṃ puggalo nekkhammagaruko nekkhammāsayo nekkhammādhimutto’’ti. Nekkhammaṃ sevantaññeva jānāti – ‘‘ayaṃ puggalo (nekkhammagaruko nekkhammāsayo nekkhammādhimutto’’ti. Nekkhammaṃ sevantaññeva jānāti – ‘‘ayaṃ puggalo kāmagaruko kāmāsayo kāmādhimutto’’ti. Byāpādaṃ sevantaññeva jānāti) 4 – ‘‘ayaṃ puggalo byāpādagaruko byāpādāsayo byāpādādhimutto’’ti. Byāpādaṃ sevantaññeva jānāti – ‘‘ayaṃ puggalo (abyāpādagaruko abyāpādāsayo abyāpādādhimutto’’ti. Abyāpādaṃ sevantaññeva jānāti – ‘‘ayaṃ puggalo abyāpādagaruko abyāpādāsayo abyāpādādhimutto’’ti. Abyāpādaṃ sevantaññeva jānāti – ‘‘ayaṃ puggalo byāpādagaruko byāpādāsayo byāpādādhimutto’’ti. Thinamiddhaṃ sevantaññeva jānāti) – ‘‘ayaṃ puggalo thinamiddhagaruko thinamiddhāsayo thinamiddhādhimutto’’ti. Thinamiddhaṃ sevantaññeva jānāti – ‘‘ayaṃ puggalo ālokasaññāgaruko ālokasaññāsayo ālokasaññādhimutto’’ti. Ālokasaññaṃ sevantaññeva jānāti – ‘‘ayaṃ puggalo (ālokasaññāgaruko ālokasaññāsayo ālokasaññādhimutto’’ti. Ālokasaññaṃ sevantaññeva jānāti – ‘‘ayaṃ puggalo thinamiddhagaruko thinamiddhāsayo thinamiddhādhimutto’’ti.) Ayaṃ sattānaṃ āsayo.
১১৪. কতমো চ সত্তানং অনুসযো? সত্তানুসযা – কামরাগানুসযো, পটিঘানুসযো, মানানুসযো, দিট্ঠানুসযো, ৰিচিকিচ্ছানুসযো, ভৰরাগানুসযো , অৰিজ্জানুসযো। যং লোকে পিযরূপং সাতরূপং, এত্থ সত্তানং কামরাগানুসযো অনুসেতি। যং লোকে অপ্পিযরূপং অসাতরূপং , এত্থ সত্তানং পটিঘানুসযো অনুসেতি। ইতি ইমেসু দ্ৰীসু ধম্মেসু অৰিজ্জা অনুপতিতা, তদেকট্ঠো মানো চ দিট্ঠি চ ৰিচিকিচ্ছা চ দট্ঠব্বা। অযং সত্তানং অনুসযো।
114. Katamo ca sattānaṃ anusayo? Sattānusayā – kāmarāgānusayo, paṭighānusayo, mānānusayo, diṭṭhānusayo, vicikicchānusayo, bhavarāgānusayo , avijjānusayo. Yaṃ loke piyarūpaṃ sātarūpaṃ, ettha sattānaṃ kāmarāgānusayo anuseti. Yaṃ loke appiyarūpaṃ asātarūpaṃ , ettha sattānaṃ paṭighānusayo anuseti. Iti imesu dvīsu dhammesu avijjā anupatitā, tadekaṭṭho māno ca diṭṭhi ca vicikicchā ca daṭṭhabbā. Ayaṃ sattānaṃ anusayo.
কতমঞ্চ সত্তানং চরিতং? পুঞ্ঞাভিসঙ্খারো অপুঞ্ঞাভিসঙ্খারো আনেঞ্জাভিসঙ্খারো পরিত্তভূমকো ৰা মহাভূমকো ৰা। ইদং সত্তানং চরিতং।
Katamañca sattānaṃ caritaṃ? Puññābhisaṅkhāro apuññābhisaṅkhāro āneñjābhisaṅkhāro parittabhūmako vā mahābhūmako vā. Idaṃ sattānaṃ caritaṃ.
১১৫. কতমা চ সত্তানং অধিমুত্তি? সন্তি সত্তা হীনাধিমুত্তিকা, সন্তি সত্তা পণীতাধিমুত্তিকা। হীনাধিমুত্তিকা সত্তা হীনাধিমুত্তিকে সত্তে সেৰন্তি ভজন্তি পযিরুপাসন্তি। পণীতাধিমুত্তিকা সত্তা পণীতাধিমুত্তিকে সত্তে সেৰন্তি ভজন্তি পযিরুপাসন্তি। অতীতম্পি অদ্ধানং হীনাধিমুত্তিকা সত্তা হীনাধিমুত্তিকে সত্তে সেৰিংসু ভজিংসু পযিরুপাসিংসু; পণীতাধিমুত্তিকা সত্তা পণীতাধিমুত্তিকে সত্তে সেৰিংসু ভজিংসু পযিরুপাসিংসু। অনাগতম্পি অদ্ধানং হীনাধিমুত্তিকা সত্তা হীনাধিমুত্তিকে সত্তে সেৰিস্সন্তি ভজিস্সন্তি পযিরুপাসিস্সন্তি; পণীতাধিমুত্তিকা সত্তা পণীতাধিমুত্তিকে সত্তে সেৰিস্সন্তি ভজিস্সন্তি পযিরুপাসিস্সন্তি। অযং সত্তানং অধিমুত্তি।
115. Katamā ca sattānaṃ adhimutti? Santi sattā hīnādhimuttikā, santi sattā paṇītādhimuttikā. Hīnādhimuttikā sattā hīnādhimuttike satte sevanti bhajanti payirupāsanti. Paṇītādhimuttikā sattā paṇītādhimuttike satte sevanti bhajanti payirupāsanti. Atītampi addhānaṃ hīnādhimuttikā sattā hīnādhimuttike satte seviṃsu bhajiṃsu payirupāsiṃsu; paṇītādhimuttikā sattā paṇītādhimuttike satte seviṃsu bhajiṃsu payirupāsiṃsu. Anāgatampi addhānaṃ hīnādhimuttikā sattā hīnādhimuttike satte sevissanti bhajissanti payirupāsissanti; paṇītādhimuttikā sattā paṇītādhimuttike satte sevissanti bhajissanti payirupāsissanti. Ayaṃ sattānaṃ adhimutti.
কতমে সত্তা অভব্বা? যে তে সত্তা কম্মাৰরণেন সমন্নাগতা, কিলেসাৰরণেন সমন্নাগতা, ৰিপাকাৰরণেন সমন্নাগতা , অস্সদ্ধা অচ্ছন্দিকা দুপ্পঞ্ঞা, অভব্বা নিযামং ওক্কমিতুং কুসলেসু ধম্মেসু সম্মত্তং – ইমে তে সত্তা অভব্বা।
Katame sattā abhabbā? Ye te sattā kammāvaraṇena samannāgatā, kilesāvaraṇena samannāgatā, vipākāvaraṇena samannāgatā , assaddhā acchandikā duppaññā, abhabbā niyāmaṃ okkamituṃ kusalesu dhammesu sammattaṃ – ime te sattā abhabbā.
কতমে সত্তা ভব্বা? যে তে সত্তা ন কম্মাৰরণেন সমন্নাগতা, ন কিলেসাৰরণেন সমন্নাগতা, ন ৰিপাকাৰরণেন সমন্নাগতা, সদ্ধা ছন্দিকা পঞ্ঞৰন্তো, ভব্বা নিযামং ওক্কমিতুং কুসলেসু ধম্মেসু সম্মত্তং – ইমে তে সত্তা ভব্বা। ইদং তথাগতস্স সত্তানং আসযানুসযে ঞাণং।
Katame sattā bhabbā? Ye te sattā na kammāvaraṇena samannāgatā, na kilesāvaraṇena samannāgatā, na vipākāvaraṇena samannāgatā, saddhā chandikā paññavanto, bhabbā niyāmaṃ okkamituṃ kusalesu dhammesu sammattaṃ – ime te sattā bhabbā. Idaṃ tathāgatassa sattānaṃ āsayānusaye ñāṇaṃ.
আসযানুসযঞাণনিদ্দেসো নৰসট্ঠিমো।
Āsayānusayañāṇaniddeso navasaṭṭhimo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৬৯. আসযানুসযঞাণনিদ্দেসৰণ্ণনা • 69. Āsayānusayañāṇaniddesavaṇṇanā
